Sorkar in April 14 jouva jong lockdown susao be maithei; Saturday nikho...

Sorkar in April 14 jouva jong lockdown susao be maithei; Saturday nikho leh thulhuhna um ding

106
0
SHARE

Sorkar in April 14 jouva jong lockdown susao be maithei; Saturday nikho leh thulhuhna um ding

New Delhi, Apr 8: Prime Minister Narendra Modi in Wednesday nikho a coronavirus natna gam a hinkho huhdoh ding hi akigel khoh pen ahi, tin aseiyin, lockdown phat kisuhsaobe maithei ahi. PMO thuson aseina a, Prime Minister in Covid-19 jeh a gamsung in sum dinmun a hahsatna ato thu aseiyin, sorkar in galjo nadinga pan sangtah alah ahi, ati.

Prime Minister in Wednesday nikho a Parliamentary floor leader hotoh video conference abol nauva aseiyu ahi’in, atamjo in lockdown ‘extend’ bol ding aphatsah ahi. Dinmun hi ‘social emergency’ tobang ahi ti PM Modi in ahetpehna thu aseiyin, thulhuhna khoutah gamsung in achepi angaiyin chule chingthei tah a pan alah angaiye, ati. State government tamtah, district administration chule expert hon lockdown phat suhsao be dinga temna aneiyu ahi”, tin PMO thuso chun aseiyin ahi.

BJD Pinake Misra in tu masanga jong ‘lockdown tu dinmun a lahdoh ding hahsa ding ahi tia PM Modi in anaseiye’, ati. Lockdown phat kichai nithum masang, April 11 teng hiche thu a thulhuhna anei diu ahi. Tu dinmun hi mihem tongkha a thilsoh sangtah ahi, tin Modi in aseiyin chule state jousen Centre toh pan alahkhom nau akipapi na thu jong aseiyin ahi.

India gam hi natna vekol jouva gam lhomcha lah a apang e, tin PM in aseibe in ahi. Chule dinmun akikhel jing jeh a aphat tin a kichih thei ngai ahi, ati.

Sorkar in coronavirus nat douna dinga April 14 kalval a jong lockdown achepi jom maithei ahi, tin Wednesday nikhon Congress in Prime Minister Narendra Modi toh all-party meeting anei jou uva asei uvin ahi.

Rajya Sabha a Opposition lamkai Nabi Azad in, COVID-19 nat douna dinga ‘lockdown’ suhsaobe nadinga Prime Minister in ngehna tamtah amu ahi, tin aseiyin, hijong le state chom chom a Chief Minister hole expert hotoh kihoukhomna anei jouteng lebou thulhuhna umding ahi, ati. Prime Minister pa toh video-conferencing a kihouna a pang politicalparty chom hop 80 in lockdown phat suhsao be dinga adeisah nau thu aseiyu ahi.

 “Sorkar in lockdown asuhsao be maithei ahi”, tin Lok Sabha a Congress lamkai Ranjan Chowdhury in thuso miho henga aseiyin ahi. Farming sector a boina ho thu a party in lunggel asei ahi, ati. “Political party jousen politics chunga gamsung khohsahna anei uva, pan alah jeh uvin Prime minister in kipathu aseiye”, tin Azad in aseiyin ahi.

Lamkai chom chom hon ngaidan aneiho chepi nadinga pan lah dinga Modi in meeting a asei ahi. “Lockdown suhsao be nadinga ngehna tamtah Prime Minister in amu ahi’in, hijong le Chief Minister le expert hotoh kihouna anei masat a thulhuhna aneiding ahi”, ati. Union Minister le state chom chom a Chief Minister hon task force asemdoh diuva Azad in PM Modi henga ngaidan asei ahi.

Chule sorkar kithopi dinga multi-party working group semdoh dinga jong ngaidan asei ahi. Covid-19 in atohkhah, natna akhohset na gam ho a ‘special financial package’ peh dinga Congress in kouna anei ahi. Chule ni 21 lockdown sunga loubol miho lha ong dinga Chowdhury in aseiyin chule har (fertilizer) a kai jouse lahdoh dinga thumna jong anei uvin ahi.

MGNREGA a enrolled kibol ho lou lho na a khohsahna peh dinga Chowdhury in aseiyin ahi. Prime Minister toh kihouna a Congress thalheng a Azad le Chowdhury pang ahi.

COVID-19 Lockdown suhsaobe ding thu’a Saturday teng PM in state Chief Minister hotoh kihouna neiding

New Delhi, Apr 8: Prime Minister Narendra Modi in April nisim 11 teng le state jouse a Chief Minister hotoh ‘lockdown’ thu panna a coronavirus natna thu toh kisai ho aseikhom diu ahi, tin Wednesday nikho thulhut in aseiyin ahi.

Hiche hi Prime Minister in ‘lockdown’ sunga Chief Minister hotoh kihouna anei anivei channa ahitai. Kal masa a jong coronavirus thu toh kisaiya Chief Minister hotoh kihouna ananei ahi. State sorkar chule expert hon March nisim 25 nikho a kichepi pan nikho 21 ‘lockdown’ kikoi hi aphat asuhsao be ding uva centre sorkar henga ngehna aneiyu ahi.

Centre in state chule expert hon lockdown suhsaobe dinga ngehna anei agel peh ahi. Video link a kon PM Modi le CM ho akihouna anivei channa ahitai. Political party chom chom hotoh akihouna a Modi in dinmun hi ‘social emergency’ tobang ahijeh a thulhuhna khoutah lah ngai ahi, tia asei ahi. District administration chule expert hon natna vetkol nadinga lockdown phat suhsao be ding thu a ngaidan alahkhom ding ahi.

Achesa April 2 nikho a Chief Minister hotoh kihouna aneina a Modi in lockdown lahdoh ding alungkham na thu anasei ahi. March 24 ni a lockdown akiphon masanga Prime Minister in achesa March 20 nikho a natna vetkol nadinga Chief Minister hotoh kihoukhomna ananei ahi.

CM in Covid-19 jeh a ‘lockdown’ phat suhsao be ding tosotna nei, gamsung in kigotna anei ahi, tia sei

Imphal, Apr 8(ET): Chief Minister N Biren Singh in Covid jeh a lockdown kikoi aphat suhsao be dinga aseiyin, Prime Minister in hiche chungchang a pan alah dinga temna aneiyin ahi.

Republic TV Editor Niranjan Narayanaswamy toh Wednesday nikho a CM Biren akihoulim lhon na a CM in gamsung (Manipur) a tuchan geiya case ni bou aumin, virus phatah a vetkol nadinga ni phabep ‘lockdown’ suhsaobe angaiye, tia asei ahi. Gamsunga positive case nil ah a khat hi kijen dam a chule khat hi isolation a kikoi ahi.

State sorkar in pandemic douna dinga pan alah ho CM Biren in aseiyin, Centre panlahna jal a PPE le sanitizer lenna huikong a kon ahung kipolut jing e, tin akipana thu aseiyin ahi. Gamsung mun chom chom a ‘lockdown’ jeh a tangden a mi tamtah aumin, amaho nungpui nading a sorkar in kihouna aneiya chule civil aviation ministry henga ngehna anei ahi, ati.

Gamsunga highway jouse kikhah ahitai, tina seiyin chule lockdown hi ni 15-20 suhsaobe ding a aseiyin, gamsung in kigotna anei ahi, ati. Coronavirus jeh a gamsung a thi mi 149 lhing a chule Wednesday nikho chan a natna neiya mi 5,194 lhing ahitai, tia Union Health Ministry in asei ahi.

Covid-19 active case hi 4,643 ahi’in, chule mi 401 val kijen dam a, hospital a kon discharge kibol ahitai. Case kisei holah a gamdang mi 70 pang ahi, tin Ministry in aseibe in ahi.

RIMS hospital a ventilator 10 kikoi be; CM le team ho panlah na jal a COVID-19 map a kon Manipur gam kiladoh maithei

Imphal, April 8(ET): China gam a kon Mandalay, Myanmar langa gamsung hung kile a Singhat, Churachandpur district a cheng kum 23 a upa numei nu Coronavirus test abol nauva ‘negative’ ahitan, gamsung dinga natna akhoh laitah a kipana thu ahi.

Numeinu hi April nisim 5 ni a gamsung hung kile ahi’in, test negative hijong le ni 14 ‘quarantined’ kibol ding ahi, tin RIMS thulhut in aseiyin ahi.  Covid-19 positive masapen nu jong ‘negative’ hi ahitan, tua hi gamsunga positive case khat bou um ahi. Mipa hi tua RIMS a kijen ahi’in, atahsa a ol cheh cheh e, tia authority hon photchenna anei uva chule insung mite test abol jou uva ‘community transmission’ aumpoi, tia aseiyu ahi.

Manipur gamsung hi Coronavirus natna kiseina gam a kon akilahdoh vah ding ginchat ahi, tin thuson aseiyin, ahivanga, state sorkar in kivenna dinga pan alah hohi pachat umtah ahi’in, natna suhmang nadinga vaccine aum kahse a kivenna neijom ding ahi, ati.

Alangkhat’a, gamsung miho ventilator le PPEs (Personal Protective Equipment) lhahsam jeh a alungkham lai uva state sorkar in Chief Minister N Biren Singh vetsuina noiya sorkar jouse chule non-government stakeholder hotoh gamsung hi COVID-19 ‘affected state’ list a apan louna dinga pan sangtah ala uvin ahi. April lha a NFSA anchang inson insung mi jouse anchang kg 4 cheh hop dinga kitepna anei bou abulhit lou ahi’in, COVID-19 case akal a ahile kijenna dinga kigotna anei ho pachat umtah ahi.

Gamsung hi thil lhahsamna ahijeh a CM Biren in kivenna sangtah anei ahi. Government hospital hon mihem hinkho huhdoh nadinga angaicha ventilator ala joupoi, tia demna tamtah um ahi’in, private hospital phabep a hi angaicha thil ho government hospital a sanga ninglhing jo ahi.

Union Health Minister Dr Jitendra Singh in RIMS a ventilaror athah 10 akikoi tai, tia asei ahi’in, hiche thu hi Chief Minister Biren Singh in avel a aseikit a chule RIMS Director leh official dang dang hon nat douna dinga pan sangtah alah nau chunga kipathu asei ahi. RIMS thulhut dungjuiya, Neonatal ventilator 3 panna a ventilator agom a 36 um ahi.

“COVID-19 natna neiho ventilator peh ding khohsahna kinei ding, hijong le natna neiya khat bou ahijeh a ventilator ngaicha adang anatna sang ho jong kimansah ding ahi”, tin Director Shanta, RIMS in thuso miho thudoh donbutna aneiyin ahi. Nat akilahson to louna dinga RIMS in psychiatry ward, clinical psychology )methadone treatment panna a) chule Psychiatry department tua Dental College, RIMS a kichon hi kha dinga aseiyin chule amun hi COVID-19 toh kisai ho kijenna a man dinga asei ahi.

General OPD jong kikhah ding, ahivanga ’emergency case, serious, ante-natal chule cancer case’ hohi casualty a jen dinga dinmun dungjuiya kila ding ahi, ati. Chule hospital dang a kon RIMS a refer kibol case ho kila talou ding ahi’in, RIMS Hospital a staff hon COVID-19 nat douna a pan phatah a alah theina diu ahi, ati.

China a kon gamsung hung kile nu Covid-19 ‘negative’ hi

Imphal, Apr 8(ET): China gam a kon hung kile a kum 23 a upa Singhat, Churachandpur a cheng numeinu Tuesday nilhah a Covid-19 test result ‘negative’ ahitai, tin Wednesday nikho thulhut in aseiyin ahi.

Numeinu hi tua Regional Institute of Medical Science (RIMS), Imphal a isolation ward a um ahi’in, Tuesday nikho a VRDL, RIMS a COVID-19 test abol u ahi. Test result hi Wednesday jingkah matah a aphat masanga amu u ahi.

Numeinu insung mite jong Churachandpur a government facility a ‘quarantined’ kibol ahitai. Tuesday nilhah a Covid-19 test kibol a, numei panna a mithum result abon a negative hi ahi. Numeinu hi Churachandpur quarantine centre a ‘quarantine period’ sung umjom ding ahi. Gamsung a lockdown aum’a chule sepai hon gamgi akha vanga April nisim 6 nikho a numeinu hi Manipur gam a Myanmar lampi langa kon hunglut ahi. Photchen loulai thulhut khat in numeinu chule akithopi khat chunga FIR kijihlut ahitai, ati. COVID-19 Common Control Room in asei dungjuiya, numeinu hi lhakhat China gam a akholjin jouva hung kile ahi.

Achesa February nisim 28 nikho a China gam jon a che a chule Myanmar langa kon April 6 ni a gamsung hung kile lhung ahi. Tuchan geiya Manipur gam a COVID-19 case photchenna kinei 2 ahi’in, hiche lah a case masapen nu hi damdoh a, chule April nisim 6 ni a anivei channa a test abol nauva negative hi ahi, tia Health Minister L Jayantakumar Singh in asei ahi. Imphal West a cheng nu hi London a kon hung kile ahi.

Numeinu insung mite jong ni 14 lhing ‘quarantine’ a akoiyu Tuesday nikho a aphat lhing a, chule insung mi coronavirus symptom neiya koima umlou ahi.

Postgraduate simlai ho dinga ‘online class’ akipan tai: Edn. Minister

Imphal, March 8(ET): Education Minister Dr. Thokchom Radheshyam in Dhanamanjuri University a postgraduate simlai chule Manipur Technical University a 6th Semester simlai ho dinga ‘online class’ akipan tai, tin aseiyin chule class I a kon XII chan simlai ho dinga extra class hi summer vacation sunga bol dinga aseibe in ahi.

Minister pa in New Secretariat, Imphal a ama office chamber a thuso miho akimupi na a asei ahi. Sorkar in Covid-19 a kon kivenna dinga lockdown akoi jeh a gamsung a themjilna mun ho akikha a, simlai ho lekhasim sangtah a atohkhah ahetpehna chule themjilna aboi louna dinga sorkar in pan alah dan ho aseiyin ahi.

Higher Education le Technical University a ZOOM App MOODLE- Modular Object Oriented Dynamic Learning Environment a kon class kipan ahitai, tin Dr Thokchom Radheshyam in aseiyin ahi. Jilkung hon ‘study material’ asem uva hiche hohi online class, email le whatsapp a simlai ho apeh diu ahi. Chule simlai hon acham uva lekha asim nading uva assignment topic kipe ding, hiche hi simlai hon email le whatsapp a kon apehlut diu ahi.

Class XI le XII simlai ho promotion a dinga jong kihouna chelha ahi, tin Minister pa in aseiyin, ahivanga thulhuhna hi state cabinet in asemding ahi, ati. Evaluation a dinga centre akisembe jouteng answer script ho check kibol pan ding ahi, ati. Chule lockdown sunga private school hon simlai ho fee alah loudiu chule private school a jilkung a pang ho lo apeh diuvin jong temna aneibe in ahi.

Department of Education (S) in DIKSHA, e-pathshala, NROER, SWAYAM chule NIOS le CBSE You Tube Channel link ho apeh ahi’in, hiche a hi study material ho muthei ahi. YouTube channel a local content hi ‘SCERT Manipur’ chule ‘Department of Education Schools Manipur’ tia hol thei ahi. Class jouse a additional weblink hi tuni a kon upload kibol ahi, ati.

Jilkung hon simlai ho telephone chule adang dang a akijahpi uva apuihoui diuvin Minister pa in temna aneiyin chule simlai honjong online portal ho a study material akihol diuvin temna aneiyin ahi. Lockdown hi insung, society chule mihem kikah a thil mantam ho velvetna nei nading a phat pha ahi, tin aseiyin chule nu le pa, pi le pu chule insung mihon chon le khan, system chule adang dang ho chate ho ahil uva, gamsung huhna dinga ahinkho phal a pang galhang ho thusim aseipeh diuvin aseibe in ahi.

Education Minister Radheshyam in simlai hotoh kijopmat na nei jing dinga jilkung ho thuhilna nei

Imphal, April 8(ET): Covid-19 jeh a gamsung ni 21 sung lockdown ahi toh lhon in tuni ani 16 nikho aki phatan hiche sung ahin gamsung a jilkung hon simlai ho toh kijopmat jing ding in Education Minister Dr. Thokchom Radheshyam chun aseiyin ahi. Tuchung hiche natna jeh in koiman na atoh ding bang in atong thei tapon, school hojong akikhah soh keitan, hiche phat sung a simlai hon alekha’u a ngainep khah ding ujong tijat um ahi in jilkung hon pan alathah uva tulai khantouna asan dungjui in kihoumat theina jong aumtan, group chom chom sem a simlai ho bolding ho seipeh jing a akithaset louna ding uva jilkung hon pan alahding uh ahi ati. Tuchung a gentheina akon panthah lahding dan jildoh theina chance tamtah aum in hiche sang a hun hahsa leh boi um ahung lhun teng lejong kimaitopi a jouthei ding a tuchung akon kisinna neiding ahi ati.

Video a athuseina achun minu mipa chule chapang vetkolna a panla hon jong inmun jeng hijong leh simlai hon thase louhel a alekha sim diu angakhoh thei nading uva pan ala ding in jong temna anei in ahi. Jilkung hon jong hun hahsa tah hijong leh iti panlah a simlai ho semphat ding ham ti lunggel a panlakhom cheh ding in temna anei in ahi.

Chassad mipi te kithopi nading’a ZYO in KKL khut’a thil phabep pehdohna nei

B.Lalboi Gangte

CCpur. April 8 (ET): Kamjong District hopsung’a um Chassad kho sung’a chenna inn 150 vel Sampui Thangkhul kho mipi leh NSCN-IM hon achesa nisem March nisim 16 nikho’a ahal lhah jeh uva Chassad khosung miho sil-le-chen, innsung tilkeu khat jong kilah doh manlou’a hinkho aman utoh kilhon’a Chassad khomi te panpi na ding’a mimal kiphaldoh naho Zou Youth Organisation  panlah na in ZYO Unite ho jouse in panpi na anala khom uvin ahi. Covid-19 lockdown jeh’a Manipur acheng Zo nam sung’a mipi ho akiphal nao ho Unit hokom’a apehkhom utoh lhon in tuni jiglam nidan 9:00 in Zou Gal Memorial Hall,  Zoveng mun’a UZO GHQ, ZYO GHQ, Unite lamkai hon  KKL CCpur khut’a panpi naho pehdoh na ananei uvin ahi. Chuleh Moreh lang’a ZYO in KKL Moreh khut’a anapehdoh ding chuleh Imphal Area ho Imphal ah ZYO Unit khut’a apehdoh ding ahi.

Hiche panpina ZYO in alahkhom ho pehdoh na Nangzathang President, S.Kamminthang Gen. Secretary tenin UZO GHQ President Chinlunthang Zou hetpeh nan Kamthang Haokip, President KKL GHQ khut’a pehdoh na aneiyin ahi. Pehdoh’a umho chu Dk. 60,000/-, annchang bag 21, sil leh chen  bag 152, um-le-bel bag 13 leh Kengkoh bag 9 ahi. ZYO Ghq President Nangzathang in houlimna aneina’a  Chassad kho mun’a chen ZYO nungah gollhang hon agah thah lut ding ti ahi vang in  Covid-19 natna hitlang jeh’a Lockdown jeh’a ahithei ding tah lou jeh in KKL GHQ khut’a anapedoh in ahi.

Hiche toh lhon’a KKL President Kamthang Haokip in houlimna aneina’a  Chassad kho’a inn hallhah natoh kisai’a mipi pankhom na  thupi asah thu aphongdoh in chuleh kihetthem lou naphat um ji jong leh hahsatna tophat teng koima kikhen chom kium theilou ihi dan atahlang in ahi. Hitoh lhon’a  tribe chom chom akipat panpina phabep alut in, Chassad kho’a inn thah tundoh ding hi inn 140 atheina dia KKL GHQ in jong 5-vei akiphata in, koima kikhen chom umlou’a pankhom na tahlang aum hi thupi asah nachung’a akipan na aphongdoh in, eimi tamna pen kisei Churachandpur mipi chung’a thomhao tah um Chassad kho mipin kinepna lentah anei u ahi atahlang in, Coronavirus jeh in deibang’a kijut matto na atheilou ban’a von leh apoimo dang dang peding’a kon ding hojong  Gari khat ah mini sang’a tamjo touthei lou ding phal ahilou jeh in, anongkai  nalentah akitoh in, panpi na pehdoh aum jouse alhun na ding mun alhun thei na dia pan kila jing ding ahi ati.

Rev. Khamchinkhai, Senior Executive Secretary, ZPCS in Pathen kom’a pehdoh aum ho lhando na aneiyin,  chuleh ZYO imphal area in  UZO, ZYO leh ZSP lamkai honjong KKL Moreh khut’a panpi na  Dk. 29000/-  Sil le-chen ding bag 5, um leh Bel 10, Blanket 2, mattress 1, Rice cooker 1, nylon bucket 3, Hot case 1 leh basket 1 apedoh vin ahi.

Government natong NFSA card neihon ni 7 sunga card apehdoh diuva Home dept. in thuso nei

Imphal, April 8(ET): Sorkar natong hi a National Food Security Act, 2013 card nei jousen ama ama district a Deputy Commissioner office phone ahiloule email a Wednesday nikho a kon ni 7 sunga akihoupi uva, apehlut (surrender) diuvin Special Secretary (Home), H Gyan Prakash in office memorandum asodoh tan ahi.

Sorkar natong hi a card pedoh louho CCS (CCA) Rules, 1956 noi chule Disaster Management Act, 2005 section 52 noiya action kilah khum ding ahi, tin gihna jong anei uvin ahi. Ministry of Consumer Affairs, Food & Public Distribution, India government a data um dungjuiya Manipur gam a 2011-12 NSSO Data a 88.56% rural chule 85.75% urban population hi National Food Security Act, 2013 in ahop ahi.

Akipe data hin card nei dinga kilom lou sorkar natong hojong National Food Security Act, 2013 noiya card kipe a chule scheme noiya anchang akilah u ahi, tihi avetsah ahi’in, hiche jeh a State Home Department in hiche tobang thuso anei ahi.