State sorkar in March 31 chan gamsung khatup chet dinga thuphon nei,...

State sorkar in March 31 chan gamsung khatup chet dinga thuphon nei, neh le chah kijohna ho kihong ding; Ration card le CMHT card nei ho PDS thil manbeiya kipe ding

141
0
SHARE

State sorkar in March 31 chan gamsung khatup chet dinga thuphon nei, neh le chah kijohna ho kihong ding; Ration card le CMHT card nei ho PDS thil manbeiya kipe ding

Imphal, March 23(ET): State Cabinet in Covid-19 nat achal louna ding le kivenna dinga tua kon March nisim 31 chan ima jouse kha tup chet dinga kilolna anei tauvin ahi.

Ahivanga emergency/kin khoh tah, neh chohna chule anche joh le adang dang ho kilha ong ding ahi. Cabinet in CM Secretariat mun a COVID-19 chungchang a kihouna anei nauva kilol lhahna aneiyu ahi. Chule Chief Minister’s COVID-19 Relief Fund jong semdoh dinga thulhuhna anei uvin, dangka crore 10 Corpus Fund a emergency manchah ho akimu thei nading ahi.

Gamsung mihon Fund a dinga to thei chan ato diuvin temna aneiyin chule Fund account hi Manipur State Co-operative Bank Ltd. a Account Number 70600875695 (IFSC Code: YESBOMSCB01 and MICR Code: 795808002) a um ahi. Health Department noiya CM Office Complex mun a Central COVID-19 Control Room (24X7) hondoh dinga kilolna anei uvin, Control room hi Police department panna a department chom chom hon avettup ding ahi.

Gamsunga hunglut a kholjin jouse ‘home quarantine’ bol dinga jong kilolna anei uvin ahi. April lha a kihom ding NFSA anchang hi aphat masang chule beneficiary ho man beiya hop peh dinga kikhohsah jal a aseilha uvin ahi. NFSA beneficiary a pang lou insung hahsa um maithei ahijeh a SECC list a CMHT a enroll hojong NFSA anchang kipe ding ahi.

JNIMS leh RIMS in COVID-19 natna nei ho dinga bou block agon peh ding ahi. Cabinet Minister jousen lhakhat lha lo hi Manipur State Covid-19 Fund a to dinga kilolna anei uvin chule sorkar natong jousen jong nikhat lo Manipur State COVID-19 Fund a apeh diuvin temna aneiyin ahi. Chule achesa March nisim 22 nikho a ‘Janata Curfew’ lolhin sah a gamsung miho henga kipathu aseibe uvin ahi.

Government Spokesperson Thongam Biswajit in thuso mihotoh akihoulimna ah vannoi leiset pumpia COVID-19 kihasei toh kilhon in State Government injong alou theilou kin le dong ho tailouvin gamsung pumpi March nisim 31 chan khatup ding’in hetsah thuphon aneiye ati. Ahinlah gamsung pumpi kikhah tup jongle thinglhang gam ho’a dukan neocha cha hovang honthei hiding ahi tin jong aseiyin chule Medical, Electricity, water supply chuleh alou theilou kin le dong tailou thildang vang kibol louding ahi ati.

Minister Biswajit chun aseibena ah Government in April lha le March lha a dia NFSA noiya PDS anchang leh thilkeu ho chuleh CMHT card holder ho manbei a kihom ding ahi ati. Hiche virus a kon kivenna dia government in kalsonna ahinnei jouse tosot cheh ding’in Minister pan mipite temna jong aneiyin ahi. Koitobang COVID-19 natna vei hidia kigingmo hon selguh louva mipite damtheina dia akinaipi pen hospital ho ajot diuvin athuhil in ahi. Aphatcha a akijen pouva ahile COVID-19 natna jong jendam thei ahi ati.

Alangkhat ah Minister Biswajit in koitobang Manipur gampam a um hahsatna toh ho social media ahilouleh a-u anao asopi ho thu le la hin hetsah ding’in jong aseikit’in, chuteng government injong jochan a pan alah ding ahi tin aseiben ahi.

CM secretariat a 24×7 control room kihongdoh

Imphal, March 23 (ET): Tuni a state cabinet phatsahna dungjui in Covid-19 control room ding in CM Secretariat ah aki hongdoh tan ahi.

Hiche hin gamsung a natna toh kisai a asun ajan a thu lakhom a pang ding ahi in police department ho jaona a control room hi manchah hiding ahi. Mipi hon 1800-345-3818 a covid-19 chungthu a thudoh neinom ahon ahoupi jingthei uh ahi.

Chassad-Sampui khosung boina hi masanga kon ahitan, jouthu a NSCN min kipan ahi, tia KTU NSCN in thuso nei

Imphal, Mar 23(ET): Chassad-Sampui kikah a kiloikhomna hi thusim masa ho ivet a ahijong le ana hoi khalou ahi. Hiche hi khosung kikah a gam kichuna thu ahi’in, hiche jeh a Tangkhul le Kuki nam teni kikah a kinahna ahina ding hi gamlha tah ahi, tin Kuki Tribal Union (KTU), NSCN in thuso anei uvin ahi.

Hitobang boina khohtah a Kuki organization hon NSCN min apat hi dei umlou tah ahi. NSCN chunga Kuki ho lungput ahoilou hi ngah ding ahi’in, adih louva NSCN chunga ngohna umho hi amun a boina suhthip nadinga akithopi hilou ding ahi, ati.

Manipur gam a Kuki ho historical status hi nelkal thei ahipoi. Semthu a thil kijih hohi history phengmai a umlou ahi. Lekha jih them hon Naga-Kuki kikah thu ajihna lekhabu tamtah um ahi’in, ahivanga Kuki lekhabu jih chule organization hon asei tobang thusim hi hiche lekhabu ho a akibang kimu lou ahi. Sem thu thusim hohi achaina geiya ding joulou ding ahi, ati.

Chassad-Sampui boina hi masang a kon ahi. Hetthei khat chu Eastern Kuki Chief Association (EKCA), Kamjong area in kum phabep masanga NSCN Collective Leadership akimupi uva, Kamjong gamkaiya Naga le Kuki alangni in adeibang hi Framework Agreement (FA) noiya ventup ding khohsahna akinei jeh a aphatna a ana donbut u ahi.

Akisei le akibol jou ahitan, aphatna langa thil ho kihei ding ahi. NSCN douna a campaign kibol hi chamna semna ding ahipon, hiche jeh a jouthu jong thutah a kikhel theilou chule thutah jong jouva kikhel thei lou ahi. Thutah kisel sot theilou ding ahi’in, thusim (history) jana peh ding hi phapen ahi. Tua hi itobang thusim hijong le aphatna ding jong gelkhoh ding ahi, tin thuso chun aseibe in ahi.

Manipur a Covid-19 vei um nailou; Foreign le Domestic akon hung lhung jouse ni 14 inn a kikhum ding a Health dept in thupeh nei

Imphal, Mar 23(ET): Thulhut khat in aseina achun JNIMS a COVID-19 ginmo khat akive kol tailou gamsunga tuni chan in hiche natna vei akimudoh naipoi ati.

State Medical department thuso in aseina achun manipur gamsung akon ginmo  sample 20 test ding in aki thotdoh tan abol chan Negative ahisoh kei in tuhin sample result khat aki ngah jing nalai e ati.

Gamdang akon Manipur gamsung hunglut inmun a vetlhahna kinei mi 468 lah ah mi 288 hon vetlhahna phat achai tauvin ahi.

State cabinet in kihou lhah na an anei utoh lhon in  State Health department in gampam akon hung lut jouse a inn cheh uva ni 14 lam aki hen ding uvin health dept in hetsah na ahin nei uvin ahi.

Principal Secretary (Health), Government of Manipur V Vumlunmang, IAS in hiche thuso chu govt kilolna dungjui a ana nei u ahi. COVID-19 suhmang an ding le hiche natna akon kivenna ding a govt tohgon jat chomchom anei dan u jong hetsah na ana kinei in ahi.

Mipin jui ding a thupeh kinei jouse ajui cheh uva inna kikhum ahi lou le bol ding a lomho abolcheh ding uvin hetsah na gov tin ahin nei uvin ahi. Hiche thupeh kinei hotoh lhon a DC ahi lou le Home depth ho in vetsui na anei ding uvin jong hetsah na ana kinei in ahi.

March nisim 1 akon Manipur hunglut hon state vaipo ho ahetsah diuva thupeh kinei

Imphal, March 23(UNA):  State Government in gampam akon Manipur achesa Match nisim 1 akon hung lut ho in achene ho u achan achai a shomemanipur@ gmail.com  a hetsah na ahin nei ding uvin thupeh ana kinei in ahi.

Hiche thupeh nitlou ho chu  gotna pehding ahi dan jong tahlang na anakinei in ahi. Chief Secretary Dr J Sureshbabu  in hiche thupeh chu Governor min a ana so ahi.  Govt akon thupeh kinei dungjui in state gamgi ho jong kha hiding, mipi kipun khomna le um khomna munho jong abon a khaidng a hetsah na an akinei ahi.

State govt in na kitong ho machal na ana mu lout oh lhon a Manipur Epidemic Diseases Covid-l9 Regulations le epidemic Diseases Act, 1897 ana chesah u ahi. Thupeh dungjui a chu state sung a gate jouse jong kha ahiding dan le mipi pohna gari jouse jong lhai sah talou ding a hetsah na ana kinei ahi.

Nitin kimanchah na a angai cha thillelo jouse kijoh naho bou kihong ding, hiche ho jong phate a vetsui na noi a bol ding a hetsah na ana kinei ahi. Mipi kiloikhomna na mi 4 vaal hithei louding,  government le private office jouse jong kikhah ding, akihongdi ho chu   Home Department, Police Department, GAD, District Administration, Health, Fire Services, Prisons, Power, PHED, Municipalities, Consumer Affairs and Public Distribution, NIC both State and District Units, Banks/ATMS, Print and Electronic media, IT  le ITeS chuleh postal le internet services,  Hospital, Optical Stores, Diagnostic Centers, Pharmacies le home delivery restaurant ho ahi. Hiche daan jui lou jouse gotna pehding ahi dan jong thupeh ana kinei in ahi. Hiche thupeh chu March nisim 31 chan a chelha ding a phondoh na ana kinei ahi.

Kuki Inpi USA in Chassad kho meiya akihal demna nei

Imphal, Mar 23(ET): Achesa March nisim 16 nikho a Chassad town a inmun 100 val chule nei le gou tamtah kho kinaipi Tangkhul kho miho le thingnoimi hon meiya ahal a asuhmang jeh uva chenna ding neilouva mi tamtah um a chule thil le lo abon tobang a mangsoh ahitai, tin Kuki Inpi USA in thilsoh demna sangtah anei uvin ahi.

Jammang Haokip, President, Kuki Inpi USA leh Seiminthang Baite, General Secretary, Kuki Inpi USA in soi akaina thuso a chun thilse bol ho chule state le sorkar natong hon khohsahna anei louvu demna anei uvin ahi. Hitobang chonna hohi asuhtheng je umlou ahi’in, hiche jeh a themmona neiho kilom tah a gotna peh ding ahi, ati.

COVID-19 natna jeh a vannoi muntin aboiya, mi koima hon lhat lou ding chule kichom khen dinga thuso aumjing laiya Chassad kho miho chenna ding mun neilou, angaicha thil khohtah tah ho nei louva aum uhi boina sangtah ahi, tin aseiyun chule Chassad kho athah a tundoh nadinga ajou chan in kithopina apeh dinga temna anei uvin ahi. Kuki Inpi USA injong kithopina dinga Go Fund Me campaign asemdoh ahi, ati.

Chassad a sopi Kuki ho ataopeh jing thu jong asei uvin chule Chassad thah sem nadinga organization dang dang kithopina a pan lah dinga aseibe uvin ahi.

TET result phongdoh ding a ATRPFM in ngehna nei

Imphal, Mar 23(ET): Thulhut khat in aseina achun ATRPFM hon ningkum 24 November nikho a Tearcher Eligibility Test (TET) agangthei pen a phongdoh ding in akisaipi authority ho heng ah ngehna anei in ahi.

TET hi Pirmary teacher hitheina ding a qualificiation niempen ahi in tuchung primary teacher kilah nading a hiche TET certificate 2012 kum a nei ho jong a expired gamtan khangthah tamtah natohna apply boltheilouvin aum lo tauvin ahi.

State govt. noiya primary teacher khat hitheina ding in Senior Secondary certificate 50% chule Diploma in Elementary Education (D.El.Ed.) kum 2 beh hiding ahiloule Senior Secondary 45% certificate chule NCTE Regulation 2002 dungjui a Diploma in Elementary Education (D.El.Ed.) hiding, ahiloule Senior Secondary 50% certificate chule Bachelor of Elementary Education (B.El.Ed.) kum 4 hiding ahiloule Secondary 50%  Diploma in Education (Special Education) kum 2 hiding ahi.

COVID-19  thu’a Joint Philanthropic Organization (JPO) in joint meeting nei

B.Lalboi Gangte

Ccpur, March 23 (ET): Joint Philanthropic Organization (JPO) Churachandpur in tunin Group YMA Manipur Office, Hmuia Veng ah COVID-19 toh kisai seikhom na ananei uvin ahi. Hiche kihoukhom na’a chun Group YMA Manipur akon Lalhmangaihzuala, , ZYA GHQ President S. Lianzalal, KKL GHQ Vice President (Administration) T. Lalboi, HYA GHQ President Laldawnlien Varte holeh members chengse hon  khovel pumpi suling lao natna Coronavirus jeh’a mipin hahsatna chom chom ato seikhomna ananei uvin ahi.

Hiche kihoukhom naphatsung’a thulhuh na alah hou chu Coronavirus natna hitleng kichat umtah leh kiven ding nading’a mipi koi hi jong leh panlah khom poimo dan atahlang in ahi. Hiche natna hit  kilason ding kham na’a government panlah na jouse JPO Churachandpur in tosot na nei ding chuleh kithopi na thei chan’a mitakip in jong akithopi cheh ding in ngehna anei in ahi.  Chuleh ahung kikhom JPO noi’a kiloikhom na jouse in ama area sung’a mun dang akipat hung aum leh Govt. in hedoh hih jong leh a-inko te toh kithujah mat’a midang toh kivopsah louva Govt. hetpeh na’a room sung’a chom koi dan lampi ngaito dan umthei bang bang’a vetkol ding’a pan lah ding in ngeh na anei uvin ahi.

Alangkhat’a Government in lock down aphon hi niseh’a neh ding kihol ho Govt. lam akipat panpi na um thei ding ham ti JPO in kivekol ding ahi. JPO noi’a kikhaikhom philanthropic organization hon ama gamkai sung’a hahsatna toh vangset na jeh’a nehding neilou’a um ho panpi na pehthei chan kipe ding iham ti’a COVID-19 jeh’a thina toh aum leh alongdamsa  khoi nading toh kisai’a thepna neiho toh kithu jah’a mipin amoh khoilou ding in ngeh na jong anei uvin ahi. Hiche na ding’a medical department toh kihoukhom’a maban’a panlah ding dan area tin’a hetsah na kibol ding ahi. Kihoukhomna kichai in Convener lamkai nan Bijang mun’a Quarantine Centre ding’a kibol Circuit House anapha uvin chulhe hiche mun’a duty medical officer heng’a Coronavirus hitleng doudal na toh kisai’a JPO in jong bol thei chan’a panlah na kinei ho ki tosot ding ahi tin hetsah na ananei uvin ahi.

 

Moreh mipi ten coronavirus kichat na nei lou; Indo-Myanmar gamgi a kivenna dia kholhang kisam jing

Imphal,  Mar 23(UNA): Leiset chung a mipi in coronavirus kichat na a anei toh lhon a kivenna jat chom chom ana nei lai uvin Moreh khopi sung a mip in kichat na nei lou in sumkol veina jong ana nein alai uvin ahi.

Moreh khopi sung a mipi  kiloikhomna le kingon jat chom chom jong anei nalai uvin ahi tin thuso kimu chun asei in ahi.  Hetthei khat chu achesa March 20, 2020 nikho  a Deputy Commissioner Tengnoupal District Matanglambam Rajkumar in Moreh kailhang kha naidng le kingon ho kibol tah nalou ding a thuso ana nei ahi.  Hiche thupeh chu koima in khopi suung  a ana jui pon ahi akiti.

Moreh khopi sung a inter state bus ho khana akinei vang in, Kakching akon in Moreh a thil akipo lut jing in Moreh kailhang a akijoh jing in ahi akiti.  Namphalong kailhang aki kha jing vang in,  mipi ho vetsui na akinei loutoh lhon in khopi sung a mipi ho alang phang jing uvin ahi akiti.

Indo-Myanmar gamgi a cheng kho ho heng a coronavirus akon kivenna ding in kholhang ana kisam jing in ahi. Primary Health Centre Moreh akon Dr. A. Arin sharma, Dr. Th. Priyobarta le staff ho in moreh police OC Dilipkumar Singh le assam rifles ho in coronavirus akon kivenna dinga toh ding le tham ding ho khomi ho hetsah na ana nei uvin ahi. Moreh akon km 8 lam a gamlha khomun  Haolenphai, T Minou, New Shijang, H Munnom, Y Ngammun, Lh Lhangnom le adang dang ho ang a coronavirus natna akon kivenna ding a khomi hochu hilchetna an anei u ahi. Myanmar akon coronavirus natna nei akihetlou mi tampi aum ginchat ahitoh lhon a koima khosung ho a lutsah louding in jong alhangsung khomi ho hetsah na ana nei uvin ahi