September 1 a kon 31 chan jui ding Guidelines sorkar in sodoh;...

September 1 a kon 31 chan jui ding Guidelines sorkar in sodoh; September 21 a kon mi 100 noilang kikhopna kin chom chom kiphal ding

324
0
SHARE

September 1 a kon 31 chan jui ding Guidelines sorkar in sodoh; September 21 a kon mi 100 noilang kikhopna kin chom chom kiphal ding

Imphal, Aug 31(ET): Disaster Management Act, 2005 Section 20(2)(a) noiya State Executive Committee, State Disaster Management Authority a Chairperson hina a Chief Secretary Dr Rajesh Kumar in September nisim 30 chan gamsunga jui ding Unlock guidelines jui dinga thuso aneiyin ahi.

August nisim 31 chan jui ding guidelines ana kisodoh jouva Covid-19 nat chal dan leh gamsung miho kihinso nading leptoh nadinga phabep hon angai jeh a guidelines athah a asodoh u ahi in, guidelines a kipe lou thil (activity) ho Deputy Commissioner hon aphal loudiu chule ama ama district a jan nidan 6 a kon jingkah nidan 5 chan curfew koi dinga thupeh aneiyin ahi.

Manipur High Court in ama order leh guidelines hi Centre leh state sorkar guidelines banga akisodoh thei ding ahi. Akiphal ho hi Covid-19 Management dungjui hiding ahi. Koi tobang dan juilou aumleh Disaster Management Act, 2005 section 51 leh 60 dungjui chule IP 188 leh Manipur Epidemic Disease (Enforcement of COVID-19 Guidelines) Regulations, 2020 dungjuiya gotna kipe ding ahi, tin thuson aseiyin ahi.

September nisim 1 a kon nisim 30 chan Containment zone pam a akiphal ding thil hohi- angaicha khoh ho home delivery, bongnoi leh bongnoi thil, vengsunga um niseh a manchah ding thil kijohna dukan ho, me kijohna, bongnoi, ahcha, sa leh nga kijohna dukan ho niseh a jingkah nidan 7 a kon jan nidan 5 chan kihong ding ahi.

Thangal Bazar, Dharamshala, Paona Bazar leh Masjid Road a whole sale dukan ho Sunday nikho tilou nidang jouse a jingkah nidan 7 a kon nilhah nidan 5 chan kihong ding ahi. Imphal West, Churachandpur, Pherzawl, Tamenglong, Noney district a dukan bol hon Monday leh Thursday nikho a wholesale dukan ho a kon thil akilah thei diu, Imphal East, Senapati, Kangpokpi, Ukhrul, Kamjong district a dinga Tuesday leh Friday nikho teng kihong ding, Chandel, Tengnoupal, Thoubal, Bishnupur, Kakchinq, Jiribam district in Wednesday leh Saturday nikho teng wholesale dukan a thil akichoh theidiu ahi.

Thangal bazar, Paona bazar leh Nagamapal pam a inn sahna, hardware, electrical thil, cement leh adang dang kijohna (standalone) dukan ho jong jingkah nidan 7 a kon nilhah nidan 5 chan kihong ding ahi. Gully kiti building kah a dukan um ho tilouva Thangal leh Paona bazar a jingkah nidan 8 a kon nilhah nidan 4 chan kihong ding dukan ho tua hi hop thum hilouva hop 2 a kikhen ahi.

Monday, Wednesday leh Friday nikho teng Thangal bazar a von, kengkoh, stationary, kong leh bel, electric thil, paint, mattress, carpet, sports thil, furniture, ply wood, aluminium kijohna dukan ho chule Paona bazar a sakhao (luggage), stationary, jewelry, cosmetic, photo, cycle, glass, ply leh von (eastern side), mattress, carpet, dry cleaner leh furniture kijohna dukan ho kihong ding ahi.

Tuesday, Thursday leh Saturday nikho teng Thangal bazar a kong leh bel, Electronic, computer, mobile (service centres), pat, Motor parts, Tyres, batteries, Hardware, sanitary fittings, tiles, marble dukan ho chule Paona bazar a von (western side), kengkoh, pat, computer, mobile kijohna dukan leh servicing centre, electronics, sports leh mitbeh kijohna dukan ho kihong ding ahi.

Thil kipohna gari kiphal ding, Mao, Jiribam leh Jessami a interstate border ho a thil kipohna gari kiphal ding, driver nil eh helper khat panna a truck chule thil po gari ho thil thah leh thil la a alhai ding kiphal ding ahi. Highway a truck semphat nading dukan leh dukan ho social distancing dan jui pum a akihon ding kiphal ding ahi. MHA guidelines dungjuiya inter/intra district a pot po gari jouse kiphal ahi. Chule Indo-Myanmar gamgi a kon Land-Border Trade Treaties kiti Myanmar toh kisem dan dungjuiya akiphal thil ho SOP jui pum a poh ding jong kiphal ding ahi.

Hospital, nursing home, clinic, dispensary, chemist, pharmacy, Jan Aushadhi Kendra panna a lou kijohna dukan ho leh medical manchah thil kijohna dukan ho, medical laboratory leh collection centre ho, veterinary hospital, dispensary, clinic  leh pathological laboratory toh kisai chule vaccine kihopna leh kijohna hojong kihong ding ahi.

LPG gas (home delivery), postal service, telecommunication, internet service, twi, meivah, waste management sector, petrol pump ho, airport leh airlines, inter leh intra state public transport ho SOP dan kichepi a kihong ding ahi. University, College leh School in online class alah, Coaching leh Tuition Centre hon online tuition leh exam apeh hojong kiphal ding ahi.

Skill/Entrepreneurship training, National Skill Training Institutes, Industrial Training Institutes, short term training centre kiti National Skill Development Corporation/State Skill Development Missions/Ministry dang dang a register kibol ho leh hitobang entrepreneurship institute ho September nisim 21 a kon MoHFW in asodoh SOP jui pum a kiphal ding ahi.

Thinglhang a phailei kibol na, agricultural leh horticultural thil lahna ding (Farmer Producers company panna a), fishery, fish farm, fish feed plant, animal husbandry a ahcha, vohcha, gancha vahna leh bongnoi kisemna, ahcha gancha nehding kisemna ho kihong ding ahi.

RBI leh financial market ho 66% staff a kipo ding, bank branch leh ATM chule Business Correspondent, LIC, AM financial institute, private bank leh adang dang ho aumsa staff lah a 66% a kipo ding ahi. Print leh electronic media, courier service, security (private) service, manufacturing unit, mineral water manufacturing leh distribution, restaurant leh outlet ho home delivery ho kihong ding, jingkah nidan 9 a kon 4 chan show room leh Servicing Centre ho kihong ding ahi. Gari semna dukan leh workshop ho jingkah nidan 7 a kon nilhah nidan 5 chan kihong ding ahi.

Shopping mall jousen mi akitit louna dinga avetsui ding, sam tan na leh beauty saloon, gym ho a jong mi tam kiphal louding ahi. Private gari ahilouleh curfew phat hilouva avah le jat kisem talou ding ahi.

Essential service a natong centre leh state government office jouse angaiya banga kihong ding, Administrative Secretary/HoD thulhuh banga staff 66% kai ding, officer jouse Group A category a um uva, office che diu ahi. MNREGA jong angaiya banga dan jui pum a kiphal ding ahi.

Natong ho amun a aumna National, Highway, Railway project, chule government department leh private construction in natoh achepi ho, water supply scheme construction leh maintenance, repairing works ho kiphal ding ahi.

September nisim 21 a kon social, academic, sports, entertainment, cultural, religious, political function leh kikhopna adang dang ho kiphal ding, mi 100 kalval kikhom theilou ding chule thermal scanning, face mask, hand sanitizer leh social distancing dan ho jui tei ding, kin a pang hon social distancing ajui tei nading uva organizer hon mopohna akilah diu ahi.

September nisim 20 chan golvahna a mi 50 kalval chule thi lhahna a mi 20 kalval kikhom theilou ding, hiche jouteng mi 100 chan kikhom thei dinga dan kijui ding ahi.

Containment zone ho district authority hon MoHFW guidelines avet uva asem diu, ama ama Deputy Commissioner in website a atahdoh uva, Health Department a kon MoHFW ahetsah diu ahi. Containment zone a angaicha khoh ho bou kiphal ding, medical emergeny leh neh leh chah lahna ding tilouva mi va le ding kiphal louding ahi. Hiche zone a hi contact tracing, inson surveillance, ho khoutah a kibol, MoHFW guidelines khoutah a kijui ding ahi. DC hon Buffer Zone jong avet diu ahi.

Kum 65 a upa chunglang, natna chom chom neikhom, naovop numei, chapang kum 10 noilang ho kin khohtah tilouva inn a umtup ding chule Aarogya Setu app install kibol cheh nadinga district authority leh employer hon pan alah diuvin jong asei uvin ahi.

Milah a face mask bol tei ding, social distancing alhompen a feet 6 juiding, milah a chilset ho leu ding ahi. Mi tamna lah a thermal scanning, hand wash ahilouleh sanitizer ho alutna leh apotna/achedoh na mun a koi tei ding, natohna mun ho sanitize bol jing dinga jong asei uvin ahi.

India President lui Pranab Mukherjee Delhi Hospital a mollem

New Delhi, Aug 31: India president ana hi le lamkai ngaisang um tah Pranab Mukherjee chu tahsa kum 84 lhing in tunichun amollem tai. Ama hi lung infection a damlou le Covid-19 natna jong nei ahi.

Mukherjee hi achenna Rajaji Marg in a kipal lhu a alhoh a thisan lut jong August 10 nia lahdoh a um ahi. Atahsa dinmun khehsuh thu jong tuni jingkah a chu doctor hon ana phondohsa ahi.

Mukherjee hi August 10 nia Army Research and Referral Hospital a pohlut ana hi in, chapa 2 le chanu khat dalha a nilhah nidan 4:30 a bei ahi.

2012-2017 a president panmun ana lo Mukherjee mollem tolhon in social media ah lainatna thuphon bannei chan akitol tho jeng e.  President Ram Nath Kovind in twitter ah Mukherjee a-it na  aphongdoh in chutobang chun Prime Minister Narendra Modi in Mukherjee chihna hetna hi atepi bei ahi, ati.

Chule Congress lamkai Rahul Gandhi in jong Mukherjee mollem hi gamsung a dia manna ahi tia asei tolhon in a-insung mi thoh hu na jong aphongdoh e.  Mukherjee hi congress a dia kum 50 hung kimang, MP vei 7 kai, politics alut masang a jilkung le journalist a ana pang, 1969 a Delhi Rajya Sabha MP ana hipan le Bengal Jangipur Lok Sabha MP dia amasapen a 2004 a ana kaidoh, avel a 2009 a lhendoh ana hikit ahi.

Indira Gandhi government a 1972 kum a minister ana tuhpan Mukherjee hin finance, commerce, external affairs le defence mopohna jong ana tuh ahi. Chule Mukherjee hi boina a pat government ana huhdoh jing le 1980 kum a Manmohan Singh RBI governor a ana pansah jong ahi.

Politics lam a  Rashtrapati Bhavan a panmun ana tuh chu Mukherjee dia mipi natoh achaina ahitai. Achesa 2012 a UPA government in president panmun lo dia ana lhendoh a government toh kihou mat na phatah ana semjang khat ahi.

President panmun alhading lhagup masang a 1992 Bara thilsoh a themmo chang ho home ministry toh kikal leu in ana ngaidam in hinla centre in athilbol ana doudal pon ahi. Chule 2019 chun Prime Minister Narendra Modi in Mukherjee chu tukhang a michingpen tin Bharat Ratna anapen ahi.

Former President Pranab Mukherjee in tuni dammo najeh’a damdoh jou talouva thina anato toh lhon’a State jouse in nikho 7 tichu August nisim 31 akon Sept. nisim 6 chan lunghempi na anit ding ahi tin Government in hetsah na anei in ahi.

Hiche toh lhon’a hiche nikho 7 sung’a hi gamsung mipi jouse in a building cheh uva National flag atundoh cheh ding uvin Ministry of Home Affairs in hetsahna anei in ahi. Chule Fomer President hi iti nikho, iti phat chuleh hoilai mun’a vuilem na kinei ding ham tihi oltah’a hung kihetsah ding ahi tinjong aseibei.

CM in RIMS a Trauma Care Centre hongdoh

Imphal, August 31(ET): Chief Minister N Biren Singh in Monday nikhon Chief Minister’s Secretariat mun a video conference a kon Level-I Trauma Care Centre, RIMS, Imphal hondohna aneiyin ahi.

Chief Minister in ahoulimna a, Trauma Centre akihon lo na ajeh thupi pen hi gamsunga gari accident a kisuhkhah jeh a thi na toh akisuhnem thei nading ahi, tin aseiyin chule RIMS authority leh doctor hon gamsunga hitobang Trauma Care Centre ahin semdoh thei jeh uvin apachatna thu aseiyin ahi. Trauma Centre a hi ICU bed, HCU bed, trolley bed, operation theatre, CT-Scan machine, dialysis unit chule adang dang umding ahi, ati.

State dang toh tekah dinga thepna nei chule natong jing doctor chule healthcare worker ineiyu ahi, tin CM in aseiyin chule sorkar in tu pandemic sunga doctor, nurse leh paramedical staff ho panlahna ahetpeh e, ati. Healthcare worker ho kitahna jal a gamsung in pandemic agaljo ding akinepna thu aseiyin chule public awareness campaign kibol hi nat douna dinga pan lentah la hiding ahi, tina seiyin ahi.

RIMS Director Prof. A Shanta in ahoulimna a, ICU a lupna hi 30 a kikal sah a chule Trauma Care Centre a ventilator 20 val kikoi a, ventilator adang 30 jong ‘back up’ a kikoi ahi, ati. Operation Theatre ni aumin, mobile X-Ray machine ni aum e, tin aseiyin chule RIMS a Trauma Centre semdoh nadinga Chief Minister leh sorkar in atosot jeh a akipana thu aseibe in ahi.

Trauma Care Centre hi Manipur Tribal Development Corporation (MTDC) in dangka crore 11.34 lut a asah ahi in, sum hi Ministry of Health and Family Welfare, India government in sanction abol ahi. ‘Capacity Building for developing Trauma Care Facilities on National Highways’ noiya Trauma Centre kisa ahi.

Kin-goun a Chairman, Manipur Tribal Development Corporation (MTDC) Vungzagin Valte, Principal Secretary (Health) V. Vumlunmang, Secretary to Chief Minister N. Geoffrey, Medical Superintendent (RIMS) Prof. Ch. Arunkumar, RIMS staff ho leh adang dang jong apang uvin ahi.

 

Dk.2,04,01,895 lut a Shelter Home sah nadinga sanction kibol sum leh Shelter Home aumna kihelou

Imphal, Aug 31(ET): Centre a Prime Minister Narendra Modi lamkaina sorkar leh state a CM Biren Singh lamkaina sorkar in ani a nehguh bol douna a bol thei chan abol lhon hi akilo lhon na ahi in, akikhet na hi PM Modi lamkaina sorkar in nehguh bol official ho gotna peh tei nadinga bol thei chan abol a, ahivanga CM Biren Singh in action lah ding chungchang a hi akhut asop ahi.

Achesa December 20, 2017 ni a Chairperson, Manipur Building and Other Construction Workers’ Welfare Board, Preshyojit Sharma in Building and Other Construction Workers ho Shelter Home khat sah nadinga dangka 2,04,01,895 sanction abol ahi.

Chairperson Preshyojit Sharma hi Labour Minister pa dinga asopinu jipa (brother-in-law) ahi in, Th Radheshyam hin Education portfolio jong atuh ahi. Manipur Building and Other Construction Workers’ Welfare Board (MBOCWWB) , state Labour department Chairperson dinga May 24, 2017 kum a kilhengdoh ahi.

MBOCWWB Chairman anahi Preshyojit Sharma in Shelter Home sah nadinga sanction order anasodoh a chu, construction agency installment khat a sum sanction bol dinga kisei ahi. Preshyojit Sharma in Educating Engineering Wing, Department of Education, Manipur government hi Construction Agency dinga alhendoh ahi in, hiche a hi asopinu jipa Education Minister anahi ahi.

MBOCWWB in itobang project ahilouleh scheme hijong leh sanction abol ding hohi Board member hon phatsahna anei ngai ahi. Preshyojit in Chairman panmun atuh jouva Board meeting ni vei anaum a, anukhah pen hi 11th meeting hi ahi. 11th Board Meeting hi June 14, 2017 kum a abol uva, agenda get aseikhom uva, phatsahna aneiyu ahi. Hiche lah a hi Shelter Home sah nadinga sum tamtah sanction bol nading agenda thu kisei lou ahi.

Tua thudoh hi akisei Shelter Home hi Manipur gamsung hoilai mun a kisa a chule Shelter Home sah nading sum sanction kibol hi hoiya um ham, tihi ahi. Tu masang, July 25 nikho a IT thusoh mihon MBOCWWB Chairman Preshyojit Sharma in dangka crore 13 lhing sum Rural Social Service Society kiti NGO a dinga sanction abol e, kiti ahi. NGO office hi Khongman Zone-II, Imphal East a um ahi in, hiche a hi Preshyojit Sharma amatah Chief Functionary chule NGO Secretary a pang ahi.

PM Modi lamkaina NDA sorkar in nehguh suhmang nadinga pan sangtah alah a, ahivanga Manipur a BJP lamkaina sorkar in fund tamtah adih louva akiman na thu a thipbeh a aumhi datmo umtah ahi.

 

By-election tet dinga kigotna neiya Thangjam Arunkumar Congress in lahlutna nei

Imphal, Aug 31(ET): Bihar state Assembly election toh kitoh a Manipur Legislative Assembly a seat a ong a umho by-election bol khom dinga tahsan ahitoh kilhon a Manipur Pradesh Congress Committee in candidate lhenna dinga kigotna anei tauvin ahi.

Wangkhei Assembly constituency a Congress ticket a election ana kaidoh a, Congress Legislature Party (CLP) lamkai Okram Ibobi sopi cha Okram Henry in party adalhah a, BJP a alut jouva candidate dinga tupna neiya Thangjam Arunkumar tunin MPCC a alut in, Congress candidate a by-election tet dinga kigotna aneiyin ahi.

Thangjam Arunkumar, Congress hi by-election Okram Henry toh akitet ding ginchat ahi. MPPC member dinga Thangjam Arunkumar lahlutna leh phatsahna kin goun Monday nikhon Congress Bhavan a anei uvin, CLP lamkai leh CM anahi Okram Ibobi, CWC member Gaikhangam , MPCC President M Okendro chule MPCC a office bearer ho jong apang uvin ahi. Congress in India chamlhatna dinga gal asat jana a Congress a lut ding kalhen ahi, tin Th. Arunkumar in kin gon a ahoulimna a aseiyin ahi. “Party chule lamkai ho chunga tahsanna kanei jeh a Congress party a kapan ahi”, ati.

CLP lamkai Okram Ibobi Singh in ahoulimna a, mi phabep in amachang ding kigel na a mipin mopohna apeh ho ajumso a, democracy hi totna tobang a asem ahi, tina seiyin ahi. “Tu by-election a Congress in tahsan umtah chule kiphalna dihtah neiya candidate alah ding ahi”, ati.

President, Manipur Pradesh Congress Committee, M. Okendro in ahoulimna a, party principle leh ideology helou ho thuhilna nei phat ahitai, tin aseiyin ahi. Congress sorkar vaipoh achesa kum 15 sunga thinglhang leh phaicham ani a party in gamsung khantou nadinga na atoh ho gamsung mihon ahet doh pan u ahitai, ati.

Th Arunkumar hi Royal Riders, Manipur founding member ahi in, chule Rotary Club, Polo City a President jong hi ahi. Tu leh tua Assistant Governor, District 3240, Eastern Zone ahi in, kichep golseh ngailutah mi jong ahi. Manipur a football club hetthei umtah NEROCA FC president jong ahi. Club a pan alahna sot ahitan, club Manager, Secretary leh Treasurer jong anahi ahi.

 

Tuithapi Village Authority in Tuithapi khosung a security outpost koi ding a SP/CCpur lekha thot pe

Ccpur, Aug 31(ET): Tuithapi kho a achesa August 26, 2020 nilhah lam nidan 5:00 velin HPC (D) Sanga Group hi a kisei uniform a kivon pasal 2 leh civil dress a kivon pasal 2 in khosungmi B.Nanglunmang inn ah aga lut un kichaodoh gihna aga nei jou un khosung adalhah ding kuon un thal jong ana kap ging un ahi. Hiche thu ah Pathenni chun Tuithapi kho mipi hon lunglhai lou vetsahna in kiphinna anan nei un, tunung tuban jong leh hitobang thilsoh dei umlou tah ahunglhung kit lou na ding in Tuithapi khosung a security outpost koi ahi nading in SP/CCpur hengah lekha pehna jong ana nei un ahi. Tuithapi Village Authority in hapta masa kiginni chun SP/CCPur hengah ngehna lekha an ape un, Aug. 26 nilhah a thilsoh tobang maban ahunglhun kit louna ding in Tuithapi khosung a security outpost koi ahi nading in ngehna ana nei un ahi. Tuithapi mipi vengbit ding in security force lah a IRB Unit adeipen’u ahi jong ahetsah un, security peh a a um ding pouleh Village Authority in lhun na gena kituptah kipe ding ahi tinjong SP/CCpur henga ana tahlang un ahi.

Gamvahmi hi kisei hon achesa Aug. 26 nilhah chun B.Nanglunmang inn sung a ana vahlut uva anikho ni jan mama a akichaodoh lou uleh a inn kibulhu a kihalpeh ding ahi ti changei a gihna ana nei jou uva thal jong akapging uva ana dalhah dan un thulhut chun aseiyin ahi. Churachandpur Police Station a FIR kibol toh kilhon in Kiginni chun Police hon Lalremruot @ Rema of Muolvaiphei village leh Ramchullou Varte of Muolvaiphei ana mandoh un, midang kigolna nei ho jong kholjing ahi nalaiyin ahi.  Tuithapi khosung thilsoh toh kilhon in Pathenni nisim August 30, 2020 nikho chun Tuithapi Village authority, Paite Tribe Council (PTC) Tuithapi Unit leh Young Paite Association (YPA) Tuithapi Unit makai na in Tuithapi mipiten kiphinna ananei un ahi. Kiphinna a chun chapang, aneo alen umlouvin abon un pan anala sohkei un mihem 100 val in placard chuom chuom choi pum in Slogan jong ana sam un ahi. Hiche sit in Protest a nei nauvah Tuithapi gam Inches khat jong akeding akiphalpoi, Tuithapi gam dihlou tah a namphu a lah ding kiguo ho Police in mandoh uhen, Tuithapi boina mimal boina ahi tiho demna neipum in Placard chuom chuom -We want Police outpost at Tuithapi, Stop gun culture, We demand to book the culprit tiho leh hem le thal a milham tijatsah ho demna ana nei un ahi.

Village Authority Chairman T. Thanglianpau in a seidan in, Tuithapi gam leiset force a lahdoh ding guo ho jeh in lunggel loulou ahung umdoh tan hijong leh gam leiset huhbitna ding a mipi chekhom ho chung ah kipathu aseiyin, Tuithapi kho mipiten mi gam akidei pon, midang gam jong suhboi ding lung akigel khapon, kho kiim khovel hotoh lungmong tah a umkhom ding joh aki dei jing in ahi ati. Aman aseibe na ah Pathenni a sit in protest kinei jeng jong hi koima toh boina semna dinga kibol ahipon, dei umlou tah milham chunga gihna thilsoh ho hi aum kitlou nadinga kiboljoh ahi atin ahi.Tuithapi a thilsoh hi akhatveina ahi tapon, June 24, 2020 nilhah in jong Tuithapi ah galvan choi hon thal ahung kap ging un, chamna leh athu seithoh ahijouvin, August 26, 2020 nilhah in jong gihna thu ahung umkit in ahi tinjong aseibei.

Thepna lhing nei Jilkung hobou panmun kalsah dia jilkung kiloikhom hon government ngehna nei

Imphal, Aug 31(ET): Service Rule dungjui a kum 30 sang a tamjo jilkung hung hi ahiloule Education(S) Department a kum 5 na hin tong hobou panmun kalsang thei a kisei ahi.

Hichu achesa November 29, 2016 nia Director ana hi Naorem Praveen in jilkung thepna sang nei ho min pehlut dia thupeh ana sodoh kum 4 masang a Seniority List umsa toh kikal in Vigilance Department vetchil ding in director ana hi Thokchom Kirankumar in July 23, 2020 ni chun Graduate jilkung panmun kalthei dia gontohsa jilkung 1903 ho amin cheh toh ana pelut e. Hiche lah a Graduate Teachers (Arts) – 1097, Graduate Teacher (Science) – 586, Graduate Teacher(Hindi) – 210, Graduate Teacher (Home Science) – 10 ahi.

Hitolhon in Graduate jilkung panmun kalthei ding ho chun B.Ed anei tei ding a Manipur government cabinet toukhom na chun August 6, 2020 nia ana phatsah kit hi Recruitment Rule 2016 noi a Primary jilkung kum 5 hin tong thepna Bachelor Degree nei ho panmun kal thei dia kisei toh jilkung jouse asuhboi lhah ahitai. Hiche hi Article 309 dan Legislature le Executive in achopkhup to thakhat ahikit e.

Panmun kalsang nadia kum 4/5 ngah ngen ahiu tolhon a danthah chepi lou ding le chepi tei ding ahijongle thepna B.Ed nei tei dia kisei hi panmun kalsang ding ngah jilkung ho hopsah lou dia jilkung kiloikhom hon government kom a ngehna anei u ahi.

Ihamtia government in ngehna hi anahsah lou le dan dungjui a kiphinna chelhah pi ding atohgon u  jilkung kiloikhom hon government ahetsah un ahi.

Natoh na akon suspend kibol

Imphal, Aug 31(ET): Bishnupur District sung a PM Kishan scheme a semthu mi tamtah register kibol na case toh kisai in Robert Okram, LA/SDC, Bishnupur, Salam Bimojit Singh, LA/SDC, DC office Thoubal le KH Rahina Shahni, LA/SDC, Lilong chu ana toh na akon suspend akibol taovin ahi.

Manipur a Covid-19 case thah 140 kimudoh

IMPHAL, AUG 31(ET): Manipur a achesa nidan 24 sung in Covid-19 +ve case 140 akimudoh in ahi. Hiche case 140 kimudoh lah’a 103 hi milham ahin chuleh 37 hi Central Armed Police Forec (CAPF) ahi. Chuleh hiche +ve case kimudoh hohi VRDL. RIMS – 16; VRDL, JN1MS – 37: Raj Medicity – 2; Christian Hospital – 1; Jiribam 29; Babina Diagnostics -17: Ukhrul – 4; Thoubal – 13; Churachandpur – 5; Imphal East RAT – 11; Chandel 5 ahi. Amaho chengse chu tun Covid Care facilities a akikoi tan ahi.

Alangkhat’a achesa nidan 24 sung’a Covid-19 akon damdoh mi 91 discharged akibol in ahi. Amaho chu CAPF akon 1. CCC Lamboikohongnangkhonag akon  29, UNACCO akon 34, JNIMS akon 2, RD Wing akon 2, DII Thoubal akon 3, CCC Thoubal akon 17 chuleh DH Tamenglong akon 3 ahi. Chule tuni chan in Imphal West hopsung Sagolband, Thangmaiband, Takhel Leikai, Yaiskul Sougaijam, Chingakham Lcirak, Old Lambulane le Sanjenthong hon containment zone in aum nalai in ahi.

 

Kangpokpi in Corona galjou khat loupitah a vailhun

KANGPOKPI, Aug. 31(UNA): Kangpokpi District Headquarters a pat ASHA worker Hevei Haokip chu CCC le CQC a nikho 28 aumjou le patepna akibol a natna neilou hi a in hung kile chu local CSO le medical department hon jannichun loupitah in availhun un ahi.

Kangpokpi DHQ Ward No. 5 a cheng kum 60 mi ASHA worker nu hi district sung a Covid-19 a nasatah a pan la chu August 1 nia natna nei ahi hetdoh ahitolhon a Imphal Lamboikhongnangkhong Covid Care Centre a jen dia pohlut a um chu August 17 nia nikho 17 aumjou a Covid Care Centre a pat hung potdoh a ama dei nabang le Kangpokpi District Hospital Medical Superintendent toh kihoumat a Kanggui Christian College Community Quarantine Centre a kikhumtup chu damsel a jannia potdoh ahi.

Apotdoh tolhon in Kangpokpi Women Welfare Organization le Kangpokpi Youth Union thalheng ho ban a ASHA ho le medical department thalheng in Dr. Paotinlal Haokip, MS i/c District Hospital Kangpokpi, nute thalheng in Hekim Hangshing, President of KWWO chule khangthah ho thalheng in  Haolet Khongsai, President KYU, ASP Kangpokpi, Lalminlen Misao, MPS abanle senior journalist Kaybie Chongloi ho chun pahvui o-peh in ana lamto uve.

Kangpokpi Town Committee hon jong Chairman Lunseh Kipgen makaina’n vilna le tilkhouna anei un, Dr Paotinlal Haokip in ASHA worker Hevei Haokip natna a pat asochat hin Corona natna chung a jona ichan nadiu ahi, ati.

Langkhat a Corona a pat damdoh Hevei Haokip in hiche natna hi gel nep lou beh ding le chingthei tah le kiveng pum a khosa ding a mipi tepna anei ban a adamdoh kipapi jouse hoc hung ah akipana jong aphongdoh in chujongle hitobang phatsung a natna nei ho lungset le khoto ding in jong mipi tepna abol in ahi.

 

KSO Saikul Block Ambulance thenso hita; CHC Saikul in kipapi

Imphal, Aug 31(ET): Kuki Students Organisation, Saikul (KSO-Saikul) in Ambulance alamdoh hondohna tunin Kuki Inpi Saikul Gamkai in Kuki Inpi Office, Saikul Bazar a ana vailhunna aneipeh in ahi.

Kingon a chun Thangjakam Misao, Vice Chairman ADC, Kpi, Thangkam Lupheng, ADC Member, Thongjalun Mate, ADC Member, Seikholal Haokip, ADC Member, Jeremy Khongsai, Henchon Hangshing, Hopson Chongloi, Thangpu Kipgen, OC Saikul Police, Vivik, Captain 38th AR Saikul post, John Lupheng, MO i/c Saikul, S. Chongloi, Programme Executive, DDK Imphal ho cheng leh Kuki Inpi, KSO, KWU, Haoso holeh Social worker ho panna in Rev. L. Bouylen Kom in Pathen heng’a lhandohna aneiyin ahi.

KSO Saikul President pan aseina ah gamsung le lhangsung’a emergency a natna le boina toh ho ana kidellut ji in amun akilhun teng apohna ding gari a boina aumjeh a hiche Ambulance project hi achesa October, 2018 a chu kihin boipi pan ahin, boina ho Lhangsung Inpi ho kom ana kilhut jouvin amahon haosa hokom eilhutpeh kit uvin hiche jalla tuni Ambulance hi kichodoh thei ahi ati.

Alangkhat a hitobang Ambulance kilamdoh CHC Saikul in akipapi in ahi. Dr. John Lupheng, Medical Officer In-charge, Community Health Centre Saikul min a kipathuphon inseina ah Gamsunga Ambulance Gari khat CSO Saikul in ahin lamdoh hi gamsung mipi dinga vangphat umtah ahin, Gari neilou jeh a alouthei lou a Imphal a emergency a refer kibol ho boina asuhlhap ding ahitai ati. Kum 3 val hi CHC Saikul in jo chan in Nat leh Saat jeh a gamsung mi hon genthei atona ho ahithei chan a suhmang ding hi lungtup akineiyin chule kibol jing in ahi. Hinlah, CHC Saikul a jen jou lou ding Emergency a Imphal langa refer bol ngai ana umjing in, gamsunga mi tam jo gari nei lou ahijeh in jankhang in lung gim tah a boina ana toh jiu vin ahi. Vangset umtah in, abang loikhat Refer kibol namun lhung man lou a Thina ana toh jong ana um in ahi. Hiche ho pohnat najal in CHC Saikul in jochan in sei nathei thei in ana kisei ji in hin lah Ambulance Gari hi akinei thei hih e tin jong aseiyin ahi.

Vangphat umtah in KSO in Ambulance Project anei alolhintah jeh in tu apat jangkhang a CHC Saikul damlou kijen refer kibol ho poh na di gari um loujeh a lungdong tah a ana umjiu chu Ambulance ahung um toh kilhon a ito lou diu kinep na ahitai ati.

Hitobang Gamsung mipi te ding gelna a Ambulance Project lolhin nading a pan hinla ho jouse chunga CHC Saikul in jong kipathu ahung kiphong ati.

Ambulance a hi First Aid, Oxygen le apoimo phabep ajaovin chule koi tobang angaicha amang nom hon hiche Helpline No. +917085928656 houpi jing thei ahi.