SoO le khouna chejom (Chamna, kinop tona khat um hi aumlouhel...

SoO le khouna chejom (Chamna, kinop tona khat um hi aumlouhel sanga phajo thou ahi)

205
0
SHARE

SoO  le khouna chejom
(Chamna, kinop tona khat um hi aumlouhel sanga phajo thou ahi)
KNO le UPF hole govt kikah a SoO kinop tonal ha 6 a dia chejomsah kit dia kinop tona soi kikai kit chu aphaat hung kichai dungjuija ahidisa ti thei ahin tua lha 6 hung kichai kit tengle jong aban’a chejom kitna dia soi hung kikai kit di jong hinalai di tina ahi. Govt to kihouna kichai kah a hitia lha 6 sehleh kinop tona soi kikaitona umjing sang’a political talk (kihouna) kichai kah a SoO hihen Ceasefire hileh kinop tona soi hi khatvei akikaileh kichai jeng dia jong hithei ahi. Ahin SoO/Ceasefire ground Rule (daan) palkehna aumji jeh a kum khat sehleh soi kikai tona ana umji chu tua hi kum keh seh a velvetna leh soi kikai tona umkitji tidan ahitai. Ground Rule sukeh akitile thingnoi langleh Army/govt lang kibang ahi alang lang’in ahet kit cheh u ahi. Khatvei veile Assam Rifles hon Ceasefire le SoO thu umlouva thingnoi ho amatji jong ground rule to kikal ahi tithei himama ahi. Alang khatna thingnoi Ceasefire/SoO a umhon jong ground rule to kilal’a ipipi abol ujong umthou kit ahijeh in koi chu dih a koijoh dihmo ham ti jong alang langa kibang le kibang ti tailou umlou ahi. Hapta masa khatveini lang’a Senapati khopi sung bazaar laitah a Assam Rifles hon NSCN-IM thingnoi khat amat uva, AR ho meithal khat analahpeh uva kinotona anasoh jong chu Ceasefire ahi timan’a lhangphong tah a thingnoi cadre ho bazaar sung’a aum jeh u keu hilouva anopnop aboljing jeh u ahi. Kuki thingnoi SoO a umho jong khatveiveileh AR hon amat, ajep, atha gei umnalaiji ahi. AR ho natohji jong hi local commander ho kiboltheisahna jeh bou hilou ding, achung lang’a (govt) a kon ahidijong tahsan umtah ahi.
Kuki political talk jong hi ipi ahung tidem datmo umtah ahidan chu UPF sung’a Zoland TC hidi ahi tiloi leh Kuki TC hihen ti thu jeh a khatcha jong hilou, ima kihoulhahna hung umtheilou te hung hidoh diham tijong mipi kichat ahiji. Tua hi KNO le UPF a atamjo group ho pangkhom udan’a umdoh ahitan ZRA a Thanglienpao group hin political talk ipi suhboi thei ham tilang joh hung himaitheijin akimui.  Thanglienpao ki ngohna hi athahbeh hilou, sotna pat Paite nam sung’a akhohjo cheh a themmo channa ana umsa ahi. Ahin Thanglienpao supporter hon jong asei uleh Thanglienpao dihmona umlouva asei kit u ahi. Aphaloupen thu kisei vang hi Churachanpur a chi le nam a kiboina ana um thu kiphongdohgo hi ahijeh in hiche thu hi seitahlouva phapen ahi. Politics a demand kibol hamkhat thua lunggel kibahlou chu thukhat ahitan, chi le nam’a kinahna ana umsa khat thua mipi tosotna holdi kitivang hi thil dihloutah ahi.