Somali Islamist galsat hon Kenya sepai phabep kakaimang uve, tia thuphon neiyu

    400
    0
    SHARE

     

    Mogadishu, Jan 18 (Reuters): Somalia gamsung’a um al Shabaab Islamist kioikhom hon Sunday nikhon Kenya sepai phabep kal masa in akiman’e, tin asei uvin, Friday nikho buluna thilsoh’a sepai ijat kiman ahi aseidoh pouvin, ahin, thilsoh’a hi Kenya sepai 100 val in thina ato ahi, tin thuphon anei uvin ahi.
    Tu masang’a thuphon chun sepai 63 thi’a asei ahi. Kenya military ahiloule AMISOM, African Union force ‘a konin hiche chungchang’a thuso akimu hih laiye. Kenya official khat in Sunday nikho chun army in thuphon aneiding ahi, tin aseiyin, ahivang’a aphat anasei lou ahi. Al Shabaad hohin official ho sei sang’a buluna thilsoh’a vangsetna toh jat hi atam jep’a anasei jing-u ahi in, athijat kholna um loulai ahi.
    Kenya President Uhuru Kenyatta in Friday nikho chun, uniform ‘a kivon gam ngailu phabep athi’e, tin aseiyin ahi. Chule Interior Minister Joseph Nkaissery in Saturday nikhon akitongkha ho kijen ding’in Nairobi khopi’a akipolut in chule athi ho a-inmun cheh uva thah ding’in akipo tai, tin aseiyin, ahin, koiman buluna thilsoh’a thi jat aseidoh lhon poi. “Mujahideen galsat honFriday jingkah in Kenya base abulu uvin, mihem 100 val athat uvin chule gal-manchah leh military ho gari alahpeh uvin, Kenya sepai phabep jong ahing’in akai uve”, tin al Shabaab in asei ahi.
    Al Shabaab hon Somali National Army base abulu uvin, AMISOM sepai hon alethuhna in abulu uve, tin AMISOM leh Kenya sepai hon aseiyui. AMISOM leh Somali army hon kum masa’a thakhat’a operation anabol uva, al Shabaab thingnoi ho ahatnau mun’a kon nasatah’a adelkhum uva, anungchon sah-u ahi. Kenya in Muslim gam adelkhum lethuhna’a kibulu ahi, tin al Shabaab in thuso anei nauva aseiyun chule Kenya gam’a army hon themmona neilou Muslim ho thisan anaso ahi, ati.