State cabinet in thinglhang gam’a ‘agricultural sector’ ho dinga lockdown lhakang; phaicham...

State cabinet in thinglhang gam’a ‘agricultural sector’ ho dinga lockdown lhakang; phaicham a lockdown chejom ding

182
0
SHARE

State cabinet in thinglhang gam’a ‘agricultural sector’ ho dinga lockdown lhakang; phaicham a lockdown chejom ding

Imphal, April 20: State Cabinet in tunin thinglhang gam a Agricultural sector a lockdown lahdoh dinga thulhuhna anei tauvin ahivanga loubol mihon COVID-19 pandemic douna ‘social distancing’ ajui diuvin thuhilna aneiyin ahi.

Jingkah nidan 10.30 a Cabinet meeting kipan a, nidan thum vel akihou nauva Prime Minister thuhilna banga sector phabep a ‘lockdown’ lahdoh ding ahiloule koijom ding thu aseikhom uvin ahi. Gamsunga Covid-19 positive case ni adamdoh a, COVID-19 case aumtah lou chule adammo teni kinaipi hojong positive khatcha aumlou hin gamsunga ‘community transmission’ aumlou avetsah ahi’in, ahivanga natna hi gamlha tah a kon hunglut ahijh a CM Biren Singh lamkaina a Cabinet meeting abol nauva sector phabep a bou lockdown lahdoh dinga kilolna anei uvin, Imphal East le Imphal West panna a phaicham ho a chejom pi dinga thulhuhna anei tauvin ahi.

Meeting a gamkai jouse a neh le chah kijohna dukan ho alhompen a nidan 2 hon dinga jong aseilha uvin ahi. Hetthei khat chu Union government in guidelines (additional) asodoh na a, Monday nikho a kon non-containment zone ho a activity phabep lha ong dinga phalna apeh ahi’in chule Covid-19 nat douna dinga May 3 chan lockdown chejom dinga jong asei ahi.

Lenna, train, bus, metro, taxi, interstate transport ho (medical le security tilou), industrial le commercial, hospitality service, themjilna mun, training le coaching centre ho, cinema hall, mall, gym, pool, entertainment park, assembly hall le adang dang, social, political, sports, le houthu a kikhopna ho kikhah jom ding ahi.

State le UT chule District administration in gamsung pumpi a ‘hotspot’ ho aseilhah diuva jong Union government in thupeh anei ahi. Hotspot hi COVID-19 natna nei atamna mun ho ahi’in, hiche hi Union Ministry, Health and Family Welfare guidelines dungjuiya kisei ding ahi. Chule containment zone hohi state/UT district administration in akhen ding ahi.

Chief Minister Biren in Cabinet meeting kichaiya thuso miho akimupi na’a, thinglhang gam a lockdown lahdoh ding chule kailhang kihon ding phal dinga thulhuhna aum thu aphondoh in ahi. Hijong le Imphal khopi le district headquarter ho a lockdown umjom ding, hiche a kailhang ho kikhah jom ding, neh le chah chule angaicha khoh ho kijohna dukan hohi Sunday tailou jingkah nidan 6 a kon nilhah nidan 2 chan kihong jing ding ahi, ati.

COVID-19 case gamsunga um tahih jongle mipin dan phatah a ajui uva, akiven them diuvin CM in temna aneiyin chule lockdown ki olsah hi phase manner a kibol ding ahi, ajeh chu virus hi koiman ahetchen loulai ahi, ati. Lou lhouding, lamlen sem ding ahiloule akilha ong na sector a natong ding jousen mask akibol uva social distancing ajui diu ahi, tin jong aseiyin ahi.

Northeast  gam mi ho kithopi a Chief Minister ho chunga kipathu aseiyin, akithopi jing diuvin temna jong aneiyin ahi. Chule cancer natna neiya boxing champion Dinko thu jong aseiyin, sorkar in akithopi na thei chan a akithopi ding chule cargo plane thalah ding hihen lang lampi dang gon ding hijong le Delhi ahiloule Mumbai a poh nadinga panlah dinga aseibe in ahi.

Governor Dr. Najma Heptulla in District Administration official hotoh ‘video conference’ a kihouna nei

Imphal, April 20(ET): Governor Dr. Najma Heptulla in tunin Raj Bhavan mun a district 16 a District Commissioner hotoh Video conference a kihouna anei uvin, ama ama district a COVID-19 nat douna dinga lockdown kichepi na, kigotna, neh le chah kihopna chule angaicha thil thil dang dang le hahsatna thu ho aseikhom u ahi.

Video conference abol nauva Chandel Deputy Commissioenr in, gamkai mihon lockdown jana ape uvin, district a boina lentah umlouva achelha in chule angaicha khoh jouse mipi dinga aum e, tin aseiyin ahi. Churachandpur DC in km 40 lhing Indo-Myanmar gamgi a boina neo aum’e, tin aseiyin ahi. Gamgi galkaiya kon koima ahunglut louna dinga District administration in lampi akha (barrier atundoh) ahi.

Tuesday nikho a kon PM Garib Kalyan Anna Yojana noiya anchang kg 5 hi Singat Sub Division a kon ahin hop pan diu ahi. District a hi Ration Card nei jat toh tekah dinga population sang ahi’in, district hin akipe jat sanga tamjo angaichat ahi, ati.

Kamjong District Administration in FCI Godown, Ukhrul a kon anchang alah a chule Phungyar AC sub-division li a ahop pan ding ahi, tin Governor henga DC in aseiyin chule administration in go juh jeh a anchang lahna a hahsatna ato thu aseiyin, kho phatlou jeh a aphatcha kihom theilou maithei dinga aseiyin ahi. Akipe anchang quintal 175 hi alhingpoi, tin aseiyin chule OMSS allocation apehbe diuvin temna aneibe in ahi. Chule sub division thum a quarantine facility le health facility alhasam in, district a ambulance jong umlou ahi, ati.

Noney District Administration in tuchan geiya kho 18 a dinga PMGKAY anchang alah pan ahitan, khosung avat 24 um nalai ahi. Kangpokpi a Quarantine centre thum um ahi’in, chule quarantine kibol mi 408 lah a mi 262 hi ‘quarantine’ akibolna phat lhing ahitai. District dang a kon hunglut ho Mayangkhang a screen kibol ahi chule medical team ho manchah ding gari lhasam ahi. Anchang, sanitizer le lou ho mipi akihom e, ati.

Pherzawl District Administration in Qaurantine centre sagi asemdoh in, ‘home quarantine’ phabep aphat lhing ahitai. District administration in April 22 nikho a kon PMGKAY anchang quota alah ding ahi’in, ahivanga kho phatlou jeh a vaigei ding ahi.

Senapati District Administration in Quarantine centre 7 ahon na a mi 20 vel JNV Academy, Mao a quarantine kibol ahi. District hospital a kon ‘high risk case’ ni kilhadoh ahitan, truck driver le handymen ho dinga screening centre kihong a chule anchang kihom jousoh ahitai.

Tamenglong DC in Imphal a kon Tamenglong che nap hat alut jeh a anchang chule lou supply hi ajat ni a apeh diuvin temna aneiyin ahi. District a hi mi 60 a dinga quarantine centre um ahi’in, mi 555 home quarantine kibol a chule 209 hi aumna ding phat lhing ahitai. Mi 344 hi observation a um nalai ahi’in, ahivanga symptoms neiya koima umloulai ahi. April lha a dinga anchang District administration in alah a ahop pan ahitai.

Tengnoupal District a ‘quarantine centre’ 7 um a, lupna 69 um ahi’in, quarantine kibol mi 21 lah a 20 hi aphat lhing ahitai. 120 ‘home quarantine’ a um a, phabep aphat lhing ahitai. Mi 22 test kibol a ahivanga abon a negative hi ahi’in chule DA in PMGKAY anchang, angaicha khoh ho lah dinga tohgon achelhah pi ahi.

Ukhrul District Administration mi 206 umna thei camp ahon a chule lupna 110 umna ‘isolation facility’ ahon ahi’in, district hospital, primary le community health centre hojong ‘quarantine centre’ a kimang ahi. Insung nga ‘quarantine’ kibol ahi’in, district in angaicha khoh thil chule mask le hand sanitizer ho alhinga anei ahi.

Bishenpur District Administration in lupna 300 umna Quarantine centre 5 aneiya, mi 500-600 vel umthei ahi. Center hohi themjilna mun ho ahijeh a lukhop le ponpha (mattress) ho choh ngai ahi. Mi 360 quarantine kibol lah a 309 hi aphat lhing ahitai. Pharmacy aphat tin a kihong a chule lockdown palkeh ho aleusah uvin ahi. PMGKAY anchang jong assembly segment thum a kihom a chule district sunga Grievance Cell khat kihongdoh ahi.

Imphal East District Administration in Lockdown sunga ‘home delivery system’ apat a chule agency 64 val ‘home delivery networking system’ a um ahi. Sumkolvei, hospital, hotel chule changval a kon kithopina kipe hohi genthei ho, adeh a meithai, HIV AIDS natna neiho heng alhun nadinga District administration in pan alah ahi. Gamdang a kon natong dinga hung ho chule niseh a sum kihol thu lockdown in sangtah a atohkhah insung 13,500 vel jong neh leh chah chule angaicha khoh ho kipe ahi. 24X7 call centre khat jong kisemdoh ahitan chule mi 1793 ‘quarantined’ kibol ahi.

Imphal West District Administration in Quarantine centre 4 ahon a, hiche lah a centre 2 kimang ahi. Agom a mi 82 (Myanmar gam mi khat panna) quarantined kibol a chule admit kibol jouse quarantine akibolna phat lhing ahitai. Ahivanga international border akikha jeh a Myanmar gam mi khat hi kilhadoh lou ahi’in, ama akinungle theina dinga Myanmar embassy kijahmat pi nading natoh chelha jing ahi. RIMS a isolation centre khat um ahi. Migrant worker 11,126 hi ration kipe a chule assembly segment 2 a anchang kihom lhinga, adang 4 a hopna dinga natoh chelha ahi.

Jiribam District Administration in niseh a Assam gam a kon hung truck 100 vel screen abol jing ahi. Administration in niseh a neh le chah (food package) 300 vel truck ho apeh ahi. Quarantine centre a dinga mun 5 kilheng ahi. PMGKY anchang hi April 23 a kon kihom ding ahi’in, district administration in district police le NGO ho toh kitho a Assam gamgi patrol abol ahi.

Kakching a Surveillance hi March 14 a kon kipan ahitai. Mi 516 lah a mi 510 hi ‘quarantine’ a kikoiya, term lhing ahitai. Mi 6 ‘home quarantine’ kibol a chule COVID 19 positive case toh toukhom a (co passenger) midang ni jong institution a quarantine kibol ahi’in, aphat abulhit soh u ahitai. Mipi chule migrant worker 800 anchang chule angaicha khoh khoh ho kihom ahitai.

Thoubal District Administration Delhi a houthu a kikhopna a pang COVID-19 positive pa chenna a kon km 3 hopsunga um ho ‘containment zone’ a akoi ahitan, amaho dinga home delivery service kihong a chule assembly segment 2 a hopding anchang ho kila ahitai. Angaicha khoh ho kihom a chule Grievance Cell jong kihongdoh ahitai.

Governor nu in Deputy Commissioner ho pottho jeh a apachatna thu aseiyin chule gamsunga COVID-19 umta hih jong le kivenna dinga screening abol jom uva chule chingthei tah a apan diuvin temna aneibe in ahi.

Indo-Myanmar gamgi Phaikok le Skipe kho a tho kigen Myanmar Army le police hon suse

Imphal, April 20: Kamjong district administration in Manipur government noiya gamgi gal a kon ahunglut aumlou nadinga Indo-Myanmar border pillar number 102 a phat chomkhat manding fencing akoi Myanmar Army le Police hon asuse uvin ahi.

District sunga COVID-19 natna venna dinga Kamjong district administration in achesa March nisim 15 nikho a Indo-Myanmar border pillar number 102 a fencing asem u ahi. Ahivanga thulhut kimu dungjuiya Myanmar Army le Police hon Kamjong District administration in atun doh fencing (temporary) asuse uve, tia ngohna um ahi.

Indo-Myanmar border pillar number 102 hi Kamjong district noiya um Phaikok a kon Skipe kho chan hi ahi. Skipe hi Indo-Myanmar international border juiya um India gam hopsung a um kho ahi. Khosung hi Ukhrul-Kamjong state highway toh phabep kimat ahi. Skipe kho solam gamkaiya Chindwin vadung, lhumlam a Kangpat chule sah le lhang a Konkan Thana le Namlee um ahi. Skipe kho a Myanmar Army ho alut nau thilsoh tamtah um ahitan, khosung hi Kamjong a kon km 21 vel a gamlha chule Imphal a kon km 78 vel a gamlha a um ahi. 2011 census dungjuiya Skipe a insung 24 um a, mi 123 vel cheng ahi.

Chule Phaikok kho hi Kamjong a kon km 35 vel a gamlha ahi’in, 2011 census dungjuiya in 81 um a mi 391 vel hi ahi. Northeast India state li- Arunachal Pradesh, Nagaland, Mizoram le Manipur hi Myanmar toh gamgi kikop ahi. Fencing akisem masanga alangni a sorkar in survey bol khom dinga kinoptona anei ahi’in, Indian Home Ministry le Myanmar in lha gup sunga survey ajo a chule March 2003 kum a kon gamgi juiya fencing atundoh pan ahi.

 

 Thinglhang gam ho’a thilsemna mun hon natoh panthei tading

Imphal, April 20: Trade, Commerce and Industries Minister Shri Thongam Biswajit Singh in aseina achun Central Ministry thupeh jui ahitoh lhon in Manipur gamsung a khopi pam a um Micro, Small, leh Medium thilsemna (Industry) hon natoh uh jing apat aban ajop kit thei ding uh ahithu asei in ahi. Official hotoh meeting anei nauva chun Manipur govt. in lockdown lha ong ding thu aphon toh lhon a department in jong thuphon kinei ahi ati.

Thil semna mun khopi pam a umho kihon kit ding toh lhon in amau hon apoimo hou chu directorate official hon thulhut hin pehlut ding uvin asei in chule natong hon jong dan juiding a kipe mask kibeh cheh ding, social distancing bolding ho jui jing ding in jong aseiyin ahi. Tuni meeting anei nauva chun Principal Secretary Suhel Aktar, Director of Trade, Commerce & Industries Director C. Arthur Worchuiyo, Handloom and handicraft Director Lamlee Kamei leh official phabep ajao uvin ahi.

 

Mumbai a journalist 50 val COVID-19 positive hi

New Delhi, April 20: Centre in Monday nikhon Mumbai khopi a journalist 50 val COVID-19 positive ahi hi vangset umtah ahi, tin aseiyin ahi.

“Journalist ho COVID-19 positive ahiu thu akijah hi vangset umtah ahi. Journalist hon na natoh u natoh teng ule kivenna nei uvin lang, social distancing jui uvin lang chule mask kibol uvin”, tin Lav Agarwal, Joint Secretary, Health and Family Welfare in aseiyin ahi. Mumbai khopi a journalist 53 Covid-19 positive ahi akihetdoh jouva asei ahi. Adamlou hohi abon uva tua hi ‘isolation’ a um ahitai, tin Brihanmumbai Municipal Corporation in asei ahi.

Natna sohdoh lou (asymptomatic) ho test bol ngaiyem, tia thudoh anei uchun Agarwal in, “Asymptomatic le symptom neocha cha nei case hi 80 percent ho kiholdoh ahi. Sampling criteria a kicheh tah a test ngaicha jouse test bol dinga kisei ahi”, ati. “Case atamna gamkai ho, case kal atamna chule doubling rate anemna hohi khohsahna kipe ahi”, tin aseiyin ahi.

Natna aumna mun ho a hi case akalbe louna dinga health official hon pan sangtah alah ahi. State le district administration hotoh pan kilakhom ahi’in, central government a kon team thum Maharashtra gam a kisol ahitan, Pune, Mumbai a na atoh uva chule Maharashtra state le central sorkar chule district administration kihoutohna anei ahi, ati.

India gam a COVID-19 doubling rate hi lockdown akichepi masanga 3.4 days a kon 7.5 days a kal ahitai, tin Agarwal in aseibe in ahi.

Minister hon kum khat alo 30% Covid-19 doudal na a pehdoh diu

Imphal, April 20(ET): Tuni a cabinet kihou khomna a minister hon akum khat lo uva kon 30% covid-19 doudal na a aehdoh na nei ding in kihou lhah na ana nei uvin ahi. Hiche thu chu govt Spokesperson le Education Minister Dr Radheshyam in thuso miho ang a phondoh na ananei ahi.

State Cabinet in MLA jouse ading in Local Area Development Fund (LADF) noi a dangka lakh 25 cheh pehding in jong kinoptona ananei uvin ahi. Hiche fund chu anchang le apoimo thil dang dang ho hopdoh na ding a jah hiding ahi akiti.

Andro MLA Th Shyamkumar chu disqualified ahi toh lhon a ama Kendra sung a DC khut a hcihe fund chu pehlut hiding ahi akiti. Hiche neh le chah po le gari driver le handyman ho in khatvei apoh na uva dangka sangkhat le janga cheh pehding in jong hetsah na ana kinei in ahi. DM University a natoh na kilah ding ho jong covid-19 kichai teng pat ahi na ding in jong kinoptona ana nei uvin ahi. Chairman Manipur Haj committee lo sempeh ding le simlai pol 11 sim ho pol 12 a promote bol ding ho jong tuni a chun seikhomna ana nei uvin ahi.

Ministry of Home Affairs in mipi ho juiding dan thah asodoh be Manipur state sunga jong chepi ding’a phatsahna um

New Delhi, April 20: Ministy of Home Affairs (MHA) in tukum April 15 nikho a mipi hon ajui tei ding uva ana sodoh uchu thuso aumkit masangse koiman mipi ho kipunkhomna ho a chil setlou ding, ju chule khamnathei dang dang  tobacco ho kijoh ding akhah uvin hiche dan juilou ho chu Disaster Management Act Section 51(b) noiya themmo chankhum thei in aseiyin ahi.

Ministry of Health & FW, Govt, of India  in jong tukum 10 April nikho chun states leh UT ho a Chief Secretary ho heng ah Paan masala, Talab chule akhu potlou khamnathei ho ne a mipi kiphunkhom lah a chilset louding thuphon ana sei in ahi.

Indian Council for Medical Research (ICMR) hon jong mipi ho heng ah hiche tobang neh phalou ho neilouva chule mipi lah a chil setthang louding in temna aneikit uvin ahi. Hichet tobang thupeh aum jeh in Manipur Government in jong hiche juiding a dan kipe sukhel aki matdoh leh Disaster Management Act, Epidemic Diseases Act, Manipur Epidemic Diseases Covid-19 Regulations, 2020, and under provisions of the Indian Penal Code 1860 chule Code of Criminal Procedure (CrPc) noiya themmo kichan khum ding ahitai tin Soiminlian Lengen, Deputy Secretary (Health & FW) in thuphon abol in ahi.

Covid-19 positive case ni channa pa ‘negative’ hikit; ‘diabetic’ ahijeh a kijen jom nalai ding

Imphal, April 20: Achesa April nisim 19 ni a COVID-19 negative hi a COVID-19 natna nei anichanna pa avel a test abol uvin, negative ahikit in ahi.

Ahivanga RIMS hospital a diabetic ahijeh a ni phabep umjom nalai ding ahi. Gamsung thuso a COVID 19 toh kisai ahivanga thudih lou phabep akithang in, mipin adih hinam ti photchenna anei masat dinga thuhilna anei uvin ahi.

State sorkar in lockdown dan phabep olsah dinga phondohna anei ahi. Covid-19 nat jendam nading lou chule vaccine aumlou jeh a mipin kivenna aneiding hi lou phapen ahi. Mask bol ding, savon a khutsop ding, chule che le va le loudinga thuhilna khoutah a ajui diuvin Dr Kh. Sasheekumar Mangang, Additional Director (MD) le Spoksperson, Health Department in thuhilna aneibe in ahi.

Thilman kikalsah thu’a State government kikum dinga mipi hon ngehna nei

Imphal, April 20(ET): Covid-19 natna douna achelhah jing toh hon in kailhang leh dukan neu neu ho ah thil man nasatah in akhang in ahi.

Hiche toh kisai in AMSU ho jaona in Civil Body chom chom in State government in akintheipen a kikum ding in ngehna anei uvin ahi. AMSU Kakching District Committee hon state govt. heng ah hiche hi gelkhoh ho mipi hon genthei hahsatna ato uhi gelkhoh a suhlhap peh ding in ngehna anei uvin Kakching khopi sung ajong thilman nasatah in akhang in chule loubol miho leh niseh a nehkom ding kihol hon gentheina nastah atoh uve ati.