Thingnoi party hon KSO amandan KSO in deilou (Sept. 20, 2016)

Thingnoi party hon KSO amandan KSO in deilou (Sept. 20, 2016)

312
0
SHARE

  Chandel district KSO ho thingnoimi (Kuki) hon hunam’in thuso’a thuphon abolsah uve tia KSO-GHQ in alungnopmona thuphon ahinbol hi thal choilou kitiphot mimal hihen kiloikhomna ho hileh hahsatna atojingnau khat ahi. Kipa leh vangphat umtah in hitobang thu ah khohelou thuso (press) ngohna leh thiemmo channa aumpoi. Tua Chandel district a KSO lamkai ho kibolna hi civil society dang injong anatojingsa khat hidi ahi. Athu hi ahileh nikho phabep masang’a thuphon kibolna (press release) khat a chu KSO-Chandel leh TSA-Chandel district in thuso’a thuphon anabolkhom lhonna thu khat jeh ahi. Thuso kibolkhom chu ahileh Chandel district sung’a thingnoi (Kuki) group khat nin civil kiloikhomna holeh mipi ho kom’ah hunam’in sumdonna aneiyun, hiche chung’ah mipi hon phamo asalheh uve ti ahi. Hitobang thuso hi KSO-Chandel in akihephapoi, bul le bal umlou thuso ahi, hunam’a KSO ho thuso/thuphon kibolsah ahi ti’n suhthengna ahinnei pai ngallin ahi. Hiche ‘suhthengna thuphon’ jong hi thingnoimi group dangkhat nin hunam’a abolsah kit mama ahi ti hi KSO-GHQ hilchenna ahi. Thingnoi thingchung hileh akina akituohmo ho kikah-a langnei sihneina beiya thusei natoh boldi hi KSO jong khat ahijeh in kiloikhomna dang honjong jana aneipeh didan ahi. Khat khat nin thuso’a thuphon abolji’a ajing athai mamaleh “hitobang thuso/thuphon hi bul le bal umlou, hetphah ahipoi” tia suhthengna (hilchetna) hung kibolji hi atam’a tam ahitai. Thudih dinpi le chepi thei civil kiloikhomna lamkai umlou jeh ham, umjongleh alonaje (upai) umlou ham, sei hahsa ahi. Mipi kiloikhomna khat lamkai ho hunam’a thil khat akibolsah gotleh “hiche vang hithei ponte/dihthei ponte” tia pan ngamna umlouvin jong akilang’e.

  Kiloikhomna (organization) khat sung jeng’a jong kitomona ho jeh a loi khat nin thuso abolji, loi khat nin jou thu, bul le bal bei, kiloikhomna suhminset nadi ahibouve” ti aumji jeh-a adihmong, atahtah ahimong’e ti theina dia Letter Head a lekha kijih chung’a thuso/thuphon bol ho soikaina (signature) ajaotei ngaidi ti hi govt hetpiehna nuoiya thuso (press/media) bolho chepi khat jong ahi. Soi kikaina thuphon jeng jong adihlou, bul le bal bei tia suhthengna umji nalai ahijeh in koi chu adih hi’a koi chu alhem hitam ti het khen hahsatna umji ahi. Hitobang dinmun ahiteng kiloikhomna hon amaho sung’a kikhuolna neiya kisuhtupdi golouva jotho tia khohelou thuso (media/press) chung’a hahiem go umkitji ahi. Tua KSO ho thiltuo jong hi hitobang chet hidan ahi. Thudih achepi ngampouve tina hilouvin,mipi kiloikhomna lamkai hon henasa’a langnei sihneina abolkhah ulevang thuchuom hintin, thudih leh thilpha achepi laiseuva ima kichalouva aumdiu hi thilkhoh ahitai.