Sept 19, 2016 Local news

Sept 19, 2016 Local news

640
0
SHARE

J&K Uri kho’a Army camp kibulu, sepai 17 thi

45386689.cms_Srinagar, Sept. 18 (Zee News): North Kashmir gamsung Uri town’a um Army cam thingnoimi hon Sunday jingkah in abulu uvin, camp hi Army Brigade Headquater, Uri ‘a kon metre phabep’a bou gamlha ahi’in chule Srinagar khopi’a kon km 102’a gamlha ahi.

  Hiche mun vel ma ma’a um Mohra mun thingnoimi hon kum ni masang’a jong ana bulu-u ahitai. Achesa December 5, 2014 kum’a hiche mun kibulu na thilsoh’a sepai 10 thi ahi. Congress president Sonia Gandhi in thilsoh’a vangsetna toh ho alunghempi na thuso aneiyin ahi. Chule thilsoh hi mi lungneo ho natoh ahi, tin Gandhi in demna aneiyin, themmona neiho gotna peh ding’a jong aseibe’e.

  Uri kibulu na thilsoh’a sepai 17 thi’a chule mi tamtah kitongkha ahi. Thilsoh toh kisaiya Home Minister Rajnath Singh inmun’a high-level toukhomna um ding ahi.


AMFA in FC Zalen Dk. 50,000 leukham bol

fc zalen and amfa UntitledImphal, Sept. 18 (ET): Achesa 14 September nikho’a Polo Ground a Manipur State League a FC Zalen toh NEROCA kichepna’a boina ana umtoh kilhon’in All Manipur Football Association in tuni’n seilhahna khat aneijin ahi.

  AMFA sei dungjui’in kichep sung’a chun referee pa suhmo ima aumpon, ahi ding dol tah’a kichep ana kichaisah ahi ati.
Fans hon thil-le-lo asuhset’u toh kilhon’a club Dk. 50,000 leukham kibol ding ahi. Chuleh AMFA sei dungjui’a hiche nikho’a football ve jouse 100 percent chu FC Zalen te fans ngen ahiuve tinjong aseibei.


Thingnoi hon amaho phatchomna din simlai ho amangcha uvin phamo akisa lheh’e: KSO-GHQ

Imphal, Sept. 18 (ET): Tulah Chandel district gamsung’a social organisation ho adeh’a KSO Chandel simlai kiloikhomna chung’a thingnoi kiloikhomna khat-le-ni in amaho group phatchom na ding’a KSO Chandel District hunam’a amanchah jing na chung’a KSO General Headquarters in nasatah in phamosah na akiphong in ahi.

  KSO hi simlai ho phatchom na ding le namsung’a khantou machal na dinga kiphut doh simlai kiloikhomna ahi in, ahung kiphudoh nikho akipat society sung’a langnei sihnei na beihel’a natong ahijing in, namsung’a thingnoi kikah’a jong tosot tum umlou hel’a hahsat lungdon khojin nikho’a jong panlah natheichan’a tanggol’a natong jing ahin ahi.

  Tunai cha’a KSO Chandel district lamkai ho hu-nam a thingnoi group khat phatchom na ding’a thuso (press release) kibol sah a, chujou’a thingnoi group khat ten jong hu-nam a suhtheng na (counter press release) kibolsah kit, chuleh thingnoi kikah’a kitomo kikalto na jeh’a a KSO lamkai ho genthei tah’a in-le-lou a jong lungmong’a umthei louva kikoi hi hohi KSO GHQ in nasatah in phamo akisan ahi. KSO hi India gamsung leh adeh’a itamchen napen’u Manipur gamsung’a jong simlai kiloikhom na lah’a Govt. le mipi in gin-le-ja a aneiloi khat ahi in, KSO minset na ding leh simlai kiloikhomna khat toh ding le bol ding’a kilomlou hu-nam a kibolsah ho hi avel’a khungnung jong leh bolkit tahlou ding in KSO GHQ in temna ahung kineijin ahi, tin Seiboi Haokip, General Secretary, KSO General Headquarters a kuon lekhathot kimu’n aseiye.


IT Road Kangpokpi Petrol Pump kom’a thal choi hon chele vahle ho sugim

Sadar Hills, Sept.18: Janhin, Kuki thalchoi ho hidinga ginmo mi phabep in Kanglatongbi a kon Makui vangkho jon a che mi get Imphal-Tamenglong lamlen pam’a um Kangpokpi Oil Pump komma asugim’uve tin thulhut kimu khat in aseiye.

  Thalchoi ho khut’a vangsetna toh ho lah a mikhat (amin kiseidohlou) in aseidan in “kei le kaloi sagi chu Shaktiman sunga katou’u ahin, Kanglatongbi a kon 8-Wakotphai District Council by-election a vote tatdinga Makui jon kahiuve ati. Kangpokpi kahinphah un a bike a kipo mithum in eihin jui’un , Kangpokpi Oil Pump maiya einakham’u ahi. Mithum ho chun KRA-U annual tax nape hihlai’uve tin sum athum un ahi. Phat chomkhat jou chun mithum ho chun Shaktiman atou jouse chu munthip khat a eipuidoh’un, lungsetna beihel in eivoh’un ahi. Thalchoi ho kom a chun sum kaneilou dan u jong kasei’uvin chuleh Shaktiman Mahajon teni jong kalah’uva panglou ahidan kasei kasei vang’un, le KNF nanoiseuve tin eivoh tei tei yun ahi ” ati.

  Aman aseibena’a chun, thalchoi ho chun gari crane ni akilah’uvin, jing nikho leh Dk.10,000 toh nahung kilheh diu ahi tin khoutah a gih pummin eisol doh’un ahi ati.
Ginchat umtah thulhut khat in asei na a, September nisim 16 nikho thilsoh’a panla KRA-U cadre ho chu September nisim 17 nikho chun S.L.Veng,Ward No.16, Kangpokpi mun’a security forces hon anaman tauvin ahi.


ST status’a meilhei ho lahlut ahina ding’a ‘mass rally’ che lha

DSC00122Imphal, Sept. 18 (ET): Imphal khopi’a Sunday nikhon mi tamtah in Indian Constitution Article 342(1) dan noiya Scheduled Tribe status ‘a Meitei/Meetei ho lahlut ahina ding’a kijotna anei uvin ahi.

  Jingkah nidan 10.30 don in Thau Ground, Thangmeiband ‘a konin kijotna apan uvin, Khuyathong, North AOC, Minuthong Hapta leh Checkon ajotpa uvin Hatta Kangjeibung, Palace Compound chan akijot uvin ahi. Meitei/Meetei ho Scheduled Tribe status ‘a lahlutna ding’a thumna lekhajem akidop uvin chule Hatta Kangjeibung ‘a public meeting abol uvin, kin-gon’a mi 10,000 nailam in pan ala uvin ahi.Co-ordinating Body, Scheduled Tribe Demand Committee, Manipur lamkaina’a rally chelha ahi’in, Hapta Kangjeibung mun’a public meeting abol nauva kilol lhahna thum asem uvin, kiphinna kehlet be ding tohgon anei uvin ahi. Article 342 (1) noiya Meilhei ho ST list ‘a lahlut ding’a thumna hi civil society organisation chom chom in atosot ahijeh’a kiphinna kehlet be ding, Manipur sorkar in Meilhei ho ST status ‘a lahlut nading’a October lha masang’a document angaicha jouse athot doh ding chule sorkar in committee ho thumna anahsah louva ahileh kiphinna kehlet be ding’a kilol lhahna aneiyu ahi.


AMSU in gamsung’a Coca Cola ‘ban’ bol ta

coca cola banned I6uqfQxImphal, Sept. 18 (ET): All Manipur Student Union (AMSU) in Manipur gamsung’a Sunday nikho’a kon Coca Cola thil (product) ho jouse ‘ban’ abol ahitai, tin kiloikhomna in DM College campus ‘a thuso miho heng’a thuphon anei uvin ahi.

  Secretary general, AMSU, Manjit Sarangthem in thuso miho akimupi na’a chun, achesa August nisim 29 nikho’a AMSU volunteer hon BSR enterprise, MG Avenue ‘a Coca Cola soft drink bottle 1000 vel amu uhi akisem na leh akidon thei nading phat sung (expiry date) kikhel ahi, ati. AMSU in hitobang thil dihlou bol’a pang dealer thum ho September nisim 15 nikho kah’a akimupi diuva kouna apeh ahi’in, hinla BS enterprise tilouva adang teni ahungpoi, ati.

  Kouna kipe dealer hohi SK Enterprises Imphal, SB enterprises chule BS enterprises ahi’in chule Bikram kiti Nongmeibung’a in bahara ‘a cheng khat jong pang ahi. Amaho hin japi heng’a thil umchan aphondoh diuva AMSU in asei ahi. Amaho hin gamdang mi kol-le-vai hotoh kihouna anei uva, kho hepha louva milham gamsung miho hi amanchah ahi, tinjong AMSU in thuso aneiye. Consumer protection act, 1986 leh Food Safety and Standard Act, 2006 noiya themmona neiho hi gotna kipe ahi’in, ahin, Manipur sorkar in amaho chung’a action ima alahlou ahi, tinjong aseiye.

  Centre sorkar in apeh dan dungjuiya themmona nei ho chung’a thudih’a thutanna aum kahse’a gamsung’a Coca Cola thil hi kijoh theilou ding chule kihom theilou ding ahi, tin simlai kiloikhom hon thuphon anei uvin ahi.


Moreh khopi sung’a khamnathei bol kikhah chelha jing

UntitledMoreh, Sept. 18 (ET): Achesa September nisim 1, 2016 nikho’a kipat hun Moreh khopi sung leh akimvel’a Drugs louchang ho leh khamnathei dng ho ajoh leh ane ho akikhah pan tan ahi.

  Hiche tohguon hung kipatna hi Moreh Centre HTC, KSOM, KWU&HR leh KCA Moreh Block chuleh HTC Unit-I – XII amaho kithokhomna leh panlahna jal’a lolhing ding ahi tin Anti Drugs Drives & Rehabilitation Committee (ADD & REC) Chairman, NP Haokip in aseiye.

  Aman aseina’ah, hitobang thilphalou le thet umtah a-itih a jong ana kideilou drugs louchang khamnathei ho suhtang na ding’a natoh ache lhah laitah ahi tinjong aseiye.

  Hiche tobang tohguon hi tumasang’a chu boldoh ding ahitan hinlah akiboldoh theilou na chu drugs addict ho koina ding mun (Rehabilitation Centre) akitup lou jeh’a ana kiboldoh theilou ahin, tua ahung kiboldoh theina hi Gospel of Shalom National (GSN) le Hope Centre Moreh, amahon akoina ding mun ho ahin suhtoh uva lhathum sung’a sun le jan’a tahsa le lhagao’a ahin boipi uva ahinkho’u jong ahung kikhel theina ding le alhagao hinkho’u thahsem ahitheina ding’a ngailutna le pohnatna neitah’a kipehdohna ahin neijeh uva natoh kipanthei ahi tinjong asei in ahi. Hiche khamnathei ho hi athahbeh ahipon, achesa kum somthum masang’a pat ajoh leh ane’a ana umpan ahiti.

  Khamnathei kibol ho khangdong hinkho ijat ham khat ana kihuhdoh man tapon ahi. Khamnathei ne’a johsah ho hi thet a donlouva koi ding ahipon, iti lamdol’a ahinkho’u thahsem peh ding ham tijoh igel joh diu ahi ati.

  Tu’a hiche kibol hi tu le tua dingseh bou ahipon khonung’a chapang hung pengthah ho ding’a lampi kisempeh masat ahi, chule hiche tohgoun hi sum le pain eh le chah hijat lut ding ahi ti’a budget kigong mas’a kibol ahipoi. Anatoh kipan masa’a sum le pain eh le chah kiholthu ahitah jeh in koi tobang changvel hihen houbung hijong leh kipana jal’a sum le pa hihen neh le chah hijong leh ahin kithopi nom jouse kot lientah akihong’in liem ahijing’e. Tu le tu’a Hope Centre a umjat numei li (4) panna’a agom’a mi 64 ahiuve, tin NP Haokip, Chairman, ADD & REC a kuon lekhathot chun aseiye.


Japi in athaneina alamlouva mangcha’a police constable 1 lethuh

Imphal, Sept. 18 (ET): Khongjom Tarpan nikho’a kin-gon’a pang ding’a che milham thum police constable khat in athanei na alam louva aman jeh in Sunday nikhon japi hon police constable pa gotna ape uvin ahi.

  Thulhut kimu dungjuiya, police constable khat in Khongjom War Memorial Complex kom Thoubal district ‘a Khongjom Tarpan kin-gon’a pang ding’a che mi thum alamtin’a, hunam’a uphoh chop’a achop sah ahi. Tarpan kin-gon nit’a kikhom mipi hon thilsoh umchan amu phat uva lunghang uva police constable pa joh amat uva, police constable pa joh hunam’a milham thum ho abolna bang’a uphoh chop’a achop sah-u ahi.

  Phat chomkhat jouvin mipi hon constable pa police station’a apelut uvin chule Khongjom War Memorial Trust hon police constable pa chung’a hehna jong asem uvin ahi. Police constable pa hi Laishram Rajesh Singh, constable No 7849 ahi’in, Lamding Laishram Leikai, Khangabok Assembly constituency ‘a cheng ahi. Chule milham thum hunam’a agimbol hohi Md Ibocha, Md Aisque chule Md Safiruddin ahiuvin, abon uva Sangaiyumpham Mairen Khun Mayai Leikai, Wangjing Tentha Assembly constituency ‘a cheng ahiuve.


Constable (Male/Civil-2013) Recruitment

Imphal, Sept. 18 (ET):Manipur Police Department nuoi’a Constable (Male/Civil-2013) kilahna’a MPTC, Pangei mun’a Physical Efficiency Test a pan lalou lai hon aphat, amun leh nikho kivet’a chethei ahi.

  Churachandpur district – 24 & 25/09/2016, 8:00 am, Senapati leh Tamenglong district – 26/09/2016, 8:00 am, Chandel leh Ukhrul district – 27/09/2016, 8:00 am, Bishnupur district – 28 & 29/09/2016, 8:00 am, Thoubal district – 30, 01 & 02/09/2016, 8:00 am chuleh Imphal East leh Jiribam Sub-Division’a – 03 & 04/10/2016, 8:00 am hiding ahi.


Trinamool Congress MLA 4 in INC jop ta

trinamol_4_mla_joining_congress - webImphal, Sept. 18 (ET): Manipur Legislative Assembly ‘a Trinamool Congress MLA 4 in Sunday nikhon party adalha uvin Indian National Congress ‘a alut uvin, MLA 4 in INC jop ding agot Manipur Pradesh Congress Committee President, TN Haokip in phatsahna ape tai.

  MLA 4 hohi Thounaojam Shyamumar (Andro Assembly constituency), Dr Irengbam Ibohalbi (Oinam Assembly constituency), Konthoujam Sharat Singh (Konthoujam Assembly constituency) chule Oinam Lukhoi (Wangoi Assembly constituency) ahiuve. Thuso miho heng’a MLA Th Shyamkumar in Trinamool Congress dalhah ding’a kigel lhahna hi state lamkai hon point thum lhing thumna anei party in abulhit louva kon kila ahitai, ati.

  Party lamkai hon GoI leh NSCN-IM in ‘framework agreement’ asem thu hi apohdoh uva chule gamgi venna leh Inner Line Permit system gamsung’a chepi nading’a pan alah diuva ngehna kinei ahi, tin aseiyin, ahin, agenda khatcha hi Trinamool Congress lamkai hon gelkhohna aneilou jeh’a party ki dalha’a ahi, tin Shyamkumar in aseibe’e. MLA 4 ho Chief Minister Okram Ibobi Singh in liemna aneiyin ahi. INC ‘a MLA 4 kilahlut be hi khovei’a umding election’a machalna hiding ahi, ati. Chule BJP jop’a legislature hohi phat gomkom ve le’a holt ho ho ahiuvin, amachang phatchomna ding’a party ponlap akheljing-u ahi, tinjong demna aneiyin ahi.


Churachandpur’a go nasatah’a ju

CCpur Sept. 18 (ET): Phulou helouva go hatah ajuh jeh in Churachandpur khopi mun chom chom’ah boina jatchom chom ana lhung’in ahi. Hiche chuhgo in atohkhah mun hetthei ho chu ahileh Laijon veng, Kamdouvaeng, Canaan veng le adang dang ahi. Gojuh chu kolphe le keh in ajui in ana gimnei lheh jeng’in ahi. Thulhut kimu’n aseina’a Khenjang’a um Power Supply jong ase’n hiche toh lhon chun khopi sung kolphe meivah ana um pon ahi.


Eimi Christian Prayer Fellowship

EPFC webImphal, Sept. 18 (ET): National Games Village a Houbung chom chom um hon nopni dani le adang danga pan lahkhom theina din EIMI CHRISTIAN PRAYER FELLOWSHIP (ECPF), NGV kiti kiloikhomna khat aphutdoh tauvin ahi. Tunia KBC C/C, NGV munna kibol kihoukhomna a chun EOC, EBC, TBA, ECA, AG, MPC, ECA(E), KCC, VCF, CATHOLIC, KBC apang’un ahi. ECPF phudoh ahito lhon in 2016 kumlhun kah a Chairman le Secretary mopohna podin Rev. James Minlun Pastor (EOC) leh Pr. Khupjoyful Singson (KBC) lhendoh ahilhon in ahi. Tuni meeting a hung jao jou lou houbung dangho jong hiche kiloikhomna a hi jao ding ahi tin thulhut akimui.


Editorial Untitled

Arunachal a Congress kiphuhlhu thou-thou

  Centre in bol ing’e ati tahtahleh aboldoh jeng mutheina nukhahpen hi Arunachal Pradesh a Congress government aphutlhuh keo hilouva kum phabeppi ahung kithodoh kitnalou di geiya asotlhuh hi ahi. MLA 60 umna Assembly a Congress MLA 40 valset umna chu tun khat bou aumtan, hijong chu Ex- Chief Minister khat ahinalaiye. Kumbul’a pat Arunachal Pradesh a government (ministry) hin anabuoipeh-a President’s Rule (PR) gei anakikoiman ahi. 2014 kum’a Assembly Election’a chu Congress party lamkaina’a Nabam Tuki Chief Minister hung hidoh anaahi-e. Hiche’a pat a chu BJP hon dungpei vaipei ahinthopan uva itileh Congress party hi State sung’ah akithaimangdem ti ana ngaito u ahi. Tua hi Nabam Tuki khel’a Congress Chief Minister hung hidoh Pema Khandu in MLA 43 Congress a kon’a apuidoh-a PPA (Peoples Party of Arunachal) a alut tah jeh un Congress MLA khat bou dalhah ahitan akidalhapa Nabam Tuki hi ex-CM ahivang’a iti kipei jongleh chomkhat tadia dia Congress ahin chohing nadi lampi umtheilou ahitai. Arunachal politics a thilsoh hi kum phabep masang’a Manipur’a Congress MLA tamjon W. Nipamacha lamkaina’a MSCP anaboldoh uva Ex-CM Rishang Keishing achangseh-a Congress a anadalhah utoh kibang chet ahi. Arunachal Pradesh akon Union Minister of State (Home) umjeh a jong hi Arunachal a BJP to kivop party beh tundoh-a Congress vaipohna suhbeidi ti hi NDA/BJP tohgon thupi khat hidi ahi. Chuleh Arunachal politician leh mipi honjong Union Minister khat aneijeh uva ichan ham’a Centre lung aholdiu jong hisa tobang ahi. Ahin CM Pema Khandu leh Congress MLA chujat PPA a alut lonau jeh pipen hi party lungel le chepi (ideology) jeh jong hilou, sum/paisa jeh bou ahijong hetsa ahi. Hiche thudih hi Arunachal Deputy CM, Milun Chowna Mein in thengsel in aseidoh-e. India sunglang’a State lien hovang sum (development fund) thua Centre’a ki-ngam louva aumthei jeh un Centre injong anopnop amohlo theipouve. North East a State neo hovang Centre in bolchahdi ati-ngal khat chu ajo mama tina ahi. Arunachal a PPA hin Congress not-thap’a akoiya BJP to kikhutjop kit ahitai. Supreme Court in Nabam Tuki lamkaina Congress ministry ahin chohing jouva chu Centre injong Congress ministry hi phuhlhuh teidi ti thangtom tah-a ahinbol tina ahi.

  BJP in North East a Assam ahinlah jou uva Arunachal jong lampi jatchuom beh khat a ahinlah u ahitan tua lhangphong tah-a asei uhi 2017 teng Manipur hinlah di ti ahi. Nagaland leh Tripura hila Congress pohna hilousa ahijeh in tua North East a BJP ho tup hi Manipur, Meghalaya leh Mizoram ahung hitai. 2017 a Manipur’a ahung hat uleh 2018 teng Mizoram leh Meghalaya MLA election a jong hatdisa’a hung kigel diu tina ahi. North East a State neo hohi sum le pai bouva Centre a ki-ngai hilou u, koikoi Minister hisah diham tiho geiya Centre party High Command atijiuva Delhi lang kikho tho jeng ngen ahitahtah jeh uva Centre kichep nopna hiu ahi.


*For more news, articles etc. please click “ET IN PDF.”