Sorkar in ‘guidelines’ thah asodoh jouva niseh kimanchah angai tobang dinmun hi

Sorkar in ‘guidelines’ thah asodoh jouva niseh kimanchah angai tobang dinmun hi

65
0
SHARE

Sorkar in ‘guidelines’ thah asodoh jouva niseh kimanchah angai tobang dinmun hi

Imphal, May 4(ET): Chief Secretary J Suresh Babu in lockdown sunga dinga guidelines thah phondohna aneiya, Paona bazar le Thangal bazar a dukan ho panna a sector phabep a relaxation akoi jouva Imphal khopi a niseh ngaichat cho dinga mi ache jing’in, nidang ngaina tobang dinmun ahitan ahi.

Guidelines thah hi guidelines ani channa phat janni a akichai jou, tuni a kon kichepi pan ahi. Dan dungjuiya Khwairambam Ima Keithel thum ho, temporary market shed le Ngari galli, Khwairamband bazar kikhah jing nalai ahi. Government office ho jong guidelines thah dungjuiya kihong kit ding, Under Secretary rank noilang ho 50% attendance chule Under secretary rank chunglang ho phatah a akai diuva kisei ahi.

School, college le themjilna mun ho, private a lhai public transport ho kikhah ding ahi’in, passenger gari ho, inter state le inter district bus hojong lhai louding ahi. Ahivanga phat kihon sunga Imphal khopi a gari tamtah alhaiyin, sorkar in jingkah nidan 6 a kon nilhah nidan 4 chan ‘ban’ lahdoh dinga thuphon anei ahi.

Churachandpur district a me johna chule grocery dukan ho akihon ding aphal uvin, ahin, kailhang akikhah in ahi. Thoubal district a jong Ima Market tilou dukan adang ho akihong in ahi. Chief Secretary Dr J Suresh Babu in thuso anei dungjuiya, sector phabep tilou adangse hin ‘social distancing’ ajuiya akihon dinga phalna kipe ahi. Lockdown kisuhsaobe sunga medical service, air ambulance le security thu tilouva lenna jouse kikhah ding, security thu le state home department in phalna apeh tilouva train lhai ding jong kikhah a, inter-state bus, school, college, themjilna mun hojong kikhah ahi’in, ahivanga, online/distance learning kiphal ahi.

Restaurant, hotel kiti hospitality service hojong health/police/government official/healthcare worker/tourist atangden/quarantine facility a kimang chule home delivery (food) ho tilou kikhah nalai ahi. Hiche tilou cinema hall, shopping mall, assembly hall, park, swimming pool, theatre, bar le auditorium chule mipi kikhopna mun ho chule kin gon bol ding jong kikhah nalai ahi.

Gamsung hung kile nom gamdang a tangden hon e-pass alah masat ding’a thupeh um

Imphal, May 4(ET): Gamdang dang a tangden tamtah in gamsung ahung kile nading uva ngehna anei jou uva state sorkar in amaho che le nadinga guidelines phabep asodoh in ahi.

Union Ministry of Home Affairs (MHA) in SOP (standard operating procedure) asodoh dungjuiya, state sorkar in gampam a tangden koitobang private ahiloule hired kibol gari a in ahung kile nom uva ahile che le va le nadinga e-pass akilah diuva thuhilna anei ahi. Senapati district a Mao gate chule Jiribam district a gamsung lutna teni hi gamdang miho ahunglut theina ding uva kihong ding ahi’in, sun nidan 12 masang ahiding hi deisah ahi, tin official hon hetsahna anei uvin ahi.

In a kile ding jouse akipatdoh masang uva medical screening test (certified) alah masat ding uva MHA in guidelines asem ahi. Chule ache ding hon identity card, journey nikho, gari registration number le akipat doh nadiu mun chule adang dang ho kipehna ‘self-declaration’ hi home department henga akalson doh ni 2 masanga email a apehdiu, hiche hi virus screen kibolna dinga le kivenna ding ahi.

In kile nom jousen shomemanipur@gmail.com a detail athot diu chule state (tengbang.in) website a e-pass kilahna dinga register kibol diu ahi. Sorkar in asodoh e-pass neilou koima gamsung kilutsah louding ahi, tia home department official in asei ahi’in, state sorkar a kon pass amu jou teng ule bou ahung kipat doh diuva kisei ahi.

Security ngaichatna nei ho thu a nganse na kipe nodal officer hon gam dang dang a atohkhompi ho chule Additional Director General of Police Lupheng Kailun toh pan alahkhom diu ahi.

Gamsung lutna mun chom chom a mi 237 ‘screened’ kibol; Test kibol sample 5 ‘negative’ hi

Imphal, May 4(UNA): Mao, Jiribam gate le Imphal Bir Tikendrajit International airport mun a ahom a kholjin le trucker 237 ‘screened’ abol uvin ahi.

Mao gate a kon trucker le mi 162 gamsunga hunglut a, Jiribam langa kon 65 chule Imphal Bir Tikendrajit International airport a kon khat hunglut ahi. State Surveillance Officer, IDSP, Manipur in asei dungjuiya, ISBT (Truck), Khuman Lampak a agom a truck driver le handyman 423 screening akibol uvin, abon uva symptoms neilou ahi, ati.

Mi 90 hi tu le tua Government Qaurantine facility a um ahi’in, tuni a athah a mi 16 kikoi be kit ahi. Government quarantine facility a agom a mi 557 um a, hiche lakh a mi 467 hi aumna ding phat lhing ahitai. Home quarantine kibol mi 486 jong ‘quarantine period’ lhing ahitai. Monday nikho a VRDL laboratory, JNIMS a sample 5 test abol uva, abon a negative hi ahi.

Tuchan geiya sample 571 test kibol a, chule JNIMS le RIMS isolation ward a tu le tua hi koima umlou ahi. Gamsung lampi chomc hom a kon hunglut mi 199,918 lhing screened kibol ahitai.

Tehse pension sum lading ho nisa noiya kidin sah

Imphal, May 4(ET): Manipur gamsung green zone ahitoh lhon in lockdown aki lha-ong toh lhon in tuni chun SBI MG Avenue bank akihon masang in mi tamtah akigol uvin chule tehse tamtah jong pension sum lahdoh ding in nisa noiya akigol uvin ahi. Thuso mihon amu nauva chun social distancing jong ajui loudan uh amudoh uvin ahi.

Tengnoupal police in gamgi ven na nei jing

Tengnoupal, May 4(ET):  Tengnoupal district sung a um N. Satang, Chongkhong le  Waksu kho a um Border Pillars 83/84 sung a gamgi khana Tengnoupal district polic emakai na noi in ana kibol jing in ahi. Hiche gamgi pal get na chu Tengnoupal district Police  addl S.P.(ops) Th. Krishanatombi singh, O.Wangkhomba  3rd IRB  Deputy commandent teni makai na noi a an akibol ahi. Akom laha kho ho a jong covid-19 natna Myanmar lam akon hung ki pohlut nalouding in jong khomi ho kihou limpi na ana kinei in ahi.

Delhi le Mumbai a Covid-19 case atam hi mihon Lockdown guidelines phatah a ajuilou jeh ahi: Health Minister

New Delhi, May 4: Delhi le Mumbai kiti metro khopi hon lockdown guidelines phatah a ajui pouve, tin Union Health Minister Dr Harshvardhan in ngohna aneiyin, hiche jeh a hiche khopi hohin khopi dang toh tekah dinga natna a kon kivenna a ga anei thei louvu ahi, ati.

“Khopi a cheng hohin lockdown dan phatah a ajui lou ahi”, tin thuso miho henga aseiyin ahi. Khopi a natna nei itidan a tam gam, tia thudoh donbutna a asei ahi. “Thinglhang gam hojong phaicham a ho sanga mopohna neijo tah a chon u ahi’, tin aseibe in ahi.

Mumbai khopi a natna neihi India gam a akisei case lah a hop 20 val ahi’in, khopi (Mumbai) a natna nei mi 8,613 hia, natna jeh a mi 343 thi ahitai. Delhi khopi a Covid-19 positive case 4,549 lhing ahitan, Sunday nikho a bou case athah 427 kisei ahi. Khopi len len a cheng holah a hi gamdang a kon kholjin (international traveller) jong atam jeh a vangsetna ato u sang hidinga Minister pa in aseibe in ahi.

“Slum lentah aumin, hiche mun a social distancing le lockdown principle chepi ding hi hithei lou ahi”, ati. Thinglhang gam a dinmun apachatna thu aseiyin ahi. India gam a testing rate hi 694 nillion ahi’in, vannoi leiset a dinga anempen ahi. India gam a mihem million khat val test kibol ahitan, gamsunga natna hi gamdang a toh tekah dinga hatah a lhom ahi, tin Dr Harshvardhan in aseiyin ahi.

Sunday nikho a India gam a confirmed case 40,000 vel ahi’in, mihem million khat val test akibol jou ahi. Germany a 73,000, USA a 1.6 lakh chule Spain a lakh 2 toh tekah dinga lhom ahi. “Nikhat a mihem lakh khat test bol dinga tohgon um ahi. Symptoms nei jouse test bol ding ahi”, ati. Government data a hi adamlou mi 11,000 val damdoh ahitan, atamjo dam doh tina ahi, tin Minister pa in aseibe in ahi.

Adamlou 1 percent noilang hi ventilator a um ahi’in, 2 percent in oxygen supply angaichat chule 2-3 percent hi ICU a um ahi. Thina toh atam ding vettup ding hi Ministry in atup sangpen ahi. “Covid-19 hi natna gangtah a kilason to thei ahi’in, natna nei akipantil jouse mat a, test bol ding hi kadei ahi. Positive ahile hospital a chonlut ding ahi”, ati.

India gamsunga stage-3 transmission aum naipon, community transmission jong ahipoi, tin aseiyin ahi. World Health Organisation sei dungjuiya sorkar in gamsung hi ‘community transmission’ alhun nathei dinmun a kon ahuhdoh ahi. “India a natna hi kivetup ahi’in, natna neiho akilahna akikhol doh lou hi um behlou ahi. Stage 3 a gamsung alhun nathei dinmun a kon kihuhdoh ahi tihi avel a kasei kit ahi”, ati.

Covid-19 douna dinga kineppi umpen experimental anti-viral drug Remdesivir thu jong Minister pa in aseiyin, sorkar in level asangpen a hiche thu aseikhom ahi, ati. “ICMR le CSIR a scientist honjong hiche thu aseikhom ahi. WHO in dose 1,000 vel jong eipeh u ahi’in, hiche hi India gam a state phabep a adamlou ho chunga clinical trial’ bolna a kimang theiding ahi”, tin aseibe in ahi.

Kangpokpi in Lockdown 3.0 a dinga kigotna a DDMA meeting bol; Community quarantine centre hon ding deisah u

Kangpokpi, May 04(UNA): Lockdown 2.0 kichai jou Lockdown 3.0 kipat a District sunga hung kile ding gamdang a um mi tamtah ahi jeh a District Disaster Management Authority meeting Conference Hall, DC office, Kangpokpi a Monday nikhon abol uvin ahi.

Social Welfare and Cooperation Minister chule in-charge Minister (Kangpokpi le Senapati district), Nemcha Kipgen, Saikul MLA Yamthong Haokip jong Chairman, District Disaster Management Authority le Kangpokpi District Magistrate hi a Lalithambigai Kalidas, IAS lamkaina a kibol DDMA meeting a apang uvin ahi.

Lalramsang Infimate, MCS, ADM/Addl.DC Kangpokpi, Chief Medical Officer Kangpokpi, Dr. T. Nilakanta Singh, Addl. SP(Ops), Kangpokpi, Lalminlen Misao, MPS, AC to DC, Kangpokpi Kaigoulal Kipgen, MCS, Sub Divisional Officer jouse, Medical Officer ho, DSO Kangpokpi, chule MHA le KSO Sadar Hills official hojong meeting a apang uvin ahi.

Gamdang dang a tangden district miho hung kile ding thu, community quarantine centre, institutional quarantine centre semdoh ding thu phatah a aseikhom uvin ahi. SDO, Active Institutional Qaurantine Centre hon ‘expenditure detail’ apeh diuvin aseiyun chule SDO, Champhal, Kangpokpi, Saikul le Saitu-Gamphazol injong ama ama sub-division a Institutional Qaurantine Centre semdoh nadinga ‘expenditure’ apehlut diuvin hetsahna anei uvin ahi. Institutional Qaurantine Centre thah a dinga aphat cha angaicha jouse kigong ding, aganna thei pen a kimangcha ding ahi. Community Qaurantine Centre hi Home Qaurantine sanga phachom jo ding ahi, ti thu agelkhom uvin, ahithei chan a hiche hi semdoh ding chule sub-division (Kangpokpi district) 9 a SDO hon Community Qaurantine Centre sah dinga kigotna thu a ‘ground report’ ageipen a May 6 kah a Deputy Commissioner henga apehlut diuva thuhilna anei uvin ahi.

Home quarantine hi ahung kile ho chule insung mite ho dinga kivenna pha hilou ahi. Kangpokpi district a tangden a gamdang miho thu a KSO Sadar Hills President Thangminlen Kipgen in, nikho 2 sunga mi 200 val hi ama ama chenna mun a thah dinga aseiyin, mopohna nei authority henga angaicha phalna akilah jouteng ama ama MLA ho a kon akholjin nadiu sum lutna a kithopina kithum a, kithah ding ahi, ati.

Kangpokpi district hi sub division 9 um a, hiche lampanga alenpen ahi’in, gamdang a tangden jat aseichet loulaiyu ahi. Gamdang a tangden district miho list apehlut diuva SDO ho jouse henga aseiyu ahi. Nikho phabep masanga tengbang website a boina (technical error) aum thu jong asei uvin, Social Welfare and Cooperation Minister Nemcha Kipgen in apet pet a ‘data entry’ dinga nikho athumbe in, ni-ni phat peh dinga aseilha uvin ahi.

Kangpokpi district a gamdanga tangden ho list hi tengbang.in a update kibol loulai ahi, hiche jeh a list lahkhom nadinga Common Service Centre (CSC) thum mopohna kipe a, amaho hin form khat a dangka 15 a form ahop diu chule ni 2 sunga tohgon ajou tei nading uva pan alah diu ahi. Mun ong laiya truck driver le handymen ho screening bol a doctor ho kivenna dinga lhahsamna aum CMO Kangpokpi le i/c Medical Superintendent, District Hospital Kangpokpi in aseiyin, Brig. M Thomas Ground a driver le handymen ho screen kibol nading ‘screening booth’ atuhdoh diuvin tmna anei uvin ahi.

Aumsa ambulance ho semphat dinga Kangpokpi CMO in asei thu jong gelkhomna anei uvin, minister Nemcha Kipgen in kithopina nei dinga kitepna aneiyin ahi. PHED tanker driver aumlou thu Minister nu in aseina’a, driver post khat thum ding, aganna thei pen a bol dinga aseiyin ahi. Meeting a doctor ho dinga angaicha thao, PPE le adang dang chuel Covid-19 toh kisai thu hojong aseikhom uvin, hiche hohi ama ama mopohna MLA hon avettup dinga seilhahna aneibe uvin ahi.

MLA le Minister hon ama ama constituency- Kangpokpi Block- Kangpokpi, Champhai le T Waichong sub-division, Saitu Block- Saitu-Gamphazol, Kangchup-Geljang le Bungte Chiru sub-division le Saikul Block a Saikul, Lhungtin le Island sub division a lou-le-ai, Covid-19 toh kisai angaicha ho a tosotna peh dinga asei uvin chule ama ama assembly constituency a kile ding gamdang a tangden ho thu MLA hon avettup ding uva aseibe uvin ahi.

FCI Ningthoupham a che truck ho chule thil kipohna truck dang dang Brig. M Thomas Ground Kangpokpi a kinga a driver le handymen ho ration (neh) ding SDO Kangpokpi in avettup dinga kilolna anei uvin ahi. District Police hon kihoumatna aneiya, truck ho ahunglhun masanga doctor ho hetsahna anei diuvin aseibe uvin ahi.

Manipur Bhawan, Guwahati a tangden ho umman le nehman ho Dk. 14,73,040 pha

Imphal, May 4 (UNA): Manipur Bhawan, Guwahati a tangden mi 84 ho Imphal khopisung puilut ahi nauva gari touman Dk. 3000 charge kibol jeh a sei boi tampi aum jing toh lhon in tuni chun Manpur Bhawan, Guwahati in atangden ho umsung a sum kisumang ho (Bill) chu Principal Secretary (GAD) GoM athot in agom a Dk. 14,73,040 aphan ahi.

Bill dungjui chun Mi 84 ni 37 aum sung a umman (lodging) Dk. 10,72,120 apha in chule nehman Dk. 3,67,920 apha in tui man Dk. 20,000 ahi in chule thil dang dang man dk. 13,000 ahi in abon a kigom in Dk. 14,73,040 apha in ahi.

Gampam a tangden gamsungmi ho puidohna ding a govt. in pan lajing

Imphal, May 4(ET): Covid-19 natna jeh a muntin gamtin aboi jing toh lhon in India gamsung ajong tuni nilhah 3:30 chan chun aveikha mi 42,533 aphatan chule thina toh 1375 jong aphatan ahi. India gamsung ah health worker ho hapan jeh in tuhin green zone jong atam chehcheh tan Manipur gamsung ajong avei 2 aum in hinlah tuhin akijendam tauvin Manipur jong covid-19 free ahitauvin ahi. Tuhin gamsung ah lockdown chelha jongleh green zone ho a themkha lha ong ahi toh lhon in Manipur govt. in state dang a tangden ho puilut nading in pan ala uvin, Manipur Bhawan Guwahati a tangden mi 84 hojong Imphal khopi sung puilhung ahitauvin ahi.

Churachandpur district administration leh agamsung constituency a MLA ho toh mundang akon hunglhung ding ho umna ding quarantine centre munding ho aseikhom uvin ahi. Chief Minister in social media a video khat atahdoh na achun state dang a tangden inlang kinungle nom ho puidoh theina ding lampi govt. in angaito jing ahithu atahdoh in ahi.

Lockdown sung’a Tution fee peh loudinga MCPCR in sei

Imphal, May 4(ET): Manipur Commission for Protection of Child Rights a Chairperson in thuso abolna achun Manipur gamsung a Private school hon lockdown sung a tution fee simlai ho akon alahlou ding in thuso abol in chule bus/van tolhon jong fee alahlou diuvin thuso abol in ahi. Chule minu mipa honjong boilaitah achapang ho gentheina ding a nupa kikhen ho bollou va chule school ahiloule themjilna mun chom chom a umho chule bus/van tolhon chapang kum 18 apat noilang ho jumso louva hiche fee chungthu a engbol louding in jong asei in ahi.