Thinglhang gamkai kivaipohna thu’a thumna sorkar in asan louleh ATRPFM leh ATCFM...

Thinglhang gamkai kivaipohna thu’a thumna sorkar in asan louleh ATRPFM leh ATCFM in Dec 8 nikho a kon kiphinna bol dinga gihna nei

303
0
SHARE

Thinglhang gamkai kivaipohna thu’a thumna sorkar in asan louleh ATRPFM leh ATCFM in Dec 8 nikho a kon kiphinna bol dinga gihna nei

Imphal, Dec 3(ET): All Tribal Rights Protection Forum Manipur (ATRPFM) leh All Tribal Chief Forum Manipur (ATCFM) in Tribal lamkai hon Hill Areas Committee (HAC) recommendation dungjuiya kho ‘recognition’ kibolna a Tribal Affairs and Hills leh Revenue Department, Manipur sorkar in ‘work allocation’ asuhchen diu thumna a Chief Minister N Biren Singh henga memorandum ape uvin ahi.

ATRPFM leh ATCFM in thumna anei hou state sorkar in asan peh louva ahileh lunggel kibahpi kiloikhomna (CSO) leh mipi tosotna a December nisim 8 nikho a kon kiphinna pat dinga gihna anei uvin chule Tribal CSO leh mipi hon kiphinna tohgon kisem ho atosot diuvin ngehna jong anei uvin ahi.

Joseph Rongmei, President, ATRPFM leh Tongpu Kipgen, President, ATCFM in soi akaina lekhathot a chun achesa August nisim 24 nikho a ATRPFM leh ATCFM in Tribal lamkai hotoh Directorate, Tribal Affairs and Hills a Special Secretary cum director, TA&Hills Chairman hina a ‘A one day consultative meeting’ anei nauva kilolna aneiho atuhdet nau avel a aseikit uvin ahi.

Hill District hi agom a 20089 sq km a len ahi’in, hiche lah a survey kibol hi 1 percent sanga lhomjo ahi’in chule MLR and LR Act 1960 kichepi ahi. Hiche hin Hill Area hop 99 a hi MLR&LR Act 1960 umlou tina ahi. Moreh town area, Tengnoupal tobang survey kibolna mun ho tilouva kho thah kisem hohi survey kibol (MLR & LR Act) noiya umlou tina ahi. Hiche jeh a Hill district a khosung ‘recognised’ bol nadinga natoh Revenue department kipe a kisei hi ventup leh suhtup jou hilouding ahi. MLA & LR (Amendment) Act 1975 a state sorkar in hiche Act hi notification a kon Hill Areas a ‘extend’ abol thei ding ahi, tia provision kikoibe ahi’in, Hill Areas Committee in phatsahna aneiya ahileh MLR & LR Act hi Hill Areas a jong kikehlen ding tina ahi.

MLR & LR Act 1960 a section 1 (2) abon a lahdoh ding a amendment provision um ahi’in, hijong leh MLR & LR Act 1960 section 2 abon a hi ladoh louva olsah joh (relax) thei ahi. Extension bol nadinga Hills Areas Committee phatsahna angaijeh a MLR & LR Act 1960 a section 2 hi 1989 a state sorkar abon a lahdoh ding agot ahi. Hiche jeh a MLR & LR Act (6th Amendment) Bill 1989 hi apohdoh uva, September nisim 15, 1989 kum a HAC henga ‘refer’ bol louva phatsahna aneiyu ahi’in, HAC phalna akilah loujeh a Governor in asan pehlou ahi. Hiche jeh a MLR & LR (Amendment) 1975 section 2 hi HAC noiya um nalai ahi, tia kilolna khat aneiyu ahi.

Article 371 C (2) a Governor in Hill Area kivaipoh thu a President henga kum sunga report apehding ahi. Angaina a Annual report hi Tribal Development/Hill Commissioner in asem ahi’in, Revenue Department in asemlou ahi. Hiche hin thinglhang thu jouse hi TA & Hills mopohna ahi avetsah ahi, tin memorandum a chun asei uvin ahi. Article 371 C 4 dungjuiya, Hill area toh kisai thu jouse hi Hill Areas Committee (HAC) noiya umding ahi. HAC mopohna kipe Scheduled thu 13 lah a 7 hi Village committee ahilouleh council kisemna, athanei nau leh khosung kivaipoh thu toh kisai ahi’in, hiche jong hin HAC hon Hills a dalhah theilou mopohna anei avetsah ahi, ati.

December nisim 24, 2009 ni a meeting a thinglhang gam a kho thah kisemna leh hetpehna kinei (recognize) na ho thu hi Hill Department thaneina hidinga kilungtoh tah a kilolna um ahi. State sorkar in HAC recommendation sang ding leh chepi ding ahi’in, HAC hi Indian Constitution Article 371 C toh kitoh a kisemdoh ahi. Hiche dan noiya Centre sorkar in pan alahthei chule Manipur Hill Areas thu a state sorkar thuhilna apeh thei ahi. State sorkar in HAC recommendation toh kitoh louva December nisim 4, 2019 ni a meeting agon nauva sub-committee alahdoh diuva thumna kinei ahi, tin aseibe uvin ahi.

Thinglhang leh phaicham mi kipunkhomna ding leh chamna aumna ding chule tribal ho ding gelna a HAC recommendation asan peh uva chule achepi diuvin ATPRFM leh ATCFM in memorandum a ngehna anei uvin ahi. Chule sorkar in thumna nahsah louva akoiya ahileh Hill Area jouse a kiphinna kipan ding ahi, tin gihna anei uvin, amasapen a state leh centre project hohi December nisim 4 nikho a kon maban kichelhah sah louding ahi, tin asei uvin ahi.

1947-1949 kum a Manipur lengpa injong Durbar kithopina a thinglhang gamkaiya dinga ‘Hill Regulation Act 1947 kiti dan achombeh asempeh ahi’in, thinglhang miho achombeh a kivaipo ahi, ati. ATRPFM leh ATCFM in CM Biren henga memorandum apeh copy hi TA & Hills Minister, HAC member, Cabinet Sub-Committee Chairman leh member chule Chief Secretary leh Governor Dr Najma Heptulla jong ape uvin ahi.

 

Thoubal district a Khamnathei kisemna khat kimandoh kit; Dk. crore 165.172 man ‘heroin’ 41.29 kg kiman

IMPHAL, Dec 3(ET): Manipur Police leh Assam Rifles hon Monday nikhon Thoubal district a um ‘brown sugar factory’ khat amandoh kit uve, tin police hon Tuesday nikhon asei uvin ahi.

Khamnathei kisemna factory amat nauva mi 2 jong aman uvin chule kailhang (international market) a dangka crore 165.172 vel man hidinga ginchat brown sugar 41.29 kg toh akiman e, tin police thulhut chun aseibe in ahi. Khamnathei kisemna a kimang manchah phabep jong akiman teni inmun akhol nauva aman uvin ahi.

Ningkhamngam Awungshi (39), s/o (L) Sangchuti Awungshi chenna inmun Sada Khumbi kho, Nongpok Sekmai police station, Thoubal district a factory aneiyu hi police hon hetdohna anei ahi. Thilsoh a akiman adang khat hi Ningkhangam Awungshi upa Wungreingam Awungshi (45) ahi. Thoubal district police team holeh 26 Assam Rifles sepai hon Monday nilhah nidan 2 don a dan dihlouva factory kihong amatdoh u ahi.

Operation abol nauva sepai hon amasapen a Ningkhamgam Awungshi inmun kholna anei ule heroin hidinga ginmo sakhao lentah ni amudoh u ahi’in, hiche jouva heroin semna a kimang manchah ho amudoh u ahi. Akiman thil holah a hi brown sugar 14.316 kg khat plastic sakhao khat a kikoi, rubber hand glove 4, pon kang khat, khaini kokta abom keu 127, thinga kisem board machine leh plastic sheet thum ahi. Brown sugar kikoina plastic a hi ‘white crystal’ tia kijih ahi.

Ningkhangam Awungshi a kon ahetdoh u dungjuiya police holeh sepai hon forensic expert ho panna a Wungreingam inlang ajot kit uva, thukholna aneiyu ahi. Kholna anei nauva ‘brown sugar’ hidinga ginmo adang chule heroin semna a kimang manchah ho amube kit u ahi. A upa inmun a kon ‘Star Brand lime’ tia kijih sakhao 9.536 kg a gih plastic khat, ‘pressing board’ khat, twi bom khat, ammonium chloride gram 50, camouflage bag 3 leh morphinated liquid litre 10 kikoina plastic bom (can) khat aman uvin ahi.

Heroin kijohna a kon hidinga ginmo sum dangka lakh 2.8 jong aman uvin ahi. Thoubal district police headquarter mun a SP Dr S Ibomcha Singh in thuso miho akimupi na’a, Sada Khumbi kho a cheng Ningkhangam in a inmun a dan in aphal lou heroin semna factory akihong e, ti thuguh kihe a kholna kinei ahi, tin aseiyin ahi.

Operation akibol sunga akiman brown sugar hi 41.293 kg leh morphinated ligquid litre 10 ahi, tin officer pa in aseiyin chule operation hi Inspector General of Police (Zone 1) Clay Khongsai leh Deputy Inspector General of Police (Range-II) K Kabib mopohna leh vetsuina noi ahi, ati. Akiman khamna thei hi ‘grade-II quality ahi’in, dangka crore 165.172 vel man hidinga asei uvin ahi. Police hon thilsoh toh kisaiya case ajihlut tauvin chule thukholna apan tauvin ahi.

 

MPSC 2016 Exam lolhinna nei Officer 33 kikah lhahna chung a KSO-GHQ in demna nei

Imphal, Dec 3(ET): Manipur Government in  MCS 13, MPS 16 le MSS 4 jaona a officer 33 ana toh na akon ana kah lhah na chung a Kuki Students Organisation General Headquarter in kidang asah nau phondoh na ahin nei uvin ahi.

Kiloikhomna in thuso ahin nei na a High Court in 2016 MPSC main exam result hetpeh lou ding  a phondoh na ahinnei jou in government in hiche thu toh kisai a kholchil na ahin nei ding ham tia nga jing ana hilai in exam bol ho bou gotna kipe dan in aum in, hetthei khat chu candidate ho lah ahi main exam ading a kigotna nasatah a nei a merit list a thengsat a hung kaidoh jong um ahin, government in mona nei ho bou akah lhah ding uva lom ahi akiti.

Hitabang dan toh kitoh lou a natoh na hung umkha hi MPSC sung a natong phabep akon ahin, government in candidate ho kah lhah na anei sang a MPSC sung a natong mona nei ho atoh na akon akah lhah diu dol ahi tin jong KSO akon thuso kimu chun asei in ahi. Kholchil na akinei le government in candidate a mark u kisutoh le kithah sem ho chu ahet tei ding u ahin, mona nei ho chung a kholchil na le gotna pe ding a government koi in akham a tu chan a ima kibol lou ham tin jong kiloikhomna in government thudoh ahin nei uvin ahi. Hitabang a natoh na ho jeh ahi mipi in government le MPSC chung a tahsan na ahin nei lal diu ahi dan jong tahlang na ana nei uvin ahi. Mona neilou officer kikah lha ho hi kum 3 lam lekha simlou ahi taovin, exam thah tou ding chu amaho ding a hahsa ahi toh lhon a government in mi hinkho ijat ham asuh set ahi dan thu KSO in thuso achun hetsah na ana nei uvin ahi.

Indo-Naga peace accord akin thei pen a chaina dinga UNC lamkai na a kijotna umding 

Senapati, Dec 3(ET): Manipur sung a Naga ho in ahunglhungding December nisim 17 le Indo-Naga peace accord agan na thei pen a chaina ding deina a UNC lamkai na a kijotna anei ding u ahi. Hiche kijotna na nei ding chu United Naga Council (UNC)’s presidential meeting, Senapati UNC office a ana kibol na a ana seilhah u ahi.

UNC akon thuso kimu dungjui in hiche kijotna chu Manipur sung a um Naga district 4 ho a jingkah lam nidan 11 a kipan ding ahi akiti. Tuni a UNC lamkai ho kihou na dungjui in  Naga MLA ho in ahunglhungding December nisim 18 akon kipan ding Special assembly session a panlah na anei louding u ahi akiti.

Coordination Committee on Manipur Integrity (COCOMI) in achesa November nisim 29 a thuso anei na u chung ah, aphat toh akito loudan le Naga mite phatchom na ding ho hitabang mi ho in atin jing na chung a deilou umtah le angai ahilou dan phondoh na jong ana nei uvin ahi. UNC akon thuso kimu chun asei be na a hetpeh na kinei lou Naga kiloikhomna koima in Naga min a gam, khang thusim le politics toh kisai a thu hoima a asei thei lou ding in jong hetsah na ahin nei uvin ahi.

Jingvalpa magazine kum 18 lhinna kingon kimang; Award phabep jong homdoh u

Kangpokpi, Dec 3(ET): Thadou-Kuki pao a lhasih a kiso Jingvalpa Magazine in Kangpokpi Ward No 11 sung a Good Shrpherd English School ah kum 18 lhinna kingon chu Kangpokpi Town Committee (KTC) Chairman Lunseh Kipgen Jin-Gun hina le Kangpokpi Town Churches Fellowship (KTCF) vice chairman Rev Thangboi David kin thempu hina in jannichun amang un ahi.

Kuki nam chung a NSCN-IM soset lai a ana sohcha Robert Hekai Kipgen in pao dang simthei lou Kuki nam Thadou pao tho hon gam le lei thilsoh ho asimdoh thei nading a 2001 kum a chu Jingvalpa Magazine ahin patdoh ahi.

Lunseh Kipgen, chairman, KTC in kingon melchihna song hondohna anei e. Editor Jingvalpa Robert Hekai Kipgen hin pot tho najal a Manipur, Nagaland, Assam le Mizoram a cheng ahao avai gei a anam mite lunglai chohthou le mitin in aha simpen magazine boldoh ahi.

Jingvalpa Journalism Award chu Kaybie Chongloi, local Senior Journalist in tohphat man in akisan in abanle Editor posot pen kipaman chu Zalen Banner Editor Onjamang Haokip in akisantan ahi.

Jingvalpa Music (Visual) Award chu Khannougoul kiti Thadou-Kuki Visual Album semdoh masapen  Jangthang alias JL Khongsai in akisan in abanle Jingvalpa Best Model Award chu S Molnom Model Village in akisan in chule Jingvalpa Philanthropic Award chu Kuki Khanglai Lompi (KKL) in akisan tan ahi.

Homdoh a um kipaman hohi Jingvalpa Managing Board le Committee in agontoh dungjui a chelha ahi.

Hiche kingon a chun Kuki Film Development Association (KUFIDA), KFDC, Agape Children Home Cultural Troupe, local artiste ban a Kuki Actor le Actress phachompi jong apang un ahi.

Kuki Christian Leaders Fellowship in Kani doudal ding a thulhuhna nei

Imphal, Dec 3 (ET): Kuki Christian Leaders Fellowship in kilolna anei nauva chun Gamsung a kani (poppy) kibol hi aphatlou dan aseikhom utoh lhon in, hiche hi agam govt. in jong akham toh lhon a khoppi kihouna in jong hiche kani adeilou thu aphon doh utoh lhon in, Haosa hon agam leiset a kani lei bolna ding a aphal tahlou diuvin ngehna anei uvin, Hiche douding in Houbung jouse, Civil society organisation chule kiloikhomna dang dang jouse thahattah a pan lakhom ding in jong ngehna anei uvin chule Inchen hahsat jeh a kani lei bolho jousen jong angah uva kailhang a johthei thildang khat joh aboipi diuvin ngehna anei uvin ahi.

Chule, Hou natong hon kanilei bol aphatlou dan hangsan tah a sapphong a, mipi ho phate keicha a hilchet ding na peding in jong ngehna aneiyu vin, chule Survey/Research bol a booklet khat sodoh ding in jong phatsahna anei uvin ahi.

State jouse a NRC 2024 le kibolchai ding ahi: Amit Shah

Guwahati, Dec 3: Jharkhand gamsung a election rallies abol nauva Union Home Minister chule BJP luboh Amit Shah in aseina achun, 2024 Lok Sabha kitetna masang a India gamsung pumpi a National Registration of Citizens (NRC) hi kichesah ding India mi dihtah leh dihlou kithit theng ding ahi tin aseiye. Shah in November 20 a Rajya Sabha ana hetsah dan chun Assam state panna a state jouse a kichesah ding in ana seiyin alangkhat ah West Bengal a BJP lamkai hon hiche NRC kibol jeh in WB sung a By-polls anei nauva koiman atosot behlou thu asei un ahi. August 31 nikho chun Assam state sung ah Final NRC list chu asohdoh in hiche achun, mi 1.9 million tobang ajao pouvin ahi.