Sept 22, 2016 Local news

Sept 22, 2016 Local news

800
0
SHARE

MSO-D, KSO-Ccpur leh Songja Inpi in (L) Henkholen @Michael Mate kithana chung’a lungkimlouna thuphon bol

Lien Gangte
CCpur, Sept. 21 (ET): Achesa 20th Sept., 2016 nikho’a melhet lou hon Gollhang (L) Henkholen @Michael Mate lungset nabei hel’a gancha tha a akitha nachung’a lungnoplou na thu nasatah in ahung kiphong in ahi tin Mate Student Organisation-Delhi leh NCR akon thuphon chun aseiyin ahi. Hitobang thilsoh gimnei hi koi chung hijongle avel a asokit nalou din tepna jong ahung kinei e. Seikhel ,bolkhel ana um khah tah jong le Anu-apa, api-apu, a innsung mi ho kom’a hetsah a khat le khat kihet them to naleh chamna sem na ima umlou hiel a hitobang’a naa kitoh nahi MSO-DELHI in demna sangtah akinei in ahi. Hitobang thilsoh hi eimi society a dei umlou tah ahin, tuolthat ho agang thei pen’a matdoh a dan dungjui a thu tan din pha akisan ahi tin MSOD& NCR Info. & Pub. akon thuphon chun aseiyin ahi.

  Chuleh, Kuki Student Organisation-Ccpur akon thuphon chun asei na’ah (L) Henkholen @Michael Mate huham tah’a akitha na chung’a Dist. Authority leh Dan leh muol (Law Enforcement Agencies) in tolthat ho akinlam’a man doh ding in hetsah na anei uvin ahi. Maban’a hitabang huham tah’a kitha naleh toltha na aumkit lou na ding’a panla ding in jong tepna leh hetsah na jong anei uvin ahi. Alang khat ah, Songza Inpi, Ccpur in jong 20th Sept., 2016 nikho’a melhet lou hon Gollhang (L) Henkholen @Michael Mate lungset nabei hel’a gancha bang’a ana thanau demna sang tah anei uvin ahi.

  Chuleh Songza Inpi akon thuphon chun aseibe na’ah Sahnit nikho 13th Sept., 2016 chun kitha melsie demna in anakimang joupan in, ibol’a Eimi ho lah’a hitabang kitha na melsie um ham tin, demna anei uvin ahi. Chuleh, Songza Inpi’n ni 7 sung Michael kitha na chung’a sunna kinei ding chuleh, ni 8 nileh thigal na kinei ding ahi ti’n Songza Inpi akon thuphon chun asebe’n ahi.


Election kon’a recruitment tamtah kilah thu ECE in hetpehna nei

eci3 - webImphal, Sept. 21 (ET): Election koncha’a government office tamtah a tohmun lahna kinei thu chunga political party chom chom hon hehna apeh toh kilhon in Chief Election Commissioner of India (ECI) Dr.Nazim Zaidi in gamsung’a election hi boina umlouva ahina ding bang’a ECI in pan alah ding ahi, tin aseiye.

  Hotel Classic Grande, Imphal khopi’a thuso mihon Dr.Nazim Zaidi anakimupi’n, State Eection Machinery hon political party boina neiho dinmun dihtah’a avetsui’a chule voter hon kichatna neilouva vote alhah diuvin temna aneiye. Ama lamkaina’a CEC team hohi Tuesday nikho’a hunglhung ahiuvin, Wednesday nikho leh kile diu ahi. Imphal khopi’a aumsung’uvin CEC team in DC, SP, DIG, IG, DGP, Home Secretary leh Chief Secretary chule political party chom chom akimupi uvin ahi.

  Imphal khopi adalhah kon’in Zaidi in hehna kipelut jouse aphatcha kivesui ding ahi, tin thuso miho heng’a aseiye. Chule phaicham leh thinglhang district ‘a ‘law and order’ dinmun leh thingnoi kiloikhom ho thu’a lungkhamna anei thu jong aseiyin ahi. Hiche thu’a commission in state leh district level official ho thuhilna aneiyin ahi. Polling booth atamjo chule boina ding’a ginchatna mun ho’a CCTV Webcast akoi diuvin jong Commission in thuhilna aneibe in ahi.

  CEO Manipur ‘a kon kimu thulhut dungjuiya gamsung’a Electoral Roll ‘a voter hi 18,07,843 ahi. Chule electoral roll ‘a um photo coverage jong 100% ahi’in, EPIC coverage hi 98% ahi. ECE Dr Nazim Zaidi in CEO Manipur natoh chung’a alunglhai na thu aseiyin ahi. Chule ECE in theatre personality Padmasgri Ratan Thiyam, International footballer P Renedy leh actor L Tonthoi hi SVEEP campaign’a state level campaigner ahiuve, tinjong thuphon aneiyin ahi.


Ahunglhung ding 2017 election’a hi Voter Verifiable Paper Audit Trial (VVPAT) kimang ding ahi: ECI

electionImphal, Sept. 21(ET): Ahunglhung ding 2017 Election toh kisaiyin tunin, Election Commission of India Commissioner’in Hotel Classic Grande,Chingmeirong, Imphal a thuso miho akihoulim piuvin ahi.

  Tuni kingon a chun political party thalheng phabep in pan alauvin ahi. Kingon’a chun Political party thalheng hon boina atohou, vote muna dinga sum the, official machinery le government resource ho lamlouva kimanchah, recruitment tampi kibol, sihnei langnei, election a thingnoi ho kikum, electoral roll a min sutlut le ladohna natoh kichehlou chuleh officer hon atohding dol atohlou’u chuleh adang thil phabep ECI Commissioner ho henga aphongdoh’uvin ahi.

  Political party hon election chamdel a achelhah theina ding in ECI Commissioner ho henga thil phabep ngehna anei’un ahi. Hiche ho chu-thingnoi ho tamna munna CCTV Coverage bolding, ahithei le Webcasting hatah a manchah ding, Micro-observer koiding, Presiding officer ho le polling staff hon sihnei langnei umlouva na atoh ding, DEO,RO chuleh SSP level a um official hon election chamdel a achelhah theina dingle sihnei langnei umlouva na atohna ding’uva hilchah ding, Single Phase election bolding, election umna ding nikho lhathum masang’a seidoh masat ding, MCC enforce bolding chuleh Dan in aphallou banners/posters/festoons/flag ho lahdoh ding tiho hi ahi.

  Hetthei khat chu ahunglhung ding 2017 election a hi Assembly Constituency phabep sunga Voter Verifiable Paper Audit Trail (VVPAT) kimang ding ahi. Hiche chungchang’a hi district election machinery in awareness campaign abolding ahi. Tibukimlouho, infirm elector ho chuleh tehse akum tamho’n jong election a vote alhah theina ding’uva Commission in angaicha ding thilho jong asuhtoh ding ahi. Election nikho le hin Check post, ginmo umna mun ho chuleh Inter-border security post ho a CCTV kikoi ding ahi. Licensed thal neiho’n jong election sunga hi athalhou sorkar heng’a apehlut diu chuleh DEO ho le SP hon boina semho le gucha michom ho a kon kivendohna ding’a pan nasatah alah ding’u ahi. Chuleh Election a kon jat le nam kinahna thei thil hungsohdoh thei ahijeh a SP ho le DEO ho’n hitobang thilho ahungso nalou dinga sensitive area ho mapped abol ding’u, action plan kicheh tah asemdoh’uva election chamdel a achelhah na ding a pan alah ding’u ahi.

  Election nikho le Candidate hon vote lhah’a hungho sum apeh’uva ama ding’a atasah’u thilsoh hi tumasang’a pat ana kichepi jing thilkhat ahi. Hitobang thilho aumlouna dinga ahunglhung ding election a hi Commission in pan hatah a alahding ahi. Commission in aseidan in hitobang thilho umlouna dinga hi Bank, Income Tax Authority, Customs, Excise & Taxation authority chuleh Police Official ho toh kitho’a active plan khoutah kisemding ahi ati. CEO ho le DEO hon election toh kisaiya na atoh hou Thuso miho heng’a aphatdungjuiya apehlut jing ding’u ahi tin Commission in aseiyin ahi.


MTU (GHQ) in demna sangpen nei

CCpur, Sept. 21 (ET): Nisim 19th September jankim’a mel hetlou hon Canaan Veng, Tuibuong a cheng (L) Henkholen Mate (30) s/0 (L) Thenlal Mate melse tah leh lungsetna beihel’a anatha na’u chung’a lungdon leh tijatum akisai. Aum taloupa longdamsa hi Kamdou Veng Cemetery, Tuibong kom’a lungsetna beihel’a akhut teni anunglang’a kikan’a alol kitansa’a umchu ana kimudoh ahi. Hitobang chonchan hi insungmite aheng akom bou hilou in nampi changeiya asuhneo ahi.Mihem khat ichan geiyin themmo jongle hitobang’a gancha tha’a kithat hi musit umtah ahi.

  Hitobang’a lunggel neilou, gancha bang’a melse tah’a mihem khat kithat hi MTU (GHQ) in nasatah in demna akineiyin chuleh Govt. in hiche’a mona neiho jouse hi 22/09/2016 apt ni 5 sung’a amatdoh lou uleh Manipur sung’a um Mate jouse’n kaumna’u muncheh a kiphinna kinei ding bandh/strike kibol ding hiche’a dei umlou thilsoh jouse Govt. in mo akipoh ding ahi ti’n MTC (GHQ) Info. & Pub. Ngamboi Mate in hetsah na aneiyin ahi.


Exam dihlou tah in akibol’e ti jeh’a candidate hon Medical Directorate nokhum

medical directorate webImphal, Sept 21: Medical Health Department (MHD), Lamphel munna candidate (job recruitment) hon tunin police hotoh akinotouve, exam dihlou tah’a kibolna chunga lunglhailou vetsahna’a building nokhum ding anagot’u ahi.

  Exam kibol dan thu’a lunglhai loujeh’a candidate ho leh AMSU member 500 vel in MHD anokhum-u ahi’n, department in Wednesday nikho’a written exam chelha’a candidate 700 vel bou kilhen na thu’a notice apeh dingun ngehna aneiyun ahi.

  Achesa June nisim 29 nikho’a MHD in job notice 155 post hi numei health worker ding’a asodoh’a chule hiche’a ding’a applicant 1600 vel in amin apehlut ahi.
Screening kichai September nisim 12-17 nikho jouva department in notice athah asodoh kit’a September nisim 19 nileh leh exam admit card lah din aseikit in ahi.

  Ahin, candidate ho admit card lah’a ache uleh department in candidate 1500 in bou admit card alah thei ahi, tia avel’a thuso anei kit’un ahi. Candidate dang hon September 20 nikho’a admit lah’a ache kit uleh mi 700 bou exam peh thei ding’a lhendohna kinei ahi, tin aseipeh kit’un ahi.

  Admit card kilahsa candidate ho hi applicant kilheng doh 700 lah’a amin panglou jong um ahi. Hiche jeh’a applicant lunglhai lou hon department in hilchenna apeh diuva ngehna aneiyu ahi.



Kihoumatna lhahsam jeh’a boina pipen ho suodoh ji ahi: Governor

governnor UntitledImphal, Sept. 21 (ET): Manipur Governor Dr. Najma Heptula in tunin, Editors Guild Manipur toh kihoulimna anei in ahi. Kihoulimna’a chun Manipur gamsung boina chom chom ho aseikhom’uvin ahi. Dr.Najma Heptula in kihoulimna a aseiyin, Manipur gamsunga cheng mipi in adeisang pen chu kei deisangpen jong ahi ati. Chuleh Manipur gamsung boina pipen hi asung’a chengho kihoumatna lhahsam jeh ahi ati.

  Najma’n, Manipur Governor panmun kahintuh’a kipat Union Minister ho heng’a Manipur gamsung boina thu hi kaseijing ahi ati. Chuleh ahunglhung ding nikho ho’a jong minister ho heng’a kasei jingding ahi ati.

  Aman asei danin Manipur sung’a Railway ahunglut nading hi phat chomkhat vat nalai ahi jeh in tu hi lamlen le huikong lampi lang’a lung le tha suhlut phat ahi ati.

  Union Ministry Nitin Gadkari heng’a jong Manipur gamsung lamlen hoilou thu kalhut ahitan, civil Aviation vaipo ho heng’a jong Imphal sung’a direct flight aumsah na ding’uva ngehna kanei ahi ati.

  Najma in aseidan’in Manipur gamsung hi cultural heritage sangtah nei ahi’n, boina tamjo hi cultural heritage jeh mama ahi ati. Communication le Health issue hi gamkhat khantouna ding’a suhlhap ding’a poimo ahilhonin, hitolhon chun Prime Minister heng’a ‘Flying Doctors’ concept hi kana podoh’e ati. Manipur gamsung boina ho suhlhap ahina dinga advisory group khat neiding adeisahna jong aphongdoh in ahi. Chuleh thuso miho toh kilungtoh tah a na tohkhom ding adeisahna jong aphongdoh in ahi.

  Alangkhat’a, Editors Guild Manipur in Dr.Najma Heptula lemna thu asei tolhonin, Media fraternity in Najma toh kilungtoh tah’a pan lahkhom ding adeisahna aphongdoh in ahi. Hitolhon chun Editors Guild in Najma jah a, Imphal-Jiribam lamlen semphat ahina ding’a pan ahinlah dingin ngehna anei in ahi. ” EGM member khat in ahoulimna’a chun ,” British ten gal umpet in Silchar a kon Imphal jotna lampi hi lhakhat jong lutlouva ana semdoh’un, hin India Sorkar’ in Zalen jou kum somsagi jouvin jong hiche lamlen hi semphatlouvin akoinalaiye ” tin aseiyin ahi.


1st Agape Premier League-2016 kikhumkha ta

agape premier league webLien Gangte
CCpur, Sept. 21 (ET): Thangting Area huop’a Agape Ministry Trust noiya Agape Football Club in anagon “The 1st Agape Premier League-2016” khumkha na kingon 21st Sept., 2016 nilhah nidan 1:00 apat chun Leinom, Play Ground mun’ah ana um in ahi. Hiche kingon toh kilhon in, Chief Guest in Letjamang Haokip, Social Worker apang in, Functional President in Seilenmang Khongsai, Hon’ble ADC Khousabung A/C apang in chuleh, Guest of Honour in Kamthang Haokip, President KKL GHQ apang in ahi. Chuleh, Special Guest in Otkholun, Chief of Leinom leh Khamlen, Chief of K. Munpi apang in ahi.

  Hiche kingon ahin, lemnathu leh kipa thusei na Sehlam Singson, President APL in aneiyin chuleh Guests ho’a kon holim na aum in ahi. Chief Guest, Letjamang Haokip, Social Worker in asei na’ah, Agape Premier League in hitabang khangthah Football kichep lunglut mi ho’a ding a Agape Premier League-2016 ahin gon na chung uvah akipa na thu aphong in, maban’a jong tukum sang’a hoijo leh phajo a organising committee in ahin gon uva, kumseh a hiche League hi aum jing ding adeisah na thu aphong in ahi.

  Aman aseibe na’ah thiemjilna tichu lekhasim na lang bouseh’a mihiem hinkho siem ding ahipo’n, Music chuleh, kichep golseh adeh’a Football lang a jong mihiem hinkho siem thei ahi ati. Kichep Golseh, Football a lunglut mi ho’a ding in neo apat Football Academy lutna thei ding tamtah aum in, hiche Football Academy/Training Centre ho’a lut got ding ahi ati. Hiche League a kichem ho chuleh kichep golseh’a lunglut miho tup na nei ding leh tahsa kisuh thieng’a, khamna thei ho’a kon kidalse ding in tilkhou na jong aneiyin ahi. Chuleh, aman aseibe na’ah, kajo kham kham’a Mipi (Social) na tong ding in kigel lhah na kana neita’n, tup khat neiyin natong khom’u tin igamsung’u akehtasa siempha ding in mipi ho kahintem uve tin jong aseiyin ahi.

  Chuleh, Functional President, Seilenmang Khongsai, Hon’ble ADC Khousabung in asei na’ah, igamsung leh ilhangsung uva ikinep piu khangthah ho ahiuvin, hijong leh khangthah ho donlou va aum tieng leh sietna thei lam chom chom ah alut ji uvin, hiche lungel neijing pum’a Agape Ministry in khangthah ho talent leh khangthah ho ding gel na’a hiche League ahin gon’u apachat thu aphong in ahi.

  Hiche league a kichem ho Games spirit neitah’a kichem ding in tepna aneiyin, chuleh Kichem mi umchan khanchan helou koima alolhing aumpoi ati. Chuleh, aman aseibe na’ah, Letjamang Haokip, Social Worker in igamsung siempha ding leh Mipi natong ding’a ahung kipeh doh na chung ah apachat na thu aphong in ahi.

  The 1st Agape Premier League-2016 khumkha na kingon aum toh kilhon in, Exhibition Match Football leh Volleyball ah Thangting Block, KKL leh Haleluijah Team ho akichem uvin ahi. Chuleh Final Match Gothol Football Club (GFC) leh Leinom Youth Club ho akichem uvin, GFC in LYC ho 3-1 in ajou uvin ahi.

  The 1st Agape Premier League-2016 Champion Team GFC in kipaman dangka 5,000/- leh Trophy akisan uvin ahi. Hiche League sung ahin Match 130 aum in, goal kikhum doh jat agom in 53 alhing in ahi. Chuleh, Seikhopao Haokip, LYC in Top Scorer kipaman akisan in; Mangsei Haokip, GFC in Man of the League kipama akisan in ahi. Chuleh hiche league a goal khum masapen Letkhongam Kipgen, GFC ahi. Chuleh, The 1st Agape Premier League-2016 ahin, kho chom chom ho’a pat team 4, K. Phaijang Youth Club, Maichammun Youth Club, Leinom Youth Club leh Gothol Football Club ho apang uvin ahi.


Don Bosco School, Moreh in annual sports meet khumkhana kinguon bol

Moreh, Sept. 21: Tuni chun Don Bosco School, Moreh in Moreh Eastern Shine School, lentuol a 2016 annual sports meet khumkhana kinguon abol in ahi. Tuni kingon a chun Additional Superintendent of Moreh Police M.Mubi Singh Jin-gu in apang in, James Thangal O/C ,Commando moreh Kin neipa in apang in chuleh J.Baite Sub-Inspector Moreh Police Jin-ja’um in apang in ahi.

  M.Mubi Singh Additional Superintendent of Moreh Police in ahoulimna’a chun simlai hon kichep golseh lam a jong lunglutna anei diuvin temna aneiyin ahi. Aman aseidan simlai ho’n tahsa damtheina ding le lhohbu hoina ding’a kichep golseh khatbeh abol’u ngai ahi ati. Chuleh kichep golseh hin mihem khat hinkho a kigahna ahinpohlut thei ahi ati. Jilkung hon jong simlai ho lekha bou hilouva kichep golseh lam a alunglut theina ding’uva jong atilkhou ding’uvin temna aneiyin ahi. Eastern Shine School vaipo hon school lentuol’a sports meet bolna ding phalna apehna chunguva jong M. Mubi Singh in akipana aphongdoh in ahi. Don Bosco School, Moreh Headmaster le simlai ho kipathilpeh apeh tolhon in , ahunglhung ding nikho ho’a jong kichep golseh lam’a lunglut simlai ho kithopinathei chan’a kakithopi ding ahi tin M.Mubi in aseiye.

  Tuni kinguon a chun O.C.Commando , Moreh Police James Thangal le Sub-Inspector J.Baite in simlai ho tilkhouna aneilhon in ahi.


Twilet in atohkhah jeh’a kithopina mulou lai’u; FVDC in kihouna nei ding

Chandel, Sept. 21 (ET): Flood Victims Demand Committee in thuphon aneina’a achesa 2015 kum’a Chandel gamkai sugn’a twilet jeh’a vangsetna anatuoh hon kihoukhomna kinei ding ahi ati.

  Hiche twilet in atohkhat kho ho chu ahileh Chadel TD Block, Chakpikarong TD Block, Khengjoy TD Block, Machi TD Block, chuleh Tengnoupal (Machi) TD Block ho ahin, ahung lhung ding September nisim 23, 2016 nikho jingla nidan 11.30 teng leh Indoor Stadium a kihouna anei diu ahi tin BD. Betha, Convenor, Flood Victims Demand Committee, Chandel’a kuon lekhathot kimu’n aseiye.


Yaiphaba that’a ngohna kinei mi 2 court ang’a ding

Imphal, Sept. 21 (ET): Yaiphaba Mutum kitha na thilsoh ‘a kiman ginmo mi 2 CJM, I/W, Cheirap Court, Uripok ‘a nilhah nidan 3.30 don in adin sah uvin ahi.Yaiphaba thi toh kisaiya kisemdoh JAC leh insung mite jong apang uvin chule court sung’a tolthat ‘a ginmo teni bulu ding ago uvin ahi. JAC leh insung miten kot suh-hong ding ago uvin ahi, police hon apuidoh uvin chule boina thilsoh aumlou nading’a police phabep asol lut be uve. Boina aumlou nading’a kivenna’in police hon JAC member leh insungmite court gate pam’a aumsah uvin, court sung’a alut diu apha peh pouvin ahi. Themmona neiya kingoh mi 2 hi sopi ahi.


Editorial Untitled

Akisei khat kijuina dia thaneina khat ngai

  MLA Election hung naito kilhon’a Kuki Inpi Manipur (KIM) leh All Manipur Christian Organisation (AMCO) hon mipi juidia thuphon abolu hi juidia phatah ahivang’a akijuinadem ti hi mi tamtah lung opkaina hidi ahi. Tahsa thu hihen lhagao thu hileh thilpha leh thudih hi mijousen ahet mama, ahia ajuidi lhom (umlou) jeh hi aboinapen ahi. Tahsa lang kivaipohna’a KIM hi nam sung’a kivaipohna thupipen loikhat ahitah jeh in KIM seisei, thulhah lhah chu mipi injong suhsei tousei leh phunna beijin juijeng le kilom ahi. Chutilou ahi. Tahsa lang’a kivaipohna’a ki thu ngaina aumtahlouleh hou lang’a kon lamkai hon aseisei u kichatna khat jeh in hou lamkai ho seisei mipi’n juijengle kilom ahi. Chutideh kitlou ahi. Hiche hi juitheilou thu kisei ahijeh jong hilou ahi. Achutileh ipi jeh-a koiman kiloikhomna lamkai khat thusei ajuilouham ti hi ahitai. Government kivaipohna kiti hi thunei vaipo hon aseisei chu mipi hon deihen deihihleh anop ada kibang’a ajui ahi. Ajeh chu ajuilouleh aga anehdi ahi. Government hin athusei mipin ajuina dia sepai/police, Court leh adangdang anei ban’a sum jong anei jeh-a athupeh juilou khat/ho chu gotna apieh thei ahi. Govt natong (service) bol khat bang chu achung’a ho thupieh ajuilouleh anatohna’a kon kihaisah-a alhalo, asumsan ho kikhahtan thei ahi. Hitobang atuhgahdi khat aumjeh-a ki seingaina (discipline) khat um thei ahi. Khosung kivaipohna’a jong haosa upa thu ngailoulou achung’a gotna kipeh di jeh-a kithungaina khat umthei ahi. ‘Force’ (hunam) jaonalouva kithungaina hi mihem hina’a lunggel thei jeh leh Nu le Pa leh isang’a lien thu ngai hi thilpha leh vaang channa ahi ti jeh ahi. ‘Force’ kiman jeh-a nop le da’a thungaina hohi ajui honjong lunglhaina tahtah aneilou, hichu force mangcha ho chung’a hamsetna jong hithei ahi. Mipi pumpi di gelna’a ‘force’ (hunam) manna aum le jong aphatna umnante, ahia alungnopmo louna diuva seipeh di hinalai ahi.

  Leiset chung’a kivaipohna lienpen gam jouse tobang kiloikhomna UNO jeng jong hin athusei leh athutanna ho Member gam hon ajuitheina dia akhohle hunam (force) apatdi ngai ahi. Ahin UNO jeng jong hin ama changtum tah-a ‘force’ (sepai) leh gal manchah aneilou jeh-a thulahlou dan’a aumna tam ahi. America te leh anungjui UNO Member gam hon akhoh dungjuiya sepai atokhom ji jeh uva UNO thusei le thutan jong hi ichan ham’a juiya um hamham ahi. UNO in gam khat le gam khat kikah-a kiboina thu atan juilouva aumna jong tam ahi. Hiche hi akisei, ajuilou ho chung’a natohna (action) lahnadi sepai le sum le pai, galmanchah ho aneilou jeh ahipen’e. Hijeh a hi Election teng mi jousen ama ama dei chieh Vote akipieh dia KIM le AMCO in asei hi ajuisahnadi tha anei dehlou jeh a mipi hon thilpha ahi tia ajui jeng ngal louleh alonaje umdehlou tobang ahi.


*For more news, articles etc. please click “ET IN PDF.”