Thilpha bol ham ngol thubuh bol joh ham (Natna thejal’a Senapati DC...

Thilpha bol ham ngol thubuh bol joh ham (Natna thejal’a Senapati DC kingoh) Senapati district DC (ex) milun Salam Samorjit, IAS in phaigam mi ho Bombay a kon innlang ahung kilenaova bu anehsah a agesah nalam’ah Senapati Naga civil kiloikhomna hon gotna (suspend) boldin kiphinna ahinneijun ahileh State govt ninjong apetpet nin transfer aboljeng’e. DC-pa hin thilpha khat kabol’e atinalam’a gotna anehlo tina ahi. DC-pa chun seileh gamlatah a kon (Bombay) inlang hinjon ho neh le chah kapen, alhunna agena diu kangaitopeh chu thilpha bol leh DC khat hina’a tohdi dol khat kabol ahi atidi (ati tahbah) ahi. Ahin thilpha kabolle kiti khat jong hi ngol thubuh khat hitheiji ahi.

670
0
SHARE

Thilpha bol ham ngol thubuh bol joh ham
(Natna thejal’a Senapati DC kingoh)

Senapati district DC (ex) milun Salam Samorjit, IAS in phaigam mi ho Bombay a kon innlang ahung kilenaova bu anehsah a agesah nalam’ah Senapati Naga civil kiloikhomna hon gotna (suspend)  boldin kiphinna ahinneijun ahileh State govt ninjong apetpet nin transfer aboljeng’e. DC-pa hin thilpha khat kabol’e atinalam’a gotna anehlo tina ahi. DC-pa chun seileh gamlatah a kon (Bombay) inlang hinjon ho neh le chah kapen, alhunna agena diu kangaitopeh chu thilpha bol leh DC khat hina’a tohdi dol khat kabol ahi atidi (ati tahbah) ahi. Ahin thilpha kabolle kiti khat jong hi ngol thubuh khat hitheiji ahi. Tupet tah a kichat umpen natna khutchengna Bombay a kon hung kile ho quarantine mun hilou mun’a kiki ngahsah a bu kinehsah a jan khat jong kigesah nalai kiti chu thilpha bol khat hijongleh ngol thubuh khat ahi. India sung mundang khopi dang dang’a kon innlang hung kile ho sanga Bombay a kon hung ho dehdeh hi mijousen akichat thojeng ahi. Ajeh chu Bombay hi India sung’a Red zone lah a agimneipen hijing nalai ahi. Akhohna lotlotna Senapati khopia hung gehpa ho mi 36 lah a mi 2 natna vei (positive) ahung hidoh chu Senapati khosung mihon imutje bunehje ahetloulo ahi. Gam hichan’a hung’a ni 4 le jan 4 gari lam hinjot ho nilhah khojin jouva Senapati hunglhung chu agilkel uleh gari sung mama a nehding donding peh a ajan mama a Imphal jangpetna ahinjot thei mamau ahi. Hiche holah a covid positive hung umdohlou hileh koiman ima jong seiponte. Ahin Senapati a agepanao inn chu Community Hall khat ahijeh a hiche hall inn vel’a cheng hon natna kilah khaovinte ti tijatna hung umdoh ahi. Ahung gehpa hochu cha hotel, ATM hoa jong avahleuve jong akiti. Natna vei hon avalenao mun hoa atham khahnau thil hoa natna hivei (virus) adalhah thei u, hiche a kon’a  midang’in natna akilahson thei jeh a Senapati Naga mipi kiloikhomna ho sei jong hi thukhatset hithou ahi.
Tua chu Senapati a natna vei khat hung umdoh khaleh DC-pa hi natna thejal’a pang ahi tia themmo chang jengdi ahi. Hitobang natna munkhatna kidalha thei ahijeh a Kangpokpi a civil kiloikhomna hon gampam’a kon innlang hung kile ho Kangpokpi khosung’a ki-ngapa, gari a kon akumle umlou dia thuphon anabol u ahi. Senapati DC ni 2 sunga gotna pehdi (suspend boldi) tia ‘demand’ kibol chu govt nin bolhihleh tulai lockdown jeh a hahsatna chunga thinglhangmi le phaicham mi kingailutna vetsahna a thil kipehto chula akihepon phaicham miholeh Naga ho chi le nam (communal) thua kivetdana khat hung umdoh thei nalai ahi. Senapati a hung kingapa hoa kon midang’in jong kihilna’a neidi ahimaije. Hiche holoi hi Bombay a ahung kipatdoh uva damona neilou u, Mao a ‘screening/test’ kibol’a jong natna veidia ginmo umlou ngen ahiuve. Ahin May 13 nia Senapati hung lhung’a natna vei ahilam u hetdohlou chu May 16 nia Test result a  mi 2 positive hiu ahi. Tua quarantine mun chomchom’a umho jong tupet tadin positive umhih jongleh ni 14 (incubation period) sunga natna vei ahi hetdoh hung umthei ahijeh in quarantine mun’a umholeh nehle chah pele volunteer ho sangtah a kichihthei ngai ahi.