Sum’a leng hina Kijohdoh jelta (Amin beh a jong lengpa hitalou)

Sum’a leng hina Kijohdoh jelta (Amin beh a jong lengpa hitalou)

42
0
SHARE

Sum’a leng hina Kijohdoh jelta
(Amin beh a jong lengpa hitalou)

Meilhei lengpa Leisemba Sanajaoba in Raja Sabha MP hijongleng “ka leng hina kadalhah dehpoi”  ati chu aman dalha hihjongleh meilhei ten apu apau khanga pat leng te’a kivaipo ahinau khat chu dangka sum le sel toh akilheh ahitai ti chu election candidate dia ana kigotna pat ahitai. Hiche jeh a meilhei thingnoi thingchung kiloikhomna jatjat hon alengpau khat MP dia akigotna pat jahdana sangtah ananei u ahi. MLA leh MP (Lok Sabha) election hobanga mipi’n vote alhahna um hileh Raja Sabha election a chu Sanajaoba kailouhel di ahi. Lok Sabha leh Raja Sabha MP hi mi jakhat lah a mi 2 (2 percent) tobang hi lampi khatna thepna le minthanna aneijeh uva ‘Nominate’ kiboltho ahi. Raja Sabha MP Election hi MLA hon vote apeh u ahijeh a Assembly a MLA nei tamjo leh Ruling a pang-pang’in asotsot chu kaijeng ahi. Ahin tuchung Manipur Raja Sabha election a meilhei lengpa hung kaidohdan chu State BJP Ruling party hon ipi iti abol uva hung kaidoh ham tijong Centre langa vaipo ho jaona’a mipi’n ahet ahi. Dih le dihmoleh election chu akai tahjeh a Chief Minister (CM) N Biren dia pachanna lentah khat leh Centre lang’a “kei bou lamkai thei kahi” tinathei paomepi di khat akiboldoh thou ahi. Hiche jeh a CM Biren Delhi lang’a agache’a Centre lamkai hoto aga kimuna a ahinboldoh khat chu amatah dia “Z plus Security cover” ahin kithumdoh chu ahi. Tupetna Manipur’a Z Plus security kipe hi Ex-CM O Ibobi jong ahi. CM Biren Z Plus security kipehleh leng Sanajaoba Raja sabha MP kikaisah hi akimatna um tina ahi. Lengpa MP kikaisah hi ama (lengpa) boltheina hilouhel, atung adom hojeh bou ahi mijouse het ahi.

Meilhei thingnoi thingchung hon amin maimai beh a lengpa (titular king) um/kinei jong hi Manipur thusim’a lengte kivaipohna leh chondan ventupna ahi tia lengpa’n India govt noija election khat ahintetna ahung kai kit nahlai hi athusim ule ahinao leinoija kivuina ahitai tia agel u ahi. Leng’a ana kivaipote kiti chu gam (lenggam) jong anei u tina, lenggam nei chun sepai leh lengpa noija khosa mipi (subject) jong anei tina ahi. India in independence anamu masang’a India gam pumpia hi lenggam 600 lang ana um ahin 1757 AD kum’a British East India Company  hon India lenggam ho ol ol’a ahinlah uva kon athunoija akoi u lenggam ‘Princely States’ atiu lah a Manipur jong anajao ahi. Hichu, British te thunoija aumvang uva leng hina chu analahpeh dehlou u ahi. India independence jouva Manipur India alut jouva jong India govt nin leng ho hi asuhmang dehlou, amin maimai beh a ana umsah u ahi. Ahin, hiche hin India a kon chamlhatna delna lunggel umthei ahi ti jeh a leng hina kisiptup insung ho suhmangna dia Election politics a analutsahgam u ahi. Maharastra a Gaikwad te, MP a Scindhya te, J & K a Abdullah te, adangdang ho politics a analut uva pat ehetlou kah uva alenggam uleh aleng hinao kisumang ahi. Amin maimai hijongleh India a leng neinalai lah a Manipur jong ahi. Tua hi meilhei lengpan MP hijongleg lengpa hina kadalha dehpoi ativanga meilhei leng (institution) chu akichai ahitai. Hiche jeh a meilhei thingnoi thingchung lunghang’a atildoh ho/atildohpa kicha’a Z plus security akithumdohlo ahi. Asondohpa hin ama macham’a aboljong hilou maithei, Delhi langa “kho upa ho” lungdei – Manipur leng suhmangdi ti ho maipha holna ahidi jong hetsa ahi.