State a kon UT (J&K hi UT a kon State hung...

State a kon UT (J&K hi UT a kon State hung hikit thouvinte)

317
0
SHARE

State a kon UT

(J&K hi UT a kon State hung hikit thouvinte)

                            Thingnoi galguhbol’a kiphinna neijouse hin gamtum, kivaipohna tum, thaneina jat khat aneojepma kon alenjep mudi tupna anei ahi. India sung’a thingnoi boinapen niseh tobang’a kithana leh India sepai asang asang’a athilonau Jamu & Kashmir (J&K) State hi State a kon Independent gam hidi tupna chu akilelang beh State a kon aneojo UT (Union Territory) ahidohtai. Mizoram, Arunachal, Goa kiti hojong abul’a UT anahiuva chomkhat jouva State hung hidoh u ahi. J&K hi apumpi’a UT khat hijongle thukhat chu keh 2 (UT 2) kiso hinalai ahi. Jamu & Kashmir gamkai hi Legislative Assembly (MLA) umna UT hitadi, Ladakh gamkai hi UT ahivang’a ‘Legislature’ umloudi, direct a Centre noija umdi ti ahi. Ladakh a Budhist honvang sotna pat UT athum’u anahi. Ahin hiche hi chomkhat akhutlah lah sung’a dibou hintin chomkhat jouleh J&K hi India a State dangto dinmun kibang’a koidi tina hidi ahi. Tutadi a hi Jamu leh Kashmir gamkai UT khat noija aumkhom lhon’a Hindu te tamjohna Jamu gamkai a kon Hindu khat J&K Chief Minister hung hidohna thei tohgon um’a kisei ahi. BJP hon sotna pat J&K State atumbeh a thupitah a kibol’a Article 370 nuoija ‘Special Status’ anei hi thaimang di anatijing u ahin Parliament a BJP MP alhingset ana umdohjouji loujeh uva ana khongai ngai u ahi. Tukum BJP te achangseh uva jong ‘majority’ ahung hiphat uva J&K a hi ipiham khat khulah a ahinlha diu ginchat ana umpeh ahi. Hapta/kal masa a pat J&K a India sepai aLakh a sim umsa chungchon’a sangsom sagile nga lang hutkhatna ana kitollutbe a chu thil nasatah khat vang hung kiboldi ahi ti mijouse ginmo anahi. Sepai kitollut chu Kashmir a thingnoi hon Hindu te muntheng’a kholjina che mi asang asang’a sim ho bulu di leh gamsung’a boina khohtah abolgot jeh u ahi ti hi Centre govt nin kilepna’a ananei ahi. Kivenna dia India mi titahlou Foreign a kon J&K sung’a gamve kholjin (tourist) hojong kintah a akile diuva thu anapeh sohkei ahi. Gal kipan hitaleh kilom jeng bang’a Army leh Air force hojong kigosadem’a (alert) aum diuva thupeh jong ana um ahi. Hitia kigottup chetna umjouva J&K State kehni hung kiso ahi. Kashmir gam mi holeh alainatpi jing’u mundang gamdang hon ipi ahinbol diuvem ti hi ahi.

                  Alang khatna seidin Kashmir a thingnoi leh atoson mipi hon adu aneh u tidi ahi. India govt noija Special Status aneijeh uva sum le pai inchen louchen lang’a koima otchalouva um uva India douna a natohla ngadehlou u ahi. Eiho gam’a Army itileh mipi kithingjeng chu Kashmir milham hon ato apehpeh uto, moltum’a vohdia ajot utoh noise tah a abol jeng’u ahi. Hiche hi kiphinna, lunglhai louna nei ahijeh uva Centre govt nin Army ho ahtui depma adepsah jeh ahi. Pakistan a kon galguhbol’a twi kilhalut bang’a hunglut jing’a India sepai hon thina atojing ahi. Kashmir phaicham’a Hindu Pandit ho Kashmir thingnoi hon alom chang’a anatha uva anadeldoh u ahi. Article 35-A noija Kashmir gam mi hilou hon Kashmir gam’a inmun/gam achohthei loudi ti daan umjong sotna pat thaimang di tohgon ana umjing ahi. J&K dia Article 370 bon suhbei ahung hileh Nagaland in Special Status aneina Article 371-A jong ipi ahung kilo in chuleh koikoi State ahung kikehsobe in hoilai lai gamkai ahung kigomkhom dem ti aban hung umnalai thei ahijeh in kihuollelna a dimloi um, vetnom hung umcheh nalai di ahi.