Thenna hi ihina a um ahi, tia S. Molnom haosapu Helien Vaiphei...

Thenna hi ihina a um ahi, tia S. Molnom haosapu Helien Vaiphei in sei Gamsung in kipunkhomna ding pao khat angaichat ahi, tia Amit Shah in “Hindi Diwas’ nikho a sei NSCN-IM in flag leh constitution achom a anei diuva thumna anei Centre in san pehlou MEETAC in asem ‘150 New Craft Souvenirs of Manipur’ Governor in hondohna nei; Gamsung a Craft Map kisem masat pen na ahi, tia sei Centre hi RIMS sangtah alhunsah ding ahi, tia Dr Harsh Vardhan in sei; Gamsung ngaichatna ho a Minister in panpina apeh dinga CM in temna nei Education Minister in Knowledge-Yan hondohna nei; school khantouna lentah hiding ahi, tia sei

342
0
SHARE

Centre hi RIMS sangtah alhunsah ding ahi, tia Dr Harsh Vardhan in sei; Gamsung ngaichatna ho a Minister in panpina apeh dinga CM in temna nei

 Imphal, Sept 14(ET): Union Health and Family Welfare Minister Dr Harsh Vardhan in gamsung a medical facility khantou sah nadinga Chief Minister N Biren Singh leh Member of Parliament Dr RK Ranjan Singh in proposal apeh ho Centre sorkar in gelkhohna neitah a amapui ding ahi, tin kitepna aneiyin ahi.

48th Foundation Day Celebration and Graduation Ceremony, RIMS kin kiman na Jubilee Hall mun a ahoulimna a asei ahi. Centre sorkar in RIMS sangtah alhun nading a tupna anei ahi, tin Union Minister Harsh Vardhan in aseiyin ahi. Achesa kum 5 sunga North East gamkaiya PM Modi lamkaina noiya khantou machalna lentah mutheiya um ahi’in, Modi in facility alhin ding hi lungtup anei ahi, ati. Kin gon a chief guest a pang Dr Harsh Vardhan in doctor pha hi damlou ho abol dan umchan a kihe ahi, tin aseiyin chule doctor hon moh mai mai hilouva damlou ho phatah a ajendiu ahi, ajeh chu damlou hon doctor hohi sangtah a akineppi ahi, tin aseiyin ahi.

Doctor khat hina a phatthei kichang ahi tihi geldoh ngai ahi’in, mihem ngailutna neitah a natoh ding ahi, ati. RIMS hi All India Rankings 2019 a Medical category a 28th position a pang ahi, tin Minister pa in aseiyin, hiche hi jilkung, simlai, doctor leh medical, para medical chule non-medical staff ho pottho na jal ahi, ati. Functional president a pang Chief Minister N Biren Singh in ahoulimna a RIMS a Air Ambulance Service pat vah theina dinga Harsh Vardhan in pan alah dinga temna aneiyin ahi.

Gamsung umdan hi mun hahsa ahijeh a hiche service hi sangtah a ngaichat ahi, tin aseiyin chule DoNER Ministry in service pat nadinga dangka crore 25 sanction abol ahitai, tin jong aseiyin ahi. Kijenna aphatna dinga Union Minister in RIMS hi AIIMS status a upgrade abol dinga ngehna aneiyin chule gamsunga state noiya um medical college athah chule JNIMS a Neurosurgery Unit leh Stroke-Care Centre akihondoh nadinga Centre sorkar in kithopina apeh dinga jong thumna aneiyin ahi. Gamsung a Cancer hospital semdoh nadinga jong Dr Harsh Vardhan henga CM in panpina athum in ahi.

Achesa kum ni-le-keh sunga BJP lamkaina noiya state sorkar in khantouna tamtah atohdoh ahitai, tin CM in aseiyin chule tuni chan geiya Chief Minister gi Hakshelgi Tengbang (CMHT) a insung 74,121 min kikhum ahitan, hiche lah a mi 14,568 in scheme noiya phatchomna amu ahitai. Dangka crore 20.74 lhing scheme noiya kisumang ahitan, tuchan a RIMS a phatchomna hi damlou 5,907 in (dangka 933.48 lakh) amu ahitai, ati. Tu dinmun a private hospital 6 a jong CMHT scheme kichepi ahi’in, gamdang a um hospital ho a jong akichepi theina dinga natoh chelha jing ahi, ati.

PMJAY-Ayushman Bharat noiya RIMS mun a dangka crore 3.80 lhing kijenna man 2,144 in claim abol ahitai, ati. Insung 1,58,421 in enroll abol phatsahna kineiya, hiche lah a 5,777 in dangka 10.86 crore lhing ‘claim’ abol ahi, tin CM in aseibe in ahi. Sorkar in Mobile laboratories 20 jong hondohna anei ahi’in, advanced life support ambulance hojong kihongdoh ahitai. Doctor 244 hi Manipur Public Service Commission (MPSC) noiya kila a chule health institution 26 a ‘generic medicine’ mutheiya kikoi ahi. Chandel leh Tamenglong a lupna 50 cheh umna district hospital jong lahlutna um ahitai, tin aseibe in ahi.

District hospital athah 8 sahna dinga phatsahna um ahi’in, JNIMS a BPL hon man beiya dialysis abol thei chule diasgnostic test manbeiya bol nading 53 jong um ahi. JNIMS a Dental college jong hondoh ahitai, tin CM in aseiyin ahi.

MP Dr. R.K. Ranjan, Union Health Secretary Preeti Sudan, RIMS Director Prof. A. Santa Singh, RIMS Medical Superintendent Prof. Ch. Arunkumar, Dean (Academics) A. Rogen, Prof. Th. Sudhirchandra, Surgery Department leh Retired Professor Dr. Y. Iboton kin gon a apang uvin ahi.

Dr Harsh Vardhan in MBBS Graduate (2014 batch) ho Gold Medal leh certificate pehdohna aneiyin chule RIMS Students’ Union annual magazine ‘Remedy’ jong hondohna aneiyin ahi. Alangkhat a Chief Minister leh jin a pang adang dang hon medical subject chom chom a top position a pang Post Graduate leh MBBS Graduate ho Gold Medal pehdohna anei uvin ahi.

MEETAC in asem ‘150 New Craft Souvenirs of Manipur’ Governor in hondohna nei; Gamsung a Craft Map kisem masat pen na ahi, tia sei

Imphal, Sept 14 (ET): Governor Dr. Najma Heptulla in MEETAC tohgon noiya Durbar Hall, Raj Bhavan, Imphal khopi a ‘150 New Craft Souvenirs of Manipur’ hondohna aneiyin ahi.

Mission for Economic Empowerment of Traditional Artisans & Craftsmen (MEETAC) leh National Institute of Design (NID), Ahmedabad tohgonna noiya Innovative Crafts Souvenirs of Manipur, Craft Map of Manipur leh MEETAC Website hondohna kin aman u ahi. Chief guest a pang Governor Dr Najma Heptulla in  ‘Innovative Craft Souvenirs of Manipur’, Craft Map of Manipur and Mission for Economic Empowerment of Traditional Artisans & Craftsmen (MEETAC) Website’ hondohna aum hi khutthem (craftsmen) ho kithopi lentah hiding ahi, tin aseiyin chule Manipur  a dinga ‘brand’ kisemna hiding ahi, ati.

Gamsung a thepna sangtah um hi vannoiyin ahetpeh loulai ahi. Gamsunga kisem thil hohi ‘bench mark quality’ ahi’in, thilsem ho khut thep dan hi eiho chang chunga kingapna thei ahi. Gamsunga handicraft leh handloom industry hi gamsung a um thil ho a kon thil hoitah tah asem theiya aum vetsahna ahi’in, ahivanga gamsunga um hitobang thepna hohi ahiding bang kihisah joulou ahi, tin aseibe in ahi.

MEETAC leh Knowledge Partner hon khosung chule cluster level a Artisan hotoh na atoh u ahi, tin Governor in aseiyin chule NID, Ahmedabad puihouina noiya MEETAC in Craft Souvenir of Manipur athah tha hondohna aneiya Traditional Crafts7 a dinga Souvenir design abol ahi, ati. Design hohi Imphal, Senapati, Kamjong, Churachandpur, Tamenglong, Noney, Tengnoupal leh Ukhrul district a kon Artisan hon asem u ahi.

Gamsunga Craft Map of Manipur akisemna hi amasapen ahi, tin aseiyin ahi. www.meetac.mn.gov.in website akisemdoh thu a jong Governor in houlimna aneiyin, hiche website hi gamsung a um artisan hon market trend athah pen pen ho hetna chule MEETAC tohgon ho hetna a aman theidiu ahi, ati.

Textiles, Commerce & Industries Minister leh MEETAC Chairman Th Biswajit Singh in ahoulimna a, gamsunga resource (thil) lhingset a aum vanga policy leh tohgon alhahsam jeh a khantouna lhasam ahi, tin aseiyin ahi. NID leh MEETAC panlahna jal a souvenir hondohna um ahi’in, artisan ho thepna kihetna thei ahi, ati. Souvenir hondohna aumhi gamsung bou hilouva gamdang injong gamsung a artist leh craftsman ho thepna hetdohna a aneidiu ahi’in, hiche hi gamsung economy machalna hiding ahi, ati.

Hetthei khat chu MEETAC hi state sorkar tohgon thah ahi’in, December 29, 2017 kum a Department of Textiles, Commerce & Industries Department noiya autonomous society khat a kisemdoh ahi. MEETAC hi September 1, 2018 kum a hondohna aneiyu ahitai. Governor Dr Najma Heptulla leh Minister Th Biswajit in Craft Map hondohna aneiyin chule Innovative Craft Souvenir of Manipur leh MEETAC official website jong hondohna anei lhonin ahi. MEETAC Skill development training a pang a district chom chom a kon Artisan leh Craftsmen ho certificate pehdohna anei uvin ahi. Kin gon a Anurag Bajpai, IFS, CEO (MEETAC), Bindoo Ranjan, Project Head, NID (Ahmedabad), MEETAC leh NID, Ahmedabad staff leh official ho chule gamsung a um Craft Entrepreneur leh Artisan hojong apang uvin ahi.

NSCN-IM in flag leh constitution achom a anei diuva thumna anei Centre in san pehlou

Guwahati, Sept 14: Nagaland gam in achombeh a flag leh constitution aneiding hi hithei louding ahi, tihi India sorkar in kicheh tah a asei ahi.

Alangkhat a sorkar in thingnoi kiloikhom hotoh aganna thei pen a kinoptona soi kaiding adei uvin ahi. Sorkar a kon tahsan umtah thulhut in The Assam Tribune henga asei dungjuiya sorkar in National Socialist Council of Nagalim (IM) leh Naga National Political Groups (NNPG) kiti Naga thingnoi kiloikhomna 6 umkhomna toh India sorkar in kihouna aneina a flag leh constitution thu a kichehna aneiyu ahi, ati.

Nagaland Governor RN Ravi injong flag leh constitution thu a sorkar dinmun achesa August nisim 16 nikho a kicheh tah a asei ahi. Thingnoi lamkai hon flag leh constitution achom a anei ding uva asei tei tei vang uva sorkar in hiche hi anoppeh lou ahi. “Sorkar in kinoptona sem chai ding chule soi kaiding hi aganna thei pen a bol ding adei ahi’in, lha ni lhathum sunga jo tei ding agot ahi. Ahivanga flag leh constitution achom a peh nading hi kinoptona a apang poi”, tin thulhut chun aseiyin ahi.

India sorkar in North East gamkaiya kon Article 371 alahdoh louhel ding ahi, tin thulhut chun aseibe in ahi. Article 371 hi India sorkar in North East henga kitepna anei ahi’in, alahdoh nading thu aumpoi, ati. Mi phabep leh kiloikhomna phabep in Jammu and Kashmir a kon Article 370 akilahdoh jouva North East gamkaiya Article 371 kiladoh thei ahi tia hetkhelna ding thu asei ahi’in, hiche article kilahdoh nading thu aumpoi”, tin thulhut chun aseiyin ahi.

Alangkhat a Nagaland gam a um civil society organization hon India sorkar toh thingnoi kiloikhom hon ‘final agreement’ soi akaina dinga ano poi, tin aseiyin ahi. Sorkar in NSCN-IM leh NNPGs toh achom chom a kihouna sem jong leh kinoptona khat bou soi kaina umding ahi. Sorkar in mijouse panlahna a hiche thu seilhah ding adei ahi’in, chamna thu kiseina a NSCN-K atamjo jong pang ahitai.

Thenna hi ihina a um ahi, tia S. Molnom haosapu Helien Vaiphei in sei

Imphal, Sept 14 (ET): Manipur gamsung a kho thengpen a kisei lah a khat hia S Molnom kho haosapu Helien Vaiphei in, thenna hi khosung a cheng ho dinga akitong jing johsahna khat ahitan, chapang cha cha injong thon louva kal seh a vengsung asuhtheng u ahi, tin aseiyin ahi.

Joint Director W Phajatombi Devi, MCS lamkaina a Directorate of Information & Public Relations (DIPR) staff leh official ho chule Deputy Director HQ L Ashok Kumar, Editor HQ Sagolsem Snehprabha chule  Editorial Board of  Manipur, Today Monthly panna team hon khosung avil nauva haosapu in asei ahi’in, athu hi Directorate leh staff dang dang in asodoh ahi.

Koubru molnoiya um Saitu Gamphajol Block hopsung, Kangpokpi district a um S Molnom hi kho thengtah chule engsit set a kihilna thei hi a khosung khat ahi. Achesa 2005-6 kum a Haokhotinlen Vaiphei lamkaina khosung suhtheng ding hi hatah a aboipi u ahi’in, Helien hi khosung haosapu chule chairman jong hi ahi. Special contractor hi a Helien hin apa panmun akhel a, haosa panmun atuh ahi.

Saturday seh leh khosung suhthengna anei uva, natohna a khosung mi atamjo in pan alah ahi. DIPR official hon khosung miho jong akihoupi uvin, achesa kum som val sunga khosung mihon lung kitoh tah a khantou machalna dinga pan alah nau ho aseikhom uvin ahi.

Khosung lamlen hi abon a ‘blacktopped’ kibol a chule kitup tah a avet suiyu ahi’in, sum lut hohi sorkar tosotna beiya abon a Helien in apohdoh ahi. Chule insung jouse a don ding twi kilhung lut a chule nullah jong phatah a kisem ahi. Inson a toilet kitup tah jong anei cheh u ahi. Khosung a hi nen paina ding mun kituptah a asem uva, nen kipai thang lou ahi’in chule amon mang thei leh amon mang theilou nen kipai nading ko achom chom lentah ni jong alaiyu ahi.

Amonmang thei nen hohi hon lei a man ding compost semna a aneiyu ahi. Kho neocha hi Kuki kho ahi’in, inn 40 um a chule mi 200 val ahi. Khosung a hi primary school khat- S Molnom UJB School um ahi. Thenna lampang a khosung chule kho haosapu panlahna hi District Administration in hetpehna aneiya, 2014 leh 2016 kum a kipaman anapeh ahi.

Gamsung in kipunkhomna ding pao khat angaichat ahi, tia Amit Shah in “Hindi Diwas’ nikho a sei

New Delhi, Sept 14: Home Minister Amit Shah in Saturday nikhon Hindi pao hi gamsung kipunkhom nathei ahi, tin aseiyin chule vannoi het a India min a pao khat nei angaiye, tin aseiyin ahi.

Hindi Diwas nikho a Amit Shah in ahoulimna a India gam a atamjo in atho Hindi hin India akipunkhom sah thei ahi, tin aseiyin ahi. Hindi hi ‘primary language’ a sem dinga Amit Shah in ngehna aneiyin chule India vetsahna dinga khat ngai ahi, ati. “India gamsung hi pao chom chom tamtah umna ahi’in, pao jouse hi thupi cheh ahi, hijong leh vannoiyin India ahet nading pao khat aumding hi thupi ahi’in, India kipunkhomna pao khat auma ahileh hiche hi atamjo in atho Hindi pao ahi”, tin Shah in aseibe in ahi.

India gam mihon Hindi pao hatah a aman diuvin Home Minister in temna aneiyin, Mahatma Gandhi leh Sardar Vallabhbhai Patel lungtup molsona hiding ahi, ati. “Hindi Day nikho a gamsung mi jousen inu pao phatah a atho ding chule Bapu (Gandhi) leh Iron Man (Sardar Patel) lungtup hi pao khat a amolso dinga temna kanei ahi”, tin Amit Shah in aseiyin ahi.

Hindi Day nikho a Bharatiya Janata Party (BJP) working president JP Nadda injong gamsung miho kipathu athot in ahi. “Hindi hi gamsunga akitho pen pao ahi’in, India gam chom chom in pao ahet ahi. Hiche hi eiho kipunkhomna chule vannoiyin pao a inei uva eihetpeh u ahi. Hindi Day kipathu kathot uvin, niseh a Hindi pao itho u hi hatho cheh uhitin, midang jong tilkhou uhite”, ati.

Congress spokesperson Randeep Singh Surjewala injong Twitter a gamsung mi kipathu athot in ahi. “Hindi hi mi puikhom a pao ahi’in, writer, poet leh journalist Hindi literature a kimangcha ho jouse Hindi Day kipathu kathot e”, ati. Hindi Diwas hi September nisim 14 kum seh a kimang ahi’in, Constituent Assembly in Hindi hi India official language dinga asei nikho geldoh na a nikho kimang jing ahi.

AIMIM chief leh Lok Sabha MP Asaduddin Owaisi in Hindi hi India gam kipunkhomna ding pao ahi, tia Home Minister Amit Shah in asei demna aneiyin, Hindi hi mijouse dinga anu pao ahipoi, tin aseiyin ahi. Saturday nikho hi Hindi Diwas a kimang tin aseiyin ahi. “Hindi hi India gammi jousen aman anu pao ahipoi. Gamsung a pao chom chom aumjeh a ahoina hi pachat ding go in. Article 29 hin India gam mi jousen pao, lekhajem chule chon leh khan ama ama a ajui thei nadinga tha kipe ahi. India hi Hindi, Hindu, Hindutva sanga lenjo ahi”, tin aseiyin ahi.

Education Minister in Knowledge-Yan hondohna nei; school khantouna lentah hiding ahi, tia sei

Imphal, Sept 14 (ET): Education Minister Thokchom Radheshyam in K-Yan tia kihe minthang Knowledge-Yan, All-in-One hondohna anei uvin ahi.

State Project Office Samagra Shiksha, Manipur, Babupara, Imphal khopi a Samagra Shiksha Manipur lamkaina a kin kimang ahi. Minister Radheshyam in ahoulimna a Information and Communication Technology (ICT) Programme noiya hiche hi kichepi ahi, tin aseiyin chule school education a khantouna (qualitative enhancement) aumna dinga kibol ahi, ati.

K-Yan hi ‘integrated community computer’ ahi’in, computer, projector leh television a kimang, Indian Institute of Technology, Bombay in IL&FS Education toh asemdoh ahi, ati. Zonal Education Officer, Manipur henga K-Yan pehdohna aneiyin, technology hi tukhang a dinga khangtou tah ahivanga hiche hin mihem akhel thei dehlou ahi, tin aseiyin ahi. Technology hin jilkung akhel theipon, ahivanga jilkung phatah khut a technology auma ahileh education system kikhel ding ahi, ati.

Th Radheshyam in pan kilahna masapen hi gamsunga um government school ho khantouna ahitei ding akinepna thu aseiyin chule tohgon thah hi themjilna thanop aumbe chehna hiding, khangthah ho lungthim a kitetna semdoh hiding ahi, tin jong aseiyin ahi. Project Approval Board of MHRD in school 224 hi ICT Component peh dinga phatsahna anei ahitan, school 224 lah a school 132 hi secondary school ahi’in chule 92 hi primary school ahi. K-Yan manchah ding dan jilkung ho kichuhna kipe ding ahi, tin jong aseibe in ahi.

Hetthei khat chu K-Yan hi technology platform ahi’in, smart classroom a dinga All-in-One manchah ahi. K-Yan a hi projector, laptop, speaker, display screen, in-built interactivity, E-Content leh DVD player pang ahi. Built-in web camera leh microphone hi K-Yan a kon ‘distance learning leh interaction’ bolna thei ahi’in, hoilai mun hijong leh kijahto nathei ahi, ati.

K-Yan hi server a jong kimangthei ahi’in, PC-based learning centre a sum kisumang suhlhom na ahi. Hiche hi computer a jong kimangthei ahijeh a school sunga operational leh administration machalna ding ahi. K-Yan hin English a pao kijil atosot ahi’in chule pao dang dang 18 jong atosot ahi. Hiche hi education curriculum ho kikoina pre-programmed kibol sa ahi’in, simlai leh jilkung ho dinga teaching-learning platform lentah ahi.

Kin gon a Commissioner, Education (S) T Ranjit Singh, Director, Education (S), Th Kirankumar Singh chule mopohna nei official leh jilkung hojong apang uvin ahi. K-Yan man je dan jong kin gon a vetsahna anei uvin ahi.