Talaq thumvei seija Jida hithei taloudi (Muslim ho bailam tah a...

Talaq thumvei seija Jida hithei taloudi (Muslim ho bailam tah a jidana kisubei)

238
0
SHARE

Talaq thumvei seija Jida hithei taloudi

(Muslim ho bailam tah a jidana kisubei)

                                  Muslim pasal khat nin ajinu adana dia “Tilaq, tilaq, tilaq” tia (thumvei) amasangtah a aseikhumleh ada hijeng ti hi adihpoi tia BJP hon sotna pat suhbei di ti ahinngaito u chu achainan Raja Sabha geijin phatsahna (passed) ahinboltai. Hiche hi Muslim numei hon kipah tah in alem un kipa vetsahna a mithai aneh utoh alam utoh achohlha jeng uve. Ahin hiche hi Muslim sung, adeh a hou lamkai holang’in Muslim ho houthu leh chondan thua akikumlou loudi kikum’a midang khat hou le chondan khat kisuhboipeh ahi tia sotna pat ana lungnopmopiu ahi. Tilaq hi numei (ji) dana bailam tah dan’a aumvang’a koiman jukham sava man’a aji khat amoh sapkhum jeng jong ahidehpoi tia pangloi um ahi. Ahin kinah jeh a lunghan lungchom jeh a Tilaq sapkhum jeng loi jong um’a kisei kit ahi. Hitobang dan hi mihem khat kibolna ahipoi tia sotna pat suhbei dia hinboipi loi um ahi. Lok sabha in hiche ‘Triple Tilaq bill’ hi passed anabol’a tua Raja Sabha injong passed ahinbol ahitan President nin phatsahna (assent) ahinpehdi vat nalai, phatsahna aumjou teng dan hung hibep di ahi. Hiche Triple Tilaq Bill hi dan ahung hiteng Muslim pasal ajinu dana dia hitobang Tilaq seikhum hi Muslim houto kitoh ahi tijongleh India govt dan dungjuija police in amatna gotna apeh thei hung hidi ahi. Ahileh India a bou hiche Tilaq thumvei kisapkhum hi dan’in aphallou ahung hidi vang’a vannoi gamdang Muslim holah a angai ngaija chejing thou thoudi ahi. Triple Talaq Bill hi party dang dang sang’a BJP hon ahiti khohsah dan’a aum hi ipi jeh ahitadem ti hi ahi. Muslim numei ho dihlou tah a kibolna ahi tia lungnatpi jeh ahidem, lunggel dang khat neija kibol ahidem ti hi ahi. BJP hohin India mi jouse alhangpi’a chepi di le juidi kibang neidi (Uniform Civil Code) hi aitih a pat anasei uleh ahinboipiu khat ahi. Hiche Uniform Civil Code dungjuija Civil lang thu – kichen, kida, nei le gou thu leh adang dang hoa hi Hindu, Muslim, Christian, Sikh, Parsee, Budhist tia hou le tahsan thua kikhen umloudi, dan chomcheh neilou di ti ahi. Civil dan kibang kiti hi alhangpi’a Hindu te jui dan mijousen jui/chepidi tina jong hikit ahi. Hiche jeh a Minority holah a Muslim holeh Christian hon hitobang tohgon (Uniform Civil Code) hi nasatah a anadou u (ananomlou u) ahi.

            Tua ‘Triple Tilaq’ hi hung kisubei ahitaleh aban itobang Civil dan ahung kibolgo’n Christian ho dattheilou tah dan ahung kipodoh tadem ti lungkham pehloi umdalou ahi. Thildang dang chonna leh hou thu in aphal chu thuchuom hitaleh Triple jidana dia Tilaq thumvei kiseija kichai jeng kiti vang hi Muslim ho hou le tahsan thuto kitoh ahi kiti jongleh mihem khantouna leh lungsetna lhasam jepma kilang ahi. Triple Tilaq hi abailam cheh a jong ana kibolgo ahi. Ajinu masangtah a Tilaq thumvei sapkhum bou hitalouva tulai Social Media khang ahito kilhon’a ‘Whatsapp Message” leh Mobile Phone kisan’a jong seikhum’a kichai jeng ti gei ana umdohman ahi. Numei jineisa khat chu anu apa kom’a akile ham, sot tah ajipa a kon ajammang ham’a houphah maiphah ahilouteng Phone le Massage a jong Tilaq seikhum’a kikhen thei ti ahi. Hiche hohi hithei taloudi ahitai. Ahin hou le tahsan to kitoh chondan khat kibolchah ahijeh in aban ipi ahung tidem ti hi ahi.