State sorkar leh Assam Rifles hon NSCN-IM chunga action alah loujeh a...

State sorkar leh Assam Rifles hon NSCN-IM chunga action alah loujeh a KSO in alunglhai louna thu sei

87
0
SHARE

State sorkar leh Assam Rifles hon NSCN-IM chunga action alah loujeh a KSO in alunglhai louna thu sei

Kangpokpi, Feb 26(ET): Kamjong Chassad a avel vel a themmona neilou Kuki ho chunga NSCN-IM thingnoi ho akhanset a dan nahsah louva aum state sorkar leh Assam Rifles hon khohsahna aneilou jeh uva Kuki Students Organization in alunglhai louna thu asei uvin ahi.

State sorkar leh Assam Rifles hon NSCN-IM ho chunga action lah ding ago pouve, tin jong asei uvin ahi. NSCN-IM leh India sorkar in hem kham kinoptona asem hin Manipur gam ahop lou ahi’in, thingnoi hohin avel vel a Kuki kho helou ho asuhgim jingu ahi, ati.

Khaiminlen Doungel, Information Secretary, KSO-GHQ in achesa February nisim 24 nikho, ni ni masanga Phaimol kho, Kamjong district a cheng Seikhohao Haokip Chassad, Kamjong a NSCN-IM thingnoi hon ajeh beiya melsetah a avoh uva ahivanga state sepai leh Assam Rifles hon hetpeh na jong nei louva, ima tilou banga thilsoh nahsah louva akoi ahi, ati.

Ahivanga, janni nikho a KNA thingnoi hidinga ginmo hon Samushong a NSCN-IM spy (thuguh khol) Sinakeithel khosung mi 2 avoh uchun Assam Rifles hon apet pet in adel lut uva, kho haosa ho akou uva chule thingnoi ho apehdoh diuva thumna anei uva, khosung mi asuhgim ahi, tin jong aseiyin ahi.

Ipijeh a Assam Rifles ho nam khat chunga lungtah a khat khohsahna chom apeh ham. Chassad a thilse bol thingnoimi ho chunga ipijeh a action alah louvu ham? Ibol a dan kibang tah a ajui louvu ham? CO, 24 AR hi tribal ahijeh ham, tin aseiyin chule Assam Rifles hon bungkhenna aneijeh a janni a kon mipi lunghanna soh ahitai, ati.

Thingnoi hon khosung mi asuhgim hi kidoudal jing a chule demna sangtah kinei ahi, tin aseiyin, chule Assam Rifles hon KNA thingnoi chunga action lahtei ding agot uva ahileh boina sem pan a NSCN-IM thingnoi ho chunga jong kibang tah a action alah ding ahi, tin aseiyin ahi.

Kum tamtah Chassad area a cheng Kuki khosung hohi NSCN-IM thingnoi hon gam deichat jeh a asuhgim jing ahi. Chassad gam a hunam a building sah ding agot uva chule khosung mihon agam leiset uva phailei abol diu jong ajahda u ahi. Amaho lungdei ahi chan le khosung miho agih uva avoh jiuva chule khosung miho kouna le gihna lekhathot jong apeh jing u ahi. Avel vel a thil umdan sorkar hetsahna kinei ahitan, ahivanga tuchan geiya NSCN-IM chunga action kila lou ahi, tin Khaiminlen Doungel in aseibe in ahi.

Chief Minister in State Assembly a NSCN-IM toh hemkham kinoptona India sorkar in asem hin Manipur gam ahop poi, tia kicheh tah a asi ahitan, ahivanga dinmun hin achom asei ahi, ajeh chu NSCN-IM chunga AR hon action lah ding jong agot lou ahi, ati. Hemkham hin gamsung ahop lou ahijeh a state sorkar in dan palkeh jing a NSCN-IM chunga action alah ding ahi, tin aseiyin chule state sorkar thipbeh a auma ahile NSCN-IM hon thilse bolna dinga lunglet na anei cheh cheh diu ahi, ati.

Sorkar chule mipin chamna adei ahi’in, kihetthem to a kijato ding adei ahi. Chamna deilou ho chunga state sorkar in action alah loule chamna umlou ding ahi, ati. Chule sorkar thipbeh a aumjeh a dinmun akhohset a, deilou thilsoh alhun a ahileh Assam Rifles leh State sorkar themmo kichan ding ahi, tin aseibe in ahi.

Sinai Camp lut ding kigo Assam Rifles ho kilutsah lou

Imphal, Feb 26(ET): Jani jan (Feb 25-26 kikah jan) nidan 1:10am vel chun New Canan post a um Assam Rifles ho gari thum Sinai Camp lutding in anacheuvin Sinai Camp a um hon ahetdoh phat uvin thal anakap utoh kilhon in KWU Bungpi area makainan Samusong ah Sepai ho alamtin uvin ana nungsol taove tin tahsan umtah thulhuh akimun ahi.

Hiche thilsoh hi achesa February 24, 2020 (Monday) nilhah lam nidan 3:00 vel’a Kamjong district, Phaimol kho mi Seikhohao Haokip (25) S/o Mangjathang Haokip chu NSCN-IM hon KNA toh kikhutjop ahe tia ngohna aneiuva nasatah a anavoh u lethuhna a February nisim 25 nia gollhang hon Sanakeithel a Tangkhul mi 2 ana voh u chu Assam Rifles hokom’a complain anabol jeh u Assam Rifles ho chu Sinai Camp analut gou ahi akiti.

Alangkhat ah IM hon anavoh Seikhohao Haokip chu tunin (Feb 26) Kuki Inpi Imphal, KSO Imphal leh KWU Imphal ho panlah nan KCC Hospital, Deulahlane, Imphal ana kilhut in tutu hin Speicial ward Room No. 7 a vetkol ahin, amahi IM hon avoh naova kon akong apat anoilamse chatthei lou ahi jong akiti.

 

Border Haats sah na dinga proposal kipelut ahi tai, tia CM in Assembly a sei

Imphal, Feb 25 (ET): 11th Manipur Legislative Assembly ni 9 ni channa House lamkai N Biren Singh in Tusom Christian kho, Ukhrul district leh Konkanthana (Huimine Thana) leh Pilong, Kamjong district a Border Haats sah nadinga proposal Ministry of Commerce, India government henga kapelut tai, tin aseiyin, hiche hi Ukhrul leh Kamjong district a ‘border trade’ tosot nading ahi, tin aseiyin ahi.

Kamjong leh Kasom sub-division a custom office/check post hon nading tohgon jong aum’e, tin aseiyin ahi. Imphal Custom division noiya Integrated Check Post Moreh a Land Customs Station, Custom Preventive Force leh Moreh GST Range in Myanmar gamgi a um Customs leh Excise check post ho avettup ahi, ati. Indo-Myanmar gamgi hi km 1640 lhing ahi’in, gamgi hi thu lentah ahi. Border Haats 9 kilheng ahitan, India gam km 16 hopsung chule Myanmar gam km 16 hopsung a lungmong tah a va le nathei ahi, tin aseibe in ahi.

MLA RK Imo thudoh CM Biren in adonbutna a, e-budget hi sorkar in agelkhoh ahi’in chule khovei kah a budget akipohdoh niteng budget document hi House member jouse e-mail a kipe ding ahi, ati. Irong Chesaba a police station sah nading mun kive nalai ahi’in, gam leiset hi mi a ham ahilouleh sorkar a ham ti akicheh a chule achoh nading leh compensation bol nadinga natoh ho achelhah lai ahi, ati.

Weight & Measures Department, Revenue, CAF & PD Minister Karam Shyam in official kilhen chungchang aseiyin, AS Peter Shitsangmi, Assistant Controller hi Deputy Controller anahi L Nripendrakumar Singh retire ahi jou March 1, 2017 a kon senior most natong hi ahi, tin aseiyin ahi. L Nripendrakumar in December 15, 1998 a kon Weight & Measurement Department a Assistant Controller panmun atuh ahi, tin suhthengna aneiyin ahi.

MLA Alfred Kanngam Arthur thudoh Minister pa in adonbutna a AS Peter Shitsangmi hi attendance alhahsam jeh, staff ho lo kitup tah a apeh theilouna leh administration akitup louna ho chule Ukhrul district a revenue collection a alhinglou thil ho aumjeh a promotion kipe lou ahi, tin aseiyin chule amahin kum 5 val ACR apehlut loulai ahi, ati.

Tribal & Hills Areas Development Minister N Kayisii in tribal development a ding fund alhahsamna aumpoi, tin aseiyin chule Saikul a kisa kailhang ling kiho jeh a anase hi athah a sah kit nadinga sorkar in phatsahna alah got ahi, ati. Impa kho, Tamenglong district, Thingpuikuol kho, Churachandpur district leh Chamu kho, Ukhrul district a Special Centre Assistance (SCA), Tribal Sub-Plan, 2017-18 noiya Health centre sah nadinga dangka lakh 25 cheh sanction kibol ahi, tin aseiyin chule natoh amachal dan akimu jouteng le bou fund kipe ding, work order akisodoh kum khat ho sunga sah chai dinga tupna um ahi, tin aseibe in ahi.

MLA K Ranjit Singh in ‘biomedical waste’ ho kitup tah a kisuhmang thu leh doctor leh medical staff dang dang ho posting kitup lou thu a thudoh aneiyin ahi. Patpuihmun leh Senvon mun a PHC building akisah theilou thu Dr Chaltonlien Amo in apodoh in, Health Minister in Operation Theatre, Minor Operation Theatre, Delivery set, leh ultrasound kivetna manchah ho thinglhang gam a jong muthei ahina dinga pan alah dinga temna aneiyin ahi

Opposition MLAs K.Ranjit Singh, Dr.Chaltonlien Amo, Kh Joykishan Singh, R.K.Imo Singh, Alfred Kanngam Arthur le  K.Meghachandra Singh in Demands for Grants thu aseikhom nauva ‘policy cut motion’ abol u ahi.

CBI in MPSC 2016 exam thu lha gup sunga akhol doh dinga Manipur High Court in thupeh nei

Imphal, Feb 26(ET): Manipur Public Service Commission (MPSC) in abol Manipur Civil Service Exam 2016 kibol dan thu khol a Central Bureau of Investigation (CBI) hon FIR kijihlut ni a kon lha gup sunga athu akhol doh diuvin Manipur High Court in phat atep peh in ahi.

CBI hon lhaseh leh ‘interim report’ apeh diuva jong Justice Kh Nobin leh Justice Lanusungkum Jamir lamkaina division bench in aseibe in ahi. MPSC 2016 Main exam a lolhing joulou candidate hon Manipur High Court a adih louva na kitong aum’e, tia case asem u ahi’in, member ni panna a thukholna nei hon exam kivetna a adihlou thil phabep amudoh u ahi. Answer script a examiner soi umlou, marks kikhel, answer sheet kive louva marks kipehna ho amudoh u ahi.

High Court in kum masa October 18 ni a appointment order asuhmang a chule CBI hon lhathum sunga athu akhol dinga thuhilna apeh ahi. Lolhinna nei candidate hon Supreme Court a court order chouna anei uva ahivanga hiche hi November 22, 2019 ni a asan peh tah louvu ahi. Manipur High Court in thuhilna anei jouva CBI hon January 31, 2020 ni a FIR asem ahi.

Lha kipat til a CBI hon MPSC a mel hetlou official ho douna a case ajihlut u ahitai. Marks akikhel in, examination controller akilheng pon chule answer sheet vetna dinga dan asem pouve, tia petition pe hon ngohna anei ahi. Commission chule court in alhendoh committee hon answer script 523 a (paper/subject 24) a examiner soi umlouva marks akikhel amudoh u ahi. Chule answer sheet 8,163 lah a paper sagi a soi umlou chule supervisor in paper 15 a soi akai lou ahi.

Thuson asei dungjuiya Education Paper-II leh Public Administrative Paper-II a answer thum a marks kipelou, General English Paper-I, Education Paper-II leh Public Administration Paper-II a answer 12 hi score akipeh louvanga mark akigop (total) na a marks kipe ahi. Geology Paper-I a answer script 4 a marks kipelou, ahivanga total kibolna a pang ahi.

 

Delhi boina a thi 27 lhingta, FIR 18 kijihlut; PM in chamna sem dia temna nei

New Delhi, Feb 26: Delhi Police hon Wednesday nikho channa North East district a boina thilsoh aumtoh kisaiya FIR 18 ajihlut a chule mi 106 tobang amat u ahitai.

“Thilse bol ho akihedoh tai. CCTV footage leh evidence kinei ahi. Tunin boina thilsoh aumpoi”, tin MS Randhawa, Delhi Police PRO in thuso miho henga aseiyin ahi. Delhi Police hon ‘helpline number’ jong ahil uvin, thulamleng ho mipin agelkhoh loudinga temna anei uvin ahi.

Delhi khopi a kiphinna bol hon chamna asem’a, sopi hina atuh chah diuvin Prime Minister Narendra Modi in temna aneiyin ahi. “Delhi a sopi numei leh pasal hon chamna atuhchah diuva temna kanei ahi. Aganna thei pen a chamna leh lungmonna semding hi thupi ahi”, tin Modi in Twitter a aseiyin chule Delhi mun chom chom a boina dinmun ho velvetna anei thu aseibe in ahi.

CAA atoson holeh adoudal ho kah a Sunday nikho a North east Delhi a kinahna sangtah um’a, nam kah a kinahna soh ahi. GTB (Guru Teg Bahadur) le Lok Nayak hospital a kon doctor ni in asei dungjuiya, kinahna thilsoh a tuchan geiya mi 27 thi ahitai. Gamkaiya inmun chule gari meiya kihal a chule Jafrabad, Maujpur, Chand Bagh leh veng dang dang a ni ni kinahna aum sunga mi 250 val kisukha ahi.

Nikho kipat til a Delhi Chief Minister Arvind Kejriwal in achesa nithum sunga boina vetup dinga Army athum be ahi. “Home Minister in dinmun vetup dinga Army asol dinga avel a ngehna kanei ahi”, tin Kejriwal in Assembly a aseiyin ahi.

Nupi thah khat athisa kimu

Imphal, Feb 26(ET): Muslim numei ajineina lha 6 bou lhing nalai khat ginmo theitah dinmun in a room ah athisan akimun ahi. Thilsoh hi janlhah nidan 8:15 vel Kumbi Police Station hopsung Borayangbi Mayai Leikai Ward No. 2 a soh ahi. Amanu chu Samerun Babi (18) ahin aloipa chu Tamiju alias Apikpa (24) ahi akiti.

Thulhut kimu dungjui in numeinu thisa a gamudoh Salatur Rahaman kiti a-inn kieng pan numeinu tehpu’n koiham khat athi e tia ahung penjah phat a kintah a kaga lhailut ahi tin aseiyin ahi.

Alangkhat ah thilso petchun aloipa inn anaumpon, atehpi, atehpu leh asopi numei khat thilso jouva kon’in akiholmo uvin ahi jong akiti. Jankhang lang geichun SP Bishnupur, Priyadarsini Laishram, SDO, Chirom Somendro, leh Kumbi Police Station OC chuleh Forensic Science team hon aboipi uvin Post mortem bol ding’in thilong ana podoh tauvin ahi.

Thilsoh toh kisaiyin themmo kichan thinatoh nu tehpu Md Abdul Gafar (48) S/o Md Abdul Jabar police hon tunin Ithai area ah aman uvin thilsoh kholna achelha jing in ahi.

 

Assembly in Dk. 12,982,312,000 lhing ‘Demands for Grants’ 6 phatsahna neita

Imphal, Feb 26(ET): 10th Session, 11th Manipur Legislative Assembly ni koh ni chan na Assembly in dangka 12,982,312,000 lhing Demands for Grants 6 kilungtah in phatsahna anei tauvin ahi.

Phatsahna anei houhi – Rs. 11,35,20,000/- (Demand No. 9 – Information and Publicity), Rs. 846,61,28,000/- (Demand No. 11 – Medical, Health and Family Welfare Services), Rs. 186,31,13,000/- (Demand No. 21 – Commerce & Industries), Rs. 3,99,05,000/- (Demand No. 34 – Rehabilitation), Rs. 7,14,67,000/- (Demand No. 35 – Stationary & Printing) chule Rs. 242,81,79,000/- (Demand No. 38 – Panchayat) ahi.

Health and Family Welfare thu asei nauva Chief Minister N Biren Singh in CMHT card neihon amudiu phatchomna amu nading uva hahsatna ato louna ding uva sorkar in bolthei chan abol ding ahi, tin aseiyin chule Hospital (empanel) kipe jouse toh Principal Secretary (Health) level a committee in ‘health insurance scheme’ a alhasam ho avetsui ding ahi, ati. Hospital hohin scheme chungchang mipin ahetna dinga notice board a dan ho atahdoh diu ahi, ati.

Health and Family Welfare, Minister L. Jayantakumar in CM Biren lamkaina a achesa January 21, 2018 kum a CMHT hondohna um a chule centre sorkar in September 23, 2018 ni a Pradhan Mantri Jan Arogya Yojana (PM-JAY) hondohna anei ahi, ati. CMHT noiya insung khat kum sunga dangka lakh 2 chan sum beiya kijen thei chule PMJAY noiya dangka lakh 5 chan kijen ding ahi, tin aseiyin chule damlou hon hospital a admit abol a kon ni 7 sunga CMHT card avetsah diu, PMJAY card neihon ni 5 sunga avetsah diu ahi, ati.

Lamdeng a Bio-Waste Treatment Facility a dinga sorkar in gam leiset acre khat alah ding ahi, tin Minister pa in aseiyin chule Bio Medical Waste management a dinga sorkar in 2020-21 kum a dangka crore 2 budget agon ahi’in, hiche hi RIMS, JNIMS chule government hospital chom chom a dinga ‘incinerator’ lahna a kimang ding ahi, ati. Record dungjuiya JNIMS, RIMS leh hospital dang dang a 2019-20 kum a ‘biomedical waste’ hi 125MT vel hi ahi. National Green Tribunal thuhilna dungjuiya Bio-Waste Treatment Facility proposed kibol a, Lamdeng, Imphal West a kichon ahi, ati.

Sorkar in Pherzawl, a District Hospital semdoh ding agon ahi, tin aseiyin chule CHC Parbung kimang pan ahitai, ati. Hiche mun a hi niseh a OPD a damlou alhangpi a 20 ho kive a chule lha seh a nao soh case 4 ho um ahi, tin Health Minister in aseiyin chule staff phabep District Hospital, Ccpur a kimang ahi, ati.

Rehabilitation portfolio jong tuh a N Biren Singh in thingnoimi 70 in thingnoi adalhah ahitan chule gal manchah leh meichang 20 apehdoh u ahi, ati. Verify kibol thingnoimi (surrenderee) 53 bank account a dangka 2,50,000 deposit kibol a chule adang thingnoi 6 a account a ‘one-time payment’ a dangka 1,44,000 deposit kibol ahi, tin aseiyin ahi. Thingnoi lampi dalha ho dinga skill development training kibol peh a chule akipedoh thingnoimi 81 hi rifleman a kila a chule 21 follower a kila ahi’in, tuchan geiya thingnoimi 486 ‘rehabilitation’ kipe ahitai, ati.

RD&PR Minister Th Biswajit Singh in House a MGNREGA thu aseiyin, hiche noiya sorkar in 2020-21 kum a natoh nading nikho 49 atup ahi, ati. Department in twi hahna mun ho a ni 50 tha man apeh dinga jong mopohna nei ministry ho henga lekhathot kipe ahi. Ahivanga Ministry in donbutna anei naipoi, tin aseiyin ahi. Governing Body/Advisory Committee, State Institute of Rural Development (SIRD) hi 2013 kum a kon kimangcha talou ahi’in, sorkar in SIRD kivaipoh akitup nadinga aganna thei pen a Governing body athah asemdoh ding ahi, tin jong aseiyin ahi.

Commerce & Industries Minister, Th. Biswajit Singh in Micro Small and Medium Enterprise (MSME) noi Prime Minister’s Employment Generation Programme (PMEGP) a 2019-20 kum a mi 3,040 natoh asempeh a chule 2018-19 kum a mi 10,160 natoh asempeh ahi, tin aseiyin ahi.

Handloom & Textile Industries injong tohmun sem nadinga ‘skill development training’ abol jing ahi, tin aseiyin, 2017-18 kum a mi 2175 kichuhna kipe a, hiche lah a 65 in private sector a na atoh a, 2110 hin achang a asum muna ding akibol u ahi. 2018-19 kum a mi 4275 kichuhna kipe a, private sector a 74 in atoh a, adang 4201 hi ‘self employed’ hi ahi. Achesa kum thum sunga agom a mi 8144 kichuhna kipe a, 139 in private sector a na atoh a chule 8005 hi ‘self employed’ ahi, ati.

Natoh mun hi sorkar inbou asem thei ahipon, entrepreneur tilou angaiye, tin Minister pa in aseiyin chule sorkar in dangka crore 81 lut a Mega Food Park sem ding agot ahi’in, crore 50 hi centre in apohdoh ding ahi, ati. Akisemdoh teng Food Park a hi natoh mun 3,000 ho kisemdoh ding ahi, tin aseiyin chule sorkar in insung lakh 1.5 in aphatchompi ding Jewellery Park semdoh ding jong tohgon anei ahi, tin aseibe in ahi.

CCpur District sung’a khamnathei jeh’a gamsung’a setna umho gelkhoh najal’a Houbung chom chom in fellowship ananei

B.Lalboi Gangte

CCpur. Feb 26 (ET): Churachandpur District, Lamka khopi sung’a Houbung chom chom um hon Kaani jeh’a gamsung’a setna umho gelkhoh na jal in tuni jinglam nidan 11:00 akipat nilhah lam nidan 3:00 chan in EBC Mini Auditorium, Dorcas Hall Campus mun’a Kho chom chom’a Haosa holeh Houbung Lamkai hotoh fellowship ananeikhom uvin ahi. Hiche phatsung in kichuh na peding in Khamsanglian Phiamphu apang in ahi. Session masapen jinglam nidan 11:00 akipat 12:30 kikah sung ding chu Rev. Dr. Khen P. Tombing in hondohna anei in chuleh  Khamsanglian Phiamphu in Kaani kitu hin gam leiset leh Society asuhset dan ho thupi pansa in hilchet na ananei in ahi. Chuleh Session nina chu nilhah lam nidan 1:00 apat nidan 2:30 kikah sung in Khamsanglian Phiamphu in “economic sustainability in Churachandpur: With Special Reference to use of Land” kiti thupi pansa in thuhil na ananei kit in ahi.

Hiche toh lhon’a hiche fellowship achun Presbyterian Church in India-Reformed noi’a um kha kho Haosa 7 leh Houbung lamkai 13, Thangkhal Baptist Church (ABA) apat kho Haosa 1 leh Hou lamkai 2,  Evangelical Baptist Convention apat Kho haosa 47, Divisional Superintendent 5, Evangelist 2 leh Hou lamkai 3, MPCS apat Haosa 10 leh Hou lamkai 2, TBC (IFCA) apat kho Haosa 4, EOC apat Hou lamkai 11, CBA apat Haosa 2 leh Hou lamkai 2,  SBCA apat Haosa 2, ZPCS apat Hou lamkai 6, ESC apat Haosa 4 leh Hou lamkai 1, NTBC apat Hou lamkai 3 leh BCM apat Hou lamkai 2 in pan anala uvin ahi.

Bundi vadung a bus lhailhah jeh a mi 24 thi, PM in lunghempi

New Delhi, Feb 26: Rajasthan Bundi a bus toset jeh a asung a tou mi 24 in thina ato utoh lhon in Prime Minister Modi in athiho insungmi ho heng ah lunghemna thuthot abol in ahi. Aseina achun Bundi vadung a bus lhailha na chung a vangset toh insungmi ho thohgimna aman jong ahetpeh thu asei in chule akitongkha a kijen ho jong ahung damvah nading uvin adeisah thu asei in ahi.

Akitongkha ho chu Kota hospital ah akijen uvin ahi. Rajasthan Government in Chief Minister’s Relief Fund akon athina toh insungmiho dk lakh 2 cheh peh hiding hi aphongdoh in ahi.