State sorkar sunga boina suhlhap tobang hita; Deputy CM Y Joykumar in...

State sorkar sunga boina suhlhap tobang hita; Deputy CM Y Joykumar in akipe portfolio kilah a natoh panta

65
0
SHARE

State sorkar sunga boina suhlhap tobang hita; Deputy CM Y Joykumar in akipe portfolio kilah a natoh panta

Imphal, July 9(ET): Deputy chief minister leh National People’s Party (NPP) lamkai Y Joykumar Singh in portfolio apeh u thum ala pon, home portfolio athum ahi, tia thu akisei ni phabep jouva BJP lamkaina state coalition government in athu suhthengna anei uvin, Y Joykumar in office atuh pan tai, tin asei uvin ahi.

Singh in Thursday nikho a thuso miho akihoupi na a, NPP lamkai pa amatah in natoh apat photchenna anei ahi, ati. Deputy CM in office ajop pan tan chule Governor Najma Heptulla in apeh Finance, Science & Technology leh Economics & Statistics portfolio thum ho ala tai, tin thulhut in aseiyin ahi. Thulhut dungjuiya, NPP MLA adang thum honjong haina anei masang uva anatuh u portfolio ho atuh kit uva, duty apat u ahitai.

NPP MLA L Jayantakumar Singh in Health and Family Welfare, Law and Legislative Affairs, Art and Culture atuh kit a, MLA Letpao Haokip in Water Resources, Youth Affairs and Sports atuh a chule MLA N Kayisii in jong Tribal Affairs, Hill Area Development chule Fisheries Minister atuh kit ahi, tin thulhut in aseiyin ahi.

Hiche masanga, Joykumar Singh in Union Home Minister Amit Shah toh Delhi a akihounau ho amu kah a akipe portfolio thum ho kalah louding ahi, tia anasei ahi. Joykumar Singh in pandemic sunga anchang kihop thu a CM Biren demna thu asei jou, achesa April nisim 9 nikho a Joykumar Singh in atuh portfolio 11 ho alahpeh uva kon Manipur politics a boina um pan ahi.

NPF tilouva BJP lamkaina coalition government a NPP MLA 4 jong pang ahi. Lha phabep Manipur politics aboi jouva NPP MLA 4 panna a MLA agom a 11 in BJP lamkaina coalition government atosot nau alahdoh uva chule Minister hina a kon haina aneiyu ahi. CM N Biren Singh in state sorkar hi chang thuneina a apoh ahi, tia jong ngohna aneiyu ahi.

Alangkhat a, CM anahi Okram Ibobi Singh lamkaina Congress party in sorkar a kon haina neiya MLA 11 hon opposition party tosot dinga thuphon anei jou uva sorkar sem dinga jong anaseiyu ahi. Ahivanga, NPP chief leh Meghalaya CM Conrad K Sangma chuleh convenor, North East Democratic Alliance (NEDA) leh Assam minister Himanta Biswa Sarma in pan alah a, Delhi khopi a Union Home Minister Amit Shah akimupi jou uva NPP in akigel lhahna akhel kit a, BJP lamkaina coalition government a kile kit u ahi.

JNIMS doctor khat panna a Manipur a Covid 19 positive athah 15 kimu be; natna nei 1,450 lhingta

Imphal, July 9(ET): Jawaharlal Nehru Institute of Medical Sciences (JNIMS), Imphal a doctor khat Thursday nikhon Covid 19 positive ahi e, tin thulhut in aseiyin ahi.

Doctor nu hi athah a Covid 19 case photchenna kinei mi 15 ho lah a pang ahi in, VRDL, RIMS a mikhat test kibol a, JNIMS a mi 10 chule Jiribam District hospital a test kibol mi 4 Covid 19 positive ahi kihetdoh be ahi. Manipur a Covid 19 case agom a 1,450 alhing tan, hiche lah a active case 651 um a chule mi 799 kijen dam ahitai.

Thulhut dungjuiya, JNIMS a healthcare worker Covid 19 positive ahi akihetdoh na amasapen ahi. Doctor numei nu hi JNIMS Hospital a sample collection team ho lah a pang ahi in, JNIMS Covid-19 Care Facility a admit kibol adamlou ho sample alahkhom u ahi.

Tuni chan geiya JNIMS hospital a COVID 19 positive agom a mi 323 admit abol uva, hiche lah a mi 220 damdoh a chule mi 103 hi isolation facility a ‘observation’ abol u ahi. Athah a kihedoh case 15 holah a Churachandpur a mi 8, Jiribam a mi 4 chule Bishnupur, Imphal East leh Tamenglong a kon mikhat cheh hi ahi.

Abon uva COVID 19 Care Facility a achon diu ahi, tin Additional Health Director Dr. K Sasheekumar Mangang in aseiyin chule ‘containment leh contact tracing’ ho chelha ahi, ati.

Alangkhat a, Covid 19 natna nei mi 6 avel a RT PCR test abol nauva natna a kon adamdoh tah jeh uvin discharge abol tauvin ahi. Covid-19 Care Center (CCC), Meitram a um mi 4, Ukhrul CCC a um mikhat chule Kasom Khullen Kamjong CCC a kijen mikhat natna a kon adamdoh toh kilhon a discharged abol u ahitai.

Gamsunga recovery rate 55.1% alhingtai, tin official hon aseibe uvin ahi. Thursday nikho chan a agom a mi 2,97,358 screened kibol ahitan chule agom a sample 59,740 test kibol ahitai, tin State Health Department in aseibe in ahi.

Zil dung in alhoh Mangmingou longdamsa nithum channa geiya mudoh hilou

Imphal, July 9(ET): Zil vadungin ana lhoh Mangmingou (9) longdamsa kiholna tuni nithum chan in jong mudoh ahi hih laiyin chule Kuki Inpi leh KSO Saikul makaina na lhangsung mipin alongdamsa holna anei jing’u ahin tuni chun Saikul Police State Disaster Response Fund hon jong pan ana la pan taovin ahi.

Chapang kum 9 vel Mangmingou hi achesa July 7, 2020 (Tuesday) ni a Kangpokpi District, Saikul Sub-division Lhungtin le Phailen kijot mat tona Zil vadung panga aloi hotoh akichep naova Twi (Zil Vadung) in analhoh khah ahi.

Mangmingou (9) hi apute kho Lhungtin a kholjin a aumpetna hiche thilsoh hi achung’a lhungkha ahi. Ama hi Leimakhong Quarter a apitoh bou cheng’a apinu hin ponkhon toh thihse ahol ji a kivah hon ahi tin thulhut akimun chule Salem Leimakhong  Redeemer School Principal pa ngailutna jal’a hiche lai school a simlai khat ahi jong akiti.

Lhangsung’a CSO ho akon thuso kimun aseina a chun tulai Twilet/twiso lai ahijeh in pansat dan le aholdan ahah lheh jeng in deibang in natoh akichal theipoi hijongle ama longdamsa hi akimudoh masang’a kihol jing ding ahijeh in lhangsung/gamsung’a mipin ngailutna neitah a pan alahjom jing uva natoh achelhahpi diuvin ngehna aneiyin ahi.

Gamdang a kon hung kile, natna nei chule natna a kon kijen dam ho achombeh a ivet u ingah diu ahi: MLA Sushindro

Imphal,  July 9(UNA): MLA Khurai Constituency L. Sushindro (Yaima) in gamdang a kon hung kile gamsung miho chule Covid 19 natna a kon kijen dam ho achombeh a akivet na ngah dinga temna aneiyin ahi.

Ima Nongmaileima Shanglen, Khurai Kongpal Chingambam Leikai mun a Thursday nikho a Epao Tengbang Lup Manipur (ETLM) 3rd Foundation Day kiman na a ahoulimna a asei ahi. Covid 19 natna hi Jiribam district a ‘local transmission stage’ a um ahi, tia phabep kiventhem angaiyin, chule quarantine centre a hi ahithei chan a aum lhomsah dinga aseiyin ahi. Quarantine centre khat a mi tamtah akikoi jeh a Covid 19 natna chal ahi, tin jong aseiyin ahi.

Hiche ho jeh a natna achal louna dinga quarantine centre joh kal sah ding chule kitup tah a vetkol ding ahi. Hitobang boina dinmun a, natna neiho leh natna a kon kijen dam chule gamdang a kon hung kile ho vetdan achombeh ahi hi ngah ding ahi. Ajeh chu hitobang chonna jeh a khangthah numei khat thi lo ahi, tin aseiyin chule khonunga hitobang thilsoh aumkit louna dinga ibol thei chan u ibol thei diu ahi, tin temna aneibe in ahi.

MLA L Sushindro leh jin a kikou adang dang hon Manipuri Jagoi Esei Nongmai, Thang-Ta leh Meitei Mayek a subject topper jouse kipapina anei uvin chule thisan pe ho (blood donor) ho thilpeh jong ape uvin ahi.

Kin gon a Income Tax Officer Laishram Ramchandra Singh, Pradhan Khurai Chingambam Leikai GP Lairikyengbam Kananbala, Pradhan Waiton GP Pukhrambam Surbabala Devi leh Pradhan Nandeibam Leikai GP guest of honour leh president a apang uvin ahi.

 

Gamsa man le that ho gotna sangtah kipe ding

B.Lalboi Gangte

CCpur. July 9(ET): Deputy Commissioner, Churachandpur leh Pherzawl leh Additional Principal Chief Conservator of Forests (Wildlife) & Chief Wildlife Warden, Government of Manipur in achesa April nisim 30 nikho’a thuso abol nao’a Wildlife (Protection) Act, 1972, Chapter-Ill Section 9 chungchon’a gamsa, ju le-va mat leh tha kham ding’a thulhuh na anei dung uvin Churachandpur District hopsung Suangdoh Sub-Division Chiefs’ Association leh Village Authority, Phaitong, Khajang, Aibulon, Hanship leh Bungpilon hon jong amama kho gamsung’a gamsa mat leh tha natoh kisai khana/kham na ananei tauvin ahi.  Hiche toh lhon’a Deputy Commissioner, Churachandpur leh Pherzawl leh Additional Principal Chief Conservator of Forests (Wildlife) & Chief Wildlife Warden, Government of Manipur in Meeting Resolution No. 1 dungjui’a daan palkeh’a chatloh aum leh Police leh Forest Department toh kitho’a mat ding chuleh Wildlife (Protection) Act, 1972 Section 50 (I) noi’a kum 3 songkul  (jail) a tang thei ding’u ahi ati. Hiche naban’a Dk. 25,000 chan jong leu thei ding’u ahi. Gamsung vebitna ding’a tohgon kinei ho mitakip in ajui cheh ding uvin gamsung mipi ho temna jong ananei uvin ahi.

 

Pending case akhoh ten ho tailou va Manipur HC leh District court ho kikhah ding

Imphal, July 9(ET): Covid-19 jeh a Central Government in July 31 chan lockdown aphon in chule Manipur Government in July 15 chan lockdown aphon toh lhon in High court of Manipur in jong July 10 chan court a toukhomna umlou ding in thuphon abol in ahi. Hinlah case pending umsa akhoh ten ten hovang kibol ding ahi ati. Hiche case ho boipi nading achun jingkah 10:30 apat nilhah 4:00 chan hiding in asei in chule Lunch break chu 1.15 pm apat 2 pm chan hiding in asei in ahi.

High court thuso khat in aseina achun Manipur govt. in covid-19 douna ding a pan alah kitosot ahi in chule court a official leh staff ho heng a jong kiven ding dan ho seipehna aki ngaicha e ati. Aseibena achun court hall, office chamber leh High court leh district court a room ho jong sanitize leh fumigate bolding a pha ahi ati. File leh record book ho akiman masang in phatah in asutheng uvin asung a natong hon jong kiven thei chan in pan ala uvin ahi.

 

Khamnathei Dk. Crore 1.7 val kimandoh

Imphal, July 9: Anti-Smuggling Unit, Custom Division, Imphal officer hon thuguh pole ho akon thulhut amu dungjui uvin tunin kholchil na anei nao’a Phundrei Makha Leikai, Thoubal District akon Md. Ataola Khan chanu Anandi (18) anamandoh uvin ahi. Amahi Imphal East District hopsung Tribal Market kom’a Heroin powder 538.6 grams toh anamatdoh’u ahi.

Hiche thilsoh nachung’a tunin Anandi chung’a  NDPS Act, 1985 noi’a case no. 03/CL/NDPS/CUS/DPFIACI/ 2020-21 a jih lut anahitan ahi. Aman khamnathei apoh hi a sum a sei ding in Dk. 1,07,72,000/- man vel hiding in akisei in chuleh achung thu kholchilna anei jing nalai uvin ahi.

Alangkhat ah Tunin Insp Lunthang Vaiphei, OC/ CDO, BPR thupehna noiya SI Keshorjit makai Bishnupur District Commando team khat in Kumbi Sangaikot Napat lampi a checking abol nauvin Eeco Van leh Kenbo bike a hunglhai akon khamnathei amandoh uvin ahi. Akimandoh teni chu Moltuk Village, Chandel district a cheng Thanglhogin Lhungdim chapa Jangkholun Lhungdim (27) ahi in chule khat chu New Songyang, Chandel district a cheng Mangjapao Haokip chapa Thanlal Haokip (30) ahi in ama teni akon bag ni akon soap case 62 cheh chule Heroin No.4 packet khat amandoh uvin ahi. Ama teni seidan in hiche khamnathei chu Napat leh Kumbi area a johding a moreh akon ahin pohlhon ahi. Akimandoh jouse chu kholna neibe dingin Kumbi PS khut a apedoh tauvin ahi.

 

India a Covid-19 positive 24,879 kimube, nikhat a dinga case kihetbe atamna pen hita; Active case 90% hi state 8 a um

New Delhi, July 9: India gam a Covid 19 active kisei lah a 90 percent hi Maharashtra, Tamil Nadu, Delhi, Karnataka leh Telangana gam panna a state 8 a um ahi in chule active case 80% hi district 49 a um ahi, tin Group of Ministers (GoM) in Thursday nikhon COVID 19 thu a hetsahna aneiyin ahi.

Covid 19 natna jeh a thi 86% hi Maharashtra, Delhi, Gujarat, Tamil Nadu, Uttar Pradesh leh West Bengal panna a state 6 a um ahi in chule thi na toh 80% hi district 32 a ahi, tin Union Health Ministry in aseiyin ahi. GoM in Union Health Minister Harsh Vardhan chairperson hina a Thursday nikho a 18 channa meeting aneiyu ahi in, Covid 19 jeh a thi na toh atamna gamkai ho khohsahna achom a akipe e, ati.

“India a natna akisei khohset na pen gam 5 hi global case 1,453 leh 68.7 toh tekah dinga case hi per million a alhomna pen ahi in, 538 (case) leh deaths per million India a 15 hi ahi”, tin Ministry thuson aseiyin ahi. Maharashtra, Tamil Nadu, Delhi, Karnataka, Telangana, Andhra Pradesh, Uttar Pradesh leh Gujarat gam a coronavirus active case hi 90 percent vel hi ahi, ati.

Thursday nikho chan a India pumpi a facility 3,914 um a chule isolation bed 3,77,737 (ICU support umlou), 39,820 (ICU bed umna) chule 1,42,415 oxygen-supported bed leh 20,047 ventilator um ahi, tin GoM henga hetsahna anei uvin ahi. N95 mask crore 21.3 val, PPE kit crore 1.2 chule hydroxychloroquine tablet 6.12 crore val tuchan a kihom doh ahitai, ati.

“Maban a Covid 19 nat vetkol nadinga containment leh surveillance khoutah a chepi ding, testing capacity bulhing set a man a, natna chom chom neiho leh akum tam tehse lang ho vetkol ding, hotspot ahi thei namun ho khol a, Aarogya Setu kiti digital ho manchah ding hi khohsahna kipe ding ahi”, tin Vardhan in aseiyin ahi. “State leh Union territory hotoh kitho a natna mat doh/hetdoh vah a jen ding, athi alhom nathei dinga panlah ding hi tupna um ahi”, ati.

Unlock 2.0 sunga, containment leh surveillance chule containment zone kikhenna ho a pan kila ding, health inistry website a hitobang mun ho hetsahna umding ahi. Angaicha khoh tah tah hobou kiphal ding, contact-tracing sangtah a kibol a, inn son kholna ahilouleh surveillance bol ding ahi, ati.

Dr Sujeet K Singh, Director, National Centre for Disease Control in India gam a pandemic sunga surveillance kibolna report ape in ahi. SARI/ILI case, serological survey leh laboratory testing network kehlet a ‘surveillance leh containment strategy’ chepi ding khohsahna apeh u ahi.

Amit Khare, Chairman, Empowered Group-8 (on information, communication and public awareness) in report apehna a, public awareness chunglang a pan kilahna ho thu aseiyin ahi. Group in thusoh lhem/dihlou (fake news alert) 6,755 amu a, hiche lah a 5,890 hi donbutna apeh uva, foreign media story 17 a published abol u ahi. Group in Covid 19 bulletin daily 98, media briefing 92 chule press release 2,482 asodoh ahi.

Pandemic sunga ‘Atmanirbhar Bharat Abhiyan’ kiti PM Modi in launch abol noiya loubol miho leh MSME holah a kithopina thil kipeh chungchang a ‘awareness’ peh nadinga group in pan lentah alah a chule Covid 19 pandemic toh kisaiya ‘mental health issue’ jong aboipi u ahi. Thuhilna (message/information) hohi ama ama gam pao a so ding jong khohsahna sangtah apeh u ahi, tin Ministry in aseibe in ahi.

India gam a Thursday nikho a coronavirus case athah 24,879 akimu be in, hiche hi nikhat sunga case kihedoh atamna pen hi ahitai. Hiche toh kilhon a gamsunga natna nei agom a 7,67,296 lhing a chule natna jeh a mi 487 athi be kit toh kilhon a athi jong mi 21,129 lhing ahitai, tin Health Ministry in Thursday jingkah nidan 8 a update abol nauva asei uvin ahi.

Hiche lah a active case 2,69,789 um a chule natna a kon kijen dam mi 4,76,378 lhing ahitai. Kihouna a External Affairs Minister S Jaishankar, Civil Aviation Minister Hardeep Singh Puri, Minister of State for Health Ashwini Kumar Choubey leh Minister of State, Chemical and Fertilisers, Shipping Mansukh Mandaviya jong pang ahi. Dr Vinod Paul, Member (Health), Niti Aayog hi video-conferencing a kon meeting a pang ahi.

 

Modi sorkar in Covid-19 pandemic sunga Hindutva lhangsap ding agot ahi: CPI-M

IMPHAL, July 9(UNA): CPI Manipur State Council in Thursday nikho a thuso anei nauva Narendra Modi lamkaina BJP sorkar in Covid-19 jeh a themjilna mun ho akikha hi phat gomkom a aman uva, Central Board of Secondary Education (CBSE) class 11 leh class 12 syllabus a kon freedom fighter ho thusim, Human Rights, Citizenship Rights, Social Movement leh adang dang alahdoh uva, Hindu hou lhangsap nadinga RSS Hinduva ideology a akhel u ahi, tin ngohna anei uvin ahi.

Hiche hi democracy leh hou thu a chamlhatna (secularism) tahsanna nei ho douna ahi, ati. CPI MSC in hitobang kinel baotamna thei educational policy draft kibol thah ho adoudal jing ahi. Syllabus thah hin khonung a milen tah hiding lungtup nei chule kinepna nei simlai ho hinkho asuhset ding ahi. Themjilna a hitobang tohgon aneiyu hi communalism lhangsap nading ahi in, hiche hi BJP sorkar in atup jing tohgon ahi, tin thuso chun aseiyin ahi.

Sorkar in RSS Hindutva lhangsap nadinga educational sector centralized bol ding abol ahi in, themjilna mun hohi sum tong hol na sumkol veina mun a khel ding agot nau jeh jong ahi. Narendra Modi in education policy thah hitobang anei ho sorkar in alahdoh dinga CPI in thumna aneiyin, chule hitobang thil hi akibol jom a ahileh CPI in mipi kiphinna chom chom gamsung pumpi a amakai ding ahi, tin aseibe uvin ahi.

 

MCM in Indo-Myanmar Border gate hon dinga sorkar henga ngehna nei

Imphal, July 9: Meitei Council Moreh (MCM) in Indo-Myanmar border gate akihon nadinga state leh centre sorkar henga temna anei uvin ahi.

MCM office mun a Council President M Thoiba in thusoh miho akimupi na a, Indo-Myanmar border gate hi Covid 19 pandemic jeh a achesa March lha a kon kikhah ahitai, tin aseiyin ahi. Hiche a kon Moreh town a cheng hon hahsatna sangtah ato a, niseh a nikho tha kihol thu ho dinga kihinso na ding hahsa ahi.

Imphal khopi a kon kipolut a niseh ngaichat thil phabep hi lhing joulou ahi, ati. “Gamgi akikha vanga Myanmar thil atamjo hi Moreh town a kimu ahi. Ahivanga, thil hohi man tamtah a kijoh a, genthei te dinga kihinso nading aumlou jeh a hahsatna sangtah a kibe ahi”, tin Thoiba in aseiyin chule border gate hi niseh a aphat/anidan kipe sunga akihon theiya ahileh mipin angaicha khoh khoh ho akichoh thei diu ahi, ati.

Indo-Myanmar gamgi hi lockdown a kon kikhah ahitan, ahivanga, khamnathei thil, WY tablet, Win cigarette leh Godzilla (thoukang lou) ho sepai hon amat jing uhin gamgi galkaiya kon Moreh town a thil akipolut jing e, ti avetsah ahi, ati.

Assam Rifles, Police leh Commando hon dan in akha thil ho amat jing apachatna thu aseiyin chule khamnathei thil hohi hoiya kon a kipolut ham ti akhol diuvin temna aneibe in ahi. “Dan in akha thil hohi gamgi akikha pet a Moreh town a iti hunglut ham. Moreh town a drug factory khat tou um ahidem tihi mipi thudoh kisei jing ahi”, tin Thoiba in aseibe in ahi.

Centre in  NE state ho panna a state 14 ho ding fund homdoh

Imphal, July 9: Tuni chun 15th Finance Commission in recommend abol bang in state 14 ho a ding 2020-21 a Post Devolution Revenue Deficit Grant crore 6,195.08 ahopdoh utoh lhon in Northeast sung a Arunachal Pradesh tailou adang jouse ajou in Assam a ding in dk. Lakh 63158.33, Manipur ading in dk. Lakh 23533.33, Meghalaya a ding in dk. Lakh 4091.66, Nagaland a ding in lakh 32641.66, Tripura ading in dk. Lakh 26966.66 chule Sikkim a ding in dk. Lakh 3733.33 ahi.

IPS Transfer and posting

Imphal, July 9(ET): Themthing Ngashangva, IPS, DIG (Range-I) & DIG (Range-IV) & i/c Director Fire Service in addition apat DIG (Range-I) & DIG (Range-II) & i/c Director Fire Service in addition; Mamata Wahengbam, IPS, DIG (AP-I)& DIG (AP-II) in addition apat DIG (AP-I); Achin Haokip, IPS, DIG (INT/NAB) apat DIG (AP-II); Kabib K, IPS, DIG (Range-II) apat DIG (Range-IV) ahiuve.