Sorkar in Jammu and Kashmir gam a um Article 370 ladoh ta;...

Sorkar in Jammu and Kashmir gam a um Article 370 ladoh ta; Union territory ni a hopkhen dinga sei

145
0
SHARE

Sorkar in Jammu and Kashmir gam a um Article 370 ladoh ta; Union territory ni a hopkhen dinga sei

New Delhi, Aug 5: Sorkar in Monday nikhon Jammu and Kashmir ‘special status’ akipehna Article 370 alah doh tan chule J&K state hi Union territory ni- Jammu and Kashmir leh Ladakh a khen dinga asei jeh a NC leh PDP lunghanna sangtah asoh in ahi.

Union Home Minister Amit Shah in Rajya Sabha a Article 370 lahdoh dinga resolution apodoh in ahi. Hiche resolution dungjuiya Jammu and Kashmir gam in ama Constitution anei nading a tha anei louding ahitai. “Parliament recommendation toh kitoh a President in August nisim 5, 2019 a kon Article 370 jouse kichepi talou ding ahi”, tin Home Minister in apohdoh resolution a asei uvin ahi.

Jammu and Kashmir state hi Union territory ni- Jammu and Kashmir division leh Ladakh a khen dinga Shah in aseibe in ahi. Shah hin Jammu and Kashmir Reorganization Bill apohdoh ahi’in, Ladakh Union territory in Chandigarh tobang legislature anei louding ahi, tin aseiyin chule Jammu and Kashmir union territory in Delhi leh Puducherry tobang legislature aneiding a aseiyin ahi.

Tohgon hi Congress, TMC leh DMK member holeh House a lamkai hon nasatah a adoudal uvin, ‘Well’ anolut uvin ahi. Amasapen a ‘slogan’ asam uva, hiche jouva House well lang a kijot u ahi. Floor a kiphinna bol holah a Azad, Congress Deputy lamkai Anand Sharma leh TMC lamkai Derek O’Brien apang uvin ahi. Well chan kiphinna a Samajwadi Party (SP) member ho apangdeh pouvin ahi.

PDP member Nazir Ahmad Laway leh Mir Mohammad Fayaz in ‘slogan’ asam in chule poster hojong abotkeh lhonin ahi. Laway in akivonna (kurta) jong abotse in ahi. Chomkhat jouva kiphinna akhohse cheh cheh in, lamkai tenin Constitution copy jong asuse lhon in, hiche jouva Naidu in amani House a konin anodoh in ahi.

“Indian Constitution hi alenpen ahi’in, koiman ima abol theilou ding ahi”, tin Naidu in aseiyin chule member teni hunam a Marshal hon apuidoh diuvin thupeh aneiyin ahi. Marshal hon pan alah masanga BJP lamkai Vijay Goel in pan ala kigo in, ahin anungsot uvin ahi. Indian Constitution hi achungnung pen ahi’in, koiman copy suhset nadinga tha aneilou ahi, tia Naidu in asei ahi. “House sunga Constitution copy kisuse a chule India douna thu awging a kisam hi kiphal louding ahi. Member ho min bou kipha louding, action jong kila ding ahi”, ati. Azad in Reservation Bill douna a kiphinna kibol ahipon, Kashmir dinmun hi seikhom masat ding kidei ahi, tin aseiyin ahi. Parliamentary Affairs Minister in Jammu and Kashmir a masanga Article 370 ana kikoiya suhkhel kinei ho semtohna (suhdihna) kinei ahi, tin aseiyin chule alangkhat a Law Minister Ravi Shankar Prasad in sorkar in phat masa a jong bill nikhat a aphatsahna um ahi, tin aseiyin ahi.

Reservation Bill hin sum dinmun a lhasam ho akithopi ding ahi, themjilna mun chule sorkar tohmun a ‘weaker section’ ho dinga 10% reservation um ahi, tin Shah in aseiyin chule reservation hi aumsa SC, ST leh OBC ho dinga kigong reservation chungchon hiding ahi, ati. Phat masang a jong Bill circulate kibol a anikho ma ma a phatsahna akinei na 38 vei lhing ahitan, Article 370 suhmang nading resolution phatsah ahiteng hiche hi ‘null and void’ hiding ahi, tin aseibe in ahi.

Hiche thu a Jammu and Kashmir House sung chule apam a jong lunghanna sangtah asoh in ahi. India in akitepna Kashmir chunga abulhit joulou ahi, tin PDP chief leh J&K CM anahi Mehbooba Mufi in aseiyin ahi. Sorkar in achang a Article 370 suhmang ding ati hi dan toh kitohlou, constitution toh kitohlou ahi, ati. Jammu and Kashmir a India hi ‘occupation force’ ahina ding ahi, tin Mehbooba in Twitter a aseiyin ahi.

“India sorkar lunggel hi kicheh ahi. J&K gammi ho suhgim a gam lahdig atiu ahi. India in Kashmir dinga a kitepna asem abulhit jou tapoi”, tin Srinagar a ‘house arrest’ a um Mehbooba in aseiyin chule itichan ikihoulim theidiu ham hetthei ahipoi, ati. National Conference lamkai Omar Abdullah injong alunghanna thu aseiyin, sorkar in achang a (unilateral) thulhuhna anei ahi, ati. “Sorkar thulhuhna hi J&K miho tahsanna kijoulhep ahi. Thukholna hi asetna sang ding ahi. Gamsung miho douna ahi’in, party jousen meeting anei nau janni a jong gihna aneiyu ahi”, ati. Sorkar in lungthim duha a pan alah ahi. Imasang uva gal sottah umding ahi’in, hiche a dinga kigotna kanei uve”, tin aseibe in ahi.

BJP quarter a goljo kipana lentah anei uvin ahi. Sorkar in Article 370 thu a thulhuhna anei hi gamsung kipunkhomna dinga hetthei umtah thulhuhna ahi, tin party lamkai Arun Jaitley in aseiyin chule atohkhompi Ram Madhav injong apachatna thu aseiyin ahi. “Nikho loupitah ahi. Dr Shyam Prasad Mukherjee a kon martyr chang a asanga sim dinga Indian Union a J&K kilahlut hi jana kipehna ahi”, tin party spokesperson Shahnawaz Hussain in aseiyin ahi.

“Article 370 leh 35A kisuhmang hin gamsung kilahlut thu a thudohna aso ahi, ajeh chu Article a kisei dan ho a kibol ahi”, tin Abdulla in aseiyin chule National Conference in thulhuhna adoudal ding ahi, ati. Congress injong tohgon sangtah in adoudal in, Rajya Sabha a Opposition lamkai leh J&K CM anahi Ghulam Nabi Azad in ‘India constitution kitha na ahi’ tin aseiyin chule BJP in gamgi a um state hi atel tel sodoh a gang ahi, ati.

Ahin, regional party phabep- BSP, YSR Congress, TDP, BJD, AAP leh AIADMK in thulhuhna atosot uvin, ahivanga BJP toh kiloikhomna JD(U) ho House a konin akijot doh uvin ahi. Alangkhat a sorkar in sepai 8,000 sol be dinga thulhuhna anei uvin, Ministry of Home Affairs in kiginna sangtah aneijing dinga temna aneiyin ahi.

Gamgi boina toh kisai a August nisim 10 akon nidan 48 Tamenglong district bandh kikou

Imphal, Aug 5(ET): Tamenglong district sunga kiloikhomna jat chom chom ho in Joint Action Committee noi  in Jiribam toh gamgi boina toh kisai in district sung nidan 48 bandh phondoh na ahin nei uvin ahi.  Hiche JAC sunga kikhai lha kiloikhomna ho chu Zeme Naga Council Manipur (ZNCM),  Liangmai Naga Council (LNC), Rongmei Naga Council  (RNC), Inpui Naga Union,  kuki Chief Association (KCA), Tousem Area Student’s  organization (TASO),  Rongmei Naga Youth Organization (RNYO), Rongmei Naga Students’ Organization (RNSO), Zeme Students’ Organization (ZSO), Liangmai Naga Katina Ruangdi (LNKR), Thadou Students’  Association (TSA), Tamenglong-Jiri branch, Kuki Students Organization ( KSO), Tamenglong-Jiri branch,  Kuki Inpi,  Jiribam le Tamenglong District, Social Welfare Forum of Jiri-Imphal Road le Liangmai Naga Youth Organization, Tamenglong district ahiu vin ahi. Kiloikhomna n ain Tatbung khomun a Jiri police station akilahdoh a Tamenglong district police aki koi nadingin jong hetsah na ahin nei uvin ahi. Tamenglong district  Tousem Sub division sunga  gam cho ho in Tamenglong district administration ang a tax apeh uva, Tousem headquarter mun a SDO le staff ho chuleh police le doctor ho in atoh ding dol u agamsung a pansa a atoh uva, Kaipundai apat Tousem kikah lampi phate a aki semphat nadingin jong hetsah na kiloikhomna ho in ahin nei uvin ahi.  Ngehna kinei ho government in nahsah lou a akoi le kiphinna jat chom chom jong kipan ding ahi tin kiloikhomna ho akon thuso kimu chun asei in ahi.

Surrenderee ho ‘scan’ bol dinga association in thumna nei

Imphal, Aug 5(UNA): All Manipur Surrender Welfare Association in 2010 kum a kon sorkar henga galmanchah pelut a thingnoi ahina dalha a kipedoh a thingnoi ijat um em ti ‘scan’ abol diuvin thumna anei uvin ahi.

Manipur Press Club mun a All Manipur Surrender Welfare Association publicity secretary H Tansen in thuso miho akimupi na’a, thingnoimi tamtah achesa 2010 kum a kon sorkar henga kipelut uva galmanchah apehdoh u ahitai, tin aseiyin chule akipelut mi tamtah lah a phabep ‘scan’ kibol a phabep abol loujeh uva akipedoh hon adinmun ahetthei lou ahi, ati.

IG scanning akichai vanga surrenderee hohin sorkar in aphondoh facility ho amu dehlou ahi, tin aseiyin chule sorkar khut a kipelut hohin insung mi, ji leh cha aneiyu ahi, ati. Sorkar in aphatcha amaho dinga tohmun agonpeh a ahileh insung mi phatah a akivettup theidiu ahi, tin aseibe in ahi. Sorkar in tu masanga ‘surrenderee’ ho tohmun peh dinga ana phondoh ahi’in, ahivanga tuchan a akitep nau abulhit dehlou ahi. Moirangthem Thambalngou Meitei, Chairman, All Manipur Surrender Welfare Association in thuso anei suhthengna aneiyin Association founder Md Tayeb Ali @ Qazi Umar in inmun adalhah ahitan, hiche thuso hi jou ahi’in, kihetkhel na ahi, tin suhthengna jong aneiyin ahi.

KISG in PMGSY thu a ‘action’ khoutah lah dinga gihna neiyu

Kangpokpi, Aug 5(UNA): PMGSY 2017 noiya Molkon leh Yangnoi kho kikah a lamlen sem nading natoh akichepi loujeh a lunglhai lou Kuki Inpi Saikul Gamkai in aganna thei pen a natoh akipat louleh action lah dinga gihna anei uvin ahi.

Saikul Hill Town a Kuki Inpi Saikul Gamkai President Seimang Lupho in thuso miho akihoupi na’a Molkon leh Yangnoi kikah lamlen km 20 vel PMGSY No MN06306 noiya sem nadinga natoh tuchan a kichepi lou ahi in, work order asodoh nunga jong kichepi lou ahi, ati. Molkon hi Saikul Hill town ban a Zilhom area a um kho 40/50 vel kilahna/sumkolvei na mun ahi’in, lamlen pha aumding hi gamkai miho kinepna chule angaicha tah ahi, ati.

2017 kum a PMGSY noiya lamlen semna dinga sanction kibol ahitan, kum ni ache tah vanga tuchan a natoh kichepi loulai ahi’in, mipi kinepna guilhung louding dinmun a aumjeh a mopohna nei authority ho vaigei na chunga lunghanna soh ahi, tin aseibe in ahi. Kuki Inpi Saikul Gamkai noiya Saikul a um CSO chom chom in mipi phatchomna dinga pan alahjing ahi’in, Yangnoi-Molkon kilah lamlen kisemna dinga jong bol thei chan kibol ding ahi, ati.

Kuki Inpi Saikul Gamkai noiya Saikul CSO hon athu kholna aneiyu ahi’in, mopohna nei engineer leh contractor hon natong louva sum akilah u ahi tihi kihedoh ahi’in, natong lou ho chunga action lahding ahi, ati. KSO Saikul, KWU Saikul panna a CSO Saikul hon Kuki Inpi Saikul Gamkai lamkaina noiya mopohna nei authority chule state sorkar in hiche thu agelkhoh diu chule themmona neiho chunga action alah diuvin aseibe uvin ahi.

Nupi holeh Police kinoto na a mi 3 kisukha, IPC Section 420 kisembe kit; Robinson ni 15 jail a umding

Imphal Aug 5(ET): Babysana thi thu khol dinga kisemdoh SIT in Babysana aumna chule thilong akimuna hostel mun hi dan dihlou ahi, tin asei uvin ahi.

Chief Magistrate henga case IO in report apehlut na a residential school hi Standard Robarth Higher Secondary School min a kibol ahi’in, authority ho a kon permit (valid) aneilou ahi, ati. COHSEM leh BOSEM in school hi ‘residential’ a bol nadinga permit akipepoi, tia aseicheh ahi, tin thulhut in aseiyin, hiche hi Babysana thi thu a lungdonna tamtah aum akibe kit na ahi. Jouthu (cheating) bol jeh a FIR a section dang kikoibe kit ahi’in section 420, IPC kikoibe ahi. Hiche hetdohna aumtoh kilhon a hostel a um simlai chule Residential a um ho khonung seithei lou dinmun a um ahi.

Ahin, thulhut khat in ‘day scholar school’ hi Standard Robarth Higher Secondary School min a kibol a chule Council leh BOSEM (class 10 chan simlai ho dinga) affiliate ahi, ati. Council leh BOSEM in mun khat a kisa school ni affiliate abol theilou ahi. Chule simlai asanga sim aumna school (main) le residential cum day scholar school a uniform, aphat chule teaching leh non-teaching staff ho kibanglou ahi. Hiche chungchon a simlai achom chom ni, class khat, section khat le roll no kibang ni in I card kibang anei ahi’in, school teni a Founder cum Principal in Icard a soi akai ahi.

Alangkhat a School founder leh Principal hi a Pheiroijam Landhoni hi August nisim 6 chan jail a umding ahi’in, atahsa alel jeh a JNIMS hospital a apolut uvin, ama leh Romita hi jing nikho teng CJM Imphal West a apui diu ahi. Pheiroijam Robinson, Junior Administrator, Standard Robarth Higher Secondary School leh Pheiroijam Landhoni chapa jong achesa July 30 ni a kon hiche thu a jail a um ahitan, tunin CJM Imphal West Court a apui uvin, ni 15 jail a umdinga asei uvin ahi.

Monday jingkah a kon Cheirap Court complex kom, Uripok, Imphal West a police tamtah in Robinson court a apui sung uva boina thilsoh aumlou nadinga angah uvin ahi. Babysana thu adih a tan dinga thumna neiya mi tamtah kikhom dinga ginmona aneiyu ahi’in, ahivanga police hon kiphinna bol hon Cheirap Court anokhum masang uva aguhcha in Robinson court a apui uvin ahi.

Sun nidan 11 don a Khwairamband Keithel a numei tamtah akikhom uvin Cheirap Court lang ajon kigo uvin, ahivanga police hon amaho alhun masanga Robinson apuiyu ahitai. Numei kikhom holeh police ho kah a kinotona aumin, police hon kiphinna bol ho nomang nadinga tear gas akap uvin, thilsoh a mithum akisukha in ahi.

Standard Robarth School Principal Pheiroijam Landhoni leh Coordinator Romita achesa August nisim 3 nilhah a police hon amat uva Duty Magistrate anga a adinsah jou uva jail a akoiyu ahi. Sunday nikho hi Babysana Asthi toh akito jeh a mi tamtah in kijotna anei uvin, Khuyathong munvel a police hotoh kinotona aumin ahi. Landhoni leh Romita ani lhon a CJM Imphal West a Tuesday nikho teng apui diu ahi. Hiche masanga Hostel warden ni jong Babysana thi thu a jail a akoiyu ahitai.

Imphal a Army recruitment umdi

Imphal, August 5(ET): Ahunglhungding Oct nisim 10 akon nisim 18 sunga Luwangpokpa Cricket Stadium, Imphal (Manipur)  a Manipur aon khangthah ho adinga Army recruitment rally kibol ding ahi. Hiche recruitment a panla nom ho in 11 Aug 2019 apat 24 Sep 2019 kikah a www.joinindianarmy.nic.in a apply abolthei ding u ahi. Candidate apply ana bol sa ho in website log in abol uva afresh ding uvin hetsah na ahung kinei in ahi.  Recruitment rally a pan la nom ho in apply abol jou teng ule panlah na anei thei ding u ahi. Tohmun kihong ho chu Soldier General Duty (10th & 12th std), Soldier Technical (12th std, Physics, Chemistry, Maths & English),       Soldier Nursing Assistant (12th std, Physics, Chemistry, Biology & English) le Soldier Tradesmen (8th &10th std simple pass) ahi. CEE  ahunglhungding  November nisim 24 nikho le Rangapahar mun a kibol ding ahi akiti.Hetbe nom na nei ho in phone no.          03862-249012 & 8974958673 a jingkah lam nidan from 0830 AM apat 0200 PM chan a office kai nikho le ahin doh thei ding u ahi.