Sept 26, 2016 Local news

Sept 26, 2016 Local news

956
0
SHARE

MU authority’in September 28 kah’a thu kidongho hilchetna apehlou le MUTSU ten 29 le kiphinna pan di

MU_Protest_20140308_14Imphal, Sep.25 (ET):Manipur University Authority in September nisim 21 le 22 nikho teni a thuphon aneihou September nisim 28 masanga suhthengna aneilou le September nisim 29 a pat kiphinna khoutah kibolpan ding ahi tin Manipur University Tribal Students’ Union (MUTSU) Information and Publicity Secretay, Hekai Lhouvum a kon kimu thulhut chun aseiyin ahi.
Thulhut in aseiyin MU Authority in thuphon aneina’a chun Amendment 2012 (34%) akijui e atin ahin state norms (31%) jong ajuipoi ati.

  Thulhut in aseibena a, MU Authority in Central Government Policy CEI (Reservation in Admission) Amendment Act, 2012 akijuiye ti’a asei hi simlai ho kikah a, jat le nam thu a boina umna dia sagu kisep ahi ati. UGC in June nisim 3 nikho a thupeh anei banga MU Authority in tunigeiya na atohlou hi ipijeh ham tin MUTSU in thudoh anei in ahi. Chuleh Delhi a UGC clarification lading a kalsong MU Authority ho’n UGC clarification alahjou nunga admission bolding tohgon aneilou ‘u hi ipijeh ham tin MUTSU a kon kimu thulhut chun thudoh anei in ahi.


Contract teacher hon Sept 26 jan-kim’a kon phat teplou ‘economic blockade’ bol ding

Imphal, Sept 25 (ET):Lha-lo kipeh lou jeh leh post regular kilhah sahlou kiphinna vetsahna’a Contract Basis Appointed Teachers Association (CBATA), Senapati district in September nisim 26 jan-kim’a kon Imphal-Dimapur lamlen leh Imphal-Jiri lamlen ‘a phat teplou economic blockade akou’un ahi.

  CBATA president Karang Rangmei in thuso miho akimupi in, achesa 2011 kum’a Manipur sorkar in contract teacher 136 alah ahi, ati. Ahin, tuni chan geiya akilheng doh teacher hohin kum 6 lhingset lha-lo amulou’u ahitan chule contract teacher ho regular lhah nading’a sorkar in tohgon ima aneilou ahi, tin aseiye. Hiche thu hi local MLA leh mopohna nei department ho heng’a kipodoh’a chule September nisim 17 nikho’a nikho sagi sung’a hiche thu suhchet ahina ding’a ‘ultimatum’ jong kipelut ahi, ati.

  Ahin, hiche thu akisei doh loujeh’a CBATA in Highway teni ‘a economic blockade bolding tilou lampi dang aneilou ahi, tin aseibe’e.

  Economic blockade hi Naga People’s Organisation, Senapati District Student Organization leh Senapati District Women Organization in atosot ahi, tin Rangmei in aseibe’e.


MPSC in MCSCC General studies paper re-examination bol ding’a candidate hon ngehna nei

MPSC_20130307_1 - webImphal, Sept. 25 (ET): Janhia ana chelha Manipur Civil Services Combined Competitive (MCSCC) Main Exam, General Studies question paper a adihlou phabep aumjeh in tuni chun candidate phabep in MPSC Secretary henga exam athahbol sah diuvin, ngehna anei’un ahi. Candidate hon aseiyun, General Studies question paper chu phengmai li ahi’n, question ho chu phengmai thum chan chu sequence in phatah in aum min, hin phengmai thum a pat phengmai li gei chu a’onglai lentah aum’e ati’uvin ahi.

  Candidate hon a’onglai chu question kichaina dan in agel un ahinlah Examination hall polam’a ahungpotdoh’u chun candidate tampi in phengmai li nah a jong question aumnahlai chu ahinhedoh’uvin ahi. Chuleh phengmai thumna a chu ‘PTO’ tia jong kisunlou ahi tin Candidate hon aseiyui.

  Phengmai li na’a um question ni chun mark somgup apoh lhon ahi’n, ahinlah candidate 200 vel’in donbutlouva adalhah’u ahi.

  Phengmai Li nah a question kisun teni donbutna pe le pelou simlai ho kah a kibahna aumna dia, MPSC in General Studies paper chu exam athah gon kit diuvin, candidate ho’n ngehna aneiyu ahi.


2016 kum sung’a northeast gam’a 23 vei ling kihot; lingpi hattah khat in ajui ding

infographic_anatomyofanearthquake-1920x1080Guwahati: Earthquake Track a kon thu kimu dungjuiyin achesa lha 9 tobang sung chun Northeast gamsunga ling 23 vei tobang akihot’in ahi. Lingkihot ho chu atamjo Nagaland State, adeh’a Tuensang le Phek district teni anahin, adangho chu ahileh Manipur sung anahi. Assam le Arunachal’a chun Lakhipur, Haliakandhi le Tezu chule adangdang sungin anakihot’in ahi. Hiche ling kiho, akidan na khat chu atamjo hi Myanmar gamgi chin’a kon hung kipan ahi.

  Hetthei chu achesa January 4 ni’a, Manipur a lingkiho chu Magnitude 6.7 tobang’a hat ahin, mi 11 tobang anathin mi 200 val anakisukha’n ahi. Lingkihona toh kisaiya hetgilna neihon aseinau chun hitobanga ling kijom’a kihot hohi anungjui aum teijin, lingpi hattah hung’um teitei ding ahi tin aseiyun ahi. Tukum sunga ling 28 vei akiho tokilhonna, Sorkar in hitobang toset na a kon kiven dohna lampi asemtup’a kitup tah a kigot na anei phat ahitai ati.


Tohmun peh ding’a centre in mi lhem lha

Imphal, Sept 25 (ET): Uripok Kangchup road ‘a um Shiva Job Consultant Pvt Ltd client khat in centre in sum tamtah adon doh jouvin hiche mun’a um job consultant service centre akhah tauve, tin ngohna aneiyin ahi.

  Chongtham Chinglensana Meitei kiti Consultant centre ‘a Director pa inmun’a sum la’a kache uchun inmun’a konin einodoh uvin, eigih uve, tin Kafiyat Khan in thuso miho heng’a aseiye. Director in tohmun hol hon natoh ahol dungjuiya dangka 50,000 leh 1,00,000 kikah alah ahi, ati. Gam pam’a tohmun eikipe ding ahi, ti kinepna lentah neiya centre ‘a sum apeh-u ahi. Manipur Press club ‘a client 5 apang uvin, ahin, Kafiyat Khan in asei dungjuiya Director Chinglensana hin sum alah nahi mi 50 vel ahi.


CCpur Khuga battalion in ‘ex-servicemen rally’ bol

Lien Gangte
CCpur, Sept. 24 (ET): Khuga Dam kom’a um Khuga Battalion Station in Churachandpur district ‘a pensioner hole army toh kicheng meithai ho ding’in rally abol uvin, kin-gon’a district official lamkai luboh holeh ex-Army men ho apang uvin ahi.

  Pensioner 100 val’a ding’in medical panna’a dukan phabep ahong uvin chule Churachandpur district DC Lunminthang Haokip, SP Rakesh Balwal, 27 sector, AR commander, Brig Ajay Kumar, Khuga Battalion CO Col Hooda leh ADC Churachandpur member, New Lamka West CT Lian Guite jong apang uvin ahi. Battalion in ahondoh counselling centre injong khangthah 50 val ding’a ‘pre-recruitment rally and training’ agon peh uvin, khangthah hohi October nisim 16 leh 21 nikho sung’a Senapati district ‘a Army recruitment ‘a pang ding ho ahiuve.

  Ex-servicemen hon adeh’a pension kihop thu leh adang dang’a boina ato ho thu’a kithopi nading ex-servicemen recruitment cell jong hondohna aneiyui. Brig Ajay Kumar in kin-gon gong’a battalion ho chung’a kipa thu aseiyin chule ex-servicemen hon hahsatna ato suhnem thei nading’a hitobang rally hi kum khat’a livei beh bol ‘a pha ahi, tin aseibe’e.


Kinoptona akisem theilou jeh’a thi-long kila lou

Imphal, Sept 25 (ET): Vangset’a thi, nu-cha teni insung mite toh gari nei ho kikah’a kihoulhah na aum theilou jeh in nu-cha teni thi-long tuchan in lah louvin aum nalaiyin ahi.

  Thulhut dungjuiya gari nei te leh athi te insung miten Saturday jan’a kihouna anei un, athi te insung miten compensation dangka lah 15 athum’un, hin gari nei te’n dangka lakh 5 bou apeh jou diuvin asei’un, hinlah, ahi athi naosen leh anu insung miten anoppeh pouvin ahi. Vangsetna thilsoh’a thi teni hi Lalngaikim (35), w/o Lalvarlien Hmar le acha naosen numei Zosangkim ahi’in, naosen hi kum khat lhing loulai ahi. Jan nidan 12.30 don’a Tata dipper (regd no ML-04B 8608) hi Kalinagar Part I, Jiribam lamlen’a lhai lha’a athi te insung’a atol lut paiya nu-cha teni atalih ahi.


State Level Kut

kut ScreenshotImphal, Sept 25 (ET): State Level Kut Committee, Manipur in ahung lhung ding November 1, 2016 nikho leh 1st MR Ground, Imphal’a KUT kimang ding ahi. Hiche golnop’a hi, vai lang leh cultural event kibol ding nilhah lang leh Miss Kut kilhenna leh lasah na chuleh item adangdang jong um ding ahi. Miss Kut a panla nom ho ding’a thuchen, anikho, aphat, amun leh adang dang ho ol’a thuso’a hung kiphongdoh ding ahi, tin P. Doungel, Secretary, SLKC, Manipur a kuon thuphon in aseiye.


FCL recruitment

Imphal, Sept 25 (ET): Ahung lhungding September nisim 18 jingkah nidan 11 ‘a kon nilhah nidan 3 chan Manipur Rifles 1st Battalion mun’a Grade-III leh IV post, State Forensic Science Laboratory (FSL), Pangei, Manipur Police Department admit card kihom ding ahi, tin T Guite, Inspector General of Police (Z-III/HR/Trg?RTI) cum chairman, DPC, Direct recruitment of Grade III and IV Posts of FSL, Pangei in hetsah thuso aneiyin ahi.


World Tourism Day, 2016

Imphal, Sept. 25 (ET): Ahung lhung ding September 27 nikho teng leh Mapao Zingsho Village a World tourism Day 2016 nitna kin kibol ding ahi. Hiche kin hi Manipur Tourism in aguon ahin, United Nations World Tourism Organization (UNWTO) toh kisamkai ahi. Hetthei chu Zingsho Village hi Senapati District sung’a um ahin, Imphal khopi’a kipat 16 kms bouseh’a gamla, chuleh Northeast India a ding’a kho theng pen lah’a khat ahi. Chief Minister Shri O. Ibobi Singh leh Deputy Chief Minister Shri Gaikhangam in Chief Guest leh President touna alo lhon ding ahi.


Nikho ni che lha Thadou Cultural Meet lolhingtah’a khumkha hita

UntitledImphal, Sept. 25 (ET): Achesa Nisim 22-23. Sept.2016 sungin Presidency College Motbung, Jubilee Hall munna Thadou Cultural Meet, Tribal Researh Institute, Imphal leh Educational and Cultural Research Centre (ECRC) tohgon na noija lolhing tah in ana kimang tan ahi.

  Hiche Kingon’a chun Ngamthang Haokip Hon’ble Minister IFCD,Print,&Sty.Manir, SL. Kaikhosei E.M. Sadar Hills Manir, chule Z.Solomon Joint Director TRI. Imphal ho chenghi Chief Guest, Guest of Honour chule Functional President’in apangun ahi.

  Hiche Kingon’a Chief Guest, Ngamthang Haokip in ECRC Founder President, Hethang Thadou vin hichan geija Thadoute Chon le Khan dopsangna dinga pan ahinlah na chunga pachahna sangtah apehna bannin, Kuki Society sunga mi tampin Thadou leh Kuki ahet them theilou phamo asah dan vetsah nan; Thadou pon hia Saipikhup, Thangnang etc. ho bou hi Kuki Nam pon nin ilaovin ahi. Hinlah Kuki Nampon iti tengleh Thadou pon goh hilouva Paite pon, Hmar pon, Vaiphei pon le adang dang ho jong ahoptha ahi tia aseina ban’in, Thadou hi i-Tribe’u ahin, Kuki iti teng vang le Sopi Unao dang dangho toh iki khai khom nao ahi ati. Hijeh chun Thadou Tribe khantouna dingin pan nasatah in lao hitin, amavang Thadou hi Kuki toh status kibangin vang koigo pou hite tin mipite temna aneijin ahi.

  Guest of Honour, SL. Kaikhosei’in Thadou Cultural Meet hijongle thanomtah-a hunglha Meitei Cultural Troupe leh Gorkha Cultural Troupe ho chunga kipa thu asei toh lhonin Thadoute Chon le Khan dopsang nadinga pan nasatah alah jing ding dan aphongdoh in, chule aban kit teng hoplen tah a gong dingin Committee ho temna aneijin ahi.

  Functional President, Z.Solomon’in Tribal ho khantouna dinga abol theichan abol dinga aphong doh toh lhonnin Coordinator ECRC, S.Thangkam’in nikho ni sunga Programme hung jemhoi ho kipa thilpeh apen Programme khumkha ahitai.


‘Eviction’ thu’a consultation meet kibol

Imphal, Sept 25 (ET): Centre for Research and Advocacy, Manipur (CRAM) in September nisim 26, nidan 10 am teng Manipur Press Club mun’a ‘Development and Displacement’ ti thupi’a State Consultation abol ding ahi.

  CRAM in thuso aneina’a chun Consultation hi gamsung’a hunam’a eviction kibol ho, tahsan na lhasam’a machalna ding tohgon ho chule japi thaneina (rights standard) ho thu seiding bidoi neiya kigong ahi, ati.


B.Vengnom, Tuibong’a special camp kibol

CCpur, Sept. 25 (ET): SDO/AERO,Tuibong, Doujapao Haokip in tuni chun gamkai sung’a um voter ho le electoral roll a amin kikhumlut nadin, khangdong hodingin Special Camp khat abol in ahi. Tuni camp a chun amollemsa elector homin lahdoh a, min le umna suhdih dingho chuleh chen na mun khel ho suhtup na din in Doujapao Haokip in tilkhouna ananeiyn ahi. Kinguon chu B.Vengnom Community Hall, Churachandpur a ana kibol ahi. -Huihchim


Songza Inpi in suhthengna nei

Imphal, Sept. 25 (ET): Songza Inpi a kuon thuphon kimu’n aseina’ah, (L) Michael Hemkholien mate thina chungthu’a WhatsaApp le social media dung’a thu hung kiso “Mate Songza Inkuon Lungkimlou” kiti chu Songza Inpi in akihepha poi ati.

  Tunung tuban leh Songza min pan’a koiman nam lamkai leh organization suhminsetna abol kit tahlou ding’in tiemna ahung kineijin ahi, tin Publicity Department, Songza Inpi a kuon thuphon chun aseiye.


KPLF/KPLA in cadre khat haisah, KNA/KNO gih

Imphal, Sept 25 (ET): Kuki People’s Liberation Front/Army (KPLF/KPLA) a kuon thuphon kimu’n aseina’ah, achesa 18th September, 2016 nikho’a kipat Headquarter Zangmuoil Dingpi mun’a Cabinet Commiittee in kihoulhahna anei dungjui’a Lunkhomang Haokip hi kinodoh ahitai ati.

  Ajeh chu ama hi numei chung’a kichemthang, drugs le kiloikhom meipum le meichang ho ajoh doh’a amachang phatchomna ding gel mi ahijeh’a nampi organisation lamkai khat dia lhingjoulou ahijeh’a kinodoh ahi ati.

Hiti ahijeh chun Kuki Society sung’a mimal hihen CSOs dang dang ho hijong le Lunkhomang Haokip hi koiman kithopina apeh tahlou diuvin hetsahna aneije. Chuleh sum le pai hihen gena touna pe’a aum’a kiloikhom in akihetdoh lh ngaidam kichanlou ding ahi ati.

  Chuleh Lunkhomang in kiloikhom min’a KNA/KNO min’a surrender abol hi KNA/KNO in nam ngailutna leh Kuki nam sung’a organisation lhomsah’a Kuki te Political solution alolhin theina ding’a apompeh lou diuvin hetsahna aneijin ahi. Hinlah KNA/KNO in nahsah louna leh khohsah na neilouva alahkhah le Kuki society ngailu louva kila’a KPLF/KPLA in kimoh vetlou ding ahi tin jong gihna aneije.

  Kiloikhom in aseibena’a, KNA/KNO in Michael Hemkholen Mate athana chung chang’a a-insung mite kom’a ngaidam athum dingin hetsahna aneijin, ijem ti’a thukisei ajui lou’uva ahile kiloikhom in mona nei ho ngaidam kichan lou ding ahi tin DJ Mate, Commander in Chief cum caretaker, President KPLF/KPLA a kuon thuphon chun aseiye.


Editorial UntitledJiribam thu gingdoh kit Sadar hills thu kijalou

  Jiribam District Demand Committee (JDDC) hon athah beh-a kiphinna ahinpat kit uhi MLA Election hunglhun dikon ahijeh kilang ahi. JDDC in 2011 kum’a State govt toh kinoptona ananei (MOU) chu aminphah in ahi. Hiche kinoptona dungjuiya chu govt in Jiribam Sub-division hi ‘full-fledged revenue district’ hisah dia anasei ahi. Kinoptona (MOU) nei hi apetpet’a thu gah suhthipna dia kinei tobang ahitai. Tua JDDC in 2011 lang’a MOU chu apaomepi theileh Sadar Hills thua jong MOU ijat ana kibolsa aumtadem, simjou hetjou hitaloudi ahi. 2011 November chu 2012 February a MLA election dikon anahie. Tua jong hi toumun kiphin kipan ahin JDDC hon govt in nahsah a akoilouleh akhoh cheh kiphinna boldin gihna aneiyin hichu bandh, economic Blockade, govt office leh School, College ho kha boldi ti ahi. Sadar Hills thu jong hi govt in kichepna’a aman, district pilhinh hisahna dia kiphin mipi kiloikhomna holeh agamsung’a kon MLA (politician) ho lhepchatvaina’a kineina hi district pilhing hina dia kiphinna ana umpat til’a pat hitadi ahi. Tu lang’a hi mipi kiloikhomna hoti, agam’a kon politician hoti Sadar Hills thu lhangphng’a seidi jengjong jahcha gam u bang ahitai. Hiche kahlah a hi Sdar Hills thu to tekah kham jong hilou Jiribam hi district hung kimoh boldoh a athupijo, aluijo, gam lenjo leh imalam jousea district pilhing hisa tobang Sadar Hills hi dalhah a hung umthei nalai ahi. Hijeh a chu mi laam laam’a laam di itile khat, midang asoso soh hen itile khat hidi ahi. Ningkum October lang’a pat Sadar Hills MLA hon CM leh Dy CM toh kihouna akichaitan thensodi, Sadar Hills district pilhing ahitai tia phondohdi bou vat ahitai anatiu, ningkum tuphat lang mama’a chu ningkum October kichai kah-a Sadar Hills thenso ahilouleh MLA akon haina (resignation) lekha kipedi ahi anatiu ahi. Hichu ningkum a Bill 3 thua Churachanpur boina anakhut cheng lai anahin, Sadar Hills lang mipi hon Churachanpur boina’a pan alahlouna diuva kilhepna bou anahitai. Kum masa lang’a Ukhrul lang anaboi khut cheng jong chun athu suhdaona din Gamnom Sapormaina ah Sadar Hills Kuki Inpi lamkaina’n Sadar Hills thua kikhopna ana um’e. Hitia Sadar Hills thu kimangji hi sot ahitai.

  Jiribam thua jong govt ijavei ana kitep ahitadem akihepoi. Ahin Sadar Hills thua hi tukum bouva jong March, July leh September kah a boldi tia kitepna ana um’e kiti chu anukhahpen September jong kichai kit tobang ahitan aban kitepna ahung umjong leh MLA election to hung kimeh beh teidi tina ahi. Hijeh a chu akoikoi ahia abollou diuleh kithipbeh uhenlang vote holnan neida uhen. Jiribam thu hi asunglang’a ipi tohgon um am ti jong seithei ahilouna chu jani dung vel’a Jiribam lhang’a Tribal kiloikhomna hon Jiribam district ah Tribal ho gam kijaosah theiponte anatiu chu ahi.


*For more news, articles etc. please click “ET IN PDF.”