Sept 21, 2016 Local news

Sept 21, 2016 Local news

692
0
SHARE

State police hon kiphinna bol ho suhthip na ding’a aphat kichaisa tear gas mang jing nalai

DSC_0373Laishram Ranbir
Imphal, Sept 20: Gamsung mun chom chom’a thumna chom chom neiya kiphinna bol ho suhthip nading’a tear gas leh mock bomb kiman jing ihe uvin, ahin, vangset umtah’a kiphinna bol ho suhthip nading’a kimang tear gas leh mock bomb hohi aphat kichaisa chule tahsa ding’a gu tobang ahi, tihi koiman ahepoi.

  Hiche thu hi tu masang’a Imphal Times thuson ana pohdoh ahitan, ahin, sorkar in hitobang tahsa tongkha thei gu hi aman jing nahlai ahi. Janhi nikho’a Singjamei leh Tera mun’a kiphinna bol ho suhthipna’a state police hon aman tear gas leh mock bomb jong aman nading phat kichai sa ahitai, tihi hetdoh ahi. Expert hon asei dungjuiya tear gas hohi aman nading phat akichai teng thil dang dang sang’a agu (poison) hatjo ahi, ahi. Hiche hin tahsa atohkhah thei ahi’in, chemical compound 2- chlorobenzalomonotrile kiti CS gas tia kihe hin lungchang leh thin atohkhah ahi.

  Tear gas aphat kichaisa kimang hin mitchot na, chemical burns, nao-se, Ashthma ho ding’a thi nathei, buh-thi tobang’a lhuh nathei ho aso thei ahi, tia expert hon aseiyu ahi. ‘The Resource Conservation and Recovery Act, 1976 dungjuiya tear gas hi tahsa tongkha thei ahi, tia kiseiya chule Environmental Protection Agency waste management regulation dungjuiya suhmang ding’a kisei ahi. Aphat kichai sa manchah kimang hi dan in aphal lou ahi. Ahin, mi phabep in tear gas shell achom uva koi ahi kihelou ho heng’a ajoh kit ahi. Manipur sorkar in hitobang’a tear gas aphat kichaisa joh ho chung’a action ala dem, ahilouleh state police hon he na sa sa ‘a aman-u ahidem, tihi thudoh ahi.


Army hon Uri kho’a terrorist 10 kaplih

530678-uriencounterSrinagar: Tuesday nikho’a Indian Army hon Kashmir, Uri district analuo khum na’uva chun Lachipura area Uri sector lutding guo galguh bol hotoh anakikap tuoa na’uva chun galguh bol mi 10 ana thi’n ahi.

  Thulhut in aseina’a chun Pakistani troops hon Indian post lam’a thal ahinkap uva kon’a hi guhthim’a hunglut go umding’a Indian Army hon ginmona ananei’u ahi.

  Hiche thilsoh hi Sunday nikho’a Uri terror attack thu’a New Delhi leh Islamabad kikah a sangtah a kinel na aumlai tah ahi. Hetthei khat chu hiche attack a hi sepai 18 in thina atuo’a chuleh adang mi 30 hi kitongkha ahi.

  Hiche attack chungchang’a India in Pakistan ngohna aneihi Pakistan anom kit po’n ahi. Hinlah Indian Army hon aseina’a chun Uri military base a combing operation aki bol na’a thal leh achang chuleh neh le chah, loule ai bom ho’a akimudoh in Pakistani marking kibol jong akimudoh’e ati.

  Chuleh India in aseina’a chun gaalguh bol kikaplih mi li hohi foreigners ahi’uve ati.


Kamdou Veng lhanmol’a thilong khat kimudoh

1b7b8dba-b146-45f1-9eae-dcc0b23db9d9 - CopyLien Gangte
CCpur, Sept. 20 (ET): Kamdou veng leh B.Ebenezer kikah a um Lhanmol ah 20th Sept., 2016 jingkah nidan 7:00 vel ding chun pasal khat thilong mu in aum in ahi. Ama hi, Michael Henkholen Mate kum 27, Canan Veng a um, (L) Thenlal Mate chapa chang khat neisun ahi. Thulhut kimu’n asei na’ah, Michael in janni 19th Sept., 2016 jan pung 11:30 vel ding chun phone call adong in, hiche jou chun inn dalha’n apot pai pai in ahi. A jing 20th Sept., 2016 jingkah’a anun ama phong ding’a aroom agavet le ana um tapo’n ahi. Chuleh, 19th Sept., jann jong chun aloi ho’n ahung villha jing uve tin thulhut chun aseibe’n ahi.

  Chuleh, Kamdou Veng Lhanmol kom’a cheng ho’n 19th Sept., 2016 jan chun mi pen gin ngeitah aja uvin, ajing 20th Sept., 2016 jingkah nidan 7:00 vel ding chun mi pen gin ajah nao mun achun Michael longdapsa mu in aum in ahi. Michael hi ama kong gah in akhut teni anung lang ah aki kan in chuleh, akeng lang ni jong akikan in ahi.  Chuleh, ahingsan’a alol ki at hiding’a ginchat ahi. Ccpur in report jingkah nidan 8:30 vel ding chun report amu uvin, thinglong umna mun’ah agala uvin, Dist. Hospital Morgue ah akoi uvin ahi. Doctor in Michael longdapsa Post mortem abol jou uvin, Police hon Innsung mi ho khut’ah apelha uvin ahi. Hiche thilsuo na chung ah, Ccpur Police in Fir No.9/2016 ccp-ps U/S 302/34 IPC dated 20/09/2016 ajih lut uvin ahi.

  Michael Henkholen Mate  longdapsa hi 20th Sept., 2016 nilhah lang chun S. Canan Veng lhanmol ah vuilem in ana um tan ahi.


KSO-I ‘Eimi Veng Chavang Golseh 2016’

Imphal, Sept. 20 (ET): Kuki Students’ Organisation, Imphal Branch (KSO-I) kin-guon ‘The 4th Eimi Veng Chavang Golseh’ kipan ding’a gotsa ahitoh kilhon in kichep-golseh chichom chom cheh’a din ‘Admision Form’ akihom pantai.

  KSO-I a kon Seigougin Haokip, Asst. Secy. Games & Sports thuphon in ‘Eimi Veng Chavang Golseh 2016’ hi ahung lhung ding October nisim 13th a pat 22nd changei THAU Ground, Imphal mun’a chelha ding ahin, Admision Form akihompantai. Admission Form ahile KSO-I Office, New Lambulane, Tribal market mun’a sun-kim dahkal 12:00 a pat nilhah lam 3:00pm changei muthei hiding,  amun le aphat kipe tailouva kihom louding ahi. Phat kitep-peh nung’a kisuhfel louho koi veng hijongle kisan pehlou ding ahi, ati.

  Chuleh, tuchung kichep-golseh sung’a ‘canteen’ hihen dukan hijongle, KSO-I Executive kilolna dungjuiya koiman ahon thei tahlou ding, amavang KSO-I Executive in ahon ding, neh-le-chah, nehthei-chahthei ijakai kimsel a kimu  ding ahi, tinjong thuphon in aseibei.

  Koitobang kichep-golseh toh kisai a dohnom, hetbenom aumle Lalpu Kilong, Secy. Games & Sports (# 7085631568) chuleh Seigougin, Asst. Secy. Games & Sports (#9089645906) a kijahmatpi thei ahi.


MPCC member phabep BJP homsung’a lut

BJPasss - webImphal, Sept. 20 (ET): Tuni chun MPCC  luboh phabep in INC ana dalha’u vin BJP ana jop’uvin ahi. Thilsoh umdan hi phatah a ikholchil’a ahileh  Manipur gamsung politician ho hin election ahung nai tolhonin ajem’u ahinpodoh pan’u hita leh akilom in ahi.

  Tuni INC dalha a BJP ana bel ho chu 10th Manipur Legislative Assembly election’a Konthoujam constituency ana tet MPCC secretary lui Dr.Sapam Ranjan , Congress MLA lui Laishram Radhakishore, Trinamool Congress candidate lui H. Dingo chuleh local bodies representative phabep ahiuve.

  State Election Management Committee BJP Manipur Pradesh Convenor in BJP bel ho lemna thu aseina’a chun ahunglhung ding Manipur legislative Assembly a seat 40 val amu diuvin, akinepna aphongdoh in ahi.

   “Ahunglhung ding 2017 election’a hi, BJP ten thinglhang (Hill) district sung’a seat 14 le Valley district a seat 26 a gol kijou ding, hitolhon a government jong kisemdoh ding ahi” tin Chaoba in akinepna aphonge.

  Ksh Babananda, President BJP Manipur Pradesh in tuni INC dalha a BJP bel ho chung’a akipana aphongdoh in ahi. Aman aseiyin BJP hin mipi ding’a natong nom ho ding’a kot kihong jing ding ahi ati. Aman, Congress hi expiry date kichai, lou le ai tobang ahi’n, nehguh le chahguh dimset kiloikhom na ahi ati.

  BJP MLA Khumukcham Joykishan in aseidan’in, BJP hi mipi te huhhingthei ahijeh a anungjui ding kibe jing ahi ati. Chuleh tumasang jep’a TMC candidate 4 in INC abel’u chu disqualification akichat jeh’uva abel’u ahi ati. TMC candidate li(4) ho chun BJP homsung’a lutdingin jong anangai touvin ahi ati. Congress belding thanom ho hi khamnatheiya kivei ho leh corrupt politician ho bou ahiuve tin Joykishan in asei in ahi.


Culture University session masapen kipan ta

Imphal, Sept 20 (DIPR):  Culture University, Manipur in Tuesday nikhon session masapen Dance and Music College, Palace Compound ‘a apan tauvin ahi.

  Vice Chancellor, Culture University Prof Naorem Khagendra Singh in hinkho hi achesa phat kigeldoh holeh khonung ding thil kimu hi ahi’in, Manipur gamsung ‘a chon dan thusim tamtah um’a tu’a Culture University aumhi lungtup guilhung ahi, tin aseiye. “Achesa kum 20 sung’a Cultural University semdoh ding lunggel ineijing uve”, tin Khogendra in aseiye. “Hiche hi ngaicha tah ahi’in, Culture University semdoh nading tohgon hi 2002 kum’a kipan ahitai”, tinjong aseiye.

  Tu-leh-tu’a Manipur’a Culture University ‘a hin department 8 aumin, Thang-Ta, Theatre, Visual Arts, Umang Lai Haraoba, Sankirtana, Dance, Music leh Tribal Studies jong apang’in ahi. University in teaching staff ding’a faculty member 19 ala in chule session masapen’a enrol kibol simlai hi Thang-Ta’a 22, Theatre- 15, Visual Arts ‘a 9, Umang Lai Haraoba’a 15, Sankirtan ‘a 37, Dance’a 20, Music ‘a 28 chule Tribal Studies ‘a 8 ahi. Refresher English leh Refresher Manipuri hi compulsory subject ahi’in, stream jouse’a pang ding ahi.

  Art and Culture Director Dr K Sushila Devi in, “Manipur ‘a Culture University ineiyu hi vangphat umtah ahi’in, hiche mangcha’a chondan ineihou vannoi mutheiya umding ahi”, ati. DIPR Director Meghachandra Kongbam in Manipur gam’a chondan thupi hohi pu-le-pa te khantouna avetsah ahi, tin aseiye. Commissioner, Art and Culture K Radhakumar Singh injong houlimna aneiyin ahi. Manipur Culture University hi Manipur Governor anahi V Shanmuganathan in ahondoh ahi.


Keithelmanbi thilsoh chung’a TPLA in hilchen na le hetsahna nei

Kaybie Chongloi
SADAR HILLS, Sept. 20 (ET): September nisim 16 jan’a Sadar Hills Keithelmanbi (Champhai) vangkho’a gollhang khat a akivohna’a kon thichan anatona thu’a tunin Thadou People’s Liberation Army (TPLA) in hilchenna le hetsah thuphon aneijun ahi.

  TPLA Information & Publicity Secretary, Th. Jalaithang a kon’a thuphon kimun aseina’a, September nisim 16 jan’a akivohna a kon’a thichan anatoh Lunkhoseh chu, AR Intelligence Department a um Lunchungnung toh kitho’a TPLA sepoy ho umna, touna seidoh le matsah a lamkai ahi lhonin ahin kikholdoh jouva Lunchungnung anajam mang man tajongle ama [Lunkhoseh] chu kiman’a gotna anakipe ahi ati.

  Thuphon in aseibena’a, Lunkhoseh chu thichan adia gotna kipe ahipon, hinlah gotna kichansah chu athohlel val’a anunga ahinkho anachanlo ahin, tha teitei ding ti lunggul neija gotna kipe vang chu anahilou ahi ati.

  TPLA thuphon in asei dungjuichun, Lunchungnung le Lunkhoseh kitho’a TPLA ho gena, touna seidoh le matsah’a apanlhon seh hilouvin, hitobanga aguh’a natoh thilbol aneilhon jeh chun khosunga nunao chapang khohephalou tampi lunglinglao tah le tijatah in hinkho anamansah lhonin, athu hi phatsottah phatah akijuilhih nunga September nisim 13 jan’a chu ‘Red-handed’ a achaloh lhonpet tah’a anakiman ahi ati.

  Kholgilna phatah’a akinei phat in, Lunkhoseh amatah in Lunchungnung toh kitho’a TPLA lamkai le sepoy matsah a apanjing lhon aseidoh in, Lunchungnung in sum apehjia khosunga TPLA lamkai ho le sepoy gena, touna aaseidohji’a chule sepoy ho operation abolsahji lhon’a amatsahji lhon ahidan jong Lunkhoseh amatah in ana phongdoh ahi ati.

  Thu kikhol sungin jong themmo kichanlou hellin Lunchungnung in a sepoy duty abollin aseijin, hichun TPLA kivaipohna ana sulunghang becheh in ahi tia Th. Jalaithang thuphonin asei banjomin TPLA in na kitong hi koima changval (personal) a kimuda vetda jeh’a kibol ahipon, TPLA suhmang nadia alung atha tohdoh’a kisalel ho kibolchah joh ahibouve ati.

  TPLA in koima insung mitmona ding le lhahsamna ding  jong anakibol khapon, TPLA suh gentheina ding le suhgamna ding lunggel neiho hi avelvel’a newspaper a warning anabolsa ahitan, hiche joununga jong hichan geija TPLA chunga lungthimse gelna lai hochu angaidamje umlou ahiban’a ngaijong kingaidam kitdeh louding ahi tin thuphon chun aseibei.

  ”TPLA in manthahna akitosanga asumang go hohi thisan vat khat um geija kidou joding ahi” tia Th. Jalaithang in athuphon’a aseitolhonin TPLA chungchanga sepoy CID ham, source ham a pang akimatdoh kit le koimacha ngaidam kichandeh louding ahi ati.

  I-sopi, imi, isa chunga sepoy koma sum kilah’a eima nopsahna ding maimai kigel’a thingnoi kidou hi avel’in koiman bolda kit hen tinjong TPLA thuphon chun aseijin chule tunung tuban le sepoy ho manchah’a pang, CID ho hin khoto le panpi aumle thingnoi douva kilading ahijeh in gotna ichan sanga gotna chanlou nadia minu mipaten jong icha, inaoteu sepoy toh kivop ho ikholtup’a ikisuhtup johdiu aphai ati.

  TPLA in koima aki suhgim nomdehpon, ahin alouthei louva tohdinga lha ahung umkhah le koima oimo ikichanto loudingu ahi tia gihna aneitolhonin, gamsunga kingailutah’a chenkhom joh’a khat suhmang nading le khat noisena a natoh ho inungsun tah diuvin mipi avelin ikitem uve tinjong TPLA thuphon aseije.


Wakotphai by-election toh kisai’in koima gihna akinei pon, akivo jong aumpoi: KRA Home Secy

Kaybie Chongloi
SADAR HILLS, Sept. 20 (ET): Tuchung 8-Wakotphai District Council Constituency by-election toh kisaijin koima gihna jong akineipon chule by-election toh kisaijin koima chunga khutlhana jong aumpoi tin KRA Home Secretary, Jeremy Khongsai thuphon in hilchenna aneijin ahi.

  Thuphon kimun aseina’a, 8-Wakotphai DCC by-election a koima sottum le deilhen tum kiloikhom in akineipon, Congress peuvin, BJP napeh theilou dingu ahi, Congress pelou lou tia gihna joule nal’a lamthu’a kisemthu le ngohna kija hohi kiloikhom in akihepha pon, bul le bal neilou semthu ahibouve ati.

  Jeremy Khongsai in athuphon’a aseibena’a, 8-Wakotphai DCC by-election chungchanga kiloikhom in akilhangsap pipen chu ‘Free and Fair’ ahi. Lungmong sel’in lungsa-ih louhel’in nadeitah’u vote kipeh cheh’un tia kilhangsap joh ahi ati.

  Alangkhatna, KRA Home Secretary pun September nisim 16 jan’a Kangpokpi Oil Pump koma mi kivoh chungchanga hilchenna aneina’a, hiche jan’a thoh hochu Wakotphai DCC by-election toh akimatna imacha aumpon, vote lhadia chego ahiujong akihepha poi ati.

  Aman ahilchenbena’a, Shaktiman teni chun annual tax apehlou jeh uva chapang hon athumji leu thumvei livei anajam uva ahin, hiche jan’a chu amatkhah phat uva a ngeipheu abehpeh u ahin, thingtum moltum a avoh’u jong ahipoi ati.

  KRA in japi thaneina akijapeh jingin, lamdih loule japi thaneina toh kikal’in na akitongpon, tong jong kitonglou ding ahi tinjong KRA Home Secretary pun aseibei.


KPLF/KPLA in president akihaisah tai ti thu toh kimat’a thuphon nei

Imphal, Sept. 20 (ET): Kuki People’s Liberation Front, KPLF/KPLA kiloikhom in aseidan’in Doujam @DJ Mate in Date 20th September nikho’a thuphon abol hi kiloikhom in hetphah na akinei pon ahi ati.

  Kiloikhom in aseina’ah, DJ Mate hi 25 November, 2015 nikho’a organisation’a ana kilalut ahi. Organisation thal sagi le hand grenade thum, meichang 400 chule complete uniform 30 piece apomang in UKLF ah ajampi’n ahi. Orgn. L/Head chule receipt mangcha’a kol le phai gam’a sum ana kidon in chukit le Thadou Kuki thingnoimi min pan in lekha semthu’n Lallim village a pat Changpol gei in sum demang anabol in ahi ati. Chuleh chapang ho ding sil le chen kithot gei in aguh in ajohmang in, ju le sa nehna le ngol in amang in chule orgn thil kol lang gari 125 agumangin anajohdoh in ahi ati.

  Kiloikhom seidan’in DJ Mate hi 41-Chandel wing mai mai’a ding’a organisation CO in’charge ana kipe ahin, ama min’a thuso hung kibol hi bul le bal neilou ahi  ati.

  KPLF/KPLA in aseibena’a, Cabinet meeting ding thu hi PS order louva cabinet khat in anop nop’a meeting a call thei ahipon, hitobang thuso ahung kibolna chung’a jachat aum lheh in ahi ati. Date 30 sung kah’a kiloikhom thil le lo sum apohmang ho ahin thahlut lou leh organisation in achan ding’a lom gotna kipe ding ahi tin Demkhoseh Kuki, Information and Publicity, Kuki People Liberation Army a kuon lekhathot kimu’n aseiye.


Nulou palou chapang ho lhaiseuva anui uva akipadiu kadei ahi: Maj. Radha Krishnan

25 AR Kpi visits and donates essential commodities to Agape Children Home Kangpokpi -webKaybie Chongloi
SADAR HILLS, Sept. 20 (ET): Pathenin phatthei eiboh’a ja-changtah military service a mi kithopina theiding panmun a kamun thei le ibol genthei chaga kamoh vetthim ding ham tin tunaicha’a Silver Jubilee Battalion, Assam Rifles Kangpokpi Post a Post Commander a hung Maj. Radha Krishnan in tunia Agape Children Home avilna chun aseijin ahi.

  Kanggui Ward No. 11 Singsit Veng a um Agape Children Home hi tunia chu Red Shield Division noija 25 AR Kangpokpi Post in vilna le nitin ngaichat thil phabep kithopina aneiju ahi. Agape Children Home vilna le kithopina kibol hi thildang imacha jeh ahipoi, minphat, seiphat le pachat deina a kibol hilouvin anu apa avesuiding umtalou chapang hijat hi khatvei cheh lhaiseuva anui uva akipanau muding deina jeh’a kabol ahibouve tin Maj. Radha Krishnan aseibei.

  Aman aseibena’a, hitobanga chapang hohi kipahtah’a lhaiseuva anuiju hin eikipasahna jatchom beh kasan, kipana lah’a kipana chungnung loijin kagel’e tia aseitolhonin eivekol diu nule pa inei uva, Pathen phatthei boh jalla mi kithopi theidia ium ule, khothengai manlouva hitobanga chapang ho ikithopi jing diu ahijoi ati.

  Maban jongle kahina toh kitoh le keima jokham’a kithopi jing ding kanom’in, amaho goh hilouvin khosunga meithai chaga, genthei hahsa hojong kajo khamkham a kithopi ding hi kakipana ahi tinjong Post Commander pun aseibei.

  Maj. Radha Krishnan in thusomi hotoh aki houlimna’a, Kangpokpi le akimvel’a um khangthah hohin lungthim phatah khat le umchan hoitah khat aneiju kahin kalungu asethei lhehjeng’e atitolhonin Kangpokpi le akimvel’a cheng khangthah/khangdong hohin kiletsah hoithona imacha neilouvin ‘Simple’ tah in ahingun phaicham gam’a khangthah hotoh akibang pouve ati. Ahin, hiche ‘Simple’ tah’a ahin pau hi mi seisei angaisah theijeh un amaho din tijat aumjep in ahi. Ajehchu, aphalou boldia min anganse jongle imacha lungthimse gellouvin aboljeng jiuvin, nu le ma ding ima agel behseh jipouvin ahi tia Maj. Radha Krishnan asei banjomin thilpha bolsah thei mitoh akivop jingleu vang Kangpokpi le akimvel’a khangthah hohi aseding, aphamo ding le amilouding aumpoi ati. Maj. Radha Krishnan in adeh’a Kangpokpi le akimvel’a um khangthah/khangdong military service a lunglut ho lamhil dinga akipehdoh nom le athanopna thujong aphongin ahi. Alangkhatna, Agape Children Home mopo honjong Maj. Radha Krishnan chunga kipathu aphong utolhonin hitobanga Nulou palou, genthei chaga ngailu mihem khat le ni hojeh hin chapang hohin Nulou, palou, genthei chaga ahinau ageldoh jiu pouve ati.


(L) T. Lianboi Simte Memorial Dist. Super Division League-2016 khumkha na um

18502f26-1e4d-4f93-82b9-406beecb56a2 - webLien Gangte
CCpur, Sept. 20 (ET):
(L) T. Lianboi Simte Memorial District Super Division League kum seh in CDSA ho gonna in ana um jing in chuleh, hiche league hi (L) T. Lianboi Simte hetjing na ding’a Innsung mi hon sponsor abol’u ahi. Hiche toh kilhon chun, tukum 2016 (L) T. Lianboi Simte Memorial Dist. Super Division League-2016 khumkha na kingon leh Closing match kichep na 20th Sept., 2016 nilhah nidan 2:00 apat chun Peace Ground, Tuibong ah ana um in ahi.

  Hiche kingon toh kilhon’a Chief Guest Lalhosan Vice Chairman ADCC in asei na ah, (L) T. Lianboi Simte hetjing na ding’a innsung mi ahin gonna chung uva kichem ding hon jong ama geldoh pum a, umchan themtah le Games spirit neitah’a nahung kichep diu ahi ati. Ccpur dist. sung’a football kichem mi hon hiche sang’a dinmun sangjo a na um thei nading uvin pan hah lah uvin lang, nakichep nao hinsuboi thei ding thil ho ah kidalse uvin tin tilkho thuseina aneiyin ahi. Chuleh, Roghumani Singh, Ex-President, AMFA; T. Suranjoy Singh, President IEDFA; K. Momo Singh, Ex-Member AMFA leh T. Brajabhidu Singh, Ex-Member AMFA ho Guest of Hours leh Functional President hina hiche kingon ah ahung jao uvin ahi.

  Guest ho’a pat Closing Match a Kichem ding ho inspection nei ahijou vin, UKB leh RACC closing match kichep na akipan pai pai yin ahi. Chuleh, RACC in UKB ho 4-3 in ajou uvin ahi. Closing match kichai in prize hopdoh na aum in, (L) T. Lianboi Simte Memorial Dist. Super Division League-2016 champion Ahshijolneng Football Club in kipaman dangka 20,000/-, Trophy, Certificate leh Medal akisan uvin, Runner up team United Khozim Brothers in kipaman dangka 10,000/- leh Certificate akisan uvin ahi.


Workers Education Day kimang

Imphal, Sept. 20 (ET): Dattopant Thengadi National Board for Worker Education and Development, Ministry of Labour and Employment, Govt. of India in 59th lhinna Foundation Day chu September 16, 2016 nikhon Constitutional Club of India, Rafi Marg, New Delhi’a Workers Education Day ti’n anamang’uvin ahi.

  Hiche kinguon’a chun chief guest in Sri M. Venkaiah Naidu, Minister for Information and Broadcasting, Urban Development, Housing and Urban Poverty Alleviation, Govt. of India chuleh Guest of Honour in Sri Bandaru Dattatreya, Minister of State for Labour & Employment (Independent Charge), Govt. of India anapang lhon in chuleh specual guest in Sri Shankar Aggarwal, Secretary Govt. of India Ministry of Labour and Employment ana pangin ahi. Chuleh Sri K. Lakshma Reddy, Chairman, Dattopant Thengadi National Board for Workers Education and Development chu kin-pipu in ana pangin ahi. Kinguon’a hin Management Associations, Trade Unions, Civil Society Organizations leh media honjong pan anala’uvin ahi.

  Chief guest Sri Venkaiah Naidu in kinguon’a hung employee holeh guest ho jouse pachatna aneiyin chuleh Central Board for Workers Education ti’a ana kihe Board hi vetjui theitah leh jaa umtah lamkai len khat min’a ‘Dattopant Thengadi National Board for Worker Education and Development’ ti’a kikhel ahi ti’n anaseidoh in ahi.


Sudeva Sports Pvt. Ltd in Football Trial cum-Selection Test nei ding

Lien Gangte
CCpur, Sept. 20 (ET): Sudeva Sports Pvt. Ltd, Vasant Vihar New Delhi akon official hon ahung lhung ding 24th Sept., 2016 jingkah nidan 9:00 apat nilhah nidan 4:00 sung Ccpur dist. sunga football kichep lunglut ho’a ding a Trial cum-Selection Test, anei diu ahi. Hiche toh kilhon a, apang thei ding ho Category 1 na Under 12 years (Born on after 1st Jan., 2004); Category 2 na Under 14 years (Born on or after 1st Jan., 2002); Category 3 na Under 16 years leh Category 4 na Under 18 years ho’a ding ahi.

  Sudeva Sports Pvt. Ltd, Vasant Vihar New Delhi, Trial cum-Selection Test a lhendoh a um ho Sudeva Residential Football School a chop’a (Sponsor) um ding chuleh 2nd Division Indian League a kichem diu ahi. Trial cum-Selection Test hi Kholmun Football Ground a um ding ahi. Ajao ding ho’n Birth Certificate Original leh Xerox copy choi ding, School reading certificate, Passport photo 2 chuleh eima mamo kichepna van kichoi cheh ding ahi. Lunglut na leh hetbe nom nei ho’n Sehlam Singson, Local Incharge P.No. 9862740672 a kithujah pi jing thei ding ahi.


Editorial Untitled

Jiribam lhang’a Tribal hon Jiribam district deilou

  Jiribam lhang’a Tribal hon Jiribam district pilhing hidi ajahda uleh itidan’a Tribal ho kiloikhomna ‘Tribal Rights Demand Committee’ (TRDC) min’a jahdana umle kilom’a tua hi Hmar Students’ Association State Coordinating Committee (HSA-SCC) min’a jahdana thu kiphong hi Tribal lah-a jong ajahda dehset um tina ahi. HSA-SCC sei hi ahileh Jiribam district umdohdi jahdana thu seidia TRDC in ngansena aneiye ti ahi. Tribal ho kiloikhomna (platform) TRDC um ngal’a jahdana thuphon boldi aumjongleh hiche ‘platform’ min’ah kibolleh kilomtah ahin tua hi Tribal holah-a Tribe khat kiloikhomna in jahdana thuphon abol hi athu hatmojo thei ahi. Jiribam district kidelna gam sung’a cheng lah-a atampen hi melhei ho ahiuvin, hinlah Tribal holah a Khasi gei um, Bengali Muslim holeh Hindu jong um ahi. Jiribam phaicham sehseh hi district khat a semkham ahilou jeh a gamhuop aliet jepna dia Hmar ho tamna Chuchachanpur district a Vangai Range (lhang) leh Tamenglong district huop Kaimai lhang jong ahitheichan’a Jiribam district a lutsahdi ti ahi. Vangai lhang’a Hmar kho ho Jiribam district a alutleh Jiribam district a alhomjo (minority) hidel diu, thinglhang gam jong phaicham kivaipohna’a lahlut a umdi tina ahi. Chubang’a chu Tamenglong district themkhat Jiribam district a lahlutdi kitina’a hi Naga kho sang’a Kuki kho tamjo ahijeh in Kuki ho dia vang Jiribam district hihen, Tamenglong district a umdendi hileh thakhat hidi ahi. Kivaipoh navah nadi itilevang Jiribam district aumdohleh agam alhang mipi jouse dia kijendi (lemchangdi) ahi. Tua Jiribam Sub-division hi Imphal East district a kikoi ahijeh in Jiribam’a kon Imphal East DC office a thilkhat boldia chedi ho chun ni thum beh asuhlutdi ahi. Vangai lhang’a cheng hojong Churachanpur DC office a thilkhat gaboldia chedi tileu nithum beh asuhlut diu ahi.

  Manipur’a district bolbedi kitina’a aboinapen hi chi le nam (ethnic line) a district leh sub-division ho kibolgo dan’a kigel jeh ahi. Sadar Hills jong hi district thah khat aumbeleh khantouna umbedi, kivaipoh jong nomjepdi tina ahin, agam sung’a cheng Naga hon ‘minority’ hidi akichat jeh uva ajahda dehset u ahi. Jiribam District Demand Committee (JDDC) hohi meilhei ho bou ahiuve. Sadar Hills District Demand Committee (SHDDC) a hi Nepali hojong ajao vang’un Naga ho jaolou ahi. Agam sung’a cheng jouse kithutolou jeh hi aboinapen ahi. Ahin govt in agamsung’a atamjo ho dei chu bol’a pha ahi tia abolle kichai jeng dijong ahi. Assam Chief Minister thah Sanowal in Majuli twikol Sub-division gam neocha chu election akaidoh a Chief Minister jong ahidoh-doh lha khat sung’a district khat a asemdoh jeng ahi. Tu hi election dikon ahijeh in govt injong Jiribam leh Sadar Hills chung’a hi kitepna khat ahinnei kit maithei, bolla kibol dehlou maithei ahi.


*For more news, articles etc. please click “ET IN PDF.”