Thingphung kiphuh jing jeh a Nongmaiching reserved forest mangthah dinga um; Forest...

Thingphung kiphuh jing jeh a Nongmaiching reserved forest mangthah dinga um; Forest department in JFMC fund hop 50 kah

68
0
SHARE

Thingphung kiphuh jing jeh a Nongmaiching reserved forest mangthah dinga um; Forest department in JFMC fund hop 50 kah

Imphal, Feb 5(UNA): Nongmaiching Reserved Forest noiya um Angoulok leh Shagollok gammang a mi phabep in dan phalna beiya thingphung aphuh a hiche mun a kitu thingphung ho achom jeh uvin amangthah dinga aumin ahi.

Manipur Forest Rules, 1971 noiya Reserved forest area noiya um thingphung ho kiphuh hi gotna pehthei ahi’in, koi tobang dan palkeh aumle lhagup chan jail a umthei ahilouleh dangka 500 leu ding, ahiloule gotna ani a kipe ding, hiche chunga court thulhuhna banga compensation jong umding ahi.

Reserved forest area a thingphung phuh hi dan phallou ahi ti hena sa sa a Forest department official hon hiche hi avettup joulou ahi. Ahivanga Forest department a um hon song, nel leh leiset po a gari ho a kon royalty tax (kai) kilahna a kisalel u ahi. Thuso mi (The Morning Bell) in tu naicha Angoulok leh Shagollok Forest area (Nongmaiching reserved forest noi) a survey abol nauva dan dihlouva thingphung kiphuh jing thu ahetdoh ahi.

Achesa 1990 kum a Angoulok, Sagollok leh Awangching a state forest government in atu thingphung (adeh a pine tree) phabep hi dan palkeh a mi phabep in aphuh kihedoh ahi. Keirao Bitra khosung mikhat in asei dungjuiya kum som masanga Keira bitra, Langdum leh akinaipi kho hohin reserved forest a thingphung hi ti ding thing lahna a aneiyu ahi.

LPG gas connection man beiya akipeh pan jouva lhomcha tilou adang hohin reserved forest a thingphung umho kingapna a anei tahlou ahi. Ahivanga Laipharok Maring kiti khosung phabep hin Uchan (Pine) chips lahna a aneijing nahlaiyu ahi. Hiche hin gammang sangtah a asuhset ahi. Thingphung a kon alah uva asem u thil hohi kailhang a ajoh u ahi. Uchan Chips hi Meilhei hon Ipan Thaba, Sharda leh hou toh kisai kin dang dang a aman jing ahi.

Jan teng thing phuh a che a khosung mi phabep um ahi’in, forest department leh Joint Forest Management Committee (JFMC) in thil umchan amoh vet tho ahi, tin khosung mihon asei uvin ahi. Reserved area a forest guard hon patrol abol lou, ahivanga Imphal-Yairipok lamlen a lhai forest thil kipohna gari ho a kon kai akilah u ahi, ati.

Joint Forest Management Committee, Keirao Bitra member khat in asei dungjuiya, phat masa a chu JFMC leh Forest official hon thingphung kiphuh chule gam mei kihal venna dinga patrol abol ahi’in, ahivanga achesa kum khat leh ni sunga kibol talou ahi. Meikahna thilsoh kiti ho forest department leh JFMC in gangtah a avetsui ahi’in, achesa kum phabep sunga reserved forest area hi eng cheh cheh ahitai, ati.

JFMC hi local representative leh forest official ho kiloikhomna ahi’in, Green India Mission noiya gammang huhna dinga kisemdoh ahi. JFMC kithahat sah hi gammang huhna dinga manchah phatah hiding ahi, tin aseibe in ahi. Mi lhomcha tailou official atamjo hi gammang huhna dinga kitahna anei louvu ahi.

Hetthei khat chu Indian State Forest Report 2019 in tu naicha Manipur gam panna a North East gam a lungnat umtah lim ho ana tahlang u ahi. Manipur gam a gammang 499 sq km amang’in, gammang kimansah asan napen ahi, tia report in aseiya, Manipur gam ban a Arunachal Pradesh gam hi a, 297 sq km gammang amansah ahi, kiti ahi.

Ahivanga Forest Minister Th Shyamkumar in kani lei lentah a akibol, anhon nadinga thingphung kiphuh, he na sa sa a gam mei kihal, phailei bolna dinga mei kihal, forest gam khantou machalna ding tohgon bolna a kimangcha, dan dihlouva gam kineh/kilah ho jeh a forest cover nemsuh ahi, tia asei ahi.

 

11th Manipur Legislative Assembly Budget session Feb 14 teng kipan ding, toukhomna 11 vei bou umding

Imphal, Feb 5(ET): 11th Manipur Legislative Assembly budget session hi February nisim 14 nikho a kon nisim 28 chan umding ahi’in, ni 15 chelha ding session a toukhomna 11 vei umding chule akahlah ni li sunga ‘toukhomna’ (sitting) umlou ding ahi.

Speaker Y Khemchand lamkaina a Wednesday nikho a BAC meeting abol nauva toukhomna ding phat seilhahna aneiyu ahi. Tohgon kisem dungjuiya session kipat ni sun nidan 11 teng Governor in House a Address apeh ding, aban a Motion of thanks, obituary reference, BAC Report 2020 pehna leh adang dang umding ahi. Sorkar in Supplementary Demands for Grants 2019-20, Budget Estimate 2020-21 hi toukhomna kipat niteng apeh ding ahi.

Saturday leh Sunday nikho a toukhomna anei loudiu ahi. February 17 teng ‘question hour, Genera discussion (Supplementary demands for rants, 2019-20), Supplementary Grants 2019-20 thu a discussion leh voting, Budget Estimate 2020-21 thu a General discussion, Manipur Appropriation no 1 bill 2020 pohdohna, Governor’s Address thu a kihoukhomna aneidiu ahi.

February 18 teng Question hour, committee report pehna, State Legislature, Council of ministers, Secretariat, Transport, MAHUD leh Relief & Disaster Management thu a kihoukhomna leh voting, government bill aumleh apohdoh nading, Manipur Appropriation no 1 bill 2020 gelkhom a phatsahna phat umding ahi.

February 19 teng question hour, PWD, Co-operation, Administration of Justice, Social Welfare Department, Science and Technology chule Economics and statistics thu a Demands for grants 2020-21 seikhomna leh voting umding ahi.

February 20 teng ‘question hour, Labour and Employment, Tribal Affairs and Hill development department, Forest and Environment, Power, Arts and Culture chule Information Technology a Demands for grants 2020-21 thu a kihoukhomna leh voting umding ahi.

February 21 teng question hour, CAF & PD department, Animal Husbandry and Veterinary (Diary farm panna), Community and Rural Development, PHED, Planning, MOBC thu a Demands for grants 2020-21 chule private member resolution aumleh hiche ho thu aseidiu ahi.

February 24 teng question hour, Police, Agriculture, Vigilance & Anti-corruption cell, Fire Protection and Control, Jail, Home Guard, Fisheries a Demands for grants 2020-21 thu seikhomna leh voting umding ahi. February 25 nikho teng question hour, committee report pehna, Land Revenue, Finance, YAS, State Excise, Sales tax, tax dang dang, State Academy of Training a Demands for Grants 2020-21 seikhomna leh voting umding ahi.

February 26 teng question hour, Information and Publicity, Medical Health and Family Welfare, Commerce and Industries, Rehabilitation, Printing and Stationary leh Panchayat a Demands for grants 2020-21 thu a kihoukhomna leh voting umding ahi.

February 27 teng question hour, Education, Election, Minor Irrigation, Sericulture, Water Resources, Horticulture and Soil Conservation, Tourism thu a Demands for grants 2020-21 kihoukhomna leh voting chule Manipur Appropriation no 2 bill 2020 pohdohna umding ahi.

Chule February nisim 28 teng question hour ban a Manipur Appropriation no 2 bill 2020/government bill, private member resolution (aumle) gelkhomna chule phatsahna umding ahi.

Imphal East district in e-Governance 2019-20 National award sang ding

Imphal, Feb 15(ET): Maharashtra gamsung Mumbai khopi a February nisim 7 leh 8 nikho a umding 23rd National Conference on e-Governance kin gon a Imphal East Deputy Commissioner Dr Rangitabali Waikhom in ‘Loucha Pathap’ – Online Land Record Computerization and National General Document Registration System (NGDRS) project a award asan ding ahi’in, Imphal East District Administration dinga national award amu kit na ahi.

Project hin ‘Category III- Excellence in District level initiative in e-Governance (i) North-East States + Hilly States (ii) UTs (including Delhi) (iii) Other States” a Silver National Award amu ahi’in, Silver Award a hi certificate, citation chule dangka lakh khat pang ahi. “NGDRS-National Generic Document Registration System” project hi Sub Registrar office, Porompat a kichepi pan ahi.

NGDRS hi online a document leh property registration kibolna ahi’in, NGDRS mangcha a mipin ‘online land evaluation’ abol thei ahi. Chule nei le gou chule document registration hi NGDRS a kon online a apply kibol thei ahi. Hetthei khat chu online land record computerization- Loucha Pathap project noiya Imphal East district a Digitisation hi kho 157 a kijou ahi.

Tua hi Land Record dat ho online a aphat tin a kive thei, revenue tax avat hojong kive thei ahi. Data hi Android mobile App ‘Louch Pathap’ kiti Google Play Store a um app a kon a jong vetthei ahi. Transaction ho digital a kibol a chule transaction leh tax collection detail hojong update kibol ahi. Gamsung mi, sorkar chule organization chom chom in hiche project hi aphatchompi ahi.

 

Kawnpui, Churachandpur a ‘Zo Kutpui’ kigong ZoRO Northern Zone in demna thuso nei

Imphal, Feb 5(ET): Kawnpui, Churachandpur in ZoRO Northern Zone ahilouleh ZoRO GHQ kiti Zo (Kuki, Chin leh Mizo) mite kiloikhomna dohna leh hetsahna umlouva February 11-12, 2020 a ‘Zo Kutpui’ agon hi ZoRO Northern Zone in doudal thei tah a agel ahi, tin ZoRO Northern Zone in thuso anei uvin ahi.

Zo Kutpui hi ZoRO in kum masa January nisim 29 nikho a Vairengte conference abolna a lunggel kisemdoh ahi’in, politics a ama phatchomna ding khohsah a mi phabep ahilouleh organization hon Zo mite phatchomna ding hilouva agon theilou ding ahi.

ZoRO Northern Zone in Zo mite (Kuki-Chin-Mizo) kipunkhom nadinga kisemdoh bidoi hi adinpi ding chule khat phatchomna a manding hilouva Burma, Bangladesh leh India gam a cheng Zo mite ho choisang nading bou ahi, tihi adinpi ding ahi, tin Information and Publicity Wing, ZoRO Northern Wing in thuso aneiyin ahi.

Kuki, Chin leh Mizo tilouva Karbi leh Singpho miho jong ZoRO a apan uhi kipana sangtah pum a tuni a kaphondoh u ahi. Kuki, Chin, Mizo, Karbi leh Singpho umna Zo insung lentah ihiu hi kithang at pi umtah ahi. Churachandpur a mi phabep in Mizo asan a Kuki douna a tohgon anei u ahi’in, ama phatchomna ding bou khohsahna a Zo thucheng asuhneo lou diu chule amanchah loudiu ahi, ati.

United Nations Permanent Forum of Indigenous Issues, New York, USA in ZoRO hetpehna anei ahi’in, status hi mijousen jana leh tosotna apeh dinga lom ahi. Hiche jeh a February nisim 3 nikho a ‘emergency meeting’ a ZoRO NZ in in ZORO GHQ leh ZoRO Northern Zone dohna umlouva Kawnpui, Churachandpur a Zo Kutpui kigong hi dem dinga kilolna anei ahi, tin thuso chun aseibe in ahi.

MCPCR Chairperson kilhen douna a petition kipe High Court in san pehlou

Imphal, Feb 5(ET): Manipur High Court in Chairperson, Manipur Commission for Protection of Child Right (MCPCR) ‘appointment order’ kipeh douna a writ petition kipe asan peh tapouvin, ahivanga Social Welfare Department, Manipur government in dan dungjuiya Chairperson athah kilah nadinga process apat diuvin thuhilna aneiyin ahi.

Deputy Secretary (SW), Manipur government in nisim 29-09-2017 ni a MCPCR Chairperson dinga Sumatibala Ningthoujam kilhen na order asodoh ahi. Petition pe a Sanoujam Shyamcharan Singh in athu hi mipi hettheiya kibol lou chule post a dinga advertisement jong media khatcha a akipe poi, tia chouna anei ahi.

Justice Kh Nobin Singh lamkaina court in thutanna anei na’a, MCPCR Chairperson a Sumatibala Ningthoujam kilhenna dinga government order kisodoh chouna neiya Sanoujam Shyamcharan Singh hi post a dinga apply bol a candidate ahi, ati. Principal Secretary/Commissioner, Social Welfare Department counsel in affidavit apeh thu a Justice Kh Nobin Singh in petitioner in thutah aselguh e, tia asei ahi.

“Petitioner in State Commission Chairperson post a dinga application apehlut vanga athu aselguh ahi’in, hiche jeh a writ petition hi suhmang ding dol ahi”, tin judge in aseiyin ahi. Child Rights Act, 2005 a thaneina kipehna a state sorkar in ‘The Manipur Commission for Protection of Child Rights Rules, 2011’ kiti dan asem ahi’in, akisei dan a hi Chairperson ahilouleh member ho kilhenna dinga state sorkar in application peh nadinga advertisement (publicity) apeh ding ahi akitina aumpoi.

Sumatibala Ningthoujam in MCPCR Chairperson panmun hi term kichai kum 3 sung atuhjom ding, akalval atuh lou dinga court in thutanna aneina a aseiyin chule Chairperson thah kilahna dinga lha gup sunga sorkar in process apat dinga aseiyin, selection process hi dan dungjuiya mipi het a abol diuvin jong aseibe in ahi.

Hetthei khat chu February 2014 a Supreme Court in NCPCR guideline kitup tah a akijui loujeh a member kilhen ding ‘stay’ anabol ahi. Justice TS Thakur lamkaina Supreme Court bench in NCPCR member kilahna dinga sorkar in notification asodoh ding aphal pehlou ahi. Mipi sum kipe a member athah kilhen nadinga dan (guidelines) aumpoi, tia asei ahi.

 

DHS leh NHM Churachandpur in Novel Corona Virus Epidemic toh kisai’a mipi hetding’a thuso nei

B.Lalboi Gangte

Ccpur, Feb 5 (ET) : District Health Society (DHS), National Health Mission (NHM) Churachandpur tohgon nanoi in tunin Medical Superintendent Office Chamber, District Hospital mun’a Novel Corona Virus Epidemic toh kisai in thuso miho heng’a briefing anabol in ahi. Kingon achun Dr. Lalzuitluangi Hauzel @ Dr. Zuii, Medical Superintendent, District Hospital in Corona Virus hung kipat dan toh kisai tahlang na anei in, Dr. Lalbiakdiki @ Dr. Diki, Medicine in Corona Virus veiho kihetdoh dan alhangpi atahlang in, Dr. Nirmala, Microbiologist in Virus toh kisai’a screening nei dan leh virus apat kiven thei ding dan atahlang in chuleh Dr. Ngahneikim Haokip, IDSP in Corona Virus leh swine flue toh kisai tahlang na anei in ahi.

Dr. Zuii in houlim na aneina’a Corona Virus toh kisai’a State apil vang in Director ho heng’a thu tamtah doh na jong anei uvin ajeh chu thupeh hi Director akon ahi jeh’a District Hospital in jong hitobang natna vei hi ding’a ginmo leh hetdoh’a um ho vetkol na ding in Isolation Ward khat akibol doh tan ahi. Hiche vekol ding’a Medical Officer jong kikoi ding chuleh hiche mun apat positive case mudoh aum leh apoimo dungjui’a RIMS ahilou leh JNIMS ho’a refer bol ding’a thupeh jong ahung kinei in ahi ati. Dr. Nirmala in aseina’a Corona Virus kiti hi buhse vei tobang ahi jeh hin buhse vei hon jong agan nathei pen’a akivetsah ding’u poimo ahi. Chuleh nap thihna (handkerchief) ho hoitah’a koitup ding hiche ho akon kilahson louna ding’a kiven na hoipen ahi. Dr. Ngahneikim in aseina’a achesa Dec. nisim 31,2019 kum achun China gam’a Corona Virus vei mudoh in anaum in chuleh hiche natna hi gamsung pumpi alhunsoh tah jeh in mi 425 vel in hiche  natna jeh in thina atoh tan ahi. India ah conferred case 3 aum in amaho chu Kerela ngam mi ngen ahi. IDSP Churachandpur in jong hiche natna vei hi ding’a ginmo mi 2 test akibol in chuleh Manipur pumpi’a mi 149 screening jong akinei tan ahi. Hiche test kibol hi thupeh kimu dungjui’a kholjin mi, travel history neiho alhangpi in test akibol in ahi. CCpur District sung’a screening kibol ho chu Tuibong leh Hmar Veng akon ahin amaho hi America akon hung pot ahi jeh uva screening ana kinei ahi.

Alangkhat’a Dr. Vumchinpau in thuso miho thudoh donbut na aneina’a Corona Virus hi hui akon kila sonthei ahi naban’a kilahson na jong abeilam in ahi. Hospital mun’a hiche tobang natna vei um ding hita leh avekol Doctor leh nurse ho akilah baipen ding’u ahi. Hiche akon kivendoh thei na ding’a khut silthing  jing ding jong hi thil poimo tah khat ahi. Ajeh chu khut hi tichung lah’a ding’a midang toh kikhoi khah napen ahi. Dr. Diki in natna apat kiven na ding’a thil poimo ho aseina’a Hospital mun’a  hi Corona Virus bou hilouva natna tamtah umna mun ahi jeh in apoimo behseh lou hon Hospital ahung phah tamlou ding uhi kivenna hoi pen ahi. Corona Virus hung kipatna China gam’a tuni chan in mi 490 in thina atoh tan ahi. Feb. nisim 4 chan chun mi 65 in thina anatoh in case thah 3,887 anamudoh be uvin ahi. Chuleh tuni chan in natna vei mi 24,324 amudoh uvin hiche natna jendam na ding lou um lou lai hijong leh buhse lou ding’a kimang  Arbidol leh HIV vetkolna Darunavir mangcha’a natna veiho vetkol’a um ahi. 2019 Novel Coronavirus (2019-nCoV) natna kilason theina apat kivenna ding in Directorate of Health Services leh IDSP, National Health Mission, Manipur in jui ding leh juilou ding toh kisai in mipi hetding Coronavirus hi khosih, khut, naptui kai, lol thah leh hai-khoplou aum leh agannathei pen’a Hospital ajoh cheh ding uvin mipite temna jong aneiyin ahi.

 

Manipur gamsung a tukum a ding a masapen Swine flu natna vei ucha numei ni kihedoh

Imphal, Feb 5(ET): Additional Director of public health Dr. L Arke Singh in thuso miho heng a asein achun RIMS hospital leh JNIMS hospital akon sample thum cheh January 31 leh Feb 4, 2020 kikah achun akila in National Institute of Virology (NIV) Pune a kholchilna nei ding in akithot in hiche sample kila ho chu tulai a natna minthang Coronavirus anei uham ti kholchilna ding a kithot ahi in Feb 4 ni chun report thum ahung lhung in hiche ahun Imphal east district hopsung a um ucha ni chu manipur gamsung a tukum a ding a masapen vohcha nat (Swine flu) vei ahi dan report achun amuthein chule Corona virues netnei vang aum pouve ati.

Numei khatnu chu Jan 14 ni chun China akon hung kinungle ahi in hiche phat chun Imphal International airport ah coronavirus nat neileh neilou ho hetna  screening kibl nailou ahi in chule khat nu akon asopinu chun akilahson ahi in chomkhat jou chun China akon hung kinungle nu chun aluchang natval jeh chule hai hahsa asah jeh chun RIMS ah akivetsah in ahi. Tuhin ani lhon in a inmun uva akivekol uvin H1N1 natna leh Coronavirus natvei ho umdan hi akibang thim in hinlah H1N1 natvei ho chu kichat ding aum beh poi tin Arke Singh chun asei in ahi.

Coronavirus nei leh neilou hetna ding a sample kithot doh ho mi gup lah ahin mi li ho chu China akon hung kinungle ahiu vin khat chu Hongkong apat ahi. Hiche nat ahung kihetdoh apat chun China gamsung aum adeh a medical simlai mi 60 ho Imphal ahung lhung tauvin hiche natna hi akhoh cheh cheh dingle adang jong hung lutbe jing nalai ding in thulhut chun asei in ahi.

KSO  le KCA in Army ho kibulu demna nei

Chandel, Feb 5(ET): Kuki Students’ Organisation (KSO) le Kuki Chief Association (KCA)Khengjoi in achesa February nisim 3 nikho a 28 Rajput ho Phaisanjang, Khengjoi sub-division, Chandel District a ana kibulu na chunga demna sangtah ahin nei uvin ahi. KSO & KCA akon thuso kimu dungjui in galguh bol ho in hiche bulu na chu chapang jaona a milham ho in post a check up ding a ahung pet u ahi ati. Hiche thilsoh chu post commander pa in BADP scheme chung a hou limna anei pat ahi akiti. Thilsoh demna ahin nei utoh lhon in hitabang na toh na nei kiloikhomna na ho in akin thei pen a suhtheng na le kiphonna ahin nei ding uvin hetsah na ahin nei uvin ahi.

NSCN-IM leh NNPG delegates ho kimuto ding

Dimapur, Feb 5: Official peace talk akichai akon amasapen ding in Feb 8 nikho leh Kohima a NSCN-IM leh NNPGs ho kimuto ding uh ahi dan thulhut chun asei in ahi. Hiche kingon chu Fathers House Church leh Nagaland Goan Burah Federation ho kigom a agon uh ahi. Hiche meeting a hi Naga National Political Groups akon mi 14 chule NSCN-IM akon mi 12 in pan alah ding uh ahi in chule CSO phabep in jong pan alah ding uh ahi. Hiche meeting ahin NSCN-IM a general Secretary Th Muivah thakhel a Kraibo Chawang in amakai ding ahi dan jong thulhut chun asei in ahi.

 

Cyclist Philem Rohan February 16 teng Tokyo chan cycle a che ding; International tour abolna masapen hi

Imphal, Feb 5(ET): Manipur cyclist Rohan Philem Singh in mission 7 channa a PwD (persons with disabilities) ho aw jah peh nading a Tokyo Ride Paralympic 2020 Japan a kalsong ding ahi.

Hiche hi Rohan Philem Singh dinga gampam a achene international cycling mission masapen hiding ahi. ‘Inclusion, respect & Dignity’ tosotna dinga Rohan Tokyo chan che ding chule ‘The rights persons with disabilities’ awareness jong abol ding ahi’in, hiche hohi 2020 Summer Paralympics, Tokyo akipat ding toh kisai ahi.

New Delhi a kon Japan chan km 10,000 vel February kal ni channa a ajot ding ahi. CAF & PD Minister Karam Shyam in tahsa damtheina ding, gam le go vetkolna ding chule cycle tol aphatchomna gamsung miho hilna dinga Thursday niseh a office cycle a che ding atup thu aseiyin ahi. Prime Minister Narendra Modi in ‘cyclothron’ launch abol a kon kal khat sunga cycle khatvei vei atoll ahi’in, gamsunga cycle Minister tia kihe ahi.

Old Secretariat office mun a Press Meet abolna a Minister pa in Rohan boldoh ho leh ahangsan na apachatna thu aseiyin chule Japan gam a achena a sum a kithopina peh dinga aseiyin chule cycle journey ahung kile teng amelchih jing ding thilpeh kapeh ding ahi, ati. Hahsatna tamtah kimaitopi a, gamsung minphatna ding hin polut a khangthah ho tilkhou angaiye, tin Karam Shyam in aseiyin chule Rohan in Tokyo tour achena a gam phabep ajot sunga hi salai flag sagi apoh a Manipur gam kihetna asemding hi kithang at pi umtah ahi, ati.

Social media a khangthah ho lhahdah sah louding, athepnau chule abol thei nau ho joh hetthempeh ding ahi. “Themmo kichan to sanga aphatna lang ho vet a society pha semding ahi”, ati. Rohan tobang khangthah hon gamsung kithang at nathei ahin pohdoh jinga ahileh gamsung khangtou ding ahi, ati. Cyclist Rohan Philem leh G Ingobi in athupi chom chom a gamdang dang cycle a ache hetpehna a ani lhon a thilpeh peh dinga Minister Shyam in kitepna aneiyin ahi.

Rohan Philem (25) hi Moirang Philem Leikai, Bishnupur district a cheng ahi’in, apa athi a chule anu leh apa akikhen jouva apupa in ahin vah khang ahi. Tua hi Sharda University, Greater Noida a Master simlai ahi. Hiche masanga Rohan in North East gam chule India gam pumpi hi ‘humanity’ leh ‘environment’ thupi chom chom a cycle a avel ahi.