Sum jeh a mi tha khoh salou khang (ATM vel’a Security umtei...

Sum jeh a mi tha khoh salou khang (ATM vel’a Security umtei ngai)

849
0
SHARE

Sum jeh a mi tha khoh salou khang
(ATM vel’a Security umtei ngai)

Khovah pet sunchang laitah a Churachanpur khopi sung bazaar sung’a mel hetlou thalchoi mi 2 in ATM Booth a sum heng ding/thun ding khat akaplih jeng lhon’a dangka Crore khat le Lakh somle nga jen ajammangpi thei kiti hi Security lang lhahsam leh Bank ho thilbondan dihlou jeh hijeng ahi. Town sunga bazar mun jousea security umjing di chu thil hitheilou ahi. Ahin ATM ho kombeh a mi khat le ni beh thalchoi louva jong umjing didol ahi. Hiche mi kikaplih le sum lahpehna thilsoh a chun akom avel’a police khat le ni beh moltum kichoijin um maimai jongleh thilse bol hon amoh bol ngamlou diu, aboltah ujongleh koi tobang mi ham, hoija kon iti hung’a hoilanga jam uham ti ho themkhat beh ahetdoh bai di ahi. Mikaplih teni chun pistol aman/ajah lhon vanga agin kijah louna dia Pistol long’a ‘Silencer’ akibu lhon jeh ham’a akom avel’a um honk on ipi alo ham ticha jong ahetlou jeh uva ‘BP Stroke’ a lhu hidia aginmo uva twidap jong abuh khum uvin akiseije. Hospital a apoh pet uva atahsa chunga meichang lutna a kon thisan ahung potdoh jouva bou meithal’a kikap ahidan hetdoh bep ahi akiti. Hiche ahileh meithal (pistol) kimang/kijang hi ajatchom jep, ahoi jep hithei ahi. Ajeh chu moh meithal Silencer kibuna hijongleh akikap khah khah a chu athisan hung pot pai jeng di ahi. Abol mithat hon bazaar mi umjingna ahijong ahet jeh uva kiguotna phatah anei masat uva meithal jong ajat chomjep mandi ti leh amun vet toh masatna phatah um ahidijong hetsa ahi. ATM a hitin mi khat le nin Security jaolouvin sum hijaja aheng jie ti jong itih ham’a pat ana vetlhih keu jing’u jong hidi ahi.  Mi kaplih a sum jampi chu mi 2 bou hijongleh hitobang natoh hi mi ijat hamkhat pankhomna hidi ahi. ATM a sum koidipa Bank a pat ahung potdoh a pat avelhi le guhthim’a ajui loi, sum kipo a kijampi jouva jong mun khatna ana kithopi di loi jong umtei maithei ahi.

Tulai miphalou, khamna thei ne tam ahitan sum sangkhat sangni jeh a bon mi kithat jeng ngam khang ahileh Bank a kon ATM booth a hetlutdi sum kipolut kiti chu crore lang ahidi jong hetsa ahijeh in gucha michom sum deina jeh a mi khat hinkho lah jeng di khohsalou ho dia vetlel umpeh khat hidi ahi. Khat vei kisuhmona aumteng lebou khah dohna umji hi mihem ngaina ahijeh in tua patna ATM a sum hetlut di teng security ho jaona’a ahung cho vevu diu jong koiman sei hih jongleh hung umtei di ginchat ahi. Covid jeh a milah a chedoh hon Mask akibu pet ahijeh a jong gucha michom mithat ho dia kiseina naijep nalai ahi. Security naina a ATM ho kikoilou ahitah jongleh ATM mai leh asung’a bon CCTV Camera koi thei tah jong ahi. Churachanpur Town sunga ATM Booth khetsetna sum jouse chom theng di ti natoh jong ana umkhasa ahileh kivenna lampang iti kibol louham datmo um ahi. Mi 3 lang kithojia Bank a kon ATM booth a sum henglutji chu midang ni teni sum gahetlut di kontah a ama ama kindang cheh a aboilhon’a mi khat bou kinganse kiti jong hi angailou khat kibol ahi. ATM Booth a sum kikoina bom hi thih ahijeh a koiman song le thihtum hoa akhetset thei jong ahilou vanga khopi dang hoa ATM booth kom’a hi meithal choilou Private Security khat beh kinga sah jing ahi. ATM booth a hitobang sum henglut dia Private Agency khat kigoi/kithalah kiti jong hi aphat aphatlou tua chu kihe ahitai.