State sorkar in July 31 chan gamsung pumpi a nidan 11 curfew...

State sorkar in July 31 chan gamsung pumpi a nidan 11 curfew kikoi chejompi dinga order sodoh

56
0
SHARE

State sorkar in July 31 chan gamsung pumpi a nidan 11 curfew kikoi chejompi dinga order sodoh

Imphal, July 10(ET): State sorkar in achesa June nisim 30 nikho a Lockdown guidelines’ kisodoh vetlhahna aneiyin, chule July nisim 31 nikho chan ahilouleh Union Home Ministry in thuhilna anei kah a gamsung pumpi a jan nidan 6 a kon jingkah nidan 5 chan curfew bulhing set a chepi dinga aseiyin ahi.

Thursday nikho a Chief Secretary J Suresh Babu in government order asodoh na a, June 30 ni a kisodoh Lockdown guidelines hi gamsung pumpi a July nisim 31 chan ahilouleh order aumkit kah a kichepi ding ahi, ati. June 30 hi a guidelines asodoh nauva July 15 chan guidelines chepi dinga kisei ahi. “Jan nidan 6 a kon jingkah nidan 5 sung hi July 31 chan curfew gamsung pumpi a kichepi ding ahi”, ati.

Deputy Commissioner hon Health and Family Welfare Ministry (MoHFW) in asodoh guidelines dungjuiya ‘containment zone’ ho akhen diu ahi. Chule medical emergency leh ngaichat khoh ho tilouva mipi va le ding kiphal louding ahi, tin order chun aseiyin ahi.

MoHFW guidelines dungjuiya ‘contact tracing, inson a surveillance chule adang dang ho khoutah a chepi dinga jong asei uvin ahi. Chule June 30 ni a gamsunga akikhah thil ho akipehna Annexure-I Sl No 4 a ‘bar’ kikoi be ahi, tin hetsahna jong anei uvin ahi.

Speaker’s Tribunal in MLA T Robindro ‘disqualify’ abol High Court in ‘suspend’ bol

Imphal, July 10(ET): Justice Lanusungkum Jamir leh Justice Ahanthem Bimol Singh panna Manipur High Court division bench in Friday nikhon Manipur Legislative Assembly Speaker’s Tribunal in  Trinamool Congress MLA Tongbram Robindro, Thanga Assembly Constituency ‘disqualify’ abol ‘suspend’ abol tauvin ahi.

Achesa June 18 ni a Speaker’s Tribunal in Trinamool Congress MLA T Robindro ‘disqualify’ abol ahi in, BJP lamkaina coalition a kon ahaiya, Congress camp a alut jou chule Rajya Sabha election umna ding nikhat masanga ‘disqualify’ abol ahi. Robindro hi April lha kichaiya lhangphong tah a BJP a lut a chule state BJP party lamkai hon kipah tah a alamto uva niseh thusoh ho a jong ama chule Congress MLA thum BJP a alut thu kisei ahi. Ahivanga, state assembly record a T Robindro hi Trinamool Congress MLA a hetpehna um nalai ahi.

T Robindro petitioner a Senior Counsel N Ibotombi leh M Hemchandra pang lhon a, division bench in kinelna thu kisei ho angailhah jouva, June 18 nikho a Manipur Speaker’s Tribunal in T Robindro ‘disqualify’ abol na thupeh hi akit hearing aum kah a dinga avohhai (suspend) abol ahi. Akit hearing hi July nisim 20 nikho teng umding ahi.

State sorkar in Paona bazar leh Thangal bazar a dukan ho nikho kihal a akihon ding phalna nei ta

Imphal, July 10: State sorkar in Imphal khopi a um Thangal Bazar leh Paona Bazar a thil kijohna dukan hohi Sunday nikho tilou nidang a nikho kihal a hon dinga phalna anei tan ahi.

Chief Secretary J Suresh Babu in Friday nikho a government order asodoh dungjuiya, Thangal Bazar a von, kengkoh, stationary, kong leh bel, electronics, computer, mobile, pat chule motor part/tyre/battery kijohna dukan hohi Monday, Wednesday leh Friday nikho teng akihon ding kiphal ding ahi.

Chule Paona bazar a bag, stationery, cycle, computer, glass leh ply, mobile, electronic, dry cleaner, von (eastern side) leh pat kijohna dukan ho Monday, Wednesday leh Friday nikho teng akihon ding kiphal ding ahi.

Tuesday, Thursday leh Saturday nikho teng Thangal Bazar a electrical thil, paint aluminium, inh sahna a manchah ho, ply wood, kong leh bel, hardware, sanitary fitting, tiles, marble kijohna dukan ho kihong ding ahi. Chule Paona Bazar a Tuesday, Thursday leh Saturday dang toh amat tha pan u nikho teng kijepna (jewellery), cosmetic, photo studio, eye glass, von (western side bou), chule kengkoh, sports, eye glass ho kihong ding ahi.

Chule Dharamshalla leh Thangal Bazar a whole sale dukan hohi dukan dang ho banga jingkah nidan 6 a kon nilhah nidan 5 chan akihon ding kiphal ding ahi. Hijong leh bazar teni a um gulli neocha cha ho a dukan neo neo hohi itobang thil kijohna hijong leh akihon ding kiphal lou ahi, tin order chun aseiyin ahi.

Achesa June nisim 30 leh July nisim 9 nikho a sorkar in guidelines asodoh hi akikhel aumpon, dukan kihon nadinga guidelines semphatna kinei ho tilou adang se angaiya kijui ding ahi, tin order chun aseibe in ahi.

Sorkar natong hon insungmi thingnoimi a pang um em, ti aphondoh diuva Nagaland sorkar in thupeh nei

Kohima, July 9:  Union government in Naga group ho atup dan hin Naga Peace Talk kisei jing achena chom hiding dinmun a aumin ahi.

Nagaland government Home Department in office memorandum asodoh anukhah pen a state sorkar in Administrative Head chule Head of Department jousen government employee hon insung mi akinaipi thingnoimi kiloikhomna a umho apeh nau self-declaration form alah uva chule August nisim 7 kah a Home Department, Political Branch henga apehlut diuva thupeh anei ahi.

Governor RN Ravi in Chief Minister Neiphiu Rio henga ‘law and order’ thu a lekhathot apeh jouva police leh Assam Rifles hon thingnoimi ho kiselna mun akhol uva, thingnoi phabep gal manchah, meichang, sum chule document dang ahitai. Naga thingnoi kiloikhom ho leh social organization hon Naga thingnoimi ho hi thal choi gang ahiuve, tia RN Ravi thusei demna sangtah anei uvin ahi.

Governor in ‘law and order’ aboi cheh cheh e, tia asei hi state sorkar in anop pehlou ahi. “Centre sorkar in Naga national political group hotoh kum somni val hemkham kinoptona asem a chule kihouna hi October 2019 ho a kichai dinga ana kisei ahi in, mipin athu seilhah vah ahiding kinepna anei ahi. ‘Armed gang’ ahiuve, tia kiloikhomna ho kisei hi chamna thu kiseina a dinga aphatna hilou dinga state sorkar in agel ahi. 2015 kum a Framework Agreement soi kaina auma chule October 31, 2019 kum a kihouna khumkhana aum toh kilhon a political organization thu hi seikhom a suhlhap dinga state sorkar in lunggel anei ahi”, tia sorkar in tu naicha asei ahi.

Naga People’s Front (NPF) leh Congress in Ravi lekhathot atosot ahi. Naga Hoho injong United Nations (UN) a lekhathot apeh uva, India sorkar in human rights apalkeh ho thu aseiyu ahi. “Covid 19 pandemic khoh pet a India sepai hon NSCN-IM chule North East Region, India leh Myanmar a um Naga thal choi kiloikhomna chom chom douna a lunghanna ding thil tamtah abol uva, operation abol uva chule Ceasefire Ground Rules ho jana apeh louvu ahi. Naga Self-Administered Zone (SAZ) kiti India leh Myanmar (Sagaing Region) gamgi a India leh Myanmar sepai hon military operation phabep abol khom u ahi”, tin Hoho in lekhathot a aseiyin ahi.

“Themmona neilou Naga khosung mi tamtah gal tobang dinmun sepai hon asem a, chule Covid 19 natna jeh a kicha jing a um u ahi. India leh Myanmar gamgi a um district a Naga kho tamtah a sepai tamtah asol lut jeh uva lungjinna umjing ahi”, tin aseibe uvin ahi.

 

MLA anahi Subashchandra in Congress ngohna asem khum ho Ibobi in donbutna nei

Imphal, July 10: Congress MLA 2 leh congress worker khat chunga ex-MLA Subashchandra in ngohna asem thu a Congress Legislative Party Wing leader Okram Singh in adih leh adihlou hi mipi seilhah sah ding ahi, tin Friday nikhon aseiyin ahi.

Ex-MLA Subashchandra leh BJP MLA adang ni in BJP primary membership chule Manipur Legislative Assembly a kon achesa June nisim 17 nikho a haina lekha apehlut ahi in, Rajya Sabha election umna ding ni 2 akivah a haina anei uva chule acham uva Congress camp a hungu ahi, tin Ibobi in thuso miho akihoupi na a aseiyin ahi.

“Manipur politics a thilsoh hohi jachat um kasa e. Akilhengdoh MLA khat in min neitah mithum in eivoh a, Legislative Assembly ahilouleh ama ama umna party a kon hunam a eihai sah ahi, tia asei hi mipin iti atahsan ding ham”, tin Ibobi in aseiyin chule Subashchandra in ama vo a ngohna anei mithum holah a hi thumvei election kaidoh a jong pang a, chule mikhat hi Manipur Legislative Assembly Speaker jong anahi ahi. Khat hi tua Indian National Congress member chule min neitah businessman ahi, tin aseibe in ahi.

“Akilhengdoh member khai in hitobang ngohna anei hi nuijat umtah ahi”, ati. Alangkhat a, Patsoi Police Station a Subashchandra in FIR asem a Congress in Minister Bishwajit toh sorkar suhlhuh nadinga kihouna anei masat jeh a hunam a eihaisah u ahi, tia asei kidang asahna thu jong aseiyin ahi.

Congress party hi aphatna dinga opposition a pang jing ahi in, sorkar suhlhuh nading lunggutna anei lou ahi. Ahivanga, NPP leh BJP MLA hon Congress MLA phabep hi ano jing a, party in acham louva pan alah ahi. Hiche hi Congress Party tohgon ahipoi, tin aseibe in ahi.

 

Covid-19 toh kisai a Congress MLA Joy Kishan in Health Minister Jayantakumar demna nei

Imphal, July 10(ET): Congress MLA Khumukcham Joykishan in tuni chun Health Minister L Jayantakumar chung a demna thu asei in ahi. Aseina achun Jayantakumar hi Arts and Culture a Minister jong anahi in acting them ahi ati. Covid-19 thu toh kisai a seina achun tuhin amaleh a party hon BJP toh kijop kit ding a nopna anei kit u ahitan hinlah tuchan in Health Minister ahina dol a pan alah akihedoh naipon tuhin frontline a tong JNIMS a numei doctor khat positive akihedoh kit in Jiribam a local transmission aum in chule Thangmeiband a insung khat leh numei chapang khat jong avei akihedoh kit uvin Health Minister ahinadol a ipi jeh a runi chan a kamkhat cha jong thuseina aneilou ham ti’n dohna abol in ahi.

Joy in aseibena achun Deputy Chief Minister ti tahlou NPP MLA dang hon tuni chan a a office uva na atohpat lou ajeh jong dohna abolkit in ahi. Iham tia Covid-19 natna chung a galjona umleh minphatna akilah nom kit ding ahi in hinlah ahung lhasam levang frontline leh health worker ho ngohna abol kigot ham ti’n dohna abol in ahi.

 

Govindas in Delimitation thu a Centre demna nei; Commission associate member a kon haina nei

Imphal, July 10: Manipur Member of Legislative Assembly Govindas Konthoujam in Friday nikhon Centre in Manipur gam a political party, stakeholder leh gamsung miho dohna umlouva Delimitation achepi ahi, tin ngohna aneiyin chule Delimitation Commission, Manipur a associate member hina a kon a jong haina aneiyin ahi.

Imphal khopi a thusoh miho akihoupi na a, Minister anahi leh Bishnupur AC MLA Govindas in Assembly Speaker henga haina lekha kathot ahitan, haina kanei na ajeh jong kasei ahi, ati. MLA pa in Commission associate member a kon ahai thu phondohna aneiyin, democracy toh kitoh louva Manipur a delimitation chepi a commission toh kisaina kanei nom poi, tin aseiyin ahi.

Manipur a Delimitation hin society chule mipi sangtah a atohkhah thei ahi, tin Govindas in aseiyin chule lamchom chom in demna anei ahijeh a Centre panlah adei louna thu jong aseiyin ahi. “2001 Census report dungjuiya Manipur a delimitation exercise bol ding deilou na a organization tamtah leh mipin aseiya, nelkalna anei ahi in, district phabep a population kal danhi kitoh theilou ahi”, ati.

Achesa July nisim 7 nikho a Assembly Speaker henga haina lekha apehlut na a, MLA pa in adeilou na thu tamtah in asei vanga Delimitation Commission of India a mopohna nei hon 2001 Census report dungjuiya Delimitation process chepi dinga thulhuhna anei hi gamsung miho deibang ahipoi, tin aseiyin chule hiche hi mi phabep phatchomna ding ahi, ati.

Hitobang dinmun a gamsunga delimitation bol dinga kisei hin gamsung pumpi a angaicha lou boina leh kiphinna asodoh sah ding ahi, tin jong gihna aneiyin, lampi dang kanei loujeh a Commission membership hina a kon haina kanei ahi, ati.

Hetthei khat chu Govindas chule MLA Samuel Jendai (BJP anahi), Yengkhom Surchandra (INC), Vungzagin Valte (BJP) leh Sapam Ranjan (BJP) hi Manipur Assembly Speaker in Manipur a Delimitation Commission associate member dinga nominate abol a, amin uhi Delimitation Commission, New Delhi a achesa May nisim 26 nikho a athot ahitai.

 

Session Judge in ‘N-95 mask’ hoilou kichoh thu a Health Director ‘bail’ a lhadoh ta

Imphal, Jul 9: Session Judge Imphal West in Covid 19 natna akisei laiya N-95 mask ahoilou (sub-standard) acho in ahom e, tia case Dr Kangujam Rajo, Director, Health Services chunga case akisem thu toh kisaiya bail (anticipatory) ape tan ahi.

Anticipatory bail hi Dr K Rajo (59) in ama douna a Vigilance and Anti-Corruption Police Station station a FIR akijihlut douna a apehlut ahi. Hiche case toh kisaiya police hon senior medical doctor khat jong amat ahitai, tin Dr K Rajo Counsel in Court a janni a apehlut ahi.

Court in case toh kisaiya thu kisei ngailhahna anei jouva July nisim 16 nikho chan a dinga Dr K Rajo anticipatory bail phatsahna apeh ahi. FIR kisem thu a amat nau chunga petitioner (Dr K Rajo) hi PR Bond dangka lakh khat chule hijat ma ‘surety amount’ chule thukholna chelha ho thungaina anei ding hi dan kikoiya interim bail a kilhadoh ding ahi. Dr K Rajo in phalna neiya gamsung adalhah louding ahi, tin court in aseiyin ahi.

Hetthei khat chu, Mairembam Dinesh, Senior Medical Officer, Medical Directorate jong achesa July nisim 7 nikho a agency chom chom noiya supply order sodoh louva standard lhinglou N-95 mask panna a protective gear akichoh thu a amat u ahi. Mask hohi district hospital a ahop u ahi. Senior Medical Officer pa hi nithum Vigilance and Anti-Corruption Police khut a akoiyu ahi.

Hetthei khat chu, Vigilance and Anti-Corruption police hon achesa April nisim 17 nikho a Central Medical Store, Medical Directorate a kikoi N-95 ho akhol uva amat u ahi in, Churachandpur district hospital a mask hoilou amudoh jouvu ahi.

Dk. Crore val man Khamnathei kiman

Tengnoupal, July 10(ET): CDO-Moreh leh Moreh Check Post akon Police personnel ho kithokhom nanoi in janni (July 9) nilhah nidan 6:20 vel in Moreh Check Post kom Kondong Lairemebi, Chikkim kho jui National Highway a frisking anei nao in Alto Car khat akon WY Tablets leh Heroin powder packet khat anamandoh uvin ahi.

Hiche toh lhon’a hiche car tolpa Thoubal District hopsung Lilong Haoreibi Turel Ahanbi akon Liyaquat chapa Barul Alam (25) anamandoh uvin ahi. Ama akon khamnathei kimandoh hochu plastic packet neo cha cha 251 a kichun WY Tablets chang 50,200 agih dan Kg. 4.905, soap case khat akon Heroin powder packet khat agih dang gram 11, Maruti Alto car (registration no. WB06B-8734), mobile phone khat, aadhar card, EPIC card, driving license, PAN card leh ATM card khat toh anamat tha uvin ahi.

Hiche toh lhon’a amachung’a Moreh Police Station a case khat jih lut in anaum tan ahi. Chuleh Police hon Barul thudoh anei nao akon in Moreh Ward No. 3, Phaicham Veng akon Lalsanhim Hmar chanu Sangkim Hmar (35) leh R. Veelashamy chapa Rajshakher (37) jong hiche tohgon na’a pang ahidan jong anahedoh utoh lhon’a amani jong anamandoh tauvin ahi.

CHADI-AFWU in Moreh lampi phat teplou bandh kikou ding

Chandel, July 10(ET): Chandel district Animal Farmers wellfare Union (CHADI-AFWU)  President K. Prakash Maring in ahunglhungding August nisim 1 akon Moreh kampi phat teplou a bandh kou ding in hetsah na anei in ahi.

Manipur a sel amang ding a aum toh lhon a Manipur govt ang a phate a vetlhah na anei uva avah pan ding uva memorandum ijat ham akipeh vang a tu channa natoh a aki boldoh loutoh lhon a Moreh lampi bandh kou ding hi kiloikhomna in pohdoh na ahin nei u ahi.

Hiche sel vah na ding a memorandum kipelut hi achesa Congress govt lai akon a pehlut na ana kinei jing ahi tah dan tahlang najong ahin nei uvin ahi. Tu le tua govt sem N. Biren Singh makai nanoi a jong a memorandum pehlut na ijat vei ham akinei jing dan tahlang na jong kiloikhomna in ahin nei uvin ahi.

 

Mi account a sum ladoh mi 2 kiman

Thoibal, July 10(ET): Tehse pensioner khat bank account akon sum ana ladoh jing mi 2 tuni in Thoubal police in ana kimandoh in ahi. Akimandoh teni chu Feroz Khan S/o Mantussar Ali, akum 33 R/o Lilong Tamyai chuleh  Hamidul Rahman S/o (L) Nur Mohammad R/o Lilong Usokpokpi Makha ahi akiti. Hiche case chu Ningthoujam Biramangol Singh(63),  Khangabok Part 2 Mayai Leikai in complain ana boltoh lhon a ana kibol ahi. Thuso kimu dungjui in dangka  6.5 lacs lam ana gu doh lhon in ahi akiti. Gucha teni chu thudoh ana kinei na a pensioner pa ATM card chu booth khat a pin ana het hontoh lhon a block card toh akhel peh lhon dan tahlang na ana nei lhon in ahi.

Assam a covid-19 jeh’a mi 8 thibe; thina toh mi 35 in hita

Guwahatai, July 10: Tuni chun Assam a mi 8 in covid-19 natgol jeh a thina ato utoh lhon in tuni chan a Assam a thina toh mi 35 aphatai tin State Health Minister Dr Himanta Biswa Sarma chun aseiyin ahi. Thina toh mi 32 lah achun 18 chu tu hapta sung a thina atoh u ahi. Case thah 568 kimudoh lah a case 355 chu Guwahatai akon ahiuvin tuhin Assam a hiche natna vei case 14,600 aphatan hiche lah achun mi 9,147 ho adamdoh tauvin chule tuhin active case 5,423 aum in ahi. Tuni a thina toh holah a mithum chu GHCH a um ahiuvin amauho  chu Ashok Jain (63), Vinod Kumar (47) and Dipali Dutta (65) ahiuve.

Manipur a covid-19 case thah 132 kimube; Mi 33 kijendam be

Imphal, July 10(ET): Achesa nidan 24 sung in Manipur a covid-19 case thah 132 hetdoh be ana hi in ahi.  Hetdoh thah kinei ho lah a chu pasal 82 hia chuleh numei 50 ahi akiti.

Positive hiho chu Imphal East akon khat, Imphal West akon 24, Jiribam akon 9, Kakching akon 11, Kamjong akon 28, Tamenglong akon 10, Thoubal akon 8, Senapati akon 4 chuleh Ukhrul akon 37 ahi akiti.

Hetdoh na anakinei ho chu covid casre facility ho a kipuilut ding ahi.

Alangkhat a natna nei akijen holah a mi 33 adamdoh utoh kilhon in hospital akon discharge akibol taovin ahi. Amaho chu Meitram akon 15, Senapati akon 6 chuleh Ukhrul akon 12 ahiuvin ahi akiti. Jani in JNIMS akon doctor khat le RIMS a natong khat jong covid-19 positive ahi lhon in ahi.

Gamsung’a loubol mi khat in lolhing tah a Apple lei bol

Imphal July 10: Yumnam Khunou Awang Leikai, Imphal East a cheng loubol mi Lairenlakpam Indrajit Meetei in kum khat sunga ama thei lei a apple chi chom chom lolhingtah a atu doh in ahi. Tu leh tua hi HRMN-99, ANNA chule Dorset Gold variety kiti apple ho a thei leiya atu ahi. Anna and Dorseet Golden hi vannoiya apple deilhen pen chi khat ahi in, innovator Hariman Sharma, Bilaspur, Himachal Pradesh in asem a, NIF-India kiti Department of Science and Technology noiya um autonomous body in atosot ahi.

Achesa February 8, 2019 kum a patepna a thei lei abol a, National Innovation Foundation- India (NIF) member Laishram Yelhounganba in introduced abol jouva apatna a thingnoi 49 bou avetna a alei abol ahi. “Kum thum jouteng aga soh ding ahi, tia eisei peh u ahi in, ahivanga, kum khat sunga aga akimu hi thanop aum val e”, tin apple lei bol pa chapa Taibanglemba in aseiyin ahi. Tukum a thingphung khat a kon apple kg 10-20 ho alodoh u ahi in, apple khat hi agih dan gram 20-30 ho ahi, tin aseibe in ahi.

Board of Trustee, TN Haokip Foundaton (TNHF) in Saikot A/C sung’a pachanna nei simlai ho Meritorious Award pehdoh nanei

B.Lalboi Gangte

CCpur. July 10 (ET) : Board of Trustee, TN Haokip Foundation (TNHF) in kum seh’a 59-Saikot Assembly Constituency sung’a pol X themvet na’a pachan na sangtah hung chang simlai holeh School ho heng’a kipa thilpehna Meritorious Award pehdohna ananei jing utoh lhon’a tunin16 vei channa ding in Molnom Community hall mun’a Award pehdoh na kingon anachelha in ahi. Kingon phatsung in Jin-gun in ADC CCpur Vice Chairman Paolal Haokip chuleh Kin-dei chom in Sielmat Christian Higher Secondary School Principal Issac L. Pakhuongte anapang lhon in ahi. Chuleh kingon achun TN. Haokip, MLA 59-saikot Assembly Constituency, Managing Trustee (TNHF) leh simlai nu le pa hon jouse in pan anala uvin ahi.

Hiche toh lhon’a16th  TN Haokip Foundation Meritorious Award 2020 kisan simlai ho jouse Rev. Lunkholen Baite in Pathen heng’a vangthum peh na anei in ahi. Dr.Paongam Haokip, Director, Conflate Academy Tuibong in Award sang simlai ho tilkhou anei in ahi. TN Haokip, MLA 59-Saikot Assembly Consituency leh Managing Trustee (TNHF) hin achesa kum 16 masang’a kon Saikot AC sung’a themjil nalam dopsang na ding leh simlai chapang ho tikhou na ding in Pol X themvet na’a pachanna sang pen simlai ho tilkhou nading leh School hoipen ho kipapi na in board of trustee, TN Haokip foundation TNHF noi’a Meritorious Award anahomdoh jing in ahi.

Alangkhat’a tukum The 16th   TN Haokip foundation TNHF Meritorious Award sang hochu All round topper 2020 ah St. Stephen English School, D.Phailen akon Khaithienlal chapa Douminlun Singsit ( 88%) in kipaman Certificate leh Dk, 30,000/- akisan in; Mathematics Topper ah Salt Brook School, Tuibong akon Chinkho Haokip chapa Thanglenmang Haokip (mark 96) in kipaman Certificate leh Dk. 20,000/- akisan in; Science Topper ah Sielmat Christian Higher Secondary School akon Zohminthang chanu Freeda Lallawmkim (80%), Sielmat Christian Higher Secondary School akon Issac L. Pakhoungte chanu Catherine Lalrongbawl (80%) leh St. Mary Higher Secondary School, Tuibong akon Manglalson chanu Lundeiching (80%) ho cheng in kipaman in Certificate leh Dk.10,000/- cheh akisan uvin ahi.

School of the Year Award ah 59-Saikot assembly Constituency sung’a School um jouse lah’a pol X  themvet na’a Pass percentage 100 lhung Sielmat Christian Higher Secondary School in kipaman Certificate leh Dk, 10,000/- akisan in chuleh Commendation of Extra Ordinary Achievers ah HSLC exam 2020 a Mathematics Subject ah 100 lah’a 100 mu Nguljathang Haokip chapa Joseph Mangkhohao Haokip leh HSLC exam 2020 ah themvet na’a achapang pen (kum 12) lolhinna chang Mount Olive School, Kangvai akon Genkholian Vaiphei chapa Issac Paulallungmuan Vaiphei tenin akisan lhon in ahi.

MLA TN. Haokip in pachan nanei kipaman sang ho pachat na sangtah apeh naban’a Pol X hi career kipatna kalbi ahipan dungjui’a maban’a lampi sao tah nei kahi ti simlai hon ageldoh ding’u apoimo in ahi. Chuleh kipaman sang hon jousen tup le-adoi aneihou chung lolhin na anei cheh ding uvin adeisah na thu aphongdoh in ahi.

Bamboo sector hi COVID kichai teng India economy a sector thupi tah hiding ahi: Jitendra Singh

New Delhi, July 10: Union Minister of State (Independent Charge) Development of North Eastern Region (DoNER) Jitendra Singh in Friday nikhon Covid akichai teng India gam a go (bamboo sector) hi economy a dinga thupi tah hiding ahi, tin aseiyin ahi. Cane and Bamboo Technology Centre (CBTC) cluster chom chom noiya webinar a ahoulimna a Minister pa in bamboo hi Northeastern region a Atmabirbhar Bharat Abhiyan a kibol ding chule India leh sub-continent a dinga sumkol veina thupi tah hung hiding ahi, ati. Go hi Northeast India Post-COVID economy a dinga bou thupi ahipon, Prime Minister Narendra Modi in ‘Vocal for Local’ khantou na jong hiding ahi, ati.

Bamboo sector bulhing set a akimanchah a chule India leh gamdang a packaging leh marketing aumthei nadinga ‘Create, Curate and Coorinate’ hi mantra a neiding ahi, tin Jitendra Singh in aseiyin chule achesa kum 70 lhing khohsahna ana kipe lou hiche sector hi tua sorkar in athupi na ahondoh ding ahi, ati. India gam hi go chule ting (cane) thil so na gam anichanna a apan vanga global trade a share 5 percent bou anei hi vangset umtah ahi, ati. Kum ja a sim Forest Act semphatna um a, Forest Act a kon inmun a kitu go phung ho kiladoh ahi, tin aseiyin ahi. Prime Minister Narendra Modi in Northeast hi khohsahna apeh jing ahi in, 2014 a Modi lamkaina sorkar akisem a kon Northeast hi India a gam khangtou adang hotoh kibanga sem dinga aseijing ahi. Achesa kum 6 sunga Northeast gamkai imalam jouse a atosot ahi, ati.

Youth Affairs and Sports, Minority Affairs Ministry Kiren Rijiju injon ahoulimna a, DoNER Ministry in Bamboo sector choisang nadinga seiphat umtah a na atoh ahi in, tua hi Northeast gam 8 ho chunga kingam ahi, ati. Chule sector hi ahina ding bang ahi loulai jeh a Centre in akaihoui ding ahi, ati. Rameshwar Teli, MoS, Food Processing Industries in ahoulimna a Bamboo sector hi tohmun tamtah kisemna jong hiding, India a building, ecological, medicinal leh paper sector kingapna jong hithei ahi, ati. Kihouna a Video conference a kon Secretary, Ministry of DoNER,  Inderjit Singh, Special Secretary Indevar Pandey, Secretary NEC, Moses K Chalai, MD, CBTC, Shailendra Chaudhari chule Department senior officer dang dang jong apang uvin ahi.

Bishnupur a Chicken pox natna alang’e kiti thu Health official hon kholchil nanei

Imphal, July 10: Thusoh a kisei Kwakta Ward No 6 leh 7 a Chicken pox natna alang e, tia kisei thu IDSP unit, Bishnupur in July nisim 10 nikho a kholna anei uvin ahi. Insung thum a mi 8 in hiche natna aneiya chule natna a kon akijen dam uve, tihi athu akhol nauva amudoh u ahi.

L Gojendra Singh, Chief Medical Officer, Bishnupur in thuso aneina a, tua hi active stage mi 2 bou um ahi. Team hon natna hi kum 13 a upa chapang khat a kon kipan hidinga asei uvin, lhakhat masanga ana damlou ahi. Neh pha nehding, immunization phatah a bol ding, thenna hinkho man ding hi hitobang natna a kon kivenna ding ahi, tin thuhilna anei uvin chule hitobang natna auma ahileh anaipen a um PHC avil diuvin mipi tilkhouna anei uvin ahi.

Chicken pox natna a athi alhom jeh a hiche natna hi khohsahna kipe beh lou ahi. Natna a kon houidoh nadinga vaccine aum vanga hiche hi National Immunization Programme, Ministry of Health, India government a pang lou ahi.