Sum aloma hung kibunglha di (Akeh khat beh dihtah in kimangleh)

Sum aloma hung kibunglha di (Akeh khat beh dihtah in kimangleh)

47
0
SHARE

Sum aloma hung kibunglha di
(Akeh khat beh dihtah in kimangleh)

Tua lamlen umho bon asuh asah umlouna mun tam’a Manipur sunga National Highway (lamlen) kehletbena di centre in dangka crore 3000 (sangthum) langpi sanction boldia ahinphondoh hi lamlen ho ichanin ahung kikheldem ti ngaito thei ahi.  Hiche hi lamlen Km khatna dangka Crore 8/9 vel lutna a semphat, kehlen hidi tina ahi. Itobang project a di hileh govt nin sum sanction abolji hohi abonchangkei hihih jongleh akeh khat beh ahinadiol tah in kimangchaji jongleh ichan hamkhatna muthei tah a gamsunga khantou machalna leh kikhelna umdi ahi. Km 316 lamlen semphatna di leh kehlenbena dia dangka crore sangthum kigong hi avalsetna dia kikhot (hisap) hinalaidi ahin kuoi-kuoi ijat jatna hung kihom masaova natohna hi ijat vel chet hung kimang di ham ti hi igah don hisap jengthei ahi. Govt project ahivanga sum hija hi GST a ijat hung kikah diham tijong hung tam thou di ahi. Hiche sum hija hi Imphal-Jiribam lamlen leh Imphal-Moreh kikah lamlen semphatna di, kehlenbena di ahi. Contractor/company hon contract muna dia sum ijatjat ahin suhmang diu ham tijong hung um nalaidi, natohna a sumlut di hoa kon hung kikah dijong ahi. Compensation a di jong jaotha ahinahlai leh sum tamtah jong lamlen semna sanga compensation pehna a kichai kit di ahi. Ahin ipipi tax kikah henlang, ipipi percentage ijatjat kikah jongleh aval ho adihtah a akimanle hoilai gam, ipi State hile muthei tah a khantouna um thou thoudi ahi. Sum sanction kiboljat lah a akeh khat sanga lhomjo hoa natoh kibol jong phanalai ahin natohna imacha umlouva jou le nal’a sum kiki kaidoh a kinehchai kiti jong gamsunga dimsetna kisei ahin ichan dih a ichan dihmo ham ti chu ahehon bou ahet di ahi. Natohna dia sum kipeji hohi akimanchahna ho vetsahna “Utilization certificate” hi govt a pehlutna um ngai ahivanga hiche certificate ho jouva semthu loi jong dimsetna kisei ahi.

Vannoija gam khangtou tia kihe hohi agam’a cheng miho alhohbu uleh achihnao jatchom beh hidehlou, mihem hina a kitahna leh thudihna aneijeh u bou ahi. Public thil lahlah a lamlen dehdeh hi mijousen amu theipen khat ahijeh a agam mipi leh govt kitahle kitahmo lamlen hoa kimutheipen ahi. Lamlen semphatna le kehlenbena dia sum hijat jat hung di ahi kitia pat lamlen panga cheng/khosa hon compensation sum mudi bou gel loi, itileh contract kachang theidem tiloi, ipipi kichuna itobang bang ahung umkit tadem het masat thei jong ahi. Kagam kalhang sung’a ichan natoh phatah a hung chelha di hinam ti velha dia kigo masa aumdi vang kinep umlou ahi. Lamlen semdi bou hilouva tua Manipur a dia centre tohgon thupi khat kit chu Imphal khopi sung anoh/ateh (congest) tah jeh a Koirengei a pat Canchipur gei “over bridge/fly over” sah di kiti jong hi kipa umtah ahi. Ahin hitobang thil kisa di hi tijat aumna tah chu ‘quality’ umlouvin hung kisa khaleh mipi dia piel thaang (trap) kikam, mipi kibilna thei hung hithei ahi. Delhi le khopi dang hoa jong hitobang lei (over bridge) achim aum theileh Manipur a naa hung kitong di hohi tijat um ahi. Company mince le kitah ho bou contract thupi ho kipeleh ti mipi dei hitei di ahi.