Service kilahna phot khongai dia thupeh (Recruitment ho kisutang hi sum...

Service kilahna phot khongai dia thupeh (Recruitment ho kisutang hi sum bat le politics jeh ahi)

327
0
SHARE

Service kilahna phot khongai dia thupeh

(Recruitment ho kisutang hi sum bat le politics jeh ahi)

                         Natoh hol atam cheh cheh jing vang’a natoh kilahna chelha ho khongai dia Reserve Bank of India (RBI) in state govt thupeh ahinnei hi mi tamtah dia thaset umtah hidi ahi. Tu tua Manipur govt nuoija ‘recruitment’ chelha hi department phabepma um ahi. Hiche lah a Home department a IRB Rfileman leh Jamadar post a dia candidate hi agom’a asang asang lang ahi. Department dang hon jong Contract a di, Casual a di, Ad-hoc a di leh Regular (permanent) a dia natoh lahna di recruitment achelhah pet tah ahi. Hiche ho jouse khongai dia govt thupeh um hi govt amale ama kikalna ahi. Hiche hi ajeh 2 hidi ahi. Khatna chu, tu tua Cabinet Minister kikhel di (reshuffling umdi) kiti leh Chief Minister (CM) kheldoh di tia politics lang’a kiboina ahung khoh cheh cheh jeh a Chief Minister hung kikhel taleh recruitment thua thuneina choi jong hung kikhel di ahijeh a gah khongai di ti ahin akipum kah, kipum ngah vang ahidehpoi. Anina’a, Manipur govt a sum le pai lang’a nichang sat kipankit ahitah jeh a RBI jin sum ahinkha jeh ahidi jong acham’a lha ahi. State govt nin ‘overdraft’ kiti, batna sum atamlahval tah jeh a RBI in Manipur State govt sum pehjomna ahinkha ahi. Manipur hi aitih a sum ninglhing khalou, Centre a kipum ngai ahi. Centre a kon sum hi RBI a kon State govt nin alahji ahin sum kisumang hi amudidol sang’a tamjo jing (overdraft) jeh a bat nin achupji ahi. State govt nuoija service kilahna (recruitment) tamtah achelhah a mi tamtah in service ahinbolpatleh lhalo pehdi mi tua sang’a hung tambe nalaidi ahijeh a tolop pehdi sum bon neiloudi tia natoh kilahna jouse khongai tah didi hi alampi phapen’a kigel hidi ahi. RBI in sum akha kiti hi Centre  govt nin akha tina ahi.

            Ahileh sum dinmun ve masa louva state govt nin itidan’a tohmun tamtah alahgot ham ti hi ahi. Service kilahna (recruitment) aumdileh amasa’a Finance department nin sum mudi leh pehdohdi ho hisap abol masat jia phatsahna apeh teng recruitment chelhaji ahi. Lok Sabha Election  dikon tah, Model Code of Conduct hung kiphon masang’a bolthei thei boldi ti bang jeng’a department tin’a post hijaja aong’e tia Casual a kila loi, Contract a kila loi, regular a dia lahna dia form kihom loi anadim ahi. Form lahna sehseh a Candidate hon sum ijat asuhmang di hitam! Tua ‘overdraft’ jeh a RBI in sum ahinpehdaleh State govt nuoija service bol hon lhalo tahbah phate ahinsanjom thei diu hinam ti hinalai  ahi. Centre leh Manipur a vaipo (govt) hi party khat (BJP) ahivang’a itidan’a state hi sum ninglhing lou ham ti hi datmo umtah ahi. BJP lamkaina Centre govt hin State sung’a khantou machal natoh ho dia sum hung kipe ho ahidi dol’a kimangcha hinam ti avelhi keu dia mi ahinsoljing ahi ti thu kijajing ahi. CM N Biren jong Centre lang’a akikhojel kit hi ministry aboijeh a party lamkai ho kom’a gatao dileh puhsui to gakop di ti jong hiteidi ahi.