Sept 24, 2016 Local news

Sept 24, 2016 Local news

1174
0
SHARE

Sadar Hills sung’a themjilna mun ho’a mel hetlou hon boina siem jing’u; TSA-SH in demna nei

24_full - web.jpegKaybie Chongloi
SADAR HILLS, Sept. 23 (ET): Sadar Hills sung’a themjilna mun ho phatkhat khat le akisuh lunglinglao jiu hi TSA Sadar Hills in nasatah in nopmo sahna le demna sangtah aneiyin ahi .

  TSA Sadar Hills Information Secretary, Henry a kon thuphon kimuna’a September nisim 21 nia, koi ahi kihelou mi phabep in Presidency College Motbung, Ideal English Senior Secondary School le Damdei Christian College ho’a hunam mangcha’a ajeh kihelouva simlai ho le jilkung ho agasuh lunglinglao thu’u akijan phamo akisalheh in nasatah in demna sangtah akineije ati.

  Themjilna mun ho hi ‘Free Zone’ hisah tei-teiding ajeh chu hiche mun ho’a hi leiset chihna lam’a mitoh kitetna hung kipan ahi tia aseito lhon’in chihna neilou nam chu nam vangset mi nungdel ding ahijeh in hitobang’a chihna lamtoh kisaija kitoh kitetna hung kipatna Themjilna mun ho hi eihoa ahin aneija ikigel diu ahi ati.

  Thuphon in asei banjom’in, thingnoi hon jong themjilna mun manlutje le apoimona ahetthem jeh’un hitobang chapang themjilna mun ho hi don-le-kai jong khonung ding gelna’a abol lou’u anahitai ati to lhon’in amaho chung’a jong kipathu aseijun ahi.

  ”Themjilna mun hohin ‘Uniform’ anei cheh ahin uniform hi koija hile ja-ngai tah ahi”, tia TSA Sadar Hills thuphonin aseitolhonin hitobanga Themjilna mun ho’a simlai hihen jilkung ho hijong le kisuh lunglinglao na ho le chon hoilou hohi tuban teng koi hile iboltah lou diuvin tiemna sangtah akineije ati.

  Alangkhat’a, TSA Sadar Hills in themjilna mun bol ho tilkhouna aneina’a, Sadar Hill sung’a themjilna mun bol koi hijong le lunglha louhel’a khonung ding gel pummin thoh hat tah’a napan jingding’u ahi tia tiemna aneito lhon’in Sadar Hills a school jouse TSA Sadar Hills ten kahin ngaisang sohkei uve ati.

  Gah nunggel doh kitthei chu, September nisim 21 ni sun’a chu mel hetlou thingnoi hidia ginmo mi phabep hin jukham pum’a Presidency College, Motbung’a cheuva simlai chapang ti jilkung ho ti agasuh lunglinglao uva, College mun’a baotam anabol’u ahi.

  Ipijeh’a hitobang’a chu gachon’ u ham jong koiman ahepon, Presidency College’a kon chun Ideal English Senior Secondary School, Charhajare chu anajot kit uva hitobang ma’a chu gachon kit uva chujouva Damdei Christian College ajotkit uva angaima leuva gachon kit’u ahi.

  Ginchat umtah thulhut kimun aseina’a, hitia themjilna mun ho’a chon hoilou tah’a chon ho chu Damdei Christian College’a baotam abol uva, simlai ho le Jilkung ho asuh lunglinglao pet’u chun sepoy hon anadel lut un, Damdei Christian College jilkung ho chun chon hoilou tah in chon jongleu koichom hilou tia ana huh’u le, sepoy hochu ana kiladoh un hinlah phatchom khat jouvin anungchekit un, College room jouse kholna aneiphat un amudoh tauvin, anaman’un, college a jilkung ho jong chu nasel uve tin hatah in anaphoh un ana house uvin ahi ati.


MHA in UPF leh KNO thingnoi ho pehding stipend Rs. 4.4 crore sodoh

Imphal, Sept. 23 (ET): Union Home Affairs Ministry, India government in SoO signatory Kuki National Organisation (KNO) leh United People’s Front (UPF) thingnoi ho stipend peh ding’a dangka 4,40,20,000 Manipur sorkar heng’a sanction abol in ahi.

  KNO leh UPF h Kuki thal-choi kiloikhomna chom chom umkhomna ahi’in, gam-tum thumna aneiyu ahi. Tu masang chun Manipur sorkar in thingnoi kiloikhomna teni hin Manipur gam’a gam-tum athumpoi, tia asei ahi’in, ahivang’a, UPF leh KNO official hon achesa June nisim 15 nikho’a New Delhi khopi’a ‘tripartite political dialogue’ toukhomna masapen ‘a gam-tum hi thumna thupi pen ‘a asei ahi.

  Thulhut dungjuiya Home Affairs Ministry, India sorkar in dangka 4,40,74,000 sanction abol ahi’in, Reserve Bank of India thuhil bang’a state sorkar in sum apehdoh (released) ahi, ati. Sum sanction kibol hi September 2013 ‘a kon February 2015 chan UPF leh KNO thingnoi ho stipend peh nading ahi. State sorkar in thingnoi kiloikhom teni peh ding stipend hi 7,07,28,000 apeh diuva ngehna anei ahi’in, Rehabilitation Scheme modules dungjuiya MHA in 4,24,20,000 asodoh ahi’in, hiche hi hop 60% ahi.

  Home Ministry thulhut dungjuiya UPF thingnoimi hi 1004 ahin, chule KNO hi 1096 ahi.
Rehabilitatiion Scheme for the Surrendered UGs dan dungjuiya stipend hi thingnoi kiloikhom ho kipe’a chule akipe jat hi Home Affairs Ministry in reimbursed abolding ahi.


JCILPS ‘drive’

Imphal, Sept. 23 (ET): Thuphon kinei masa bang’a JCILPS member holeh civil society organisation chom chom in gamsung’a kol-le-vai ho douna’a ‘drive’ abol‘u akehlet be uvin ahi.

  Friday nidan 1.20 pm don’a Sekmai Advance Society leh JCILPS volunteer hon Dimapur ‘a kon Thoubal jon’a che gamdang mi 21 aman uvin ahi. Amaho hi SEWA Power Project kisahna’a natong ding’a apuiyu ahi. JCILPS Women’s Wing convenor Th Apabi in thuso miho akimupi’a chun, sorkar in phat kitep masa (tu kal) sung’a special session akou louva ahileh JCILPS in kiphinna akehlet be ding ahi, ati.


TSUM in gampam’a um ho thumop

Imphal, Sept. 23 (ET): Tribal Students’ Union Manipur (TSUM) a kuon thuphon kimu’n aseina’a, gampam, hetthei ding’a New Delhi, Mumbai, Banglore, Pune le adang dang’a khosa hon changseh’a vale, numei natong hon anatohna mun uva kivenna anei diu, jan a changseh a vale, night shopping tiho abollou diuvin thumopna aneiyun ahi. Che le vale na’a ahithei chan’a honna kilhon le din kiloikhom in aseiye.

  JCILPS Manipur in gamdang miho gamsung’a ahung lut diu apet pet’a akha’a kipat simlai kiloikhom in khohsahna neija hiche thuphon hi kivenna ding’a ahin bol’u ahi.


Chiefs/Chairmen Association in SDO/BDO Tengnoupal thah liemna kinguon bol

Chandel, Sept. 23: Kuki-Naga Chiefs’/Chairmen Association, Tengnoupal Block in tuni chun Sub-Divisional Headquarter a Sub-Divisional Officer/Block Development Officer (SDO/BDO) Tengnoupal thah Z.Joute lemna kin abolpeh in ahi.

  Tuni kinguon a chun kiloikhom President Tm.Holkhokhai Haokip le Secretary Sk.Angshel Lamkang in Sub-Divisional Officer thah Z.Joute lemna thu aseilhon in hitolhon chun jatpon silpehna jong aneilhon in ahi.

  Z.Joute in kingon a ahoulimna a chun kiloikhom chung a akipana thu aphongdoh in ahi. Chuleh khantouna ding a scheme kibol ho lolhingtah a achelhah theina ding a kho haosa ho leh Chairmen hon SDO atosot diuvin temna anei in ahi.


Culture University faculty member kilahna’a UGC dan akijui poi: KCP Poirei Meitei

Imphal, Sept. 23 (ET): Thal-choi kiloikhom KCP Poirei Meitei Lup hon Friday nikhon Culture University, Manipur noiya um department chom chom’a faculty kilahna’a adihlou aum’e, tin ngohna anei uvin, Culture University academic session hi tukum September lha’a kipan ahi.

  KCP Poirei Meitei in thuso apeh nauva chun mopohna nei University authority hon thepna neiya (qualified) faculty bou alah diuva gihna kinei ahi, ati. Ahin, gihna thu kipe masa hi Registrar, Culture University in jana pe louva faculty recruitment jouse hi UGC guideline dungjuiya kila ahi, tia suhthengna aneiya, September nisim 17 nikho’a aguh’a faculty member 17 ho list asodoh ahi, ati. Faculty member kilahna’a kideilhen chomna aum’e, tia ngohna aneiyu ahi.

  Recruitment kibol na’a UGC guidelines akijui poi, tin KCP in ngohna aneiyin chule Manipuri department ‘a lecturer post ni kilahna ding’a candidate 47 in apply abol ahi’in, amaho hi scanning kicheh tah’a kibol lou, interview ‘a tohmun kila ahi, ati. Authority hon abolkhel atohkhel ho asuhdih ding’in kiloikhomna in gihna aneibe in ahi.


2015 kum’a Singngat gamkai’a BPL gas apply bol hon tunigeija ima mulou lai

Singngat, Sept. 23 (ET): Kum lui 2015 chun BPL gas form Rs. 500/- in akijuoh in hichu mi tamtah in apply abol vang’un tuhin athu athipmang del tan ahi. Hiti dinmun ahitoh kilhon’a 2015 kum’a hiche BPL gas apply anabol hon ajeh hetnomna neijn tuni’n ngehna ahin nei uvin ahi.

  Thunei mopo ho’a kuon’a hilchetna aumlouva ahileh masang’a Rs. 500/- ana peh’u chu anungle diuvin gihna jong anei tauvin ahi.

  Hiche toh belap in mun dang’a gas livei tobang alhunji teng Singngat gamkai’ah khatvei tobang bou alhungji’n, adang ho hoilai kijuohmang hitam lungdon aum’e. Hiche gas amang ho hi akiholdoh’a alhunna akihet’a boina bang ahungso’a ahileh gas bol hon mo akipoh diuvin gihna jong anei uvin ahi.


Akhut tah’a Bible pumpi jih jou upa R. Lalliana

14463175_1112126388836113_877061120386294273_nImphal, Sept. 23 (ET): Bible pumpi 10 vei asim jou nung’a ama khut tah’a Bible pumpi jihjou upa R. Lalliana, Dinthar Veng Aizawl chun kum 2 val asulut in ahi. Bible hi 04-05-2013 chun ajih pan’in, 21-01-2016 nikho chun ajih jouvin ahi. Aman Bible ajih sung hin Parker Pen 300 amang’in, Pen Refill 50 val asulut in, Book binding man pum’in agom in Dk.6560 asulut in ahi akiti.


Meipum’a kikap kha

6b82e60f-2c0f-4bdf-b509-02eeb6e8af14Chassad, Sept. 23: Tuni 10:30 am don in Pa Lhunthanglen Touthang Khoikai, 34 chu aloipa Pa Jangkhai Haokip Pihang in ama ni kah’a kinah kibou jeh in Kartoos meipum in ana kap in ahi.

  Vangset um tah in Pa Lhunthanglen chu abanbul, a-oi leh anahgu lah ana kap kha in, Chassad A/R Unit Hospital in First Aid anape’n ahi. Hinlah aha serious jeh chun Imphal lam’a ahin tollut un, Shija Hospital Imphal ana ki lhut in ahi.

  Thilsoh ajah chun KSO Imphal in ana del lut in jochan in anaboipiuvin ahi. Tuhin ICU Ward a Operation dingin aum’in ahi. Alangkhat’ah mi kapkha pa hi ajammang tan, ageina lam akihe tapoi tin thulhut kimu’n aseiye.


Saikot Sub-Division Demand Committee in CM a ding memorandum pe; nahsah’a aumlou leh kiphinna pan ding

Lien Gangte
CCpur, Sept. 23 (ET): Saikot Sub-Division Demand Committee in achesa 29th Oct., 2011 chun Saikot kho’a SDO aum thei na ding in Manipur CM heng’ah memorandum 2-vei anapelut uvun ahi. Hiche tohkilhon in,17th April, 2015 nikho chun Manipur State Cabinet thulhuh na bang in Govt. Of Manipur, Secretariat: Revenue Dept. in Saikot Sub-Division a ding Saikot kho’a SDO um ding in Gazette Order (No. 182 dated 2nd Sept., 2016 and Govt. Order No. 30/3/2015-R dated 29th Aug., 2016) anasuo tan ahi. Saikot Sub-Division noi’ah hin Kho 30 aum in, Govt. a record um lo kho 12 jao-na in Saikot SDO noi’ah agom in kho 42 aum in ahi.

  Manipur Govt. in Saikot SDO Gazette order 30th March, 2015 a anasuo toh kilhon’a, agang theipen’a Manipur Govt. in Saikot SDO Office mun’a SDO a tou ding aniem pen’a MCS (Gazette Officer) leh Staff koi ding in Memorandum Manipur CM heng’ah 17th Sept., 2016 nikho chun anapelut uvin ahi.

  Hiche toh kilhon in, Kho Haosa/Village Authority ho jaona in Saikot Sub-Division Committee in Saikot SDO Office a SDO atou ding aniem pen’a MCS Officer ahi ding chuleh, Staff kining lhing aum ding ngehna in Memorandum 2, Manipur CM, Minister, RD & PR ho’a ding DC, Ccpur heng’ah 23rd Sept., 2016 nikho chun ana pelut uvin ahi. Chuleh, Saikot SDO in Saikot Sub-Division in huop sung’a Revenue toh kisai’a Official Order a suo thei na ding, thaneina Saikot SDO in anei ding ngeh na in Memorandum Hon’ble Minister, Revenue a ding in DC, Ccpur heng’ah ana pelut uvin ahi.

  Saikot Sub-Division Demand Committee in Manipur Govt. heng’a ngeh na anei hou ahung lhung ding 11th Oct., 2016 masang ngei’a asuhbulhit louva nahsah’a aneilou ule kiphin na jat chom chom pan ding’a SSDC kiman jing ahi tin memorandum achun atahlang uvin ahi. Chuleh, Ccpur Dist. sung ah Assembly Constituency 6 aum in, Assembly Constituency 5 ho’ah SDO Office ana um tan, hijongleh Saikot Assembly Constituency ah tuni chan in Saikot, SDO Gazette Order ana um tajong leh SDO Office umlou tabang ahi nalaije tin SSDC apat thulhut chun aseiyin ahi.


‘Wild life Campaign’ hondoh hita

Thoubal, Sept. 23 (ET): District Forest Officer Thoubal in ahung lhungding October nisim 1 nikho’a kipan ding Wild Life Week kiman nading’a campaign apan tan ahi.

  Kin-gon’a Conservator of Forest, Thoubal district, Lukhoi in kal khat lhing campaign hi mipin gam-leh-go chule wild life athupi dan ahet them nading ahi, tin aseiye. Chule hiche hi Forest department in wild life venna ding’a hahsatna ato ho ahet them peh nadiu jong ahi, ati. District Forest Officer Thoubal Rk Amarjit in ‘flagged off’ programme ‘a apanna ‘a, department in wild ife thupi dan ahetthem nading’a programme chom chom abolding ahi, tin aseiye. “Kin-gon kiman sung’a kitetna chule workshop aban ban’a kibol ding ahi”, tin Amarjit in aseiye.


SP, Ccpur lhahdohna kin-gon um

Lien Gangte
CCpur, Sept. 23 (ET): Manipur Govt. in IPS ho Transfer and Posting order 19th Sept., 2016 nikho’a anasuo na bang in Superintendent of Police, Ccpur L. Mangkhogin Haokip, IPS jong CO, 8th IRB a ding in chon in aum in ahi. Hiche toh kilhon in ama lhahdoh na kingon 23rd Sept., 2016 nilhah nidan 3:00 vel ding chun SP Quater mun’ah aum ahi. Hiche kingon ahin phatvop in Sangboi Gangte, MPS, SDPO, Thanlon apang in, Police officer chom chom ho’a kon holim na jong aum in ahi. Chuleh, phatkhat na leh kipa thusei na H. Balram Singh, MPS, Addl. SP/OPs Ccpur in aneiyin ahi. Hiche kingon ahin SP, Ccpur panmun tuh ding Rakesh Balwal, IPS jong ahung pang in ahi.

  Chuleh, L. Mangkhogin in asei na’ah, phat chesa ho’a kideisah na jeh leh aphajo ding deina’a kipho na ho leh kihil na ho aselang’a gellou ding in anoiya tong Officer ho chuleh, Constable ho heng’ah aseiyin ahi. Maban’a jong igam sung leh idistrict sung’a danleh-muol (Law and Order) chuleh chamna leh monna aum thei na ding’a pan lajom jing ding in tepna leh ngeh na jong aneiyin ahi.

  Manipur Govt. in IPS ho Transfer and Posting order 19th Sept., 2016 nikho’a ana suo toh kilhon in L. Mangkhogin Haokip, IPS leh Rakesh Balwal, IPS in charge kipeh tuo na ana neilhon in ahi.


Pasal khat in Imphal airport’a bomb’a mi alhep jeh’a kiman

Imphal, Sept. 23: Delhi lang jon ding’a um kum 39 a tah upa khat in Imphal International Airport a bomb a mi analhep jeh in anakiman in ahi.

  Hiche thilsoh jeh chun flight chu pung 2 tobang in anageiyin ahi. Akimanpa chu ahileh amin Robinson Paotei, S/o. Raphie Paotei, Senapati District’a kon ahi. Thu kimu dungjuiyin Paotei toh aloi mi 2 Air Asia flight a New Delhi jon ding’a um lhon ahi ati.

  Airport authority hon Paotei loi teni D Seikou Paomei toh Ng Hraili Paomei jong chu flight atousah tapouvin ahi. Thusoh jou chun Robinson Paotei chu police khut’a anapedoh uvin ahi. Thu kimu in aseina’a chun Robinson chu jingkah nidan pung 10:30am vel chun pung 11:30am leh lengdoh ding New Delhi jon ding Air Asia flight a ding’a security check kibol pet in asakhao (luggage) sung’in bomb aum’e tin ana peng in ahi. Airport security personnel hon ama chu apetpet in anaman uvin ama leh a sakhao ho chu screening anabol uvin bomb vang chu anamupouvin ahi. Nilhah pung 5pm vel chun police in thudoh abol din authority hon ana pelut uvin ahi.


Editorial UntitledRecruitment kiti phot a boina um bangjeng

  RIMS a Nurse leh Staff dangdang kilahna thua AMSU (All Manipur Students’ Union)in thil dihlou akibol’e atia hiche ‘Recruitment’ aban chelha theiloudi ahinti kit tan aboisa Police Recruitment la Court a kitangden nalai loi aumkit in huoilaiya hi adih kibol’a huoilaiya hi adihlou kibol ahitadem! Munkhat a adihlou kilang behseh-a thil ahung kibolteng adang sese jong hung kiphongdohji ahi. Manipur sorkar in tunaicha’a “Recruitment Ban” kibol analahdoh a pat Department tamtah ah Service (natohna) kilading ahi ti’n thuphon ahinbol’in hiche dungjui chun service hol/ngaito jousen thepna leh hetna dungjuiya service kilading ahi ti atahsanlou jeh uva koi kom’a ipi, ijat pehdi ham tia kidungpei kivaipei ngen ahi mijouse mu le het ahi. Nehguh, pehguh (corruption) thua jani dung vel’a jong Manipur University a North East gam huop a ni 3 jen Seminar ana um, hichea thusei hon jong aboina thu leh thil umdan ho ngen bou anasei uva asuhbei nadi lampang seidoh thei leh seidoh ngam umkit dehlou anahi-e. Nehguh pehguh kiti hi pum suhbei ahitheiloudi jong hetsa tobang ahi. Ahin iti suhnem (lhomsah) jep theiham ti vang um mamadi ahi. Hichena dia mi khat le ni bou hilouva mijouse mo pohna leh pan lahna aum ngai ahi. Service munadi hihen thildang khat boldohnadi hileh koi machan koima imacha pehda behleh kon onghom’a kon ipi akilahdem ti thei ahi. Hitobang pehguh nehguh hi “akibol ngai” tia mijousen ahet leh achepi jeh-a adihlou dan’a jong koiman agellou ahitai. Achutileh bhitobang service kilahna thu khat a adihlou akibol’e ahung kiti teng levang ‘adihlou mong-mong’ hung hitadi ahi. RIMS a Nurse leh natoh (Post) dangdang kilahnadi bou hilouva Department dangdang a-jong amin maimaiya mipi hetsahna thuphon (Notification) Newspaper hoa kiso jia asunglang’a akiladi mi gontupsa ahijong mijouse kihoulim nopna khat ahi. Thika/Contract natoh hoa jong chutima ahina jong tam in akiseiye. Ahin mi tamtah in hut khat a thil khat angaitona’a hoa hi dan (Rule) jong kivejep henlang, mipi mitmua kilomdom injong kibolleh boina umloudi ahi.

  Hitihchan Manipur a service (natoh) kilahna ana kikhah (“Ban”) chu ipijeh-a hung kiladoh a department tamtah a natoh kiladi ahi ti hung choh jengjung ham ti jong Election hung nai jeh ahi mijousen ahetkit thouve. Hiche tahtah jeh a jong hi Ruling party Congress tilou Political party dang hon thangthipna ahinnei uva chomkhat tadi ‘Recruitment’ kiti phot umdahen atiu toh, Election Commission kom’a heh (complain) to hibang soh ahi. Election Commission injong Manipur a Recruitment thu hi ahet ahitah jeh hin ‘Recruitment process’ kichailoulaiyin Election Code of Conduct hinphong taleh “Election jou (kichai) leh boltaute, kiboljomdi ahi” kiti te hung hijengdi ahi.


*For more news, articles etc. please click “ET IN PDF.”