Sonia Gandhi, Rahul Gandhi, Priyanka Gandhi in SPG security anei Z+ security...

Sonia Gandhi, Rahul Gandhi, Priyanka Gandhi in SPG security anei Z+ security a kisuhnem peh ta

520
0
SHARE

Sonia Gandhi, Rahul Gandhi, Priyanka Gandhi in SPG security anei Z+ security a kisuhnem peh ta

New Delhi, November 8: Prime Minister Narendra Modi lamkaina NDA sorkar in Gandhi insung mite Special Protection Group (SPG) security kipe hi Central Reserve Police Force (CRPF) Z-plus security a asuhnem peh tauvin ahi.

Gandhi insungmi- Congress President Sonia Gandhi, president anahi Rahul Gandhi, General Secretary Priyanka Gandhi Vadra in Z-plus security anei diu ahitai. CRPF hon kichuhna apeh commando hon amaho aven diu ahitai, tin India Today TV thuson aseiyin chule security agency hon ‘threat input’ velvetna anei jou uva hiche thulhuhna aneiyu ahi. Gandhi insung mihon boina ato nathei dinmun aumlou jeh a SPG security kiladoh ahi, ati.

Sorkar in achesa August lha a Prime minister anahi Manmohan Singh security cover analahdoh peh ahi’in, security agency chom chom in dinmun velvetna anei jouva Singh security hi SPG a kon Z+ a akhel u ahi. Gandhi insung mite SPG protection kipe akilahdoh toh kilhon a security sangpen a kiveng hi PM Modi bou hiding ahitai.

Senior Congress lamkai Nana Patole in hiche hi RSS ho tohgon ahi, tin aseiyin ahi. “Indira Gandhi leh Rajiv Gandhi in kiphaltheng na anei hi gamsung in ahet ahi’in, Gandhi te insung in boina ato thei hi ahet u ahi”, tin Patole in thuso miho henga aseiyin chule Gandhi insung chunga Congress in thilse alhunsah louding ahi, ati. Congress lamkai Ahmed Patel injong BJP hon vetdana aneijeh a thingnoi natoh leh boina a anathi Prime minister 2 umna insung mite hinkho hi atodoh ahi, ati.

SPG hi 1985 kum a prime minister anahi Indira Gandhi akitha jouva kisemdoh ahi’in Parliament in 1988 kum a SPG Act phatsahna apeh a chule Prime Minister veng dinga apehdoh ahi. Hiche phat laiya Act hin prime minister anahi masa ho ahop tha lou ahi’in, 1989 kum a VP Singh in sorkar ahin lamkaiya hi Rajiv Gandhi SPG protection kipe alahdoh ahi. Rajiv Gandhi 1991 kum a thingnoi hon atha jou uva SPG Act semphatna anei uva, prime minister anahi ho leh amaho insung mite jong alhompen a kum 10 tobang SPG protection peh dinga dan semphatna aneiyu ahi.

Atal Bihari Vajpayee sorkar in SPG kivaipoh dan velvetna aneiya hiche jouva Prime minister anahi PV Narasimha Rao, HD Deve Gowda leh IK Gujral SPG protection kipe lahdoh dinga thulhuhna anei ahi. 2003 kum a Vajpayee sorkar in avel a SPG Act semphatna aneiya, kum 10 protection peh dinga kisei hi Prime Minister khat in apanmun alha nikho a kon kum khat sung bou protection peh ding chule boina ato nathei dinmun dungjuiya sorkar in thulhuhna anei dinga dan asemphat kit ahi.