Thingnoi boina Kashmir kithampan, aban North East? By Lunsieh Kipgen

Thingnoi boina Kashmir kithampan, aban North East? By Lunsieh Kipgen

814
0
SHARE

Thingnoi boina Kashmir kithampan, aban North East?
By Lunsieh Kipgen
Britishte India a ahunglut masang’a India Sub-continent kiti tua India leh Pakistan-Afghanistan gamkai hi adondon’a lenggam ana um’a leng hon vai anapoh u ahi. Britishte hunglut jouva vai ahinpoh uva jong lenggam neochacha British sorkar noija kivaipohna ana um ahi. 1947 August 14 ni’a British te vaipohna anabeija pat India leh Pakistan hi Independent gam 2 a hung kihomkhen anahi. British ten adalhah lhah uva lenggam ho chu hou (religion) leh gamkai dungjuija  Pakistan leh India a um dia leng hon akilhen thei u anahi. Ahin India lailung tah a um Muslim tamna Hyderabad chu lengpan Pakistan a lutdi anati vang’a ana hitheilou ahi. Jamu & Kashmir (J&K) lenggam chu Muslim tamjohna ahivang’a lengpa chu Hindu Maharaja Hari Singh anahi jeh in agam Pakistan toh akigamgit keu hilouva amipi jong Muslim tamna ahivang’a Pakistan a lut sang’a India a analut ahi.  Hiche jeh a Pakistan keu hilouva J&K a Muslim tamjon jong J&K hi Pakistan a lutdi anadei u ahi. Hitobang kichuna/boina ana umpai jeh a chupetna India Home Minister Sardar Vallabhai Patel chun suhlen toulen anathoa lenggam tamtah ho chu India Union a ana umsah ahi. J&K leng Maharaja Hari Singh chun thanom tah a India a analut hidehlou, Independent a umdi ti anadei nahlai ahi. Ichan hamkhat kihouna umjouva ‘Instrument of Accession’ kiti kinoptona dungjuija J&K hi October 27, 1947 ni’a nahnah a India a analut ahi.
J&K India a lut dikon a pat Pakistan sepai holeh atosot Pakistan a kon Tribal gal hang hon J&K ahinbulupai uva tua J&K sung’a Pakistan Occupied Kashmir (PoK) kiti gamkai hi ahiti toupha den u ahi. J&K thua India leh Pakistan kigal jeh a UNO in April 21, 1948 nikhoa kikaptona suhtang hidi, hicheto lhon’a J&K mipi ten Pakistan leh India adeijoh joh akilhenna diuva Vote lhahna (Plebiscite)  UNO vetsuina noija um dia thulhuhna ananei ahi. Chomkhatjou lang’a India in hiche ‘Plebiscite’ boldi kiti hi akibolna di aumtapoi tia hung pang kitna tugeija bol jong kibollou paipai ahitai.  J&K gam’a Ladakh gamkai to kimat mihem chenna theilou muol le lhang suongthop lah Aksai Chin tia kihe gam jong hi Pakistan nin China anapehdoh ahi. India leh Pakistan J&K kichu jeh a tuni geija India leh Pakistan gamgi kichehsel’a kikaina umtheilou, alang lang’a sepai hon atoupha phana lhang (LoC-Line of Control) chu gamgi dan’a umjeng, kikaptona jong angaina dan’a umjing ahi.
‘Instrument of Accession’ noija soi kikaitona dungjuija chu J&K hi India State dang bang hilouva ‘Special Status’ aneidi, hicheto lhon’a J&K hin Constitution tumbeh, ponlap tumbeh, Prime Minister tumbeh aneidi, Indian a daan kijui tamjo J&K a cheloudi, Kashmir mi hon Citizenship jong India leh J&K  atumcheh a 2 aneidi, India Supreme Court thu cheloudi, MLA Term jong kum 6 chuleh adang dang thaneina jatchombeh J&K in aneidi ti ho anahi. India Constitution ahung kisemdoh jouva Article 370 hin J&K Special Status ahina asuhdet, avenvit ahi. Article 35-A thu achomlam tah a seidin J&K gam’a gamdang mi’n inmun loumun achohthei loudi, State government noija Service ho amuthei loudi tiho ahi.
Lamkai masa lah a chupetna India Prime Minister Jawaharlal Nehru in bolkhel ana nei J&K Special Status anakipeh chu apet petna boina akhoh behseh jeh a ahile hitante tia anabol u hidi ahin tugeija boina kichaimo lona khat hung hidoh ahitai. Independent a umdi dei Kashmir mi holeh J&K Pakistan a lahlutdi ti tup jing Pakistan hon UNO jaona a kinoptona soi anakikai holeh J&K Special Status kipeh hi tugeija akipechah kheh jing uva J&K thu hi seichai loulai kiboina thu hingjing khatna akoi u ahi. J&K keu hilouva chupetna India Union a jaolou di tia kiphinna neilah a AZ Phizo lamkaina a Naga thingnoi NNC ho kom’a jong Nehru hin Naga te India kipumkhatna noija naum nomlou ujongleh nangho thu ahi tin anaseije kiti jong aphot chetna lekha podoh thei koima aumlou vang’a tugeija India douna a galguhbol Naga thingnoi honjong Nehru in hitia anaseisa ahi tia aki benglam thilsip jing u ahi. J&K Special Status anakipeh hi bolkhel lentah ahi tia tua BJP lamkaina Centre sorkar in suhdih di (semphat di) ahinti ahi.
J&K gam’a kon chamlhat di delna a thingnoi galguh hung kipatna hi 1990 kum lang bep bou anahi. Hichelai chu Europe a Yugoslavia-Kosovo-Chehnya gam hoa achi anam, ahouva kivetdana leh kithana ana um, nam khat, jat khat achi anam’a suhmang’a gamkai khatna kon suhthengdi/deldohdi (ethnic cleansing) kiti ana umpetlai ahi. Europe lang’a kibol chu J&K a jong hung kibol ahi. J&K chamlhatna dia Muslim galguhbol hon Kashmir phaicham’a Hindu Pundit ho alom chang chang’a ahintha pat uva anaban deldoh uva Hindu Pundit ho tugeija ain alouva kile theilouva kikoigam u ahi. North East a Naga thingnoi group (seilouva het) khat nin jong Europe leh J&K a thingnoi ho bolbol ahintho uva 1992 lang’a pat Naga ho tamjohna gamle lhang’a cheng Kuki ho achi anam’a vetdana leh thana ahinnei uva ain alou uva kon anadeldoh u ahi.
J&K India State dang to dinmun kibang louhel’a aum hi India gam hiloudan’a gel loi atamtai tia BJP hon sotna pat hiche Article 370 hi thaimang di anatup peh u ahi. Sotna pat (kum 30.40 masang) RSS leh BJP hon Article 370 akilahdoh louleh kiboina umjing dia anagel u ahi. 2014 Lok Sabha Election a BJP lamkaina a Centre sorkar ahung kisemdoh a pat Article 370 hi suhbei jeng diham anatiuleh BJP MP achang uva sorkar semkham analhinlou jeh uva ijoleh NDA Partner party dang hon hin tosot kha hihleu sorkar lhuhlona hinte tia ana khongai u ahi. Ahin tukum 2019 Lok Sabha Election a BJP te achangseh uva jong Majority ahung hiphat uva J&K thu hi tham/bol masatpen di loija ahinkoi u ahi.
Lamkai masa hon J&K thua suhkhel bolkhel ananei u semphatna di tohgon hi sotna pat BJP ho anakigojing u hijongleh tuchung’a ahinboldan uhi koiman hitin hung kibolinte ti anagelphah louhel ahi. Ahin kigot tupna hi chomkhatset hung che, achesa June first week lang’a ana kipan ahi. Union Home Minister Amit Shah J&K khopi Srinagar a anache masa’a Security dinmun ho vettup masatna leh agam mipi sou/lunggel vetlhahna ananeija Kashmir mipi te dia thilpha hung kiboldi ahi ti aga sei masat ahi. National Security Adviser Ajit Doval jong nivei tah Srinagar a gache masa’a Security dinmun ho vetlhahna leh gontupselna aga nei masat ahi. Kumsehleh J&K a Hindute asang asang’a muntheng’a achejinau Amarnath Yatra chu thingnoi hon suhboija buludi ti thu aum’e tia photlot tobang’a hung ki ngahsah ahi. India mi Amarnath Yatra che ho keu hilouva Foreign mi J&K a gamve a umho jong kintah a akile diuva thupeh hung kibol ahi.
J&K a sepai a-lakh a sim umsa ho kithopi dia chomkah louva Sepai 75,000 lang ana kitol lutbe ahi. LoC a pat thuboina umnathei mun jousea Amry leh Para Military ho chahkheh a kikoija gal kipansa tobang leu dan’a Army leh Air force ho jong kigosadem’a (alert) tah a kikoi ahi. J&K a TV Channel, Internet, Telephone ho kikhah a gamsung pumpia Curfew jong kikoi ahi. TV News Channel ho Delhi a kikouva boina solouna dia thusoh hung umdi ho amoh sosolou diuva tepna leh gahna kinei masa ahi. Kashmir mipi te hintilsente ti ginmona jeh a J&K Ex Chief Minister Mehebooba Mufti leh Omar Abdullah hentup (House Arrest) a ana kikoi masa lhon ahi. Thu umdan ahung jatchom jouva Mehebooba hin Centre in thildihlou ahinbolleh meikong kitungdi ahi tia gihna thu anaseiman ahi. J&K a kon Article 370 akilahdohleh Constitution to kikal ahi tia Supreme Court a hehna ahung umdi jong ginchat ahijeh a hitobang Court Case ahung kibolleh iti seija jodi ham ti Law lang’a hetna nei hoto gontupsa a kikoi ahi. Hiche ho chung chon’a CBI leh NIA ho Kashmir mi aboltheidom lamkai hon thingnoi hoto kikhut jopma agam mipi di sum kinehmang ho khuoldohna kibolsah a mipi ho phatchomna di naa hung kitongdi ahi ti hetsahna um masa ahi.
Hitobang kigot tupchetna umjouva August 5, 2019 ni’a chu Home Minister Amit Shah in Parliament (Raja Sabha) a “J&K Reorganization Bill-2019” chu anapohdoh a Raja Sabha in pass abolpai, ajing’a Lok Sabha injong pass abolpai kit ahi. Hicheto kilhon’a J&K Union Territory (UT) 2 a kisoa Article 370 leh 35-A jong akilahdohtai tia India President order kisopai ahi. Adihtah a chu hitobang bolna dia hi Centre in J&K State Assembly (Constituent Assembly) phatsahna alah masat ngai ahi. Ahin J&K a President’s Rule umpet ahijeh a Centre in abolmo ahipoi tia sorkar pangkit jeng ahi.
Ipi jeh a kino cheng thim tobang’a J&K chung’a natohna hung um ham tijong thu umkit ahi. Tunaicha (July lha) a Pakistan Prime Minister Imran Khan USA (America) a kholjin’a anachena a Kashmir thuboina seilhapna dia President Donald Trump in panlahna ahinnei dia tepna ananei chu India dia thoh hahsa ahi. Ajeh chu Kashmir gam hi India sung ahijeh in koima dang, gamdang kikumna di aumpon, seidi ahijongleh akiboi teni Pakistan leh India kikah a bou kihouna umdi ahi tin hi India dinmun ahi. Afghanistan a USA leh Taliban thingnoi ho kum sot tah gal akisatto lhon jouva tunaicha a kihouna ahinnei uto lhon’a Afghanistan a kon USA sepai ho lahdoh di ti ahung hi jong hi J&K thua kinona khat ahung ngailona khatna kisei ahi. Afghanistan a Taliban hon kidoupi di US leh Allied force sepai ho ahinneilou teng uleh Pakistan leh Kashmir gam’a hung kitollut uva tua sang’a boina khohcheh ahinboldoh thei u ahi. Kashmir hi India State dang hoto dinmun kibang ahijou teng gamdang koiman Kashmir hi dinmun jatchombeh nei ahijeh a kiboina gam ahi tia kikum thei talou dia kigel jong hidi ahi.
Tuchung J&K kibolna hi RSS leh BJP ho thilgon le lungtup hijongleh Prime Minister Modi leh Home Minister Amit Shah in hangsan tah a panlahna anei lhon jeh ahi. Amit Shah dehdeh hin kathile kathi J&K hi India toh kipumkhat del’a aumna dia kajochan kaboldi ahi atijeng ahi. Amit Shah hi Muslim ahijeh a Kashmir Muslim honjong agelje khat ahet u himaithei di, avetda dehset loijong umdi ahi. Kashmir hi India gamsung ahijeh in itih hijongleh India a kon kilhadoh louheldi ahi tia hangsan tah a Home Minister-pu hin asaple jeng ahi. Special State a kon UT a kisuhnemna um hi Kashmiri koiman vang kipah tah a apomlou heldi ahi. Ahin hiche hi chomkhatna dia bou kibol ahin thu ahung thip teng J&K hi State mama hung hikitdi ahi ti hi BJP lamkai hon abul’a pat ‘indirect’ thim’a asei u ahi. Ahin Article 370 vanghi kinungpeh kitloudi ahi, ajeh chu hiche lahdohna dia UT kiso masa hidan ahi. Centre in Kashmiri mipi te phatchomnadi leh khantouna tah natoh ahinneileh mipi joh hin gampam’a kon thingnoi ho ahinkimaitopi nahlai thei ahi.
Kashmir gam kibolna jeh hin ipi ahung tin, gal ahung umlodem ti hi mi bangkhat gel ahi. J&K kehni akison Article 370 akilahdoh pehtai ti thuphon umjou jouva Pakistan Cabinet leh Defence Officer hon ajing mama a kihouna ananei uva Kashmir thua jochan boldi tia kihoulhahna anei u ahi. Pakistan a Civil government khat hinjouna dia Kashmir thua India thimahmah aseile atoh akop ngai tobang ahi. Pakistan nin Kashmir a boina sem dia sum le manchah keu hilouva thingnoimi geija ‘supply’ abol ahi. Kashmir jeh a India leh Pakistan kikah a kitup tona leh kinahna ahungsoleh gal manchah nasa tahtah sem lam’a thepna nei USA, Russia, France, China leh Israel hon manchah johlhahna (meilhei paova ‘pot sitpa’) a India leh Pakistan ahinnei diu ahi. Tujeng’a jong Pakistan nin USA leh China a kon manchah akichohjing, India injong Russia, France leh Israel a kon manchah akichohjing kit ahi. India le Pakistan Nuclear gal manchah (Atom bomb) nei cheh ahilhon vang’a “nati mongleh nangjong hinglou, keijong hinglou” ti lungput nei ngapcha umdeh loudi ahi. Akikumlou loudi jong hung kikumgo nalai di ahi. USA in LoC a kikaptona umjing thua kitimna nei dia ahinseipan ahitai.
Article 370 kilahdoh jeh a North East a State tamjo Special Status kipehna Article 371 jong ahung kiladohdem tia lunglinglao loi umpan ahi. Article 371 noija hi North East State tamjon agam uleh achondan u adeh a Tribal Custom ho huhbitna um ahi. Alunglinglao hojong oimo thei ahilouna chu BJP hon ‘Uniform Civil Code’ kiti India a nam chomchom leh hou le tahsan jatchom chom jui hon kichen kida, nei le gou thu leh Civil langa daan kibang anei diu ti hi sotna pat agel u ahi. Ningkum lang’a BJP hon Citizens Amendment Bill North East gam’a chesah di ahinpohdoh ujong North East State hoa Tribal ho gam le chondan ahinsuhboi dia kichatna ana umpansa ahi. North East a Hindu hilou Christian tamna State lah a Nagaland leh Mizoram dehdeh hin agam u venbitna dia ILP jong anei lhon ahi.
Article khat (370) bon akilahdoh theileh Article 371 jong hung kiladoh thei ahi ti hi akihuollelnau ahi. Chuleh J&K bon kehni akisoleh State dang dang jong agam mi nopna louvin ahung kikehso khadem ti kichatna nei loi jong um ahi. West Bengal leh Sikkim jong ipi ahung kilodem tia ginmona leh kichatna anei u ahi. Ahin J&K bang’a India a kon potdohdi ti leh gampam’a kon thingnoi leh manchah hung kisol lutnalou State ho ima kilodeh ponte tia hilchetna nei lamkai jong um ahi. Achesa 1980s lang geija chu North East a galguhbol Naga leh Mizo hon China akon kithopina anamu u ahin tua vang thingnoi bolnalai Naga honjong amulou u ahitai. Alangkhatna J&K thingnoi hon tugeija Pakistan a kon kithopina jatjat amujing jeh uva J&K hi alonaje khat neidi tidan’a kisei ahi. Khonungleh ipi ahung ti chu seithei ahipon hinlah tupetna vang Article 371 hi kiladohlou di ahi tia Home Minister Amit Shah amatah in asei ahijeh in moh lunglinglaona di umponte. Ijem tia North East thingnoi holah a India a kon potdoh di tia China a kon het theitah a kithopina mu ahung umkitle vang Centre injong J&K ban’a thamdi ahintidi hetsa ahi.