Sorkar in ‘Bodo Peace Accord’ soi kai ta; Bodoland tua kon Bodoland...

Sorkar in ‘Bodo Peace Accord’ soi kai ta; Bodoland tua kon Bodoland Territorial Region (BTR) tia kihe tading, Centre in Dk. cr 1500 Package phongdoh

107
0
SHARE

Sorkar in ‘Bodo Peace Accord’ soi kai ta; Bodoland tua kon Bodoland Territorial Region (BTR) tia kihe tading, Centre in Dk. cr 1500 Package phongdoh

New Delhi, Jan 27: Sorkar in Monday nikhon Assam gam a gin umtah thingnoi kiloikhomna – National Democratic Front of Boroland (NDFB) toh kinoptona soi akai tauvin, Northeast a chamna kisemna amachal cheh na ahiding tahsan ahi.

Bodo Accord athumvei channa ahi’in, hiche masang 1993 leh 2003 kum a jong kinoptona soi akaiyu ahi. Bodoland hi tua kon Bodoland Territorial Region (BTR) tia kiminsah ding chule administrative power kipeh be ding ahi. Bodoland a chamna aumna dinga kisem Agreement a hi organization 9 in nopna anei ahi.

Center in kum thum sunga dinga Bodoland Territorial Autonomous District (BTAD) a dinga dangka crore 1500 package phondohna anei uvin ahi. Union Home Minister Amit Shah leh Assam Chief Minister Sarbananda Sonowal jong Centre in ‘traipartite agreement’ soi akaina a apang uvin, kihouna a ‘Ban’ kibol organization faction thalheng hojong pang ahi.

“Tunin Centre, Assam sorkar chule Bodo thalheng hon kinoptona thupi tah a soi akaiyu ahitai. Hiche hi Assam chule Bodo mite dinga khonung phatah akisemdoh nading ahi”, tin Amit Shah in aseiyin chule Agreement a hi Bodo pao leh ham chule chon leh khan ho venbit ding tilou political leh economic demand bulhit na jong hiding ahi, ati.

BTAD hi tua kon Bodoland Territorial Region (BTR) kiti ding ahitai. DTR a dinga DIG thah peh dinga Shah in thuphon jong aneiyin chule NDFB thingnoimi ho January nisim 30 teng ‘surrender’ kibol diu ahitai, tin hetsahna jong aneiyin ahi. Bodo pao hi tua kon Assam gam a Devanagari script associate official language hiding ahitai.

Pact a hi tribal ho political leh economic bonanza kipe ahi. Assam Minister Himanta Biswa Sarma in kinoptona a hi Bodo society a stakeholder jousen soi akai ahi, tin aseiyin ahi. January nisim 30 nikho teng leh thingnoimi 1,550 in galmanchah 130 toh sorkar khut a kipehdohna aneidiu ahi, tin Union Home Minister Amit Shah in aseiyin chule aphat kipe sunga kitepna jouse bulhit dinga Shah in kitepna aneibe in ahi.

Assam gam a Bodo thingnoi natoh aganna thei pen a suhlhap ahina dinga Accord akijo vah ding Home Minister in adeisah ahi’in, Assam gam a Bodo chenna gamkaiya chamna det aumding agelkhoh ahi, tin official hon asei uvin ahi. “Accord thah hin nam dang ahilouleh hou dang ho kipana atohkhah louding ahi. Bodo organization boina tamtah um ahi’in, hiche ho akisuhlhap jouleh a Bodo hon Bodoland gam tum athum ahi. Tua hi Assam state noiya sorkar in thumna ho sanpeh dinga nopna anei ahitai”, tin Rajya Sabha MP Biswajit Daimary in aseiyin ahi.

“Bodo Accord hi Assam gam kivenbitna chule Bodoland a chamna leh machalna chule kinepna thah kisemna ahi”, tin Assam Minister Himanta Biswa Sarma in aseiyin ahi. Achesa kum 27 sunga BOdo Accord soi kaina aneiyu athumvei channa ahitai. Amasapen a Bodo Accord hi All Bodo Students Union (ABSU) toh 1993 kum a soi akaiyu ahi’in, hiche a hi Bodoland Autonomous Council kisemdoh a, ahivanga political power hi lhomcha bou kipe ahi.

2003 kum a anivei channa a sorkar in Bodo Liberation Tigers (BLT) thingnoi hotoh Bodo Accord anivei channa soi akai uva, hiche a hi Assam gamsung district li- Kokrajhar, Chirang, Baska leh Udalguri a Bodoland Territorial Council (BTC) kisemdoh ahi’in, hiche hi Bodoland Territorial Area District (BTAD) tia kikou ahi.

BTC hin education, forest, horticulture kiti subject 30 val a thu anei ahi’in, ahivanga police, revenue leh general administration department ho a tha aneilou, hiche hohi Assam sorkar vaipohna noi hi ahi. NTC hi Indian Constitution 6th Schedule noiya kisemdoh ahi.

Achesa kum somnga val Bodo hon gamtum athum u ahitan, Bodo overground leh thingnoi kiloikhomna phabep in athu apohdoh’a, kiphinna sangtah um’a, chule tamtah injong thina ato ahi. Alangkhat a Bodo stakeholder chom chom ho toh Centre in Peace Accord soi kaiding agot douna a non-Bodo organization chom chom in Assam gam a nidan 12 bandh akou uvin ahi.

Bodo ho ST (Hills) chanvou kipeh Karbi, Dimasa simlai hon  doudal; Garo autonomous council ngehna a nidan 48 Assam bandh kikou

Guwahati, Jan 27: Centre in Bodo ho ST (Hills) chanvou pehding a ateppih Assam Hills Area simlai kiloikhom Karbi Students’ Association (KSA) le Dimasa Students’ Union (DSU) in nasatah a doudal ding a aphondoh tolhon in ama hon Bodo ho kidou ahipon, Bodo Accord kisemdoh hi kipa umtah ahi in hijongle nam khat chanvou pehding in nam dang atohkhah lou angai e tin asei un ahi.

Karbi Students’ Asociation (KSA) President Simeon Rongphar in hiche chung chang in state le central government lekha akipe jing in, ipi ati le ST (Plain) chanvou chang Bodo ho chu ST (Hills) chanvou kipe thei ham, namkhat chanvou 2 ipi iti kipeh thei ham tin dohna jong anei uve.

Aman asei be na ah Bodo hohi Karbi Anglong gammi ahi pouvin 1940 a hung lut bep ahiuvin ama ho chanvou kipeh ding hin Karbi ho dinmjn asuhset joh ding, hitolhon a Karbi Anglong Autonomous Council (KAAC) executive member hon hiche thu toh kimat a ‘No Objection’ certificate apehlou angai e, ati. Chule hiche banjom chjn Assam Garo ho ding autonomous council ngehna a Januaru 28 jingkah nidan 5 a pat nidan 48 sung Assam bandh United Garo Autonomous Council Movement Committee (UGACMC) hon kou ding in aphongdoh tan ahi.

Geldoh ding chu NDFB, ABSU le united Bodo group hon kinoptona asemni ma a UGACMC autonomous council chombeh a semdoh ding ngehna chu aphondoh pai ahi. Chule United Garo Autonomous Council Movement Committee (UGACMC) in satellite basis a autonomous council chombeh Garo a dia semdoh ding hi 2003 a pat ngehna kineipan ahitai, ati.

UGACMC general secretary Thengsil Sangma le chairman Alex K Sangma in Assam a  Garo hohi achesa 1972 a pat government um jousen ana chombol pan ahitai, ati.

UGACMC in Sixth Schedule noi a Rabha Hasong Autonomous Council (RHAC) toh kibang a Garo Autonomous Council semdoh ding a ngehna anei u ahi.

UGACMC in ihamtia government in nidan 96 sung kiphinna jonh akhohsah dehlou le nop le da kibang a phag tep bei Assam gamsung economic blockade chelhahpi ding in government gihna anei pai uve.

Centre in kipaman leh gotna peh akop hin kihouna amachal sah louding ahi: NSCN-IM

Imphal, Jan 27(ET): Peace Talk a thulhuhna akinei kon a NSCN-IM thingnoi hon India sorkar demna sangtah anei uvin, ‘carrot and stick policy’ (gotna leh kipaman pehna) tohgon abol uve, tin ngohna anei uvin, hiche jeh a thil umdan hi ceasefire kisem masang dinmun soh kit thei ahi, tin gihna anei uvin ahi.

India sorkar in NSCN toh kihouna chelha hi dihtah a atuh a aphatna dinga pan alah loule dinmun khohse ding ahi, ati. Ministry of Information and Publicity, NSCN-IM in thuso anei dungjuiya, tu naicha Centre intelligence agency ho, adeh a NIA ho chaloh hin Naga chule NSCN-IM ho lungthim na tahsan lhahsamna asem ahi, ati. ‘Political solution’ kisemna a India sorkar kitahna hi tahsan lelna kaneiyu ahi, ajeh chu gotna leh kipaman peh akot ahi’in, Center in akitepna ho jana apeh teng lebou kihouna machal theiding ahi, ati.

Kum somni val hemkham kinoptona akisem chule kihouna (political dialogue) aum sunga India sorkar, sepai holeh intelligence agency adeh a National Investigation Agency (NIA) hon Ceasefire Ground Rules avel vel a apalkeh u ahi, tin thuso chun ngohna aneiyin ahi. Thingnoi dou ding a NIA ho tha kipehbe ahi’in, NIA hon thilse bol ho ahuh uva, NSCN-IM member ho ngohna asem khum u ahi’in, tu naicha Alemla Jamir, cabinet Kilonser jong ‘terror funding’ a angoh u ahi, ati.

Ngohna kisem hohi kum somni val NSCN-IM toh sorkar in kihouna asem ahitoh kilhon a lungdon umtah ahi, tin aseiyun chule tu kitahsan to louva um sanga ‘political dialogue’ huhna dinga pan lahding ahi, ati. Chule India sorkar in kihouna hi akhohsah a chule dihtah a pan alah louleh tuh joulou boina sohding ahi, ati.

India sorkar in achesa November 18, 2002 kum a Milan, Italy gam a Memorandum of Understanding (MoU) soi ahai ho ageldoh kit phat ahi, tin thuso chun aseiyin ahi. MoU dungjuiya Unlawful Activities (Prevention) Act noiya NSCN-IM ‘ban’ kibol lahdoh dinga kinoptona um ahi’in chule NSCN-IM toh kihouna amachal jing toh  kilhon a aphat dungjuiya Rules, Regulations leh Act adang dang ho velvet dinga jong kihetthem to na asem u ahi.

NSCN-IM lamkai ho India Prime Minister in kouna apeh dungjuiya December, 2002 kum a Delhi a che a, ‘peace dialogue’ machal pi dinga nopna aneiyu ahi, tin jong achesa phat umdan ho asei uvin ahi. “Kum sottah jouva India sorkar in Indo-Naga thu hi ‘political’ ahi ti hetpehna anei ahi. India policy akikhel akimu jouva bou NSCN-IM in India sorkar toh 1997 kum a ‘political dialogue’ sem dinga nopna anei ahi”, ati.

Political dialogue aumkal kum somni aval tan, 2002 kum a Naga ho thusim leh dinmun achombeh ahina (unique history) hetpehna aum’a chule August 3, 2015 kum a Framework Agreement (FA) soi kaina aumtoh kilhon a aphatna lang a kalson be na um ahi. Framework Agremeent a hi Naga ho thaneina (sovereign rights) hetpehna kinei ahi.

Alangkhat a NSCN-IM hon ‘hemkham’ ngah dinga kigotna anei uve, ti vetsahna jong um ahi. Hangshi Ramson Tangkhul lamkaina a NSCN-IM 400 vel Somra Tracts, Myanmar a camp a aum uve, ti thulhut um ahi.

Gamsung mun chom chom a 71st Republic Day loupitah a kimang

Imphal, Jan 26 (ET): India pumpi in Sunday nikhon 71 channa Republic Day amang’in, gamsung injong Kangla Fort mun a Governor Dr. Najma Heptulla chief guest hina a Republic Day amang in ahi.

Governor in India flag akhaidoh in, ‘guard of honour’ vetlhahna aneiyin kin apan uvin, hiche jouva uniform service, school, college, band platoon panna a march past contingent chom chom 118 a kon ‘salute’ asang in ahi. Cultural troupe 17 chule government department chom chom a kon tableaux 16 jong apang in ahi.

Kin gon a Governor in Jemadar Md. Ghiyasuddin, 7th IRB President’s Police Medal for Distinguished Service award pehdohna aneiyin ahi. Alangkhat a Police Medal for Meritorious Service award Dy. CO, 1st MR Suresh Thapa, S Sarat Chandra Singh, 3rd IRB, ASI, MPTO Devishore, Head Constable K Brojen Singh, Imphal West District, Head Constable Khualthianthang Vaiphei, Churachandpur district leh Havildar Bhomen Sharma, 7th IRB in amu uvin ahi.

Governor nu in Union Home Minister’s Medal for Excellence in Police Training jong pehdohna aneiyin, Subedar Kh Naba Singh, Havildar Y Guneshore Singh leh Havildar D Mathew Maring chule Rifleman Y Sundar Singh, Manipur Police Training College in kipaman akisan uvin ahi.

1st Bn MR Ground mun a Chief Minister N Biren Singh in kipathu aseina a sorkar in thinglhang leh phaicham abon a akhantou nading, chamna leh lungmonna chule kipunkhomna aumding akhohsah ahi, tin aseiyin ahi. Republic Day ni a nam jousen pan alah uhin nam chom chom hokah a kiloikhomna aum avetsah ahi, tin aseiyin chule BJP lamkaina state sorkar in mijouse chan kibang pehding hi agelkhoh ahi, ati.

Hiche bidoi neiya Go to Hills leh Go to Village mission kipan ahi, tin CM in aseiyin chule thinglhang gam lhatah tah a jong sorkar tohgon ho kichepi ahi, ati. Kin hon a Chief Minister N Biren Singh, Cabinet Minister ho, MP ho, MLA ho chule civil leh police official luboh, sorkar natong leh mipi tamtah in pan ala uvin ahi.

Churachandpur: Churachandpur district a jong Churachandpur Deputy Commissioner Pawan Yadav in India ponlap akhaidoh in, Lalrinum Pulamte, MPS, AC 1st IRB Churachandpur lamkaina a Parade Contingent 29 a kon salute asang in, Republic Day kin amang uvin ahi. Parade a Civil police, BSF, Ex-servicemen, VDF, NCC unit chom chom a kon cadet ho, school simlai chule 1st IRB Band Party hon pan ala uvin, Lamka Public Ground a kin amang uvin ahi.

Cultural troup chom chom in pan ala uvin chule Kayakalp Award pehdohna jong anei uvin ahi. Deputy Commissioner Pawan in achesa kum khat sunga Swachh Bharat Mission noiya Churachandpur hi ODF (Open Defecation Free) ahi tia August nisim 11, 2018 kum a phondohna um ahitai, tin aseiyin chule MGNREGA noiya block nga hi e-fms block tia kikhel ahi, ati.

Health sector lampang a PMSPMA service hi State leh District in kitho a PHC Sagang mun a kum masa July lha a agon a chule District Non-Communicable Dieseases Cell in ‘Population based screening camp’ agon ahi, tin achesa phat ho a natoh chelha ho aseiyin ahi.

District Hospital Churachandpur in Health Kayakalp Award asang in, PHC Behiang in Best PHC, HWC Pearsonmun in Best Health & Wellness Centre Award chule Suangdoh HWC Sub-centre in Commendation Award asan na chunga akipapina thu aseiyin ahi.

Beti Bachao Beti Padhao (BBBP) noiya District in numei chapang ho gelkhoh nadinga campaign chom chom abol a chule achesa September nisim 16, 2019 nikho a mipi lah, natohna mun ahilouleh inmun a khansetna toh numei ho kithopi nadinga One Stop Centre hondohna um ahi, tin DC in aseibe in ahi. Education Sector lampang’a, Indian Constitution 86th Amendment dungjuiya chapang kum 6 leh 14 kikah ho uniform, textbook leh themjilna man beiya SSA noiya government school jouse a peh dinga kisei ahi, ati.

Saikot sub-division noi Moulbem kho a kon kum 10 pasal chapang Lalkansung in pukhri a lhalut numei thum ahuhdoh jeh a tu naicha National Bravery Award asan akipapina thu jong aseiyin ahi. District sunga ‘law and order’ vetup a police ho apachatna thu aseiyin ahi.

Thoubal: Thoubal district a jong 71st Republic Day 2020 loupitah a amang uvin, Thoubal Deputy Commissioner N Bandana Devi in National Flag akhaidoh in, civil police, school simlai, NCC unit chom chom a kon cadet ho, NYK, cultural troupe hon salute ape uvin, Chaoyaima Hr. Sec. School, Thoubal mun a kin aman nauva Thuobal Municipal Council in Swachh Bharat Mission Tableau avetsah uvin ahi.

Department chom chom a kitah tah a natong ho DC Commendation Certificate pehdohna jong anei uvin ahi. NH-102 kehlet nadinga 27.5km lah a km 15 lhing gam kila ahi’in, chule September lha a National Nutrition Month kimang’a, hiche jouva Mahatma Gandhi pen kum 150 lhin toh kitoh a lolhingtah a Swachhta Hi Seva kimang a, khatvei man a kipai plastic thil ho man ding kikhah ahi, ati.

DC Office a One Stop Centre kihongdoh a chule Axis leh Punjab & Sind Bank jong kihongdoh ahitan, Khongjom munvel a ATM booth adang khat kitungdoh vahding ahi, ati. ILP kichepi January nisim 1 nikho a kon ILP permit 350 val akipetai, ati. National Social Assistance Programme (ASAP) noiya beneficiary 7126 (IGNOAP, IGNWPS, NFBS leh Annapurna), MOAPS beneficiary 5191 chule CMST beneficiary 612 aum’e, ati.

Thoubal district a um local media a natong ho leh news hawker ho panna a CMHT beneficiary 89425 alhing’e, tin aseiyin chule District Hospital, Thoubal mun a Dialysis Unit kihongdoh ahitan, damlou hon aman pan vahdiu ahi, ati. Hospital a Viral Hepatitis Unit jong kihongdoh ahitan chule District Hospital a Emergency and Trauma Centre jong hondohna umvah ding ahi, tin aseibe in ahi.

Tamenglong: Tamenglong district a jong 71st Republic Day amang uvin, Zadonang Park a kon Republic Day aman nau mun chan 5th MR platoon, Manipur Civil police, VDF, NCC, school leh college simlai, scout leh guide ho panna a contingent 27 in March past abol uvin ahi. March past a Joshia Pamei, MPS, SDPO, Tamenglong parade commande a apang in ahi.

Tamenglong district hi gammang atamna pen ahi’in, vadung, gammang chule gam le go huhna dinga pan ilahkhom diu ahi, tin aseiyin ahi. Achesa kum ni sunga gammang hi kem tul tul ahi’in, aventup ding hi eiho mopohna ahi, tin DC Armstrong Pame in aseiyin ahi. Tamenglong hi Manipur a dinga district thengpen a phondoh ahithei nadinga kho haosa upa, chairman chule sorkar department thengtah a aum diuvin temna jong anei uvin ahi. Tamenglong district a department chom chom 37 Merit of Certificate pehdohna jong anei uvin ahi.

Bishnupur: Bishnupur district injong Old Mini-Secretariat Ground mun a 71st Republic Day amang uvin, district Deputy Commissioner Neta Arambam in India ponlap akhaidoh in, Ksh Shivakanta Singh, ASP lamkaina a parade contingent 18 salute ala in, kijotna a civil police, VDF, Home Guard, Anganwadi Worker, ASHA, Joganti Society, NCC unit leh school simlai ho apang uvin ahi.

Chandel: Chandel district injong Maha Union Hr. Sec. School lentol a 71st Republic Day amang uvin, Chandel DC Krishna Kumar chief guest hina a kin amang uvin ahi. Sorkar in gamsung khantouna dinga pan chom chom alah ahi’in chule Chandel hi ‘Aspirational District’ khat a kilheng ahi’in, khantou machalna district sunga akikhohsah nading ahi, ati.

Government scheme leh program jouse district sunga dihtah leh thengtah a chepi dinga District Administration thalheng a DC in kitepna aneiyin ahi. District police, VDF, Ex-servicemen, Anganwadi worker leh school chom chom panna a March past contingent 24 in pan ala in chule agom a cultural troupe 8 apang uvin ahi. Oinam Sukuman, MPS, SDPO, Chandel parade command hina a March past chelha ahi.

China gam a coronavirus case 2,744 photchen hi, mi 81 in thina toh ta

Beijing [China], Jan 26 (Sputnik/ANI): China gam a coronavirus case photchenna um hi 2744 alhingtan chule hiche natna jeh a thi mi 81 alhingtai, tin China thuson aseiyin ahi.

South China Morning Post dungjuiya natna jeh a thi hi Sunday jingkah chan a 55 lhing ahi. Sunday nikho a athi mi 54 ahitai, tia asei kit u ahi. China health authority hon coronavirus (2019-nCoV) a kon pneumonia jeh a damlou case 2744 photchen ahitan, hiche lah a mi 324 hi anatna sang a chule Monday ni chan a mi 81 thi ahitai, ati.

Alangkhat a China National Health Commission in Monday nikho a China gam a natna nei 2744 ahi’e, tia asei ahi. Beijing khopi a um Indian embassy in China gam a um India gammi ho tahsa damtheina vetlhahna anei jing’e, tin External Affairs Minister S Jaishankar in aseiyin ahi.

Natna hi Wuhan khopi, China gama  December lha a kipan ahi’in, hiche a kon vannoi mun dang dang a chal ahi. Pneumonia tobang symptoms soh ahi. Kivenna dinga China in ‘travel restriction’ akoiya khopi chom chom a mihem 56 million val kimanchah atohkhah ahi. China gam a Lunar New Year ahitoh kilhon a kholjin atam jeh a natna hi hatah a kal dinga kichatna aneijeh u ahi.

Australia, France, United States leh China tilou Asia gam sagi a jong natna akisei toh kilhon a Health authority hon kivenna sangtah alah ahi. Ahin, World Health Organisation (WHO) in natna hi China gam a bou ‘khoh’ (emergency) ahi, tin asei uvin ahi. Indian Embassy injong China a kon India gam a kholjin ding ho thuhilna khoutah apeh ahi.

Mary Kom in Padma Vidhushan award sang

IMPHAL | Jan 25(ET): Gamsung mi Olympic Boxing champion MC Mary Kom in 71st Republic Day kin kiman masanga Padma Vibhushan Award asan hi gamsunga dinga kipana sangtah ahi.

Padma Vibhushan hi India gam a Bharat Ratna bantah a second-highet civilian award ahi. Mary Kom panna a Arun jaitley, Sushma Swaraj leh George Fernandes in January nisim 25 nikho a Padma Vibhushan Award amu u ahi.

Mary Kom hi gup vei Worl Amateur Boxing champion hi a numei masapen ahi’in, World Championship sagi a medal mu a numei boxer amabou ahi’in chule World Championship medal get vei sanga boxer (numei hileh pasal hile) amabou hi nalai ahi.

Magnificent Mary tia kiminvo Mary Kom hi 2012 Summer Olympics a qualify hi a India boxer numei amabou ahi’in, flyweight (51 kg) category a pang a bronze medal asana hi. AIBA World Women’s Ranking Light Flyweight category a No 1 a um ahi’in, Asian Games, 2014, Incheon, South Korea a Gold medal sang Indian boxer masapen hi ahi. Chule 2018 Commonwealth Games a gold medal mu a India boxer numei masapen jong hi ahi.

Asian Amateur Boxing Champion a nga vei (record) pang boxer amabou ahi. Tukum President in Padma Awards 141 peh dinga phatsahna anei ahi’in, hiche lah a hi duo case 4 (award khat a akisim na) pang ahi. Padma Vibhushan 7, Padma Bhushan 16 leh Padma Shri Awards 118 kipe ahi. Award sang holah a 34 hi numei ahi’in chule 18 hi Foreigners/NRI/PIO/OCI category a hi’a chule 12 hi Posthumous Awardee (thi nunga kipe) hi ahi.

Nagaland CM anahi leh Odisha Governor anahi SC Jamir injong Public Affairs field a Padma Bhushan award amu in ahi.