Themjilna mun ho kikhah nalai ding; Imphal khopi le District Headquaters ho’a...

Themjilna mun ho kikhah nalai ding; Imphal khopi le District Headquaters ho’a May 31 chan nilhah nidan 6 akon jingkah nidan 6 chan total curfew umdia daan kisem

54
0
SHARE

Themjilna mun ho kikhah nalai ding; Imphal khopi le District Headquaters ho’a May 31 chan nilhah nidan 6 akon jingkah nidan 6 chan total curfew umdia daan kisem

Imphal, May 18(ET):  Tuni Manipur Chief Secretary Dr. J Suresh Babu akon thuso kimu dungjui in ahung lhungding May nisim 31 chan a Imphal khopi sung leh District Headquarters jouse a total curfew umding ahi akiti. Hiche curfew chu nilhah lam nidan 6:00 akon jingkah lam nidan 6:00 chan hiding ahi akiti.

Lockdown toh kisai a flight khatcha kiluhsah louding, phal na kipe ho chu Air Ambulance le Ministry of Home Affairs in phalna apeh ho bou hiding ahi. Themjil namun kiti phot kihonglouding, hotel le Restaurant ho khatcha kihong theilouding, cinema hall le shopping mall chuleh mi kikhop namun kiti phot kihong louding, mip kingon kiti phot jong khana kinei ding ahi akiti. May lha kichai kah a phalna kinei ding ho chu thil le lo angaicha inn a kithah lut,  khosung vengsung a dukan ho, chuleh pass nei a vah le ho hiding ahi. Gampam akon a thil le lo hin polut truck jouse kilut sah ding, truck driver le handyman a innlam che ding aum le quarantine a um masa ding u ahi akiti. Workshop  phabep jong hon ding a phal na kipe ding ahi akiti.

Hiche lockdown sung ahi pharmacy ho kihong ding, hospital clinic le kijan na kiti phot hona ding a phal na kipe ding, mipi ading a LPG cylinder ho jong home delivery adinga phalna kipe ding, post office kihongding, internet service ho, twi poho le nen chom ho jong natoh na kijom sah ding chuleh CAF& PD  department phalpeh na noi a petrol pump ho jong kihongding ahi. Khopi pam lam a lou natoh ho phal na kipe ding, lou natoh toh kisai a natoh na nei hoc he le va le kikhah louding, lou thil joh ho dukan nilhah lam nidan 2 chan kihon sah ding bank jouse kihongding chuleh ATM  ho jong kihong sohkei ding ahi. Print le electronic media jouse kihongding, courier service, private security service, neh le chah semnamun ho, donding twi semna, chuleh dukan dang dang ho jong kihongding ahi akiti.  Private gari ho hi emergency hobou phal na kipe ding,  govt office ho jong staff alhom na thei channa natoh na kinei sah ding ahi akiti. Government office ho a koima lutsah na vang kinei louding ahi. Mipi polam pot tapou in maitom akitom ding u, mun jouse a mi 5 vaal kitit na phal hilouding, chil set thang ho matdoh ahi le ki leusah ding ahi akiti.

Manipur a NSCN-IM camp aume ti thu a sorkar in action alah dan aseidoh dinga UCM in temna nei

Imphal, May 18(ET): United Committee Manipur (UCM) in Manipur gamsung Senapati le Chandel district a NSCN -IM camp aum thu a action alah dan Chief Minister in aseidoh dinga temna anei uvin ahi.

Hiche toh kisaiya memorandum apelut uvin chule United Naga Council lamkai masa hetthei umtah phabep in Manipur gam a camp phatah a kisem mun ni- Huthrong Brigade camp, Senapati le Ashiho Chaomi Battalion, Chandel district a achesa May nisim 8 le 13 nikho a kithopina lhangphong tah a aneiyu ahi, tin memorandum a asei uvin ahi.

Thil umchan hin Manipur gam hopsunga NSCN-IM thingnoimi ho tuhtang louva lhangphong tah a aum uve, ti aphotchen ahi’in, hiche hi aumtalou India Prime minister anahi Atal Bihari Vajpayee in achesa July 27 nikho a India sorkar le NSCN-IM in asem Ceasefire Agreement hi Manipur gam a kikehlen lou ahi, tia asei toh kitoh lou ahi, ati.

“UNC lamkai ho hitia achon uhi Great June Uprising, 2001 a martyr ho kijumso na ahi’in, gamsunga chamna ngailu ho lunghanna ding ahi. Mipi chule UCM in Inda sorkar chule state sorkar in ibon uva eijoulhep u ahi, tia aginmo ahi. India sorkar le state sorkar in avel vel a Manipur gam a NSCN-IM camp chule thingnoi aumpoi, tia asei jing ahi’in, chule gamsunga NSCN-IM thingnoi akimu le dan dungjuiya action kilahkhum ding ahi, tia jong avel vel a kitepna anei ahitai”, tin memorandum a asei uvin ahi.

Achesa February 25, 2017 kum a Imphal khopi a Public meeting abol nauva PM Modi in NSCN-IM hotoh Centre in chamna thu asei hin Manipur gam mi ho atohkhah louding ahi, tia PM Modi in asei ahi’in chule Manipur chule agam mi ho lunglutna tongkha thei Naga Accord a ima thu aumpoi, ati ahi. Achesa January 4, 2019 kum a Lok Sabha election a PM Modi in Framework Agreement hin Manipuri miho pohnatna asodoh louding ahi, ati ahi.

Chule April 7, 2019 kum a PM Modi in ‘Framework Agreement’ hin Manipur gamgi chule kivaipohna atohkhah louding ahi, tia aseikit ahi. Naga thu kiseilhah na a hi gamsung economy, socio political, culture tohkhah louding ahi, tin UCM in aseibe in ahi.

Kpi police hon mipi ho kithopi

Kpi, May 18(UNA): Covid-19 jeh a gamsung aboi jeng vang in michung a natoh phat Kpi police hon abol jing uvin ahi. Janhi chun Officer-in-charge Inspector Khogen makaina in aloi chapang hotoh Distict Screening centre mun a nen kisuthang ho asutheng uvin ahi. M. Thomas lentol a gampam akon hunglut ho screening bolna mun a nen kisuthang koiman jong atheh nomlou hou chu atheh uvin chule District police akon kithopi na dk. 3000 jong Kangpokpi Youth Union ho heng a ape uvin, Khogen in aseina achun hiche hi kipa thilpeh ahi in Union hon tanglouva kithopina eipeh jeh uva kipa jeh a kipe ahi ati. M. Thomas lentol sung a nen paina ding in district police hon dumtin 10 atohdoh uvin ahi. KYU hon Police hon mipi agelkhoh najeh un kipathu aphong un ahi.

Mumbai a kon hung kile hon Senapati DC chunga ngohna kisem suhthengna neiyu

Imphal, May 18(ET): Senapati District Civil Body hon Chief Minister henga Senapati district DC Salam Somorjit apet pet a ‘suspend’ bol dinga thumna aneiyu chungchang a Mumbai khopi a kon hung kile a Cancer Patients’ Party hon suhthengna thuso anei uvin ahi.

Covid-19 pandemic kisei khoh laitah ahijeh a Civil body hon lungkhamna aneiyu hi hetthem na kanei uve, ahivanga achesa May nisim 13 nikho a Mao gate leh Senapati a thilsoh umchan hi sihnei langneina beiya hilchenna kanei nom u ahi, tin thuso a asei uvin ahi. “Ahung kile hohi member 36 chule driver 3 kahiuvin, hiche lah a Mumbai a lockdown masanga kijen pan a chule chemotherapy kibol cancer natna nei 13 pang ahi.

State sorkar teni in phatsahna anei jouva ambulance le bus booked kabol uva, sun 4 le jan 4 lhing lamsaotah hi May 8 nikho a kahin jot pan u ahi. Adamlou phabep hi nosefeeding kibol a chule phabep hi lam lhung a glucose drip kipe ahi’in, chule India sorkar in Covid 19 guidelines asem kajuiyu ahi. Lamkah a nap ha tong a neh kichun eipe uva phabep katoh uvin, achung uva kipana sangtah kanei uve”, ati.

May 13 jan nidan 6.15 a Mao Gate kalhun uva, verification ho abol jou uva IIT Mantripukhri a aban test le verification bol dinga eisol u ahi. Ahivanga Mao gate a akium sot ding jeh a authority ho henga gari kingah nading chule cancer natna neiho neh le chah chule lhunna ding mun eigon peh thei diuham tia kadoh ule amun a duty bol a SDO in jukham pum a paocheng ngailou tah a eihou uva ‘social distancing’ jui louva eingoh u ahi.

Duty bol a OC le SI injong voh a chule jail a koi dinga eigih uvin, ahivanga alunghan angah uva eikithopi diuva joh temna kaneiyu ahi. Achaina a km 2 gamlha mol chunga jan nage theidiu ahi atiu ahi’in, amun agamlhat jeh a adamlou ho alhun joulou ding jeh a kaboiyu ahi. Achaina a, jan nidan 9.30 don a phone a District authority kakijahmat pi ule amahon Senapati a hung uvin, tia kithopi dinga eiseiyu ahi.

Senapati kalhun uva DC in phatah a eilamto uva chule Covid-19 protocol kajui diuva khoutah a eithuhil uva, keihon jong jui dinga kitepna kaneiyu ahi. Ngehna kaneijeh uva DC in jan a kaum nadiu le ka nehdiu eigon peh u ahi’in, achunga kipana sangtah kanei uve. Kakile kah uva kaumnao building a kon achedoh koima kaum pouve, tin suhthengna anei uvin ahi.May 14 jingkah nidan 6.30 a IIT Imphal a medical verification bol dinga kipandoh u ahitan, vangset umtah a group lah a um mi 2 Covid 19 positive hi ahi. Adammo teni tua hi RIMS, Imphal a um ahi.

Ka kholjin pat uva kon dan kapalkeh pouvin chule chingthei tah a kaum u ahi. Senapati miho hi keiho member 2 positive kahi ahet jeh uva lungkham ahiu kahethem uvin, ahivanga District Commissioner, Senapati chunga ngohna kisem hi thudih ahipoi. Ama phatna le hangsanna jal a Senapati a cancer natna neiho lungmong a kichol ahi’in, aphatna ho a themmo sah louding ahi. Vengsung miho chule ja umtah CSO hon thil umchan ahetthem uva, thutah hetna nei louva boina asem lou diuva ngehna kaneiyu ahi, tin Cancer Patients’ Team hon ngehna aneibe uvin chule Senapati DC chunga akipanau thu sangtah aseibe uvin ahi.

2001 census toh kisai a Delimitation hi gamsung dinmun toh kitoh louding ahi: O Joy

Imphal, May 18(ET): Manipur veteran politician le minister lui Okram Joy Singh in central govt in delimitation exercise 2001 census toh kisai a Northeast state li sung a bolding a tohgon anei hi gamsung dinmun le thilsoh hot oh kitoh louding ahi ati.

MLA lui pa chun 2001 census dungjui  a natoh na akinei le adeh a Manipur sung a aboi an ding tamtah umding ahi ati. Hetthei khat chu central govt in assembly seat le parliamentary constituency toh kisai a gamgi ho thah vet tup ding a achesa February nisim 28 a phondoh na ana nei u ahi.

Hiche natoh na hi Northeast state li Assam, Arunachal Pradesh, Manipur le Nagaland ho a bolding a hetsah na ana kinei ahi. O Joy in thuso mho toh akihou limna a State dang dang a chu thil dang dang jeh a kibol kigo hintin hinlal Manipur sung achu Senapati, Ukhrul le Chandel mi hungha pun jeh a kibol kigo ahin, hiche hi thil dih ahipon, thinglhang gam adeh a Senapati sung a um Mao-Maram, Paomata le Purul lhang sung a mihem 2001 le 2011 sung a population ahilou lamtah a ahung khan hi thildih ahipon ahi ati.

Machi, Tengnoupal, Chandel le Chakpikarong  chuleh Ukhrul district sung a mun phabep  a jong ahilou lamtah a population hung khang ahi dan jong tahlang na MLA lui pa chun ana nei in ahi. Hicche assembly seat ho hi thnglhang gam a mi tam jeh a peh be ding ahi le phaicham gam akon seat 3 kila doh ding ahin hiche hi ahithei louding ahi tinjong O Joy chun ana sei in ahi.

Vadodara akon Special train khat  Jiribam hunglhung ta

Imphal, May 18 (ET): Covid-19 jeh a tangden ho Vadodara akon special train in ahinpo in tuni nilhah nidan 4:42 chun Jiribam Railway Station ahung lhung tauvin ahi. Mi 18 chu Ukhrul akon ahiuvin, mi 32 chu Ccpur leh Pherzawl district ho,Tamenglong district mi 10 ahiuve. Senapati district mi 25 ajao uvin, Chandel District lmi 29 chule Kakching district mi 68 ajao uvin ahi.

Bishnupur district mi 50, Kangpokpi district mi 23 chule Thoubal district mi 111 ajao uvin chule Imphal East leh Kamjong district mi 97,  Imphal West leh Tengnoupal district mi 132 chule Noney district mi 14 ajao uvin amauho hin Jiribam adalha tauvin ahi. Jiribam district Administration makaina in ahung lhung thah jouse chu screening abolsoh kei uvin ahi. Tuni a hung lhungthah ho jouse ama ama district alhun teng ule quarantine centre a ni 14 sung umcheh ding u ahi.

Delhi tangden Manipur mi 20,000 vel pohdoh ding tohgon um

Imphal, May 18: Manipur govt in state dangdang akon Manipur gammi tangdan ho apohdoh jing utoh lhon in Delhi a gammi tangdan ho pohdoh ding tohgon jong ahin nei uvin ahi.

Hetthei khat chu Delhi sung a Manipur mi 20,000 lam in inn lam ahung kile nom utoh lhon a amin u pehlut na ana nei u ahi.  Hiche mipi ho hi train a poh doh ding a tohgon kinei ahi.

Ahung nading u phat hi ahunglhungding nikho phabep sung a phondoh na kinei ding ahi tin thuso akimu in ahi. Delhi a gamsung mi tam ahi toh lhon a phase 15 lam hung umding in akisei in ahi. Ahund ding ho hi test kibol ding negative hiho bou hung kipodoh ding ahi akiti.

Kolkata a anatoh na a kon haina nei Manipur mi nurse hon lungmong tah a natoh sah dinga authority hon kitepna aneileh natoh jop kit dinga seiyu

Kolkata, May 18: Kolkata khopi a nurse tamtah in anatoh nauva kon haina anei uvin, agam a akile uvin ahi. Amaho lah a nurse phabep hin sorkar in hospital a amaho ‘security’ le ‘safety’ apeh a ahile bou kile dinga nopna aneiyu ahi.

Anatoh na a kon haina neiya nurse khat in Manipur sorkar a kon ‘offer’ hoicheh amu a ahile tia akile ding eiphal peh louvu ahi, ati. Kolkata a private nursing home a natong Karuna Rai in Manipur gam a kon phone a Aajtak hotoh akihouna’a, Manipur gam a kile nurse holah a khat kahi, tin aseiyin chule Manipur government a natoh alah ding eikiphal peh poi, tin aseiyin ahi.

The Association of Hospitals of Eastern India in nurse hon haina aneiyu thu a Chief Secretary henga lekhathot apeh u ahitai. Hiche thu a Chief Secretary in pan alah dinga thumna aneiyu ahi. State sorkar in nurse ho ahung kile nadinga ‘stipend’ hoitah tah sempeh dinga ‘offer’ abol ahi, tia jong lekhathot a aseiyu ahi. Karuna chule nurse adang phabep in state sorkar a kon hitobang offer amu lou ahi.

Rupak Barua, secretary, Association of Hospitals of Eastern India in nurse 500 vel in haina anei ahitai, tin aseiyin ahi. West Bengal BJP Dilip Ghosh in, nurse tamtah in haina aneijeh a state health department in hahsatna ato ding ahi, ati ahi.

Karuna in asei dungjuiya, anatoh nauva kon haina aneiyu hi ‘security/safety’ jeh ahi, ati. Karuna hin Charnok Hospital a na atoh ahi’in, Hospital authority hon apeh u hostel a nurse adang phabep toh umu ahi. Staff member leh hospital a kijen mi phabep coronavirus positive ahi jouva hospital hi ni phabep kikhah ahitai.

Hospital a coronavirus natna hetdoh ahi thu vengsung mihon ahet jouva vengsung miho kachunga akhanse uvin chule hospital authority ho hetsahna kanei vanga kithopina kamu lou ahi. Ventup dinga kitepna phatah a anei uva ahile bou nurse ho kakile diu ahi, tin Karuna in aseiyin ahi. Alangkhat a, Karuna thusei hi CEO, Charnok Hospital in anop louna thu aseiyin ahi.

Manipur gam a kon nurse phabep Kolkata a kile dinga um ahi’in, ahivanga amaho hin natohna pe ho (employer) chule state sorkar in lungmonna peh dinga kitepna anei masat diu adeiyu ahi. Association of Hospitals of Eastern India Secretary Rupak Barua in hiche chungchang a Chief Secretary in pan alah a chule boina asuhlhap dinga temna anei ahi.

India a nikhat sunga covid 19 case athah 5,242 kihetdoh be, natna jeh a thi 3,029 lhingta

New Delhi, May 18: India gam pumpi a Lockdown chule dan khoutah tah akichepi vanga coronavirus case kisei aniseh a atam cheh cheh in, Monday nikho a case athah 5000 val akihetdoh in, hiche hi India gamsunga nidan 24 sunga case kihedoh atam na pen ahitai.

Natna neiya agom a 96,169 lhing ahitai. Achesa nidan 24 sunga Health Ministry thulhut dungjuiya coronavirus case athah 5242 kihetdoh be a chule athi 157 um ahi. India gam a natna nei agom a 56,316 hi active case ahi’in, mi 36,823 damdoh a, gamdang mikhat kinung le chule natna jeh a mi 3,029 thi ahitai. Recovery Rate hi India gam a 38.29 percent hi ahi.

India gamsung hi tua coronavirus in atohkhah natna akisei khohna top 10 country list a pang ahitai. Maharashtra a natna nei 33,053 val a, India gam a dinga natna akisei tamna pen hijing nalai ahi’in, aban a Gujarat gam (11,379), Tamil Nadu (11,224) le Delhi (10,054) ahi. Maharashtra gam a hi athi jong kisei tampen ahi’in, natna jeh a thi 1,198 lhing a, aban a Gujarat (659), Madhya Pradesh (248) le West Bengal (238) ahi.

Achesa Sunday nikho a India gam a case athah 4987 kisei ahi’in, hiche hi akalna asan na pen ahi, tia ana kisei ahi. Tu a India gam a Covid-19 positive akisei jat hi virus ahung kisei pat na China gam a natna nei kisei jat sanga tamjo ahitai.

Labour & Employment Minister in Covid-19 toh kisaiya ‘labourer’ ho aphatcha kithopina peh nadinga department official hotoh meeting bol

Imphal, May 18(ET): Labour & Employment Minister Dr. Thokchom Radheshyam in Labour & Employment department official hotoh gamsunga natong ho kithopina peh nadinga kigotna angaicha ho chule kigot dan thu a ‘review meeting’ abol uvin ahi.

Office Chamber a meeting abol nauva Additional Chief Secretary, Labour & Employment, Letkhogin Haokip, Under Secretary, Labour & Employment, Huidrom Sofia Devi, Deputy Labour Commissioner Karam Bono Singh le Labour Inspector ho apang uvin, department in kigotna anei dan thu official hon Minister pa henga asei uvin ahi.

Official hon Atmanirbhar Bharat (Self-Reliant India Movement) Part (1) Business  (MSME panna), Pradhan Mantri Garib Kalyan Package (2)- Building and Contruction Wokers Welfare Fund a kisei banga natong  ho COVID-19 toh kisaiya kithopina peh nadinga tohgon ho asem diuva Minister pa in thuhilna aneiyin ahi.

Tuchan geiya Building and Construction Workers Welfare Board a um CESS fund a kon Building and Other Construction workers 41,114 hi dangka 1,000 cheh kithopina a kipe ahitai, tin aseiyin chule official hon kithopina aphat cha akipeh theina dinga ‘organised’ le un-organised sector’ a kon worker/labourer ho akhol diuvin thuhilna jong aneiyin ahi.

Organised sector a gamdang a kon hung natong 20,188 chule unorganized sector a phabep hi authority vetkolna noiya um ahi, tia asei jou uva Minister pa in akidalha hon aganna thei pen a sorkar a kon kithopina amu nading uva hetdoh ding ahi, ati. Dr Th Radheshyam in Prime Minister Narendra Modi in dangka 20 lakh crore ‘special economic package’ phondohna anei thu avel a aseikit in ahi.

PM Modi in achesa May nisim 15 nikho a AtmaNirbhar Bharat Abhiyan (Self Reliant India Campaign) phondohna anei ahi. Covid-19 sunga hahsatna le boina toh kisai ho thu Department a ahetsah diuvin Minister pa in aseibe in ahi.