Themmo kichanto a hung kichai di (Adeidan cheh a FA ledoh diu)

Themmo kichanto a hung kichai di (Adeidan cheh a FA ledoh diu)

358
0
SHARE

Themmo kichanto a hung kichai di
(Adeidan cheh a FA ledoh diu)

Mi tamtah in Naga ‘Framework Agreement’ (FA) a ipi bepseu um ahitadem tia anagel chu ahung kiseidoh phat nin ima aumpoi tithei leu ahi. Manipur a meilhei te le Kuki te dehdeh in hiche FA a hi Final Agreement achen achaija kinoptona lekha phengmai (page) tamtah kijihdoh a soi kikai tona ana umdan’a anagel/ana ginmona chu Manipur gamgi kena jao diham, Kuki te chenna ho Nagalim a jao diham, Naga Autonomous Council a Kuki te gam ite jaokha di hitam ti ho anahi. 2015 a Naga FA soi kikai tona ana kibol’a pat Meilhei te dehdeh in itobang kinop tona soi kikai tona um hitam, centre in seidoh hen tia ahamdoh chan uleh ‘June 18 Uprising’ – mipi kiphinna avel’a soh kit di ahi tia centre govt gihna ananeijing u ahi.  Abul langa pat centre injong hiche FA a hin ima achen achai kinop tona aumpoi tia avel vel’a hilchetna anapehjing ahi. Tuchung a September lha kichai kah a Naga thingnoi boina thu seichai dia centre in ahinsei kit to lhon’a NSCN-IM lamkai ho Delhi a kihouna a dia acheuleh hiche FA a thucheng ana kijih phabep akithaimange tia sot tah ana kiselsel FA a thu kijih ho ahintahdoh u ahi. RN Ravi in thucheng/thugol athaimang’e kiti holeh kihouna ho ama deideijin ahum ahalin apeilele e kiti hi IM ho lunglhai louna ahijeh a palai (interlocutor) jong hi kheldoh in umhen atiu ahi. RN Ravi chun ama chamtah a ima abol’a aseidi hinaisailou, kiletsah tah in kihouna ho ah thu aseiji tia IM hon ngohna abol ho jong hi ama macham’a adeidei thu asei hilouheldi ahi. RN Ravi Nagaland Governor a kipansah kiti jong hi kihouna a palai ahijeh a Kohima ah chenden tholeh amun tah a thu umdan jouse ahetchen theina di ti ahin midang Governor di umlou jeh hilouhel ahi.

FA a akisei kinoptona chomcha a kijih holah a athupipen ho chu – (1) Naga ten thusim jat chombeh (unique Naga history) anei uve ti centre in hetpehna anei. (2) Shared sovereigny (India le Nagaland/Naga te  thaneina chungnung (sovereignty) kihom di, chuleh (3) Inclusive New Relationship between two entities (mijouse huop dia kinoptona umdi, nam ni- India le Naga kitimatna thah aneidi. Hiche ho hi FA a athupipen leh achomlam tah a kinoptona chu anahin, Naga Flag le Constitution ho ana kiseiphalou, Greater Nagaland umdi, Manipur gamgi kitongkha di ti ho umlou ahi. Ahin alhangpia kinop tona thu ahijeh a tua hi centre leh Naga (IM) hon ama ama deidandan’a hiche FA a anajih hou ahin kiledoh (interpret) diu ahitan boljong abol chehpan u ahitai. IM hon Naga history atiu hi India mi kahipouvin sotna chamlhatsa kahiuve tia alah/agel u, centre in kum 70 lang galguhbol thusim neite tia agel/alah ahi. Sovereignty kiti hi kihomkhen thei ahipoi. IM hon Naga te leh India govt sovereign power kihopdi atiu hi Independent gam 2 atina ahin, centre lahdan ahikitleh India constitution noija Centre le State govt ho power kihopna umsa bou ahikitne. “Inclusive” kiti hi Naga/IM ledohdan’a Nagaland bou hilouva gamtin’a cheng Naga jouse  atinau ahin centre dia vang Nagaland a Naga thingnoi leh Civil mipi kiloikhomna jouse jaona tina ahi. Kihouna hi anaisailou muthei ahijeh in koiman “keiho thu kiseichai masang’in” tin lekha thot thot hihjongleh kihouchaina umdeh loudi ahibouve.