Thingnoi Vs mipi kibolna hahijo (Kithana umlouva hiti, umleh ipi atitadem)

Thingnoi Vs mipi kibolna hahijo (Kithana umlouva hiti, umleh ipi atitadem)

505
0
SHARE

Thingnoi Vs mipi kibolna hahijo

(Kithana umlouva hiti, umleh ipi atitadem)

                ZRA Faction 2 kah a lamkai kichuna hi phat chomhatpi ahung hitan hinlah akichieh umthei dehlou, khatvei veileh Churachanpur Lamka khopi sung’s veng phabepma kivoh le kigih tona hoa hiti chejing u ahi. Thingnoi group khat chu Faction ahung che teng kikaptona, kitha tona umjia achaina leh Faction khat jojoh chu party min thah khat kisahloji ahi. Hiche hi ZRA sung’a kiboina leh Faction chena’a umlou, anigel lhon’a ZRA dihtah kahi tia kichuna umjing ahi. July 31 (2019) nilhah a Lamka town sung’a ZRA Faction teni kikah a kinah, kivohtona a kon mipi le police ho tamtah chuoh the thua aum uchu thingnoi ho kikah a kiboina jeh a khopi sung’a chamna aumtheilou mutheina khat ahi. Hiche nilhah khojin jou veljepma chu ZRA Calvin H nungjuija kihe hon ZRA Thanglienpau nungjui thingnoi Cadre khat anavoh uva kon Thanglienpau toson hon Calvin H chenna inn bulu agot uva ahal lhah got u anahin Police leh Assam Rifles ho kithoa mipi ana nocheh u ahi. Calvin H nungjui ho hi thingnoi ZRA Cadre tam behlou ahivang’a khopi sung’a Civil mi tamtah in atosot ahijeh a hiche nilhah a Calvin inn maija mipi kitit hojong chu Calvin bulu diloi leh ahuhgo loi um tina ahi. Hiche ni masang nikhat ni ni vel’a chu Assam Rifles hon ZRA lamkai kichu teni – Thanglienpau leh Calvin anakoukhom uva kihouna ananeikhom piu ahi. Ipi chet kihouna ana umham akihepon hinlah ama ama Cadre ho ijat jat ha, hoilailaija um uham, khopi sung’a boina asemlou diu ti ho ahidi ginchat ahi. Ahin hiche meeting kibol jou-jouva boina ahung umpai jeng chu akibolto lhon dia kitilse bang jeng ahi. Hiche nikho masang tah mama a jong chu UPF hon Thanglienpau hi UPF Chairman ahitahlou jeh in UPF Letterhead amanjom tahlou dia hetsahna ananei ahi. Alangkhatna, Thanglienpau lamkaina ZRA/ZRO hon Calvin hi ZRA a kon kinodoh ahitai tia thulhah a akoikitlou u ahi. Khat joh joh min dang khat kisah jeng theileh kichieh di ahin adalha di kisemoto lhon ahi. Ajeh chu govt nin jong tua pat group thah thah SoO a kikhumbe talou di ti khat ahinchepi ahi.

                Churachanpur a New Lamka Area a ZRA Faction kikah a kigih tona, kivoh tona leh kibuloto gotna thilsoh umji hohi thingnoi Cadre ho sehseh panlahna hileh akikapto uva akichieh khat umthei ahin tua hi civil mi tamjo kikumna leh panlahna ahi hi aboinapen ahi. Kithana tahbah bon umloulaija hitia kiboina aumjileh khat tou hung kikaplih/kivolih khaleh alang lang’a mipi hi alomchang’a lentho’a kiboltona umdia kilom jeng ahi. Achesa 2015 kum’a Anti Tribal Bill thua boina umlaija pat Paite sung’a mipi honkhat hon Thanglienpau inn (building) ana hallhah khah u ahijeh a tua jong Thanglienpau Supporter hon lunghanna khat ahinnei uleh Calvin inn hallhah di ahinti diu ahi. Hiche chet hi July 31 nilhah a anasoh ahi. ZRA sung’a kiboina hi Thanglienpau leh Calvin kikah hilouva Zomi Vs Paite kiboina jeh ahidan jong sotna kichieh ahitah jeh a thingnoi kiboina hilou, thingnoi Faction khat leh mipi kiboina joh dan’a aum jeh in chamna umna di hi mipi khut mama a ki-ngam ahi.