Sept 27, 2016 Local news

Sept 27, 2016 Local news

1558
0
SHARE

Flood victims Demand Committee Chandel in phat-teplou Economic Blockade bol

20160926_110940 - webLetmang Haokip
Chandel, Sept. 26 (ET): Government in 2015 kum’a tuilet jeh a boina toh ho relief fund apehdoh lou jeh a, Flood Victims Demand Committee Chandel in phatteplou Economic Blockade chu tuni’n apantauvin ahi. Gamkai sunga niseh kimanchahna hatah in atongkha in ahi. Indefinite bandh toson hon tuni jingkah a kipat chun Imphal-Moreh lamlen juiya um Thamlapokpi vangkho le Liwachangning kom’a um District Headquarter a lamlen ating’un ahi. Imphal le Moreh kikah a lhai gari ho jong Thamlapokpi le Liwachangning a ana tingtan’un, thilkeu ho alahpeh jouteng’ule a lhadoh jiuvin ahi.

  Flood Victims Demand Committee Chandel ,Convenor Bd.Betha in thuso miho henga aseiyin, September nisim 24 jaankim a kon National Highway a phatteplou economic blockade kibol hi government in relief fund apehdohlou jeh ahi ati. Democratic agitation kibolho le memorandum kiseplut ho mopohna neiho’n donlouva akoijeh a phatteplou economic blockade kibol ahi’n, state sorkar le mopohna neiho’n fund ahinpehdoh loulaiseuva economic blockade kiboljing ding ahi tin aseiye. Chuleh State Finance Department in tuilet jeh a boina toh ho dia Dk.4,29,97500 apehdohna dia pan nasatah hinla Ex-MLA Bd.Behring chungin Bd.Betha in akipanathu a phongdoh in ahi.


Themjilna mun ho’a pol VIII chan Kuki pao hetpehna um tading

Imphal, Sept. 26 (ET): Government of Manipur, Secretariat: Education (S) Department’a kuon thuphon kimu’n aseina’ah, Chairman, Kuki Literature Society, Manipur in gamsung’a themjilna mun ho’a Kuki tribal dialect hi pol VIII chan’a hetpehna (recognition) ding’a ngehna aneitoh lhon’a Director, Language Planning & Implementation, Manipur in proposed ahin bol toh lhon’in State Government in khuolchilna (examination) anei tan ahi.

  Hetthei chu Manipur gamsung’a hi tribal dialect agom’a 39 um ahin, hiche ho lah’a som-le-sagi, tichu Thadou-Kuki, Paite, Hmar, Tangkhul, Vaiphei, Kom, Kabui/Rongmei, Poumai, Gangte, Mao, Zou, Mizo, Liangmei, Marm, Anal, Maring chuleh Simte hi govt in hetpehna aneisa ahitan, Adang som-le-ni cheng se hi hetpehna umloulai ahina ban’a khuolchilna (examination) um ding ahitai.

  Tribe khat in aham leh apao hetpeh’a aumtheina dinga’ asuh bulhit ding ho chu ahileh tribe amihing jat agom’a 10,000 sang’a lhomjo louding, a tribe in ama ama ham le pao a newspaper, magazine leh simthei adang dang anei ding, Language/dialect’a ama ama lekhabu (text book) anei ding tiho asuhbulhit angaijin ahi.

  Hiche hi Kuki tribe in asuhbulhit toh kilhon’a Class VIII chan hetpehna um ding ahitai. Chule Kuki population hi agom’a 28,306; kho agom’a 55; school agom’a 55 chuleh lekhabu simthei agom’a 31 um ahi, tin thulhut chun aseiye.


CM Okram Ibobi in BJP demna nei; BJP in avaihom sung’a tohdoh aneipoi, tia ngohna nei

congressImphal, Sept. 26 (ET): Chief Minister Okram Ibobi in Monday nin BJP demna thu sangtah in aseiyin, kum ni-leh-keh party in vai apoh sungin ima atongdoh pouvin ahi ati.

  1st State Level Mahila Congress Campaign Committee Meeting, Manipur Pradesh Congress Committee kin-gon kiman na Congress Bhavan’a Chief Guest ‘a pang CM Ibobi in, BJP hohin khantou machalna hi athu’a bou asei tho ahi’in, anatoh’a avetsah ngailou ahi, tin aseiye. Gamsung’a khantou machalna tohgon phabep hi Centre’a BJP in avaihop jeh’a maban chelha thei louva khongaiden ahitai, ati. Chuleh state sorkar in National Sports University sahna dia gam leiset anagon toh vangin, Centre a BJP sorkar in agel khoh loujeh a chelha theilou ahi tinjong ngohna aneiye.

  NIT hi kum 5 alhin tah vang’a, Institution machalna ding’a tuni chan geiya sanction ima umlou lai ahi, tin jong aseiye. Union Minister ho gamsung’a ahung kholjin jing thu’a Ibobi in, BJP Minister ho gamsung’a ahung uvin, thu asei uvin, ahin, project ‘a ding’a ima sanction bol louva akile kit ji tauve, ati. Amaho hi gu the’a hung ahi bouve, tin demna aneiyin ahi.

  Gamsung miho angol’a aumpon, amaho hi khantou machalna ding’a natong’a hung ahi pouve, tihi Manipur gam-mi hon ahetsoh ahi, tin aseibe’e. Chief Minister in term thum kijom’a avaipoh ahitan, hiche sung’a MPCC in machalna tohgon chom chom abol doh ho aseiphong ding ahi. Chule state’a Congress party in sorkar ahinsem kit ding ahi tin CM in lhamonna thu aseiyin ahi. Mahila Congress Campaign Committee toukhomna hi MPCC President TN Haokip in alamkai ahi. Social Welfare Minister, AK Mirabai, MLA O Landhoni, MLA Nemcha Kipgen, General Secretary, AIMCC (i/c Manipur) Jarjum Ete , President, AIMCC, Sobha Oza, MLA K Ranjit, MLA Loken, MLA Victor Keishing jong guest of honour ‘a apang uvin ahi.


Irom Chanu Sharmila in Delhi CM Kejriwal kimupi

sharmila and kejriwal
Imphal, Sept. 26 (ET):
AFSPA crusader Irom Chanu Sharmila in New Delhi khopi’a Chief Minister Arvind Kejriwal Monday nikhon akimupi in ahi.

  Sharmila leh women activist Shivani Wangkheimayum New Delhi jon’a Monday jingkah’a Imphal khopi dalha’a kipandoh-u ahitai. Sharmila in tu masang’a jong Delhi Chief Minister akimupi nom na thu anasei ahitan, chule Congress sorkar suhlhuh nading leh Delhi Legislative Assembly election’a BJP thanei chou ding adei ahi.

  Thulhut kimu dungjuiya Sharmila in Monday nikho nidan 2.30 ‘a Arvind Kejriwal akimupi ahi’in, minute 45 vel toukhomna aneilhon ahi.

  Amani kihou na thu hi tuchan in het ahihih laiyin chule Sharmila injong thuphon anei looulai ahi. Delhi khopi’a kon Chandigarh khopi’a International Youth Convention ‘a pang ding’a Sharmila che pai ding ahi’in, September nisim 28 leh 29 nikho leh umding ahi.


Mapithel Dam twi kilhadoh nading’a thumna um

Mapithel-DamImphal, Sept. 26 (ET): Housing and Land Right Network (HLRN), Mapithel Dam Affected Villages Organization (MDAVO) leh Centre for Research and Advocacy, Manipur (CRA) hon Monday nikhon Mapithe Dam ‘a kon twi alha diuvin thumna anei uvin ahi.

  Chairman, MDAVO Dominic Kashung in hiche thu’a PMO office in pan alah liemna thu aseiyin ahi. HLRN in PMO heng’a memorandum apeh donbutna ahi. Rights Organization in Monday nikhon state sorkar heng’a Dam Reservoir ‘a kikoi twi alhapeh diuvin thumna aneiyun chule Thoubal vadung twi hi angaiya bang’a alon sah diuva thumna aneiyu ahi. Phailei kibolna, gam chule kihin so na’a kimang adang dang ho twiyin achup hi sorkar in angah nading’a temna jong aneiyui. Chule sihnei langneina umlouva Mapithel in atohkhah insung mite ‘rehabilitation’ leh ‘resettlement’ asem peh diuvin aseibe in ahi. HLRN Director Shivani Choudhury leh CRAM President Sanaton Laishram jong thuso miho toh kimuto na’a apang in ahi.


Malaysia jail’a tang khat ZPHREF Ccpur in huhdoh

dd9cfc09-f924-4c19-9ff5-0a6906555c4e - web
Imphal, Sept. 26 (ET):
Mr.Zamkhothang Haokip s/o (L) Ngamkholet Haokip h/o Nemkim Haokip, Moreh Ward No.2 document neilou jeh a Malaysia jail a kumkhat um , a’inkoten jong angaituona je helou konkhat in athidan a akoitasa’u chu tuni 26th Sept. 2016 jingkahlam nidan 10:30 vel in Imphal Airport ahunglhungtan ahi. Amachu Sesei Zou Chairman ADC Chandel le Zou People for Human Rights and Empowerment Forum,Convenor Khamchingpau Zou le member hon ana vailhun un ahi.

  Convenor K.Zou in mipite heng’a temna aneina’ah , gamdang (foreign) lut masang’a document neitei tei dingin aseiye tin Lamsianmuan , Public relation in-charge ZPHREF a kon kimu thuphon chun aseiye.


Kangchup’a alivei channa ding’a PDS anchang kihomdoh ta

23e88cc6-e502-4e75-989d-b102319a275e - webSadar Hills, Sept. 26 (ET): Kangchup Area Tribal Youth Organisation (KATYO) makaina noiya Kangchup SDC/SDO Campus mun’a Agents ho le 13th Kangchup MDC , S. Damma Vaiphei jaona’n Kangchup Public Distrubuttion System, Kangchup Centre’a PDS Anchang hopdohna kin ana um in ahi. Phat chomkhat PDS Anchang chung’a mipi lungboi/lungkimlouna chung’a Kangchup MDC pun hilchenna aneijin, PDS aphat cha hungjilou chule deibang’a akihop theilouna hi aum ding dol PDS Godown um lou jeh ahi ati. Hijeh chun hiche lampang’a mopohna nei Government Official hon jong mipi ding gel na’a akinthei pen’a PDS Godown umsah ding in hetsahna le tiemna aneijin ahi.
KATYO injong tua pat Agent hon mun dang hom talouva Kangchup SDO/SDC campus mun’a bou ahop diuvin hetsahna aneijin ahi. Hetthei khat chu hiche hi Kangchup Area sung’a ali vei channa Anchang kihopna ahitai.


Tribal Carnival Festival 2016

Imphal, Sept. 26: Nisim 24 October nikho’a New Delhi mun’a kipan ding Tribal Carnival Festival a thanopna nei Sadar Hills, Churachandpur leh Chandel district a koun BJP member hon Tongmang Haokip IRS Retd. State Executive Member, BJP, Manipur Pradesh toh October 4 masang’a kijahmat tuo thei ahi.

  Manipur akon member 400 tobang in nisim 21-10-2016 tengleh Imphal apat Dimapur chan bus a cheding chuteng leh Dimapur apat New Delhi chan train a cheding ahi. Hiche’a hi member ho Rs. 3000 cheh chele kile na ding’a ahin pehlut masat diu, nehle chah jouse Ministry of Tribal Affairs, Delhi in apuohdoh ding ahi.


“7-days Basic Course in News Reporting” Ukhrul’a ana kithenso ta; Thusoh mi ho kingaichabe

Imphal, Sept. 26 (DIPR): Ukhrul a “7-days Basic Course in News Reporting” kin gon kithenso na’a chun Director Information and Public Relation, Meghachandra Kongbam’in Manipur a chendan khantouna le phat theina dingin pao le ham chomchom a thusoh miho ngaichatna aum’e tin aseiyin ahi. Hiche kin gon chu State Institute of Journalism of DIPR in TTA Hall, Hamleikhong Ukhrul mun’a anabol ahi.

  Meghachandra Kongbam in aseina’a chun thusoh mi hohi japi natong ahiu tokilhonnin, mopohna lentah nei ahiuve ati. Thusoh mi hon mass communication media adeh’a Press, Radio, TV, Film chule Social media toh kithokhom’agamsunga mipite thupeh leh hilna in apang’un ahi. 7-days Basic Course kibolna jeh chu thusoh ho hoithei na leh khantoutheina ding toh thusoh lampang langa thinglhang langa cheng lunglutna nei khangdong ho phatchom theina dinga kibol ahi tin thulhut chun aseiyin ahi. Hitobang course hi lhakit le Senapati district headquarter a kibol kit ding ahi tin jong DIPR kon’a thu kimu chun aseiye. Tuchung Course ahi mi 20 bou lah dinga kibol chu numei mi 4 ajauvin, agom’in 24 alhingin ahi. Basic training course hi October 3 le khumkhana kibol ding ahi.


Tuibong Women Welfare Association in khamnathei bol khat mandoh

4f174fc5-7067-45ca-83ab-55c80d983202 - webCCpur, Sept. 26 (ET): Tuni nilhah lang pung 6 don chun Tuibong Women Welfare Association (TWWA) in Chinneilam w/o Seilam , Canaan veng’a cheng nuhin, Nu Thethem inn’a sum 7,000 (sang sagi) aguh laitah ana man uvin ahi. Athilpoh ho jong kholchil na anei uvin ahi.

  Hiche kholchilna’a chun WY Drugs tamtah toh akichepna silver paper jong ana mattha uve. Chuban’ah Churachandpur sung’a dukan ho’a puon mantamtah tah le Kengkoh tamtah aguh ho jong amanthauvin ahi. Hetthei khat chu Tuibong Area Youth Club (TAYC) le Tuibong Women Welfare Association (TWWA) hin janseh le Tuibong khosung ahi gucha le khamnathei bol ho velha’a duty apoh jing’u ahi.


Nepali ho kigihna

Imphal, Sept. 26 (ET): Tunin Kangpokpi police OC leh Kangpokpi SDC in Sadar Hills Senapati huopsunga’a Thonglang Atongba kho ah agachelhonin haosa ho kom ah alhanga cheng Nepali hon Naga te kom’a Tax apehdiu thua gihna ananei uto kisaiya boina abollou diuvin agahetsah lhone. Thonglhang vel IT Road a hi Nepali ho tamtah cheng u ahi. Tunaicha a chu Grazing Tax thu a L:iangmei Naga hon Nepali ho ana gih u ahi. Nepali hon Naga ho koma gam tax apehdiu thu a boina aumlouna din Liangmei Council leh NPO ho hetsahna jong police SP Senapati in ananeiye.


Wakotphai MDC thah in kihahselna neita

SADAR HILLS, Sept. 26 (ET): 8-Wakotphai DCC a athah beh’a kilheng doh District Council member Seilen Lhoujem chu T. Manihar Singh, MCS, Addl. DC Kangpokpi in tuni’n kihahsel na ananeisah ta’n ahi.

  Hiche kihahsel na kiguon’a chun Haokholal Hangshing, Chairman, ADC Sadar Hills, Thangjakam Misao, Vice Chairman, ADC Sadar Hills, Executive Members chuleh DLOs, SHADC, Kangpokpi official leh staff ho anapang’uvin ahi.

  Seilen Lhoujem hhi tu naicha’a 8-Wakotphai By-Election a akitet pi BJP candidate pa chu 396 vote a anakhel’a anakai doh ahi. Kinguon’a chun Rev. Y. Haokip in vang thumpehna taona jong ananeiyin ahi.

  Haokholal Hangshing, Chairman ADC Sadar Hills in lemna thu aseina’a chun tuchung’a Seilen Lhoujem in ADC Sadar Hills member ding’a kihahsel na aneihi Government nominee 2 jaona’a 26 member alhitna ahin, District Council Sadar Hills thusim’a ding’a amasapen leh hetjing ding khat ahitai ati.

  Aseibe na’a chun district council member ihung hileh kipana sangin lunggim na atamjoji’e ati. Ajeh chu gamsung’a hin district council ho phaten manchah thei hijongleh Government in district council ho nganse na lhingset ape naipoi ati.

  Member thah Seilen Lhoujem in local MLA Nemcha Kipgen, Chairman Haokholal Hangshing chuleh aloi apai, kho Haosa ho leh alolhin na’a pan hinla jouse chung’a akipana thu aphongin ahi. Kinguon kichai lam chun Sadar Hills Autonomous District Council administration in aguon chadon khomna jong ananei’uvin ahi.


Editorial UntitledKum 6 lhalo kipelouva lhalo pehdi kiholbe

  Senapati district a Contract Teacher agom’a mi 136 lang’in kum 6 contract a naa ahintoh nung uva lhalo khatvei cha asankhah lou u thu hi thil kidang khat ahi. Hiche jeh-a hi Contract Basis Appointed Teachers Association (CBATA) ti kiloikhomna nuoiya kkiphinna’a Imphal-Dimapur Road leh Imphal-Jiribam Road a phat teplou ‘economic blockade’ ahin tiu ahi. Hitihchan nikhotha sanglouva ana umjing uchu nikhat leh apunin kimunte tia ana kinep jeh ujong hidi ahi. Ipi hileh kum 6 langjen lhalo sanglou, kipelou chu Contract a natoh kilahna a hi a ‘Rule’ juilouva ana kimoh lah u ahidem ti jong doh thei leu ahi. Contract a government service khat bol hi ni khat leh Regular hung kihinte ti kinepna neipum’a tong ngen ahi. Ahin Contract a kiti chu Regular lhah teitei di tina jong umdehlou, kum ijat, lha ijat a dia natohna ham ti Department Rule dungjuiya soi (sign) kikaitona jong umdidol ahi. Hitobang umjilou jeh hitam, khatvei veileh Contract Teacher hon kiphinna ahinnei jiu hi akijajing’e. Tua Contract Teacher thua Economic Blockade bol ho hi Senapati District a ho ahiuvin achutileh District dang’a Contract Teacher hon lhalo amu uva, a service u ‘regular’ hitam? Tua Senapati district a Contract Teacher kiti hi High School ham, Primary school ham, Secondary school ham jong kichiehlou ahi. Akiphinnau hi kum 6 lhalo mulou jeh leh Regular lhah lou jeh ahi. Thinglhang’a Contract Teacher ho thu a KSO, ANSAM leh ATSUM honjong kiphinna ana tijing u ahi. Ahilouleh Senapati district a hohin amaho bou akiphin ujongleh koima dang ngaichalou dan’a kigel u ahidem? Local MLA (Senapati district a kon MLA) ho tojong athu hi govt kom’a alhut jingsauvin akiseijin aphatchom louleh govt in donsea akoilou u mong ahidem, daan le mol (Rule) jeh a boina um ahidem, ahilouleh govt in sum pehdi aneilou ahidem hidi ahi. Khatvei veileh govt in nungdi madi gel lou, sum le pai dinmun velouva Contract a natoh ho amoh lahlahna tam, abang chu Regular ahunglhah leh a ‘pension’ nadi nailamji tam ahi.

  Contract le Part Time a Teacher (oja/jilkung) natoh kipe hohi atongho ‘qualified’ (thepna) loujeh hilouva sum dinmun hahsat jeh a ‘Regular’ a kila lou u ahijoi. Kum 6 lang lhalo kipelou loi kisei vang’a tua election hung naito lhon’a department tamtah a Regular a di natohna (service) lahdi ti umjing ahi. Govt Finance lang dinmun hethem ho seidan abahleh tua Police department jaona’a department tamtah a ‘recruitment’ (service kilahna) kibol hi itijongleh lhalo ahung kipehna diu hahsa ahi. Politics lang’a hetna neihon aseikit uleh hitobang (recruitment) hi govt in henasa’a abol, ijem tia govt ahung kikhel jongleh aban hinpodi ho dia pohgih leh boina lentah notkhum di ti ahi tia seiloi aum’e. Senapati district a CABTA hohin tuchung Recruitment twi kicholohna’a hi jaoteidi (Regular hiteidi) atiu hintin twilah a khelut cheh in ahung pang diuvem seithei ahipoi.


*For more news, articles etc. please click “ET IN PDF.”