Thingnoi le kho haosa hon tahtah atiuleh himoloudi (Kaani lei bol khadi...

Thingnoi le kho haosa hon tahtah atiuleh himoloudi (Kaani lei bol khadi kiti kit)

1551
0
SHARE

Thingnoi le kho haosa hon tahtah atiuleh himoloudi
(Kaani lei bol khadi kiti kit)
KNO holeh Churachanpur lhang khat le nia haosa hon gamsung’a Kaani lei bol khadia kihoulhahna ahinnei kit uhi  tohsoa hung umdi hinam hinvet kitdi ahitai. Achesa kum ni kum thum masang’a pat khatvei veileh thingnoi hon Kaani lei bol ahinkhaji vang uva angaingaija kibol thou thou, anabol khalou honjong ahinbolbebe hinalai ahi. Tuchung September 5 (2019) ni’a Churachanpur M Songgel khopi’a KNO leh lhang haosa hon hiche thua kilolna khat ahinnei u ajatchombeh phabep aum’in tumasang’a “koiman abolthei tahloudi ahi” kiti maimai toh akikhetna vang aum’e. Govt nin Kanni leibol akhah e tina dia aga kilodi konleh sepai/police ho anaivel’a kaani lei phabep agavat (aga suhset) jiu ahin agam alhang’a Kaani lei hop jakhat lah a hop nga (5 percent) jong hijiloudi ahi. Tua kihouna dungjuija hi aleibol kipat muchi kitu dikonleh govt sepai hoto kithoa amun’a chomkhat pansat thoa muchi tu umsahloudi ti ahi. Hiche hi govt nin thinglhang jougam lang gamla pitah a sepai/police chomkhat ga umdia soldi phatsahna ahinnei di hinam ti jong seithei hilou ahi. Govt sepai chu aum umna’a meithal toh Ration toh, umnadi Camp kitupdom ho sah masat ngaidi ahijeh in joulei geh ho bang’a buh neoneo hoa apansat diu hitheilou ahi. Gari lhunna thei mun khatna pansa’a natoh vang umthei thoudi ahi. Houbung hon Kaani hopsom asan/alah tahlou dia kisei jong hi thil khat im le selguh umlouva asan avom kiseidoh jeng tina ahijeh in jachatna’a laho dia vetnadi jong umlou khat hidi ahi. Houbung jouse hin mipi hon hopsom phatah a apeh chehdi hi sum le pai muna lam’a phatthei channa khatna asei chuleh houbung mi hon jong atahsan khat ahi. Hiche jeh a hopsom hinpe khat chu koiman “nang hopsom hinpeh sum hi athenglou ahijeh in kisang ponte” ati theilou khat ahi. Ahin govt nin ajahda khat kibolna a sum kimu hopsom pehna din kitilkhouna vang umdaleh ti hi aphapen hikit di ahi.
Kaani lei bol kha di kiti hi govt nin akham, ajahda khat ahijeh leh pathen houtoh akitohpoi tia lhagao lang gelna jong hibehsehlou maithei ahi. Thingnoi leh haosa hon akha lona hi gam leiset asuhset jeh  hipendin tahsan ahi. Ahin thingnoi hole haosa ho lah a akhahloi, akikha jahdaloi, akhah holah a asung  lang’a Tax kilahloi aumji’e kiti ho thuguh kisel aumtheilou hi akikham le akikhamlou kibang ahidan mijouse tapkong kihoulim nopna hidoh ahi. Ipi hileh Society sung’a thuneina jat khat akhutphang’a choi hi thingnoi holeh kho haosa ho ahijeh in amahon thilkhat bol tahtah di atiuleh ahimo umlou di ahi. Ahin kiseitho beh henlang atah a bol ahile ahilou chutitante itilevang thuchom ahi. Thinglhang gam le kho hi haosa ho khutna um ahijeh in amahon kakho kagam’ah hitobang kiboltheipon te atiuva thingnoi hon atosot uleh koi govt thu le la umlouva ahimo umloudi ahi. Chuleh sum muna khat bolsa ho dia abol khat kikhah kiti jong ichan hamkhat inchen louchen atoh khah thei ahijeh in govt nin jong Kaani lei bol hon sum muna thei thildang khat abolna diuva panlahna aneidiu jong thilkhoh khat hidi ahi. Thingnoi hon Kaani lei bol khadi atijing’u, kikhahlou, govt nin jong kaani leibol hon thildang abolna diu kingaitodi ahi tijing, ima umdeh kitlou ahi. Churachanpur a tohgon ahung lolhinleh district dang’a jong ahung kichepidi kinep ahi.