Sum kichuna bou hidi (Term kichai dikon geija ADC Chairman kichuna umjing)

Sum kichuna bou hidi (Term kichai dikon geija ADC Chairman kichuna umjing)

40
0
SHARE

Sum kichuna bou hidi
(Term kichai dikon geija ADC Chairman kichuna umjing)

ADC/MDC chairman kichuna lahlah a Churachanpur ADC/MDC chairman kichuna hi tuchung term sunga akiha boinapen ahi hettheina chu tu kum 5 kichai dikon geija boina abeitheilou hi ahi. Phatdang term dang a jong ADC jousea Chiarman kichuna jeh a boina ana umsohkei ahi. Chandel ADC, Ukhrul, Temenglong leh Senapati ADC sung hoa jong chairman kichuna ana umsohkeijin term khat sunga chairman kikhel ngen ahi. Kidang tah in Sadar Hills ADC a vang tuchung term sungah chairman kichuna jeh a camp kibolna leh boina dang ana umpoi. Churachanpur ADC a kiboina ajat chombehna chu tu term sung’a chairman khat vei ana kikhel jouva tu athahbeh a kiboina hung umkitna August 28 ni’a ADC Member 14 in tutua chairman leh Vice Chairman kahlhahna dia vote anapeh u chu akitetpi group ho ajaolou atamjoh tah jeh in chairman le Vice chairman athah hung hikit di tina ahitai. Milun Khaipao Haokip in chomkhat Chairman anapoh jouvin ADC member group khat nin camp anabollin ahinsulhu uvin ahileh Paukhanlian Chairman a tundoh ahung hitai. Tua hi tuchung ADC term kichaisa bon ahitan adihtah a chedi hileh achesa May lha a chu election thah ana umdi ahitan state govt nin term  hi lha 6 extend anabol jeh a November langa election um dia ana kivochon ahi. Hiche thua jong anomlou loi tamtah ana um’a May/June lha ngeija ADC election hi boldoh jeng dia ana phuut u ahi. Ipi le ipi kitoh kha hitam covid natna hise lan jeh in lockdown aumjing kit toh ahileh ADC election aphatna boldi tiho jong anathip jeng’u ahi. Term kichaisa nung, extend kibolna phaat geija chairman kichuna aum hi ima dang jeh hilouhel di, sum/paisa mudi umjeh ahidi jong ginchat umtah ahi. Achutilouleh kum 5 sunga ima khantou machalna natoh kineilou chu lha 5/6 sunga ima boldoh tohdoh neina di hilouhel ahi.

State Assembly a minister hon bou power leh sum muna anei tobang uva ADC  a hi chairman lhon bou power le sum amu uva anaat themkhat chu Executive Member (EM) hon aliekhah nahnah uva kisei ahi. Ahin ima mudi le nehdi aumpoi kiti vanga ADC election tet nom le akainom akikhaplhah kit thou hi mudi le nehdi ima aumpoi kiti jongleh ipiham khat (themkhat) vang umthou dia kisei kit ahi. State Assembly hihen ADC hileh sum hi mipi dileh gamsung pumpi a dia hung ahin ipi atileh Minister leh ADC chairman ho di bouva um dan’a lengdoh jeng ham ti hi akisuhtoh tokah a minister kichuna leh ADC chairman kichuna ho itih hijongleh beideh loudi, election kibol kit jongleh athah a minister leh chairman ho kichuna kipan kit thou thou di hetsa ahi. ADC a fund (sum) kipe jat jouse ADC Member ho geija achan diu, amu diu kibang chetna kikoidohna (fix) khat aumjeng louleh Chiarman hilou group sesen loitum asem kit diu, camp kibol tona umkit di, mipi di natohna umthei louva chairman kichuna bouva kiboi jing diu ahi. MLA jong chutima ahi. MLA jousen Constituency Development Fund kibang chetna sum amu banga minister hoto chanvou kibang thimleu anei tokah uva cabinet minister kichuna jeh a govt boi jing thou thou di ahi.