Thilong vuilouva kikoi kum khat lhing ta

Thilong vuilouva kikoi kum khat lhing ta

195
0
SHARE

  Ningkum 31st August nilhah leh 1st September ni’a Churachanpur khopi’a mipi kiphinna’a anathilo ho chu kum khat gei vuilouvin kikoi inte ti hiche nikho’a chu koiman anagelphah loudi ahi. Ahin chomkhat jouva Churachanpur district hospital’a sot tah thilong koina thei Cool Storage Machine ahung kikoiya pat leh ningkum Christmas (kumlui) ahung galkaiya pat vang chu hiche ‘martyr 9’ ho hi vuilouvin kum khat lang vang hung kikoi tei unte ti hung kilangpan anahitai. Imphal khopi’a govt hospital thupipen chieh RIMS leh JNIMS jeng’a jong hitobang Cool Storage thilong 8 lang koinathei umloudi ahin, Churachanpur district hospital’a di mong-mong mithilong 10 lang koinathei gangtah-a ahung kipohlut a pat vang chu “tohguon” khat aumtai ti muthei anahi-e. Mithi vuilouva kum khat kikoi kiti hi kiboina jeh hihen ipijeh hileh aumkhalou (record) khat vang hidi ahi. Ahin kiphinna khat jeh akon hijongleh athi ho vuilouva kikoi sot laisea phachuomdi ham, phachuom dehloudi tivang dihchetna seithei umloudi ahi. Tua hitobang mithi vuilouva kikoina kumkhat lhinna hi ‘unity day’(kipunkhom nikho) ti’n kimang jongleh ‘tribal’ ho lah-a kipunkhomna dihtah umnam ti lung opkai (doubtful) umtah ahitai. Thilso (thina) jou lha khat lha ni gei chun mijouse kitoh tah in anapangkhom in hiche laitah chun thivuina kin ana umleh ana thupi dehsetdi, kipunkhomna jong anasang dehset di ahi. Tuni’a hi kipunkhomna akitivang’a kibungkhenna mutheitah-a aumna jong tam ahitai. Martyr ho thilona thua Khopi sung khat jeng’a jong kithutona umlou ahitai. Hiche hi mithi vuilouva akikoisot laisea thilse in ajuiji-e kiti adihna khat hidi ahi. Athu hinna dia mithi ho kivuida tina ahijeh in thivuilouva kikoikal kum khat lhin ni’a hi lamkai mopona nei jouse akigelphatna nikho ahidia pha ahi. Politics kiti hi ni khat, kum khat thu hilou, leiset leh mihem umlaisea umjingdi ahijeh in kiphinna leh politics khat bolna’a mithi vuilouva kikoi jing kiti chu itup khat munadi hijongleh thildih behseh hiloudi ahi.

  Kipunkhomna nikho kinitna’a hin khopi sung khat a chengkhom ho apangloi, apanglouloi aumtan, alangkhat ah, muchuom, district chuom’a kon Tribal dang ho thanom tah-a hung panbeloi jong aumkit tai. Govt nin thivuina di ima adonpoi tia themmo chandi jong hung dihmo cheh cheh thei ahi. Ajeh chu govt in JAC hotoh kihouna ananeiji’a JAC ho joh nungchonji anahipeh e. Bill thua vang Tribal ho lunglhailouna hi adihna umnante. Ahin thivuilouva kikoi vang govt kimoh ngoh theita loudi ahi. Ajeh chu President injong Bill khatpen aphatsah lou, adang teni jong velvet dia akoi jeh-a chelha talou ahitai. Tua hi Bill dang pass hung kibolgo tuhtangna dia thilong ho kimang go nalai ahijeh in itih chan vuilouva hung kikoibe nalaidi ham seithei ahimo cheh-e.