Thaang kikam’a Moreh OC –pa ohkha ahidem (Khamnatheija kiveinala hat cheh cheh)

Thaang kikam’a Moreh OC –pa ohkha ahidem (Khamnatheija kiveinala hat cheh cheh)

913
0
SHARE

Thaang kikam’a Moreh OC –pa ohkha ahidem
(Khamnatheija kiveinala hat cheh cheh)
Moreh lang’a kon’a bou khamna thei leh Black thil jatjat ho Manipur sung’a hung kipolut hilouva Imphal lang’a kon Moreh lang jon’a jong dan’in aphallou thil jatjat kipojing ahi hi thuthah beh ahilou vang’in tuchung Moreh police station a OC L Vaiphei “drug case” a kibolchahna hin athah beh a ahintahlang kit ahi. Moreh OC keu hilouva anoija atohkhompi ei thinglhangmi mama midang 2 leh pangal khat jong kimat tha ahi. Manipur a sopi pangal ho tamna Thoubal district huopsung’a Lilong lhang akitileh khamna thei semna leh kiveina munpi khatna kithang ahijeh in tuchung Moreh OC-pa leh police dang mi 3 kimatma a abul jong hilai lhang mama ahikitne. Moreh lampi a khamnathei poh thua mipi gah het theidom govt lang’a tohmun het thei nei mi kimatna hi tuchung amasapen ahidehpoi. Kum phabep masang jong chun Army Officer (Assam Rifles a Lt. Colonel) khat jaona’n mi phabep khamna thei semna di thilpo’a ana kimat u thu jong ana kithang ahi. Hiche Case a chu tua Congress MLA (chupetna MLA anahilou) khat jong ngohna ana kineikhum’a tugeija khatveiveileh athu (Case) hung kiseipohji nalai ahi. Akiman loi aum vang’a nitin phat tin tobang’a khamna thei jaona’a dan’in aphallou thil jatjat kipole jing thoudi ahi tahsan umtah ahi. Ahileh itidan’a khatveiveileh mi gah het thei ho drug case a hung kimanji ham ti hi ahi. Ex Chandel ADC L Zou drug case a ana kimat jong politics a tupna ana kineikhumna khat jeh a seiloi jong aum’e. Tua L Vaiphei leh “aloiho” kimat jong hi asunglang’a kithangthip tona khat umjeh jong himaithei ahi. Moreh posting kiti hi mitamtah kichu ahijeh a itileh khat kasuboijin ken amun kilo theile ti jong umteidi ahi.
Moreh OC-pa chu Imphal lang’a ahung jouva Lilong a kon “thil” (drug) chu Moreh gei neipoh lhungpeh un tia tepna ana um hidan’in akiseije. “Thil” chu Moreh police station ho gari DI truck a Lilong a kon ana kipoa Moreh Ward No. 9 a ASI khat chenna inn’a ana kilhut ahijeh a akikoina innei ASI-pa, gari Driver-pa jong matna umtha ahi. L Vaiphei chu Imphal lang’a ahungpet ahin Moreh lang’a ASI-pa chu phone agahbol’a “thil” hung kipodi ahin na inn ah anakoijin” ati ahi ti hi thusoh a kimu chu ahi. Hiche hi ichan’a dih ham, dihmo ham akihetapon, OC-pa hin ipi thil ahijong ahetlou maithei, apohman sum themkhat muna dia abol jong hithei ahi. Akiman thil hi ‘Ketamine Injection’ akitin ipi chetna kimang hidiham akihetlou vang’a dan’in aphallou lou le ai khat ahina chung’a khamna thei semna dia kimang hididan ahi. Themchakhat hile koiman ahetloudi ahin Cartoon box 32 lang dim kiti chu sum’a ijatman ahidi akiseilou vang’a tam thimdivang ahi. Tengnoupal SP in “thil” kipoh leh Moreh a kikoi thuguh ahetphatna amatah kipatna thil chu agamat ahi akiti. Anoija khat anatoh boithei leh minsetna theija kon huhdohdi kiti umloudan ahi. Hiche hi report pehon thil ahetsa ahijeh panpinom jongleh ahitheilouna umdi ahi. Aphai tina hilouvin midang tamtah in ipipi apoh a akivei vang’a mi gah hetthei akimandoh kiti umkhabehlou chu ipi atileh ei thinglhangmi gah hetthei dom ho gei hitobang minsetna hung changkhaji hi “Line Clear” bollou (sum pehguhlou) jeh jong himaithei, asunglang’a kitupna jong hithei ahi.