Speaker Khemchand in MLA 7 douna a ‘Disqualification case’ kisem chungchang a...

Speaker Khemchand in MLA 7 douna a ‘Disqualification case’ kisem chungchang a thulhuhna nei loulai

58
0
SHARE

Speaker Khemchand in MLA 7 douna a ‘Disqualification case’ kisem chungchang a thulhuhna nei loulai

Imphal, May 8(ET): Speakers Tribunal luboh hina a MLA sagi ho douna a ‘disqualification case’ kisem ngailhahna neiya Speaker Khemchand in hiche thu a thulhuhna anei naipon ahin, akit a hearing aum nading nikho jong atep deh pon ahi.

Speaker thuso dungjuiya, gamsunga COVID-19 dinmun seithei ahi loujeh ahi. Chule thuso mihon hearing um masanga Speaker Tribunal in hitobang thulhuhna anei maithei ahi tia ginchat thu amoh sei lou diuvin jong temna aneiyin ahi.

Disqualification case kisem khum MLA sagi hohi  Oinam Lukhoi Singh, Ksh Bira Singh, Paonam Brojen Singh, Ngamthang Haokip, Ginsuanhao chule Yenkhom Surchandra ahi. Amaho douna a Congress MLA phabep in hehna asem ahi.

Achesa March nisim 28 nikho a Speaker Khemchand in Thounaojam Shyamkumar ‘disqualify’ anabol ahi. Shyamkumar hi achesa March nisim 12, 2017 kuma 7- Andro assembly constituency a kon Congress ticket a MLA kaidoh ahi’in, akaidoh jou jouva BJP a lut a chule CM Biren lamkaina noiya Minister panmun jong atuh ahi.

Hetthei khat chu, hehna kisem khum MLA sagi hohi abon uva assembly election nukhah pen a Congress ticket a kaidoh uva, ahivanga N Biren Singh lamkaina a BJP in sorkar asemna a lut u ahi. Agriculture Minister anahi Th Shyamkumar hin apanmun a kon haina anei ahitan, ama jong BJP a lut ahi.

Alangkhat a, Congress MLA hon hiche case chungchang a Speaker’s Tribunal in proceeding phatah a achepi loujeh a Tribunal douna a Supreme Court a SLP fileabol ding ahi, tin thulhut in aseiyin ahi.

Covid-19 case kal cheh cheh a 56,000 val ta; ‘Recovery Rate’ 29.36% a aum’e, tia Health Ministry in sei

New Delhi, May 8: Friday nikho chan a India gam a coronavirus case 56,342 a akal toh kilhon a Union Health Ministry in, ‘virus’ toh hin je dan ihet u angaiye, tin aseiyin, chule gal kisat hi hahsatah hijong le mijouse kithuto na kingaicha ahi, ati.

Health Ministry Joint Secretary Lav Agarwal in India gam a natna a kon adamdoh jat hi tuchan a 16,540 ahi’in, 29.36 per cent ahi, tin aseiyin chule achesa nidan 24 sunga mi 1,273 damdoh ahi, ati. Achesa nidan 24 sung, Friday jingkah nidan 8 chan a covid case athah 3,390 kiseiya, natna jeh a thi athah a 103 um ahi.

Natna neiya agom a 56,342 hi a, hiche lah a active case 37,916 hi a chule tuchan geiya natna jeh a thi 1,886 lhing ahitai. Lav Agarwal in thuso miho akimupi na’a, “Virus toh hin je dan ihet u angaiyin, social distancing kiti hin dan kikhelna ho pohdoh a chepi ngai ahi”, ati. Achesa nikho phabep sunga positive case hatah a akal a, niseh a 3,000 aval jing jouva Health Ministry in asei ahi.

AIIMS Director Randeep Guleria in tu naicha Covid-19 case hi India gam a June-July lha teng hatah a sang ding (peak) ahi, tia asei chungchang thuso mihon adoh uchun Agarwal in, “Bol ding le bol louding a kisei dan ho ijui uva ahile ‘peak’ (akhohset na) ahina ito lou maitheiyu chule tua natna akal cheh cheh jong nemsuh ding ahi”, tin adonbut in ahi.

India gam a tuchan geiya district 216 a covid-19 case kisei loulai ahi’in, achesa nikho 28 sunga district 42 a case thah kisei lou chule achesa ni 21 sunga district 29 a case thah kisei lou ahi, tin Agarwal in aseibe in ahi. Achesa ni 14 sunga case athah akisei louna district 36 um a chule achesa ni 7 sunga case thah akisei louna district 46 um ahi, ati.

ICMR in hospital 21 a ‘plasma therapy’ aphatchomna chule ‘safe’ ahi dan ho kholna dinga clinical trial abol ding ahi, tin jong aseiyin ahi. Trial kibolna ding hospital holah a hospital 5 hi Maharashtra gam a ahi’in, Gujarat gam a 4, Rajasthan, Tamil Nadu, Madhya Pradesh, UP a hospital ni cheh chule Karnataka, Chandigarh, Punjab le Telangana a hospital khat cheh ahi.

Covid 19 positive hi a 3.2 percent hi oxygen kipe a, 4.2 percent ICU a um a chule 1.1 percent ventilator a um ahi, ati. Agarwal in thuso miho akimupi na’a, Railways in coach 5,231 hi COVID Care Centre dinga akhel ahitan, hiche hi akilhengdoh railway station 215 a kikoi ding chule Covid-19 natna neiya ahivanga ana khoh lou ho kijenna a kimang ding ahi, tin aseiyin ahi.

“Migrant worker ho ama ama gal a akile pan tah jeh uva, natna vettup nadinga guidelines kipe chule kivenna ding hohi phatah a jui ngai ahi. Natong hon hiche hi amaho, amiho, a khosung chule khopi phatchomna ding ahi tihi ahetthem diuva temna kanei ahi”, tin Agarwal in aseiyin ahi. Aurangabad, Maharashtra gam a thil kipohna train in train lampi a imu a ‘migrant worker’ 16 ata lih na thilsoh thu a asei ahi.

Kangla solam gamkaiya dan dihlouva thil kisa ho police hon suse

Imphal, May 8(ET): Imphal le akimvel a dan dihlouva gam lo ho nodoh nadinga Imphal East District Police team hon Additional SP (LO)/Imphal East, SDPO le OC, Porompat Police station lamkaina chule Ward member le local club leader ho tosotna a drive abol uvin ahi.

Friday jingkah nidan 10.15 a kon Sacred Kangla solam gamkaiya dan phalna umlouva cheng ho douna a drive abol u ahi. Drive abol nauva team hon gun twi (Imphal River) pam, Hatta Golapati jui lhumlam gamkai, Sanjenthong a kon Minuthong chan a dan dihlouva kisa thil ho asuse uvin ahi. Kangla solam gamkai gari ahi’in, hiche mun a hi mihon dan dihlouva toilet, garage, workshed, cha dukan, hotel chule nen kipaina mun le adang dang asah u ahi.

Team hon sem thum toilet 10 le buh (shed) 18 aladoh uvin chule vengsung mihon vadung pam a nen apai loudiu chule thenna ajui diuvin thuhilna anei uvin ahi.

Kum 79 a upa minu khat achapa in lhan a avui nithum jouva ahing a kimudoh

Beijing, May 8: China gam a police hon lhan a anu vui a kingoh, anu that kigo a ngohna kinei pasal khat aman uvin ahi. Anu hi lhan a avui nithum jouva ahing a kimudoh ahi’in, alungthim sangtah a atohkhah vanga leiset adet loujeh a sohcha ahi.

Akiman pasal pa ajinu in police ho henga ajipa in anu achesa May nisim 2 nikho a thil gih kipohna kangtalai tobang a apuidoh ahitai, tin aseiyin ahi. Nithum channi a ahung kile lou phat a police ho ahetsah uva chule police hon mipa hi amat u ahi. Shaanxi province, Jingbian county mun thilsoh ahi.

Numeinu huhdoh hon asei dungjuiya, numei nu hin dinmun hahsatah ato vanga akithopi dinga mi ol ol a akou kou jeng ahi. Mipa hi kum 58 a upa Ma kiti ahi’in chule anu hi kum 79 a upa Wang ahi. Anu hi atahsa akehkhat paralyze hi ahitan, achapa in aphat tin a anu ajen hi akhop val ahi, tin agamsung thuso in aseiyin ahi.

Jingbian county prosecutor office in thilsoh umchan telephone a atah ahi photchenna aneiyin, thukholna achelha jing e, tin aseiyin, ahivanga thuchen seidoh ding anom pon ahi. Mipa hin amin ‘Yen’ ahi tibou aseiya, adang aseilou ahi. China gam thinglhang gamkai ho a sorkar a kon mipi kithopina hi lhasam ahi’in, insung miten ama ama insung a tehse hohi kithopina umlouva akivetkol u ahi.

Maharashtra a Madhya Pradesh gammi natong mi 16 ho thil kipohna train in tanglih

Aurangabad, May 8: Maharashtra gamsung Aurangabad noiya um Karman a Friday nikho a thil kipohna train in gamdang a kon natong dinga hung (migrant labourer) mi 16 atat lih in, thilsoh a midang phabep jong akisukha in chule mi 2 kisukha man louva asohcha lhonin ahi.

Natong hohi abon uva Madhya Pradesh a kon hiu ahi. Karman railway station kom, Jalna le Aurangbad kikah, Nanded Division, South Central Railway mun a thilsoh ahi. Natong hohi train lampi a aimut nauva vangsetna ato u ahi. Akisukha ho Aurangabad Civil Hospital alhut tauvin ahi.

Prime Minister Narendra Modi in Aurangabad thilsoh a vangsetna toh ho alunghempi in, chule kithopina thei chan a panpi dinga kitepna aneiyin ahi. Railway Minister Piyush Goyal toh kakihou tan, aman avetlhah ahi, ati. Union Railway Minister Piyush Goyal injong alunghempi na thu aseiyin, athu khol dinga thupeh anei ahitai. “Train in atalih hohi Umarya le Shahdol, Madhya Pradesh gam mi ahiuvin, Jalna, Maharashtra a SRG Company a natong hiu ahi”, tin Railway in thuso aneiyin ahi. Jalna company a supervisor hon asei dungjuiya, Thursday jan nidan 7 a natohna mun adalhah uva, keng a Badnapore chan cheuva, hiche a kon Aurangabad lang jon a track ajuiyu ahi. Km 36 vel keng lam ajot jou uva chol uva, track a atou uva akichol ule imu lhu u ahi, ati.

Mi 14 hi track a um a, mi 2 hi amaiya um a chule mithum hi track pam a um ahi. Madhya Pradesh Chief Minister Shivraj Singh Chauhan injong alunghempina thu aseiyin chule athi ho insung mite dangka lakh 56 ex gratia peh dinga thuphon aneiyin ahi. Uddhav Thackeray injong dangka lakh 5 compensation peh dinga thuphon anei ahi, tin Maharashtra CM Office in thuso aneiyin ahi.

CM Biren in train man sanction bol

Imphal, May 8(ET): Manipur Chief Minister N Biren Singh in Bengaluru akon Manipur gammi ho hinpoh doh na ding train Shramit Special train jah na ding man in dangka 12,36,000 sanction ana bol tan ahi. Hiche sum chu Chief Minister COVID-19 Relief Fund akon a kiladoh ahi. Hiche train ahi mi 1200 lam hung tou ding u ahin, mikhat a dangka 1030 man ding a kibol ahi.

Covid-19 jeh a Assam a mi khat in thina toh kit

Guwahati, May 8: Assam health minister Himanta Biswa Sarma in aseina achun Guwahati sung a um Lokhra ah Deepika Nath kum 16 in tuni chun covid-19 jeh in thina atoh in tuhin Assam gamsung ah thina mi 2 alhinhtan chule aveikha mi 53 alhingtan ahi. April 27 ni chun hiche khangthah nu hin akeng nat leh akhosih thu asei in ESI Hospital, Beltola a aki vetsah in chuban ah Cancer Institute (BBCI) a staff quarter ah apinu umna ah anaonu toh akichonlut in ahi. Thursday nichun akeng nat aseikit in chujovin ahinkho abeitan ahi. Athi thu jah ahi in Gauhati Medical College & Hospital (GMCH) in BBCI heng ah test bolding in asei in a result kimuna ah covid-19 vei ahidan amudoh uvin ahi.

A umna BBCI staff quarter chu akhah tauvin   chule amanu ana umkhahna leh akimupi ho Lokhra, BBCI staff quarter leh ESI hospital, Beltola ho a khol ahipan tai. Health Minister in aseibena achun Ajmar, Rajasthan akon Cachar hinjon bus a hungtou mi thum ho chu covid-19 vei ahidan akimudoh kit in tuhin Assam gamsung a natna veikha mi 56 aphatan ahi.

CCpur Dist. mi Gampam’a tangden ho test kibol jouva Negative hon bou Dist. jon thei diu

B.Lalboi Gangte

CCpur. May 8 (ET): COVID-19 natna hit jeh’a gamdang’a natong leh lekhasim aum tangden ho ahung kile kit thei nading uva pan lah ding dan janni (May 7) chun GNM Training School, CMO Campus mun’a Medical Department lamkai na meeting anachelha in ahi. Hiche meeting achun CCpur District sung’a Non-Governmental Organisation (NGOs) 11 leh Philanthropic Organisation chom chom 9 akon lamkai ho leh  Pawan Yadav, IAS DC Ccpur hon pan anala uvin ahi. Hiche phatsung’a chun lock-down sung leh lock Down lahdoh nung’a kigon tup ding dan, CCpur District Hospital pan lah dan, PPE Gears leh Equipment chung chang, gamdang akipat hung ding ho chung chang, Home Quarantine leh Community Quarantine thu, Govt. vetkol na Quarantine Centre ho seikhom na ananei uvin ahin hiche ho chung chang thu’a thulhuh na kichen tah analah thei lou jeh uchun DC lamkai naleh ama Chairman hina noi’a District Task Force for COVID-19 semdoh ding in kithulhuh na ananei uvin ahi. Hiche’a member ding ho DC/CCpur in agon ding ti ahi naban’a NEST in asem COVID-19 Mitigation & Protection Model, CCpur kiti jong anapom peh uvin ahi.

Hiche Meeting achun COVID-19 lock-down jeh’a State chom chom’a tanden CCpur district mi 2500 inn lam ahung thei ding uvin Manipur Home Dept. in phalna apeh toh lhon’a ahung lhun teng uleh Imphal ah nikho 2 sung COVID-19 test kibol dingu, Test phatsung’a Negative jouse CCpur District sung lut thei ding chuleh CCpur District ahung lhun teng uleh Community Quarantine Centre a koi hi ding ahi. Manipur gammi State chom’a tangden inn hung kile nom tengbang.in a kikhum lut dungjui in mi 45,000 apha in hiche lah’a chun mi 34,200 hi kintah’a inn lam hung nom ngen ahi. Hiche 45,000 registration kibol nalah’a Delhi akon registration bol jat mi 9747 ahi. Chuleh Bangalore akon Manipur mi 1200 vel hi Train a May nisim 9 leh Bangalore ahin dalhah uva Jiribam chan hung lhung ding ahi. Kolkata khopi’a natong Manipur mi Nurse leh dam theina lam’a natong mi 22 vel in amaho sum in Kolkata apat tuni jingkah in Imphal ahung lhung tauvin ahi.

Kpi DHQ a police le KYU hon Lockdown ‘guidelines’ phate vetup u; agam jon ding gamdang mi ho kipohna gari ho ki nga pa lou dinga seiyu

Kangpokpi, May 8(UNA): Kangpokpi DHQ a lockdown guidelines athah phatah a akichepi nadinga District police ho kithopi a Kangpokpi Youth Union in Kangpokpi bazar a West Bengal registration number umna gari khat bazar a akingah amudoh uvin ahi.

KYU Vice President Kamgougin Lunkim injong apet pet a panalah a, athu police ho hetsahna aneiya, chule police ho dohna anei ahi. Kolkata, West Bengal a kon hung Manipur a tangden ho pohdoh nading gari ahi, tihi athu akhol jou uva hetdohna aneiyu ahi. Chule gari adang tamtah jong ahung be jing nalaiye, ti thu jong ahetdoh be uvin ahi.

KYU lamkai hole police honjong ajot nadiu mun ajot nading uva gangtah in asoldoh uvin, chule ajot nau mun alhun kah uva akingah lou diuvin aseipeh uvin ahi. “Lam saotah ahijeh a atangden ho chule driver hon ichan gei hahsatna ato diu ham ti kahethem ahi. Ahivanga natna akiseina gam a kon hung ahi jeh uva kithopina ding kinom jong le kivenna nei ding hi thupi ahi”,tin KYU Vice President in aseiyin ahi.

Lockdown jeh a atangden ho kipohna gari a tou hon akhoh behseh a ahile mi umlouna mun a akingah diu adeina thu aseiyin, ahivanga mi tamna bazar lah a akingah lou diuvin aseiyin ahi. Chule atangden ho kipohna gari hohin akholjin nading u nikho chule aphat hetsahna anei uva ahile KYU in kithopina dinga nopna anei ahi, ati.

Alangkhat a, guidelines athah gangtah a akikhel jeh chule aphatcha thuhilna aumlou jeh a Kangpokpi DHQ a gari chule mipi tamtah akitit in ahi. Kangpokpi Police le KYU hon mipi chule gari nei ho lockdown guidelines hina chule vetkolna a hahsatna sangtah atoh uvin ahi. Kangpokpi DHQ a private gari lhai tamtah mutheiya aumin, gari hon guidelines ajui lou jeh a police hon aman uvin ahi.

Ahivanga, dan palkeh hon guidelines athah akikhel thu kahet louvu ahi, tia police ho henga asei ahi. Dan thah dungjuiya ‘pass’ neilou gari ho alhai ding kiphal lou ahi. SP Kangpokpi in thuhilna anei toh kilhon a, guidelines palkeh a tehse ahan lang ho alhadoh masa uvin chule adang se khoutah a gihna anei uva chule ‘guidelines’ athah thu hilna anei jou uva alhadoh tauvin ahi.

Electric mei vah lou ding

Imphal, May 8(ET): Ahung lhungding May nisim 11 pat electric line semphatna um ding jeh a hiche akisem nikho sunga ho jingkah lam nidan 8:00 akon nilhah lam nidan 4:00 channa mun phabep a electric vah kimu louding ahi.

Hiche akisempha ding ho chu 33KV Karong-Kangpokpi hi May nisim 11 akon 13 chan hiding, 11KV Lairou feeder leh 11KV Senapati feeder a May nisim 14 hiding chule 11KV Mayangkhang feeder hi May nisim 11, 12, 13, 15, 16 leh 17 hiding ahi. Hiche nikho jingkah nidan 8:00 akon nilhah lam nidan 4:00 sung’a electric kilha lou ding ahi.

Guwahati a tangden mi 43 ho Imphal khopi hung lhung tau

Imphal, May 8(ET): Guwahati khopi a tangden a Sagolband, Imphal West a kon gamsung mi 43 ho Friday nilhah nidan 3 a ahung lhung tauvin ahi. Amaho hi Thursday nikho nilhah nidan 3.10 a Guwahati khopi a kon hung kipan doh u ahi.

Mao a screening phatah a abol jou uva IIIT Mantripukhri a health department dan dungjuiya ‘quarantine’ bol dinga apui tauve, tin thulhut in aseiyin ahi. Atangden hohi abon uva Mantripukhri a um u ahitan, hiche mun a ‘quarantine’ abol diu ahi.

Passenger mi 43 hohi abon uva Sagolband assembly constituency MLA RK Imo Singh in bus ni a apui ahi. Atou ho bahara man ima alah louvu ahi, tin thulhut in aseibe in ahi.

PREPAK-PRO thingnoi ho a hidinga ginmo galmanchah tamtah kiman

Imphal, May 8(UNA): Imphal West District Commando team hon Sekamijing Khoidumpat, Imphal West district a um ‘fish farm’ a kon a Friday jingkah nidan 6 don a PREPAK-PRO thingnoimi ho a hidinga ginmo meithal chule meichang tamtah amudoh uvin ahi.

Police thulhut dungjuiya, meithal le meichang kimu na nga kul hi Mayanglambam Kumar @ Ningthi Singh, s/o Mayanglambam Kulapi Singh kiti mikhat a ahi. Mayanglambam hi Kakching Ningthou Pareng, Kakching district a cheng ahi’in, ama jong hi PREPAK-PRO thingnoi khat ahi’in, tu le tua Myanmar a um ahi.

Akiman galmanchah holah a AK-56 rifle 1, carbine machine gun 1 le magazine, .303 modified rifle 1 le magazine, loose rifle barrel khat chule motor shell ni pang ahi. Akimudoh meithal le meichang ho aman uvin chule Hiyanglam Police Station a case ajihlut tauvin, thukholna chelha ding ahi, tin thulhut in aseibe in ahi.