Thangminlien Kipgen panna a NPP Manipur unit a lamkai luboh 4 party...

Thangminlien Kipgen panna a NPP Manipur unit a lamkai luboh 4 party a kon kinodoh

70
0
SHARE

Thangminlien Kipgen panna a NPP Manipur unit a lamkai luboh 4 party a kon kinodoh

IMPHAL, Aug. 26(UNA): Party douna natoh jeh a National People’s Party president anahi khat panna a functionary luboh 4 kum 6 sunga dinga party primary membership anei nauva konin anodoh tauvin ahi.

Party a kon kinodoh functionary 4 ho lah a NPP state president anahi Thangminlien Kipgen, Ch Ajang Khongsai (Working president), Dr. Ph Jilasana (vice president) chule Sushil Huidrom (vice president) apang uvin ahi. NPP National president Conrad Sangma in achesa August nisim 24 nikho a Article 26.2(i), Constitution of National People’s Party noiya anodoh ahi.

Expulsion order dungjuiya, Central Disciplinary Committee, National People’s Party in NPP Manipur state president anahi Thangminlien Kipgen henga dan dih louva State Election Authority asem a chule Party Constitution toh kitoh louva thaneina ahilouleh jurisdiction nei louva election bol nadinga Returning Officer alhen thu hetsahna aneiyu ahi.
Achesa August 20 nikho a Thangminlien Kipgen hi National People’s Party a kon kinodoh ahitan, party toh kisai natohna a pan alah ding kiphal talou ahi. Thangminlien Kipgen in election bol nadinga na atohna jouse hi kipom lou chule legal sanction aumlou jeh leh Party Constitution toh kitoh lou ahijeh a kichepi louding ahi, tin asei uvin ahi.

August nisim 8 nikho a Show Cause Notice kipe chule nisim 20 nikho a order (08.08.2020 leh 17.08.2020) alahdoh dinga thuhilna akipeh nunga Thangminlien in August nisim 23 nikho a Party thuhilna toh kitoh louva President, NPP Manipur State Unit post a election bol nadinga natoh achelhah pi ahi. Election kibol hi dihlou ahi in, Constitution (Party) toh kitoh lou ahijeh a kisang louding ahi, tin order chun aseibe in ahi.

Ch Ajang Khongsai (Working president), Dr. Ph Jilasana (vice president) leh Sushil Huidrom (Vice president) hin Thangminlien toh pan alahkhom jeh a party douna natong ahi tia party a kon kinodoh ahi, ati.

NPP hi Manipur a BJP lamkaina coalition government a pang ahi. Thulhut dungjuiya, state unit president Thangminlien Kipgen term hi August 25 nikho a kichai ahitan, party vice president Dr Ph Jilasana hi National president phatsahna beiya ex-officio Returning Officer dinga alhen a, party sunga election bol ding agot ahi. Achesa August nisim 20 nikho a party election anabol nauva Thangminlien hi candidate dang in nomination apeh loujeh a Thangminlien hi akitet pi um louva election kai doh ahi.

Alangkhat a, NPP national president Conrad Sangma in NPP Manipur state president (interim) dinga Minister N Kayisii alhendoh a, Central Election Authority toh kihoutoh na aneiya party election lamkai nadinga mopohna apeh ahi.

……………………..

Health Minister in gamsunga dinga amasapen ‘Teleconsultation-OPD’ hondohna nei

Imphal, Aug 26(ET): Health and Family Welfare Minister L. Jayantakumar Singh in Medical Directorate, Lamphelpat, Imphal khopi a Wednesday nikhon sSanjeevaniOPD platform mangcha in Teleconsultation hondohna anei tan, Manipur gam a dinga hitobang platform masapen ahi.

Chief guest a pang Jayantakumar Singh in ahoulimna a, tahsa damthei na hi sector thupi tah khat ahi in, sorkar in gamsung miho dinga health care service khantou sah ding khohsahna anei ahi, ati. Hitobang health platform hondohna kinei hi gamsung mihon sum sumang louva a inmun uva jon doctor ho henga atahsa dammo na thu asei thei nadiu ahi in, mipi dinga phachom tah hiding ahi, tin aseiyin ahi.

Lou lekha (medical prescription script) jong internet a kon athot diu ahi. Hiche facility muthei nadinga internet facility umna smartphone/laptop/computer manthei ahi in, hiche hi Covid-19 pandemic sunga mipin hahsatna ato ho suh ol nadinga akithopi lentah hiding ahi, tin minister pa in aseiyin ahi.

Covid-19 in vannoi pumpi economy atohkhah a asuhboi soh ahi in, phat sottah ache jom a ahileh hinkho man ahahsat ding dan hi gel a hetthei ahi. Natna jen na a dinga scientist tamtah in pan alah ahi in, tu phat hi gamsung mihon thu hetna chule athu hillhang na a aman ngai ahi, ati.

Hiche platform hi akipat til a doctor 30 kikoi ding ahi, tin Health minister in aseiyin chule mipi natong dinga mun chom chom a um health center 220 a natoh pat ding tupna um ahi. Aban teng sorkar in TeleconsultationOPD hi state dang a um doctor ho pan theina dinga akehlet ding ahi in, gamsung mihon esanjeevaniopd.in a amin u register abol uva tuni a kon TeleconsultationOPD phatchomna akilah thei diu ahi, tin minister pa in aseibe in ahi.

COVID Care Centre phabep a dei umlou thilsoh lhung ho thu Minister Jayantakumar Singh in aseiyin, centre a umho leh mopohna neiho kah a kihetkhelna neocha aumjeh a public thil kisuse hi thil dihlou ahi, ati. Sorkar in Covid Care Centre leh Quarantine center a umho lungmon nading leh kithopina dinga bol thei chan abol ahi in, amun a umho dinga lunglhai louna um jongleh department in centre ho khohsahna aneilou ahipoi, ati. Chule inmate ho lungneng tah a aum uva, alunglhai lounau phatah a asei diuvin temna aneibe in ahi.

Kin goun a President, Director, Health Services Manipur Dr K Rajo Singh injong ahoulimna a pandemic douna dinga natong ding mi, kivenna ding manchah chule health facility dang dang alhing in aumnai, tin aseiyin ahi. Frontliner staff ho jong aniseh a pontho cheh cheh u ahi in, tu dinmun a TeleconsultationOPD akihon doh hi mipi dinga facility thah ahi, ati.

Kin goun a Additional Director Health, Dr Kh Sasheekumar Mangang, Deputy Director Dr Tomcha Singh guest of honour a apang in chule State Health Services leh NHM Manipur official leh staff ho jong apang uvin ahi.

Xxxxxxxxxxx

CSO chom chom in ‘Draft State Drug Policy’ thu seikhom

IMPHAL, Aug. 26(UNA): Human Rights Alert (HRA) Conference Hall, Kwakeithel mun a Wednesday nikhon CSO hon ‘Draft State Drug Policy, Manipur’ thu a kihoukhom na anei uvin ahi.

Principal Secretary Social Welfare V Vumlunmang henga draft policy thu a mopohna nei stakeholder ho dohna aum jouteng giltah a kihoukhomna nei angai dan thu sei dinga meeting a kilolna anei uvin ahi. State Draft Policy thu chule ichan geiya lolhing tah a kichepi jouding ham ti thu aseiyu ahi. Stakeholder hon kihouna a ‘supply reduction’ thu jong asei uvin ahi.

Tu dinmun a criminal justice system in khamnathei a sumkol vei ho gotna apeh joulou thu asei uvin chule mi neiya abol thei tah tah leh thunei ho hiche a apan thu jong asei uvin ahi. Khamnathei thil tamtah a kiman hohi sihnei langneina umlouva athu khol angai dan thu asei uvin, politician ho thuneina umlouva seilhah angai dan jong asei uvin ahi.

Manipur a khamnathei douna leh vetkol nadinga mipi lungdei dungjuiya civil society hon pan alahkhom dinga aseibe uvin ahi. Meeting a CADA, CONE, USER, AMSU, DESAM, AIMS, AMKIL, ADVISAV, AIMS, WASEDEV, IKAL, EEVFAM, Lousal, LEEPUN, HRA, legal expert ho leh adang dang ho jong apang uvin ahi. PIL no 34 of 2020, High Court of Manipur (USER-Manipur) a co-petitioner Paojel Chaoba leh HRA lamkaina a kihouna chelha ahi.

Xxxxxxxxx

Gamdang a kon hung kile ho Covid-19 test bol pai ding chule negative hi ho inn a sol dinga state sorkar in thuso nei

Imphal, Aug 26(ET): Gam dang a kon hung kile ho gamsung ahung lhun lhun uleh Covid 19 test bol pai ding chule coronavirus negative ho inn a akile diu phalpeh ding ahi, tin state sorkar in Tuesday nikhon thuso anei uvin ahi.

Manipur sorkar in Tuesday nikho a gamdang a kon hung kile ho vetkol ding dan SOP velvetna anei nauva Covid-19 negative hi ho quarantine centre a aum ngai lou dinga asei uvin ahi. Notification kisodoh dungjuiya, state sorkar in Manipur gam a hung kile lhung jouse apet pet a Covid-19 test abol ding chule negative hi ho a inn uva akile ding kiphal ding ahi.

Gamdang a kon hung kile hon Covid a kon kivenna dinga thuhilna umho- mask bol ding, savon leh twi a khut sop jing ding, social distancing jui ding chule adang dang ho phatah a ajui diuva jong thuhilna anei uvin ahi.

Test kibol a negative hi ho Quarantine centre a kikoi louding chule District Chief Medical officer jousen gam dang a kon hung kile ho apet pet a test abol ding uva Chief Secretary Rajesh Kumar in soi akai na notification a thuhilna aneibe uvin ahi.

Xxxxxxxxx

State sorkar in Japan henga kithopina thumna ‘proposal’ apehlut dinga ngehna um

Imphal, Aug 26(ET): Apunba Imagi Machasing in New Delhi khopi a um Japanese Embassy a kon Japan sorkar in kithopina anei diuva ngehna anei jou uva Covid 19 douna a Manipur sorkar in Japa kithopina alah nadinga proposal apehlut dinga temna anei uvin ahi.

Japan sorkar in ‘green signal’ eipeh u ahitan, ahivanga diplomatic channel a thot ngai ahi, tin thuso anei uvin ahi. Hiche thu a Health Minister Langpoklakpam Jayantakumar Singh in Union External Affairs MLok Minister Subrahmanyam Jaishankar toh kihouna anei ahi.

Lok Sabha MP Lorho S Pfoze in Manipur gam mi ho aganna thei pen a kithopi dinga External Affairs Minister henga lekhathot jong apeh ahitai, ati. External Affairs Minister in lekhathot adonbut na a, Minister pa in Japan sorkar toh Health sector a dinga ‘programme loan’ thu a kihouna aneiyin, Covid-19 nat douna dinga Japan kithopina chule grant-in-aid noi ahi, tin thuso chun aseibe in ahi.

State sorkar in Economic Affairs department, Finance Minister henga proposal apeh dinga jong Minister in asei ahi, ati. AIMS director Atom Sunil Singh in achesa March lha a Northeast India a Covid-19 case masapen ana kiseiya hi Japan authority ho henga kithopina ngehna ananei ahi. Ngehna anei ‘minute 15’ jouva Japanese authority hon jong state sorkar ahilouleh centre sorkar a kon asei diuva donbutna anei ahi, tin AIMS thuson aseibe in ahi.

xxxxxxxxx

Covid-19 case punbe jing jeh’a CAPF posting chomkhat khongai sah dinga state sorkar in Centre henga ngehna nei

Imphal, Aug 26(ET): Manipur gam a Covid-19 case akal be jing toh kilhon a Centre in pandemic dinmun a oldom kah a Central Armed Police Forces (CAPF) personnel gamsunga um ho transfer leh posting akhongai ding uva Chief Minister N Biren Singh in temna aneiyin ahi.

Thulhut dungjuiya, CM Biren in Union Home Ministry henga CAPF ho transfer and posting hi phat chomkhat a dinga akhongai ding uva temna anei ahi, ajeh chu suty a kon hung kile ahilouleh duty leh posting a dinga report bol a sepai tamtah Covid-19 positive ahi kihedoh ahi.

Tuchan geiya Manipur a Covid 19 positive hi a CAPF personnel 1,431 lhing ahitan, hiche lah a mi 658 dam doh a chule mi 772 hi kijen nalai ahi. Chule gamsunga active case aumjat hi tu dinmun a 1,608 lhing ahi. CM Biren lamkaina a Wednesday nikho a CAPF official luboh hon Covid-19 dinmun velvetna dinga meeting anei nauva, pan lah ding dan aseikhom u ahi.

Achesa Tuesday nikho a, Manipur a Covid-19 positive kimu be case athah 82 lah a CAPF 9 pang a chule anikho ma ma a CAPF personnel natna nei mi 23 dam doh ahi. August 26 chan a Manipur a Covid-19 case 5585 lhing ahitan, hiche lah a active case 1,731 um a chule natna a kon dam doh 3,829 lhing ahitai. Natna a thi hi 0.41 percent ahi in chule recovery rate 68.55 percent a um ahi. Tuchan geiya Covid-19 natna nei mi 25 thi ahitai.

Xxxxxx

Manipur a Covid-19 jeh a mikhat thibe; Positvie case thah 141 kimube

Imphal, Aug 26(ET): Achesa nidan 24 sunga Imphal West district mi kum 65 a upa numei khat Covid-19 natna a akijenna JNIMS a athi in, Manipur gam a natna a thi mi 25 alhingtan ahi. Gamsunga natna nei mi 141 akimu be in, natna nei agom a 5,585 alhingtai, tin state health department thuson aseiyin ahi.

Positive case athha kisei ho lah a CAPF 25 leh milham 116 pang ahi. Milham Covid-19 positive hi a mi 116 lah a Imphal West district mi 57, Imphal East 32, Thoubal 14, Bishnupur 4, Churachandpur leh Noney a 3 cheh, chule Kakching leh Noney district mi khat cheh ahi. Mi 116 lah a 114 hi local transmission ahi in, abon uva Covid Care facility a achon tauvin chule angaicha ‘containment leh contact tracing’ ho jong kipan ahitai.

Alangkhat a, Covid-19 natna nei ho RT PCR test akibol jouva negative ahi tah jeh uvin mi 17 akijen nau CCC chom chom a kon discharged abol tauvin ahi. Discharge kibol ho lah a CAPF 8, RIMS a kijen mi 8 chule RD Wing (1) a kijen mikhat pang ahi.

Manipur a positive case hi agom a 5585 (milham 4129 leh CAPF 1456) ahi in, adam doh jat 3829 (milham 3163 leh CAPF 666) ahi in chule active case 1731 (milham 942 leh CAPF 789) ahi. Recovery rate hi tua 68.55% a um ahi, tin thuso chun aseibe in ahi.

Alangkhat a, Health and Family Welfare Minister in State HUB (DHS) leh II Centre (District Hospital leh PIIC) a state Teleconsultation leh eSanjeevaniOPD hondohna aneiyin ahi. Internet umna smartphone, computer leh laptop mangcha a adamlou ho leh doctor ho akihoumat thei nadiu ahi in, eSanjeevaniOPD app hi Google Play store ahilouleh website www.csaniccvaniopd.in a kon download bol thei ahi. Jingkah nidan 10 a kon nilhah nidan 3 sung (working days jouse) a adamlou hon government doctor ho hiche a hi akihoumat pi theidiu ahi.

Xxxxxxxx

State sorkar in akitepna abulhit dinga Tribal simlai kiloikhomna 3 in thumna nei

Imphal, Aug 26(ET): All Tribal Students’ Union (ATSUM), Kuki Students’ Organisation (KSO) GHQ leh All Naga Students Association Manipur (ANSAM) panna a tribal kiloikhomna thum in Wednesday nikhon achesa August nisim 13, 2019 kum a simlai kiloikhom hon ‘charter of demand’ apeh lut u chepi na dinga state sorkar in kitepna anei dinga ngehna anei uvin ahi.

Ahung lhung ding August nisim 31 nikho kah a state sorkar in kitepna anei thu hi achepi nadinga thumna asan peh louva ahileh tribal simlai kiloikhom hon maban a itobang pan alah ding ham ti aseilhah diu ahi, tin Seiboi Haokip, General Secretary, ATSUM in thuso aneina a aseiyin ahi. Achesa August 13, 2019 kum a lekha kipelut dungjuiya state sorkar in lha thum sunga kitepna abulhit ding chule Medical leh education sector khohsahna apeh dinga asei ahi, tin Seiboi Haokip in aseiyin ahi.

Sorkar in kitepna anei nunga jong tuni chan geiya health leh education sector machal nadinga natoh ima chelha lou ahi, tin aseiyin chule specialist doctor appoint bol dinga kitepna aneiyu hi jou ahi in, infrastructure semphat na dinga kitepna jong mang tobang ahi, ati.

Covid 19 pandemic jeh a mipin hahsatna sangtah ato laiya, Hill district a um Health care service centre ho dinmun hoilou tah a um a, natong ding mi chule manchah kitup jong umlou ahi, tin Seiboi Haokip in aseiyin, hospital a ambulance peh dinga kitepna aneiyu jong kimu loulai ahi, ati.

“District sung thinglhang gamlha tah tah a adamlou ho kijen dinga khosung mihon apoh nading akisem thu uva, lam saotah tah a apoh uhi mijousen amu ahi in, sorkar in thinglhang gamlha tah a cheng ho khohsahna aneilou ahi”, ati.

Education sector chungchang a, tribal simlai kiloikhomna thum in sorkar in akitepna abulhit loujeh a alunglhai louna thu asei uvin ahi. Teacher post ong tamtah lah nading natoh umlou, contract teacher ho regularized bol dinga kihouna a kitepna sorkar in anei jong amin mai mai ahi. Tribal Affairs department a post 32 lah nading chule MIL teacher lah dinga kitepna aneiyu jong gamlha tah hi nalai ahi, ati. August nisim 31 nikho kah a sorkar in akitepna leh thumna kinei ho abulhit louleh thipbeh a kium louding ahi, tin Seiboi Haokip in aseibe in ahi.

xxxxxxxxxxxx

CMO, CCpur in Covid-19 test kibol ding chung chang thu’a thuso miho kimupi

B.Lalboi Gangte

CCpur, August 26 (ET): Chief Medical Officer (CMO) Churachandpur in tunin (Aug 26) office mun’a Press/Media ana kimupi na’a Covid-19 jeh’a test kibol na’a panlah dan ho chung’a hilchet na anapen ahi. CMO, Dr. VC Pau Tongsing in aseina’a mun dang akipat hung kipan District sung hunglut jouse Transit Centre, Tuibong mun’a Google Sheet chung chon’a Registration lah hi ding chule hiche mun’a sample test kibol ding ahi. Hiche sung’a positive kimudoh ho Covid-19 Care Centre, NEILIT a vetkol ding’a poh hiding chuleh negative jouse Result Sheet hoitah toh inn a Standard Operating Procedure (SOP) hoitah leh khoutah ajui uva Room/Self Isolation ding’a kisol ding ahi ati.

Hiche toh lhon’a Test kibol ding jouse Rapid Antigent Testing (RAGT) mangcha’a kibol ding ahin CCC ah positive vetkol aum ho PT PCR mangcha’a test kibol ding ahi. Test hi angai bang’a froontline worker, natna dang nei jeh’a ki-vekol, naovop, chapang kum 10 noilam leh kum 60 chung lam ho, kholjin na ding toh kisai’a Covid-19 test result poimo ho angai bang’a test kibol ding ahi. Hiche test bol nading’a sum peh’a test bolthei leh manbei’a test bol tehi na um ding ahi ati. Koiham khat Covid-19 toh kisai’a ama mimal dinmun hetchen na neinom hon sum apeh’a test akibol thei ding hiche nading’a Store Office, CMO Complex ah jinglam nidan 10:00 akon nilhah lam nidan 2:00 kikah’a Registration akibol thei ding chuleh mi khat test bolman hi Govt. sem dungjui’a Dk. 750 hiding hiche jing (Aug. 27) nikho akon chelhah panding ahidan atahlang in ahi.

Hiche  nading’a kholjin na nei ding, medical check-up ding’a poimo, natoh banjom na ding’a poimo, negative certificate poimo chule symptom neilou hijong leh ama dinmun kihetchen nom hon sum apeh’a test akibolsah thei ding ahi. Chule manbei’a test bolthei ding ho chu Covid-19 toh kisai’a frontline workers, service i-card vetsah thei ding ho, naovop leh damlou najeh’a vetkol’a um ho, medical certificate vetsah ding neiho, movement pass vetsah ding neiho, mun dang apat hung kipan ho, insung khosahna hahsa ho, lha khat a Dk. 10,000  noilam muho, BPL, CMHT, PMJAY, AAY Card nei ho, contact tracing bol ding’a min um ho, Deputy Commissioner in ahetpeh ho, Covid-19 toh kisai’a volunteer a pang ho jouse manbei’a test kibol peh thei ding ahidan jong CMO in aphongdoh in ahi.

xxxxxxxxxxxxxxxxx

CCpur District a Covid +ve case thah 2 kimudoh

B.Lalboi Gangte

CCpur. August 26 (ET): Churachandpur  District sung’a Community Transmission aum tah vang in kiven tahsang in kholai pot mi atam cheh cheh jo tan ahi. Covid-19 hin CCpur District aphah toh lhon’a kivenbit na ding’a District Administration leh kho/veng tin’a kiloikhom na chom chom in thuso abol naban’a Lockdown, curfew jong phongdoh in aum in ahi. Chuleh District sung’a Covid-19 vei kemlam amano naban’a adamdoh jong aum jing in ahi. Hetthei khat chu District sung’a Covid-19 jeh’a mi khat in thina anato naban’a jalhang’a kilahson na ahung um jeh tah jeh in kivenbit nalam nasath in khohsah na ahin nei tauvin ahi. Tunin masang’a sang in kholai pot mi alhom in chuleh Bank leh ATM booth kimkhat’a mi jong akemsuh lheh jeng tan ahi.

Hiche toh lhon’a CCpur District a tuhin Covid-19 toh kisai in lockdown, curfew phon ahi jong leh jingkah akon nilhah nidan 2:00 sung kailhang honding phat akipen ahi.

Alangkhat’a tunin Salem Veng ah positive case thah numei 2 akon in akimudoh in ahi. Hiche numei teni lah’a khat hi Zamkunga Colony acheng ahi jeh in Salem Veng khosung thunei vaihom hon Containment zone in aphongdoh tauvin ahi. Chule khat hi Donbosco Hr. Sec School luttou na bul’a cheng ahi. Hetthei kaht chu ama ni hi khol jindoh na neilou mi ahilhon in ahi.

xxxxxxxxxxxxxxxxxx

KUFIDA in Chassad khomite kithopi na’a Dk. 50,000 KKL GHQ khut’a anapelut

Mangneo Touthang

CCpur. Aug 26 (ET) : Achesa March nisim 16 nikho’a Kamjong leh Sampui khomiten khotona beihel’a anahallhah’u Chassad khopi kihalvam nachung’a khomite genthei hahsatna thoh-hu ding leh jokham kham’a panpi na ding in 1990 kum’a anakiphutdoh Film kiloikhomna Kuki Film Development Association, KUFIDA noi’a Actors leh Filmmakers ho kipehdoh na dungjui’a adondoh sum le pai Dk. 50,000 hi Covid-19 jeh’a aphat cha in anapedoh thei hih jong leh tunin ( Aug. 26) NISO FILMS INSTITUTE Office B Vengnom mun’a Relief Committee mopoh nanei Kuki Khanglai Kiloikhom,KKL GHQ President Kamthang Haokip khut’a pehdohna ananei uvin ahi.

Hiche toh lhon’a KUFIDA President Letthang Doungel in ahoulimna’a hiche sum hi tam hih jong leh Association sung’a khangthah Kuki Film khantou machalna ding’a panla hon nam-khat chi-khat hina jal’a Chassad khomite thohgimna ho’a panna thei um hih jong leh jokham kham ahin tokhom utoh kilhon’a hiche sum le pai lhomcha hi inn le lou kihallha Chassad khomite ngailut vetsahna kahinbol’u ahi ati. KKL GHQ min a sum receipt bol KKL President Kamthang Haokip in Kuki Film Development Association, KUFIDA in ngailutna neitah’a Chassad khomite khotona aneinao chung’a kipathu aphong in ahi. Chuleh Chassad khomite genthei hahsat naho akigelkhoh jing in ahin Covid-19 min’a kilep a Relief material jeng jong Chassad khomun pohlut ding phallou um jong leh lhathah lam leh Chassad kho mun’a neh-le chah hihen angaicha thil phabep ho kithah lut ding ahi ati.

Xxxxxxxxxxxx

Nagaland a Covid +ve case thah 26 kimudoh; agom’a case 3,778 lhing ta

Kohima, Agu 26 : Nagaland a Covid +ve case thah tuni 26 akimudohbe toh lhon’a agom’a case 3,778 alhing tan ahi. Nagaland Health Minister S Pangnyu Phom in aseina’a case thah kimudoh hohi sample 627 test kibol na akon kihedoh ahi. Chuleh case thah kimudoh 26 lah’a 20 hi Kohima akon, 4 hi Dimapur akon chuleh khat hi Mokokchung akon ahi ati. Hiche naban’a tule tu’a Nagaland a active case 1,149, adamdoh 2,611 aum in ahi tinjong aseibei.

Xxxxxxxxxxxxxxx

Mizoram a Covid +ve case thah 14 kimudoh; agom’a case 967 lhing ta

AIZAWL, AUG 26 : Mizoram a nidan 24 sung’a Covid +ve case thah numei 3 panna’a mi 14 akimudohbe toh lhon’a agom’a case 967 alhing tan ahi tin thulhut kimu chun aseiyin ahi. Chule State Information and Public Relation Department akon thulhut kimun aseina’a case thah kimudoh 14 lah’a 6 hi Aizawl District akon, 2 hi Serchhip District akon chuleh Kolasib leh Mamit District akon 3 cheh ahi. Hiche nachung chon’a case thah kimudoh holah’a BSF jawan khat leh local level task force volunteer teni hi travel history nei lou cheh ahi lhon in ahi. Adang mi 12 vang hi Weng Bengal, Goa, Assam leh Karnataka akon hung gamsung hung lhung ngen ahi tinjong aseibei.

Hiche toh lhon’a Mizoram a tule tun active case 503 aum in chuleh adamdoh mi 464 aum tan ahi tin Health Department akon thulhut chun aseiyin ahi. Chuleh Tuesday nikho’a Department in bulletin asodoh dungjui in tuni chan’a sample 35,214 test akiboldoh tan ahi akiti.

Xxxxxxxxx

Assam Rifle hon Dk. Lakh 30 val man dan in aphallou mandoh

Tengnoupal, Aug. 26 (ET): HQ IGAR (S) vetsui nanoi’a um Assam Rifle hon tunin Tengnoupal District hopsung Sita-Lipham Khullen track junction mun’a daan in aphal lou thilkeu phabep anamandoh uvin ahi. Assam Rifle ho hin ginmo thei taha’a Kenbo bike khat Sita-Lipham Khullen track junction a hung lhaiphei amu utoh lhon’a kham ding agot nao in bike tol pa anajam man in athilkeu poh ho amun achun anadalha in ahi. Hiche thilkeu hochu imported cigarettes carton 2 a sum seiding’a Dk. Lakh 3, Godzilla Coil carton 8 a sum a Dk. 64,000 chule kuwa chang Kg. 150 a sum a Dk. 90,000 agom’a Dk. Lakh 4.54 ahi. Matdoh’a um thilkeu jouse Customs Department Pallel khut’a kholchil na neibe ahi nading in anape lut tauvin ahi.

Alangkhat a Assam Rifle hon tunin Mobile Vehicles Check Post (MVCP) Tengnoupal mun’a khamnathei brown sugar anamudoh uvin ahi. Hetthei khat chu Assam Rifle hon gari ho kholchil na anei jing ban’a tuni Eecho van bearing registration no. AS 01 BB 7724 Imphal jon ding’a hung kholchil na ananei nao’a hiche khamnathei chu anamudoh ahi. Hiche gari hi CCpur District hopsung K Monnaphai village, Tuibang TD Block akon Letkholum Haokip chapa Letkhokai Haokip (25) in atol ahi akiti.

Hiche toh lhon’a Assam Rifle hon hiche gari akon chun brown sugar hi ding’a ginmo packet 11 a sum sei ding’a Dk. Lakh 28 chu gari bonnet sung’a akisel na’a kon anamudoh’u ahi. Chuleh matdoh’a um khamnathei jouse kholchil na neibe ding in Narcotics Control Bureau, Imphal a anapelut tauvin ahi.

Xxxxxxxxxxxxxxx

MCSCC (Main) Exam 2016 athah beh a bol ding kiti hi court thupeh dungjui ahi: MPSC

Imphal, Aug 26(ET): Manipur Public Service Commission, Secretary, Ng Roben Singh in tuni in Commission in abolgot MCSCC (Main) Examination 2016 chung chang a hilchetna aneina a hiche exam athah beh a bolding kiti hi court thupeh dung jui a kibol ahi tin asei in ahi.

Hetthei khat chu hiche exam chu Manipur High Court in ana kahlhah a exam thahbol ding’a thupeh ana nei ahi. Chule CBI in jong hiche chung chang thu’a kholchilna nei ding’a thupeh ana nei ahi.

Hiche thupeh chouna ahi MPSC in Surpreme Court a SLP file jong abol u ahitan ahi. Hiche exam chu MCSCC (Preliminary) Examination, 2016 a lolhin na ana nei candidate 1130 ho ading bou ahi akiti. Thuso kimu dungjui a hiche exam chu amasa a scheme le syllabus toh kisai a kibol ding ahi kiti ahi.

MPSC akon thuso kimun aseina ah hiche exam a hi akiselguh ima umlou a thengsel a natoh na kinei ding ahi dan jong aseiyin ahi. High Court in hiche exam lolhin na ding a manding a ana deisah On-Screen Evaluation System, Bar Coding of Answer Papers le adang dang ho jong man ding ahidan jong ahetsah uvin chule hiche exam a dinga hi MCS cadre holah a Controller of Examination ding le Joint Controller of Examination ding jong lhendoh na kinei ahi tai.

MPSC in covid toh kisai a exam bol nading a SOP jong phondoh na ana nei tahdan jong hetsah na ahung kinei in ahi. Hiche exam thengsel a kibolding ahidan jong MPSC in mipi hetding in tahlang na ahin nei uvin ahi.

Xxxxxxxxx

India a Covid-19 active case sang’a adamdoh jat 3 val’a tamjo

New Delhi, Aug 26: India sung a COVID-19 akon damdoh mi 24,67,758 lam alhin tah toh lhon in active case sang in jat 3.5 in atamjo tan ahi. Health ministry akon thuso kimu dungjui in achesa nidan 24 sung in mi  63,173 lam in damdoh na ana nei utoh lhon a damdoh na nei hi mi 24,67,758 lam hung lhing ahi.

Damdoh na nei hi tu le tua natna nei sang a 17,60,489 a tam ahitan ahi. Ministry akon thuso kimu dungjui in India sung a damdoh na nei jat hi tuni in 76.30 per cent in akhang tan ahi akiti. Tu le tua gamsung a covid natna nei hi 7,07,267 lam lhing ahi.  Centre in State le UT hotoh kitho a testing hatah a abol a dammo na nei ho vetsui naphate a anei akon a hitabang damdoh na nei hi gamsung a tam ahi tin ministry akon thuso kimu chun asei in ahi.

Alangkhat a achesa nidan 24 sung a covid natna nei mi 67,151 a ana pun be toh lhon in India sung a covid natna nei mi 32.34 lakh ana lhing tan ahi. Tu chan na covid akon thina toh jat hi mi 59,449 lhing ahitan, achesa nidan 24 sung a mi 1,059 in thina ana to kit u ahi.