Sept 30, 2016 Local news

Sept 30, 2016 Local news

1532
0
SHARE

Indian Army in Pakistan a Terrorist ho Camp bulu

 

Uri:  Army personnel take position after the suicide attack by militants at Mohura Army camp, in Uri on Friday. PTI Photo (PTI12_5_2014_000023B)

New Delhi, Sept. 29: Wednesday nilhah chun India sepai hon Line of Control ana pal galkai’un Pakistan’a galguhbol ho pansatna post ho ana bulu uvin ahi, tin Defence Ministry in Thursday nikho chun ana phongdoh in ahi.

  Defence Ministry a kuon thulhut in aseina’ah, galguhbol ho chu akibulu’n, hatah in ana kitongkhauvin ahi ati. Hiche lethuhna hi abanbol be ding akihechen naipoi.
Alangkhat’ah Pakistan in hiche thuphon hi hatah in anielkal in ahi.

  Pakistan govt. seidan’in hiche ni’a chun kibuluna thilsoh hijolouvin border a crossfiring ana um ahin, Sepai ni’n thina anato a phabep ana kitongkha ahi ati.

  Pakistan Defence Minister Khawaja Asif in Thursday nikho’n aseijin, “Ka sepai ni athi’n chuleh ko (9) akitongkha’n ahi ati. Pakistan Prime Minister Nawaz Sharif in jong thuphon aneina’ah, ” India sepai hon hiti’a buluna tohguon ahin nei’u hi hatah in demna kaneijin ahi” ati.

  Alangkhat’ah, Pakistan te Inter Services Public Relations (ISPR) seidan’in hiche buluna chu Bhimber, Hotspring, Kel leh Lipa sector a kibol ahi ati. India’a kuon’in surgical strike imacha ana umpon, amavang cross-border a kikaptuona ana um ahi ati. I-ham ti’a Pakistan gamsung’a surgical strike aum’a ahileh kilethuh tei tei ding ahi ati.

  Alangkhat’a Dawn thuso in aseina’ah, LoC ah Pakistan sepai ni’n thina atuoh in ahi ati. India in LoC a hitobang tohguon DGMO in aphotchet jouva, “The Dawn” in LoC a kikaptuona’a chun Pakistan sepai ni in thina atuo in ahi tin ana phongdoh in ahi.

  Hiche meithal kikaptuona chu jinglam 2:30 don’a kipan’a jinglam 8:00 chan ana kikaptuo ahi, tin Inter-Services Public Relations in aseiye.


NSCN-IM cadre thum kimat jeh a numei hon NH-2’a apetpet’a bandh bol

Women protestors WEBSADAR HILLS, Sept. 29: Jaanhi nilhahlam nidan 8:15 vel a National Highway 2 juiya um Satyam Industries kom’a 25 Assam Rifles hon NSCN-IM cadre thum ana mat’u tolhonin Senapati District HQ sunga boina sangtah anasoh in ahi.

  NSCN-IM cadre ho kimatna chungchan’a lungkimlou vetsahna’n Nupi ho le numei hon Imphal-Dimapur lamlen anating’uvin, district headquarter sunga um sumkolveina mun ho jouse ana khah’uvin ahi. 25 AR in amat NSCN –IM cadre ho chu Capt.Akas S/o Pukeho, Kaibi village, Lieutenant Ningreishang S/o Wonmi, kachai village chuleh Corporal Elvis S/o N.S.Nikhini, Makhrelui ahiuve. AR in amat cadre thum ho chu Judicial Magistrate 1st Class, Kangpokpi maiya tuni nilhahlam chun ana ding’uvin ahi.

  Akiman NSCN-IM cadre ho apetpet a lhadoh ahina dingin nupi ho le numei ho jaanhi jaan nidan 10 a kipat chun Imphal-Dimapur lamlen a lightning bandh anabol’uvin ahi. Hitolhon chun numei phabep in 35 AR coy, Senapati kelkot maiya jaan nidan 11 a kipat jingkah gei toumun kiphinna anabol’uvin ahi. DC Senapati office maiya jong numei tampi ana kikhom’uvin phatchomkhat jouvin Senapati Police Station kelkot maiya nilhah geijin toumun kiphinna abol’uvin ahi. Phulou helouva bandh aum tolhon chun Taphou Kuki le Karong a mipo gari hole thilpo gari tampi akinohden uvin ahi.

  Akiman NSCN-IM cadre thum ho damle bit a lhadoh ahina ding a district police in pan alahna ding in kiphin na nei numei ho chun ngehna anei’uvin ahi. Ngehna kineiho suhbulhit ahilou le ahunglhung ding nikhoho’a thilse hungsodoh ho SP Senapati in mo akipohding ahi tin kiphin na neiho chun asei’uve. Chuleh Government in protocol juilouva na atoh jing ding’a ahileh Senapati district sung’a police station kikoi hi pan nabei ahi tin numei ho chun asei’uvin ahi.

  Kiphinna nei numei hon aseidan’un Centre Government in Nagate boina suhlhapna ding khohsahna aneijal’a NSCN-IM toh cease fire anei ahi’n, ahinlah Assam Rifles ho natoh hin NSCN-IM le Govt. of India kah a kihoulimna umhi suhmolphou teiding tohguon anei ahi tin asei’uvin ahi.

  Numei kiloikhom lamkai khat in aseidan in Senapati hi ‘Peace Zone’ ahi’n,uniform service ho le milham ho kilungtohtah a achenkhomna’u munkhat ahi. Ahinlah Assam Rifles hin phat khat khat le gamkai sunga chamna umho suhmolphou ding tohguon ahin neijing’e ati.

  Hiche thuso kisut gei chun lightning bandh kibol’a kon deiumlou thilsoh ana sohdoh naipo’n ahi. Chuleh court process jong ichan agei ahi hetchen ahinaipo’n ahi. Vaigeitah a kimu ginchat umtah thulhut khat in aseidan in NSCN-IM cadre thum ho chu medical ground a lhadoh ahita’uvin hitolhon chun lightning bandh joh lahdoh ahitai ati.chun Taphou Kuki le Karong a mipo gari hole thilpo gari tampi akinohden’uvin ahi.


DC I/W panmun’a kon T Ranjit kilahdoh na ding’a CEO Manipur in Sorkar thuhil

Imphal, Sept. 29 (ET): State Sorkar in Deputy Commissioner, Imphal West T Ranjit hi 11th channa Manipur Legislative Assembly election kipat masang’a aganna thei pen’a alahdoh ding’in Chief Election Officer in Thursday nikhon aseiyin ahi.

  Ipijeh’a hitobang thuhilna anei ham ti het ahihih laiyin, ahin, political party phabep in Congress toh kinaina aneiye, tia Election Commission of India (ECI) heng’a hehna anabol u ahi. Alangkhat’a, state sorkar in ECI heng’a lekhathot apeuvin, Imphal West Deputy Commissioner ahina’a kon T Ranjit alahdoh lou diuvin ngehna aneiyui, tin thulhut in aseibe in ahi.


Beneficiary hon NFSA document ho apehlut ding’uva ADC KPI in thupeh nei

nfsa UntitledSADAR HILLS, Sept. 29: ADC Kangpokpi noiya National Food Security Act (NFSA) beneficiary hon domicile, income, Aadhar, Bank Passbook, mobile No. chuleh document poimo ho apehlut diuvin Addl.DC Kangpokpi in thupeh aneiyin ahi. Ihamtia beneficiary hon document poimo ho aphatcha a apehlutlou jeh’uva ration card kikah lha aumle, hitobang beneficiary hon ADC Kangpokpi mo achanlou diuvin jong thupeh aneiyui.


INC’a kilalut MSCP MLA 5 ‘disqualify’ bolna ding’a ngehna Speaker in sanpeh talou

Imphal, Sept. 29 (ET): Achesa 2014 kum’a Indian National Congress’a anakilalut, MSCP MLA 5 ho disqualify bol nading’a petition Tribunal kibol chu, Manipur Legislative Assembly Speaker in asanpeh tapon ahi.

  Tu naicha BJP’a lut’a Manipur State Congress Party vice president anahi Adim Panmei in Indian National Congress’a analut, MSCP MLA 5 hohi Indian Constitution tenth Scheduled noiya disqualify bol nading’a Speaker, Tribunal heng’a petition apeh ahi. Manipur State Congress Party (MSCP) ticket’a 10th Manipur Legislative Election kaidoh’a Sagolband MLA RK Imo Singh, Wangjing Tentha MLA Paonam Brojen, Kangpokpi MLA Nemcha Kipgen, Tamenglong MLA Janghemlung Panmei le Keirao MLA Karam Thamarjit leh office bearer phabep in achesa April nisim 14, 2014 nikho’a Congress Party ‘a ana lut u ahi.

  MLA hohin 10th Scheduled, Indian Constitution dan apalkeh uve, tia MSCP vice president anahi Adim Panmei in MLA 5 ho disqualify kibolna ding’a ngehna anei ahi. Speaker, Tribunal in thutanna aneina’a chun MSCP MLA ho disqualify bolna ding’a ngehna hi alhahsam na aum’e, tin aseiye. Hetthei khat chu petition pe’a Adim Panmei jong MSCP member hitalou ahi’in, achesa February nisim 16, 2015 nikho’a BJP ajop ahitai. MSCP leh INC kipunkhom hi Tenth Schedule para 4 dungjuiyin adihnai, tin tribunal in aseibe in ahi.


Unemployment rate sangtah’a kaltou

Tripura: 2015-16 kum sung chun Unemployment rate hatah in akaltouve tin Labour Bureau akon kimu thulhut khat in aseiye. Thulhut in aseiyin 2015-16 kum a Unemployment rate chu 5% ahi’n, hiche rate hi achesa kum nga sung a ding a asangpen ahi. Unemployment rate akaltou hi centre a vaihom BJP ding a molphouna khat ahi. Ajeh chu BJP hin gamsung a um khangdong ho natoh pehna ding a ‘Make in India’ chuleh scheme dang dang ana boldoh ahi.

  Fifth annual employment-unemployment survey kibolna a mudoh ahidungjuiyin, India sung a cheng Insung jakhat lah a somsagi le sagi vel hi lhalo neilou ahi’uve. 2013-14 kum sung a chu unemployment rate 4.9 percent vel anahi’n, chuleh 2011-12 sunga chu 3.8 percent anahi’a , 2009-10 a chu 9.3 percent anapha’n ahi.(TOI)


MLA Nemcha in earthquake victim ho dinga kisa Inn le Mandir khat hondohna nei

Kpi AC MLA WEBKaybie Chongloi
SADAR HILLS, Sept. 28: Sadar Hills administrative jurisdiction hopsunga um Lamchok Irang Part-I a Ling in a’Inn le lou anasuhset ho chen na ding Inn kisaho le Durga Mandir teni chu tuni’n Kangpokpi AC MLA Nemcha Kipgen in hondohna aneiyin ahi.

  Tuni kinguon a chun Bhumi Prasad Vikas Basnet, Executive Member; Local MDC Sagar Gewali; Tujang Waichong MDC Seikhosat Kipgen; Keithelmanbi MDC Lamminthang Kipgen chuleh MDC Milan Pradhan in Nemcha Kipgen ana kilhonpi’uvin ahi.

  MLA Nemcha Kipgen in kigon a ahoulimna a chun, Manipur a vaihom congress sorkar hin amite gelkhohna aneiyin chule aboina ho’u le ahahsatnaho’u suhlhap pehna ding in na atongjing’e ati. Nemcha in aseibena a chun Kangpokpi AC sung sunglampeh a hitobang na kitongna hi amasapen ahi ati. Achesa kum nga sunga hin Lamchok, Thaldara, Ghimiri, Harup Khopi, Gorkha Harup,Rijadhar chuleh Kharpani a Government LP, IJB, Primary chuleh junior High School phabep akitungdoh in water supply, road connectivity chule PDS agent jong kituptah in akisemdoh’e ati.

  Lamchok a pat Maedara gei (km 15 vel sao) black topping bolna dingin Centre Govt. in phalna apeh ahitan PMGSY noiya lamlen semna natoh kipan vahding ahitai tin Nemcha in aseiyin, chule Chawangkining a pat Gorkha Tapon gei lamlen semna natoh jong kipan vahding ahitai ati.

  Durga Mandir hondohna kingon a ahoulimna a chun, “Pathen hi khatseh bou ahi. Jat le nam chom chom in pathen ihoudan’u akibahlou thubou ahi’n, pathen khatseh bou ahi’n eiho hi achate ihiuve” tin Nemcha in aseiye.

Gamkai sung a cheng Nepali ho achen na muncheh’uva kiholtah le chamlhat tah a achen ding’uvin MLA Nemcha Kipgen in temna aneiyin ahi. Voter/Adhaar Card hi India citizen ihiu photchetna ahi’n, land le grazing tax kipe hin Government gam a cheng ihi’u aphotchen ahi tin Nemcha in aseiye.

  Alangkhat’a, lamchok Village Chairman, Man Kumar Yogi in MLA Nemcha chung a akipana thu aphongdoh in ahi. Man kumar Yogi in aseidan in MLA Nemcha hi amite ngailutah lamkai khat ahi’n, akom a igentheinaho jong hasei ngailouva hetthei jeng mikhat ahi ati.

  MLA Nemcha Kipgen kilhonpi ADC Sadar hills member hon kingon a chun houlimna aneiuvin, hitolhon chun local MLA in gamkai sung a cheng mipi ho angailutdan aseiphong’uvin ahi. Tuni kingon a chun Nepali hon cultural dance le jaila phabep vetsahna anei’uvin ahi. Kingon kichai chung akikhom mipi cheng le lamkai cheng in ankong asohkhom’uvin ahi.


Delhi University in Syllabus a Hindi subject compulsory hisahna ding aguotna chunga NEFIS in demna thu sei

Imphal, Sept. 29: DU syllabus a Hindi compulsory hisah nading kigonna chunga hin North-East Forum for International Solidarity (NEFIS) in demna thu aseiyin ahi. NEFIS in aseina a, hiche thilbol hi India sunga gam chomchom a hung simlai ho vetchuomna dinga kibol ahi ati. Hetthei chu DU in kum masa langin jong DU syllabus a Hindi compulsory hisah nadingin anagong’un, hin ana chelhathei pon ahi. Tuchungin jong hetsahna (notification) imacha umlouvin abolgo kit’un ahi tin NEFIS in aseiyin ahi. Hetthei chu achesa kum 2013 in jong DU a simlai ho chunga Hindi/MIL simsah ding tohgon ana neiyun, hin NEFIS makaina noiya simlai tamtah in kiphinna ananei jeh’un, DU in order chu anung ladoh’in ahi.

  Syllabus a Hindi koiteitei dia kibol hi gampam a kon hung Hindi pao helou simlai ho adeh’a North East miho dinga hahsatna lentah le minung phah lelna hiding ahi ati. North East simlai ho gelkhohna neilouva kibol go thil hi amasapen ahipoi tin jong aseiyun ahi. Chuleh NEFIS in aseibena a, DU authorities in hitobanga thil abolgot uhi, NEFIS in North East simlai hotoh kitho khom’a kiphinna khoutah bol dingin aseiyiu.


Assam Rifles in World Heart Day nit

Assam Rifles WEBBishnupur, Sept. 29 (PR): HQ IGAR (South) noiya um 12 BIHAR battalion (9 Sector Assam Rifles) in Nambol, Bishnupur district ‘a World Heart Day kin ana mang’un, sepai ho le Veng miho kikah’a kingailutna aumbe cheh theina ding leh khangdong ho kichep golseh lam’a lunglutna aneithei nadiuva jong kin ana kigong than ahi. akom’a themjilna mun ho’a kon, NCC leh Kennedy & ABBA Boxing Clubs a khangdong tamtah jauna’n “Run for Fun” jong ana bol’un ahi. Kin chu DSP, Nambol Police Station, RIMS thalhenga Dr. Gambhir chuleh 12 BIHAR officials ho jaunan ana kimang’in ahi. Manbeiya kivetsahna (free medical camp) jong ana hongin, lou le ai ho jong ana hom doh uvin ahi. Kingon na a chun mi 250 tobang ajauvin ahi.Kichep Golseh a pachangho le ajauho kipaman hopdohna jong ana neiyun ahi. Nambol kho mite kin kibolna chungin akipah lheh uve, tin press release thulhut chun aseibe’n ahi.


(L) Khaikhanlian Memorial District Ist Division League -2016 kipan

Lien Gangte
Ccpur, Sept. 29 (ET): Ccpur District Sports Association (CDSA) gonna in 29th Sept., 2016 nilhah nidan 2:00 apat chun (L) Khaikhanlian Memorial District Ist Division League – 2016 hondoh na kin-gon aum in ahi. Hiche kingon toh kilhon in, Chief Guest in T. Khaikhomang, MDC, Chairman, Fin. Commtt., ADCC apang in, chuleh Guest of Honour in Thanglal Haokip, President, KKL Thangting Block ahi. Chuleh Guest of Honour, Thanglal Haokip, President, KKL Thangting Block in asei na’ah, Ccpur Dist. sung’a Football kichiem mi ho dopsang na ding a (L) Khaikhanlian hetjing na ding a insung mi ho’n District Ist Division League – 2016 sponsor ahin bol na chung uvah apa chat thu aphong in ahi.

  Chuleh, Ccpur District Sports Association (CDSA) in Khangdong Football kichep lunglut mi ho amasang diu gelkhoh najal a pan alah nao apachat thujong aphong in ahi. Kichiem mi ho umchan thiem ding leh lamkai ho jadan thiem ding in hiche league a kichem ding ho tilkhou thusei na jong aneiyin ahi. Chuleh, Chief Guest T. Khaikhomang, MDC, Chairman, Fin. Commtt., ADCC in asei na’ah, (L) Khaikhanlian min a kichem ding ihi nao ka ngaisang in, kichep golseh hin jat le nam akhen po’n, hiche league in kito na leh kingainat na ahin lhut ding akinep na thu aphong in ahi. Chuleh, State League changei a pang ding in (L) Khaikhanlian Memorial District Ist Division League – 2016 a kichem ding ho adeisah na thu jong aphong in ahi.

  (L) Khaikhanlian Memorial District Ist Division League – 2016 hondoh a aum toh kilhon in Opening Match ah New Lamka Youth Club (NLYC) leh Zoheisa Football Club ho akichem uvin ahi. NLYC in ZOFC 2-1 in ajou uvin ahi. Chuleh, 30th Sept., 2016 nilhah nidan 2:30 le GSC leh NVYC ho kichem diu ahi. (L) Khaikhanlian Memorial District Ist Division League – 2016 a hi Club 12 ho’n kitet na anei diu ahi.


Inn mun’a bomb kikoi

Imphal, Sept. 29 (ET): MAHUD ‘a natong, Nungei Meitei Leikai’a cheng Khaidem Ajit Kumar Meitei, s/o Ibochou inmun’a Chinese hand grenade khat akimudoh’in, Lilong PS noiya um Kumar inmun’a bomb kimu hi gate kom’a kidalha ahi. Manipur Police Bomb Squad hon bomb lolhing tah in aladoh tauve.


‘Character assassination’ case bol

IMPHAL, Sept. 29 (ET): Deputy CM Gaikhangam toh lim akilahkhom pet kitahlang chung’ah numei khat in ‘character assassination’ case khat abol tan ahi. Hiche nu hi koi dang hilouvin Congress party former state coordinator anahi, Swany Keisam ahi. Hitobang natoh phalou tongho chung’a aman hiche case hi abol khum dan ahi. Thursday nikho’a press conference abolna’ah, Kwatkeithek veng mi leh Congtess party (MPCC) active member Swany Keisam in phondohna anei ahi.


Editorial web featured - 200px

Kikichato leh kinoiseto inheng louheng teni

  Gal kiti hi koiman adeilou vanga ahamdoh sehleh galboldi thu bou sei hi inheng louheng hia ui le kel bangjing jeng India leh Pakistan ahi. India leh Pakistan hin British akon’a Indepent anamulhon kipat pat apat anakigalpeh lhon gal thupi tah thumvei anakisatlhonsa jong ahi. Ahin tuchung’a Kasmir a thingnoi ho leh Indian Army ho kithatona akon hin hiche gam teni kikah ah gal kiboltodi thu ahung hagindoh dehseh kit tan tulang hin asangjep jep in Pakistan Defence Minister Khwaja Asim in Inidia kichaidoh (kinuoimang) di ahi ti’n ahinseitai. Hitobang gihna hi athah beh ahipon sot a pat khat le khat kithaimangto jeng dia kigihtona ana umjing peh ahi. Tuchung gal thu hung nai hi achesa July 8 nikho’a Jamu & Kashmir gam’a thingnoimi (terrorist) lamkai Indian Army hon anatuppen u Burhan Wani anakaplih uva kon ahi. Burhan Wani kitha a pat chun Kashmir gam’a mipi kiphinna ana khucheng jengin achesa lha 2 sung chu niseh taobang Curfew um’a mipi leh police/Army ho kinotona’a milham 50 lang jong sepai/police hon akaplihlo kit ahi. Thu umdan tuni geiya phadehloulai ahi. Hiche kikah hin achesa September 18 ni chun Pakistan a kon pansa galguhbol thingnoimi hon Kashmir a Uri kho ah Indian Army ho ana bulu un sepai 18 anakaplih uve. Kashmir a galguhbol hohi Pakistan sorkar in atosot ahi photchetna India sorkar in tamtah aneijing ahi. Hiche jeh-a India in Pakistan bolchah dia agihjing’a tua hi Pakistan gamsung’a thingnoimi ho pansatna leh Training bolna Camp ho nokhum jengdi ahinti kit ahi. Achutileh Indian Army in vanleng leh Missile (bomb po Rocket) hojong amanchahdi tina, sepai honjong gamgi apal diu tina ahi. Pakistan hin lethuhna pedin Pakistan Army ho akigojing uve atikeu u hitalouvin “India in eihin nokhum pou-pou uleh India kichaidohdi ahi” tia gihna hiche a-Defence Ministerpu uhin ahinsei ahi. Pakistan in India chaidohdi ati chu Nuclear Bomb (Atom bomb) a India khopi ho sekhumdi ti ahi. India inla Pakistan sang’a Atom bomb haojo kit ahijeh in tahte tia akibol lhonleh akuoi-kuoi dia manthahna hidi ahijong anilhon’a ahetlhon kit thou ahi. Hitobang galmanchah nei jeh a kikichato lhon, nuoijong kinoiseto lhon ahi. Ahin Pakistan in India khopi phabep chaidoh jongleh India chu alet jeh a North East India, South India, Central India abon’a ima alothei dehloudi, North India khopi khat le ni abulu kah a Pakistan gam pumpi vutvaiya lengmangdi ahi ti hi India a Defence lang’a hetna sang neiho sei ahi.

  Aboina tah hi alang lang’a ‘fanatic’ (mi ngol tidi) umjeh ahipen’e. Pakistan Civil govt lamkai hohi India dehgun jong hilou u, ahia hou lamkai leh thingnoi ho thu thua um ahijeh uva amaho seisei aseijeng u, akhohleh boljong aboldiu diu dinmun ahi. India a-jong PM Modi leh anungjui ho hin galboldi aphatsah dehlou u, ahia Hindu Fanatic langhon Pakistan chung’a gal boldia ahatil kit u ahi. Gujarat a kon Hindu (Shiv Sainik) mi 30 lang’in Pakistan buluna din Bomb to pokehtha jeng ing’e (Human Bomb) tia kipehdohna anei u ahi. Kumseh October lha a UNO Assembly umdi kon sehleh India le Pakistan hi haboiya kiboiji mong ahi. Pakistan in Kashmir thu UNO a pohdohdi ti jeh hikit ahi.


*For more news, articles etc. please click “ET IN PDF.”