Sept. 17, 2016 Local news

Sept. 17, 2016 Local news

923
0
SHARE

CCpur Dist. SDO/BDO building kihongdoh ho khatcha function lou, fencing leh main office selha kit ta

sdo Building failB.Lalboi Gangte
CCpur. Sept. 16 (ET): Manipur State vaihom Manipur Chief Minister O.Ibobi Singh leh Deputy Chief minister Gaikhanngam teni makaina noija Churachandpur district sung’a Congress MLA ho toh achesa 24 April 2015nin nikho khat mipi kipana dingin Tribal Area Inclusive Growth Infrastructure Project, Manipur Development Schemes (MDS), Special Plant Assistant (SPA), Rural Development (RD) fund noija Sub-divisional Office/BDO Office Building Samulamlane, Sangaikot SDO/BDO Office building, Saikot SDO/BDO Building, Lanava BDO Office Building, New Lamka BDO Office Building leh Lanva block building kisa ho jotheng ahi tai ati. Manipur Chief Minister in nikho khat’a ban neicha Block hopsung’a cheng ho khantou machalna di leh mipin amamo hou amuthei na diuva manchah thei ahi tai ti’a hondohna anei chu, tunichan’in SDO/BDO Office ho a office koima akaipan hihlai in, kiminphah office jouse Lamka khopi sung’a Office akaiyui.

  Hiche SDO/BDO Office Building kihongdoh ho’a natong ho Office akai masang’un Building le Fencing ho mun tampi achimlha tan, main building le Staffs Quarter ho ase tamtah aum kit tan, chuleh akihondoh kal kum 1 lha 5 achetah vang’in tunichan’in State Govt. a kuon a function na di ima thu akiseihihlaije.

  Chuleh SDO/BDO building Samulamlane, Sangaikot, Saikot, Lanva, New Lamka, hopsung’a cheng mipi te ding’a vangset umtah chu SDO/BDO Block Office ho a Staff hon tuni geiya lolut louva akoi na ban’a office sung’a manchah ding furniture khatcha jong aum pon ahi. SDO office ho pilhin sah na ding’a State Govt’a kuon ima thu aum pon chule District Administration’a kuon Orders sodoh na leh nona jong tuni geijin aumkit hihlai jin ahi.

  Chuleh Sangaikot, Lanva leh New Lamka SDO/BDO Office mun’a SBI Bank , SDO/BDO Office kihondoh nikho’a kipat agamkai mipi ten manchah thei ding ahi tai ti’a Manipur chief minister in akamcheng tah’a aphondoh’a, mipi’n kinepna anga’u chu tuni chan’in akinepna’u hi mopohna nei hon mipi ngaichat ho asubulhit jou pouvin, Bank khatcha jong tuni geijin function louvin alim bou akitung’in ahi.

  Chuleh SDO/BDO Office building kihondoh na lah’a Tuibong SDO/BDO bou hoitah in a function in sub-div hopsung’a um mipi hon Hill house Tax hihen, lekha poimo jouse jangkhai tah in akilah thei tauvin, Revenue ho jong sub-div hopsung’a umjouse akikaikhom tauvin, hiche kipilhin sah hin Tuibong sub-div sung’a mipi te khantouna le machalna amusah in ahi. Chuleh State Govt. in 2015 MDC Election ah Congress ho natoh hoidan hiche ahi tin mipi lhepna leh Election vote holnan abol’un, SDO/BDO Office Building ho hondohna anei’u ahi tin suhpilhing lou’a um Sub-div sumga mipin state govt. thepmo achan tauvin ahi, agam mipi ngaikhoh nanei leh gamsung khantou, natong Govt. hiu leh tu’a jong SDO/BDO office ahondoh houjouse mipi hon lekha poimo angaichat hou jouse CCpur SDO mun dellut lou’a phatsu lutlou leh sum le pai sumang lou’a ama ama sub-division a beilam tahleh jangkhai tah’a ngaicha ho akimuthei u ahitai atiuve. Ahin hiche ho suh pilhin nading’a mopoh nanei mipi thakhel’a thu le la seiding Politicians hon pan ala pouve atiu vin ahi.

  Chuleh 29 Dec 2016 nikho’a Thanlon sub-division noiya um Sinzawl kho mun’a 33/11 KV Power Sub-Station jotheng ahitai tia Manipur Chief Minister in anahondoh jong chu tuni geijin agam mipin kolphe meivah amukha naipou vin ahi, chuleh hiche Power Sub-station kihondoh nikho hin Dept. hon Generator 2 mangchan, Power Sub-Station chu Manipur chief minister in ana hondoh ahi, hiche kin kichai jouva kolphe meivah amit chu tuni geiya khatvei jong kolphe meivah kiti vah kha nailou ahi tin khomi ten aseiyun ahi.


Nehguh leh North East kivaihom thu’a nikho thum seminar hondoh hita

corruptionImphal, Sept. 16 (ET): Court Room, VC Office, Manipur University’a nikho thum ‘Corruption and Governance in Northeast India’ Regional Seminar hondohna anei uvin, kin-gon hi Social Work Department, Indira Gandhi National Tribal University, Regional Campus, Manipur in Manipur Studies Centre, Manipur University toh thakhat’a North Eastern Council, Shillong sponsored na noiya abol ahi.

  Thangso Baite, Member of Parliament Chief Guest in apang’in, Prof W Nabakumar Singh, Anthropology Department, Manipur University leh Khaidem Mani, Senior Advocate Guest of Honour ‘a apang lhon in, chule Kim Gangte, ex-MP leh Dr Ng Ngalengnam, Director, (i/c) Indira Gandhi National Tribal University, Regional Campus, Manipur kin-gon’a special guest leh president ‘a apang uvin ahi.

  Dr Aheibam Koireng Singh, MU in ahoulimna’a seminar hi academic hon India gamsung’a neh-guh muntin’a aum thu ahetthem nadiu thu’a houlimna aneiyin ahi. Nehguh hi milen milah ho office ‘a jong um ahi’in, SI, ASI, Constable Clerk ahilouleh Nurse kilahna hi Minister leh MLA ho sum holna ahitai, ati. Manipur gam sung’a nehguh hi ja umtah tah hon abol jeh’a nehguh jong jana kipe’a ahitai. Milham hon phailei ahilouleh inmun ajoh uva tohmun mu nading’a sum-guh sun na’a aman ahi, tinjong aseiye. PDS, Loktak Lake leh Mapithel

  Dam chule tu’a police constable thu’a jong boina umlo’a ahi’in, activist leh academia ho thipbeh’a umlouva hitobang chonna suhmang nading’a pan alah angaiye, tin athusei khumkhana aneiyin ahi.

  Nehguh hi insung’a niseh’a kisei thucheng ahitan, ache jom jing’in ahi, tin Prof W Nabakumr Singh in aseiye. Nehguh hin society leh gamsung asuhset ahi, ati. Hiche hin khonung’a kisemdoh ding society atohkhah ding ahi, tin aseiyin, ahin, nehguh aum hi sorkar seh seh themmo chan ding ahipon, mipi hojong kibang’a themmo ahi, ati. Nehguh suhmang ding hi eiho tohding ahi, tin aseibe’e.

  Khaidem Mani in ahoulimna’a neh-guh thucheng hilchenna anei masa in, office mun ho khat in ama phatchomna din amanchah hi sum chule thaneina adihlouva kiman na ahi, ati. Nehguh hi anem’a kipan ahi’in, Panchayati Raj leh ADC ‘a kon state-level machinery chan ‘a um ahi, tin aseiyin, atekahna’a tu naicha police constable kilahna thu aseiyin ahi.

  Thinglhang hihen lang phaicham hijongleh thipbeh’a moh vet ding ahipoi, ati. Thipbeh’a ium-u leh ithoh thou hi nehguh suhmang nading’a idalhah phat-u ahitai. Hiche teng chule sorkar hing ding, kipunkhomna umding chule Mnaipur gamsung hi democratic society dihtah hiding ahi, tin aseibe’e.

  Kim Gangte in ahoulimna’a Delhi khopi’a Common Wealth Games umsung’a Suresh Kamaldi in nehguh abol leh akimat dan thu aseiyin ahi. Ahin, Suresh Kamaldi hin nehguh bol dan hi Manipur gam’a kichuhna anei hileh kiman louhel ding ahi, tin aseibe’e. Phaicham’a election aum kon teng numei ho akikhom uvin sum athum nathei diu candidate angah uvin, thinglhang’a meithal choi hon ballot box akichoi mang uvin ahi. Hiche hi nehguh kipatna ahi’in, politician hobou themmo ichan theiyu ahipoi, ati. Khohsahna aumlou, vaihom themlou leh nehguh umjing jeh’a gamsung se’a ahi, ati.

  Chief Guest ‘a pang Thangso Baite in seminar hi lekha sim hon nehguh umdan thu ahetthem nadiu ahi, tin aseiye. Hiche hi department ahilouleh ministry ahilouleh mikhat bou ngoh thei ahipoi, ati. Chule police constable kilahna’a thuchaina sem jeng jong hi dihlou ding ahi, tin aseiye. Boina in gamsung asuhset ahi, tin aseiyin chule bandh leh blockade bol hon lamlen kisemphat nading leh adang dang thu’a kiphinna abol uhi ama ama ngaichat dungjuiya mopohna nei ho heng’a jong ache diuvin aseiye. Dr Ng Ngalengnam injong seminar kiman lo na ajeh ho thu aseiyin, sorkar in amopohna’a alhin lel na aumleh sorkar hi japi dou ahi, tia sei jeng theina thaneina mipi in anei ahi, ati. Aman asei dungjuiya nehguh hi asang’a kon kipan’a aneopen channa um ahi.


Congress in Arunachal lhaso ta, Chief Minister BJP a kichon lut

Pema_Khandu_2939312fNew Delhi: Congress khutsip’a kuon’in Arunachal Pradesh akitoldoh kit tan ahi.

  Hiche hi Supreme Court in government thah atundoh peh lha ni jou bep thilsoh ahi.

  Friday ni’n Chief Minister Pema Khandu in BJP toh kikhutjopna aneitan, ruling party member khatbouseh adalha’n ahi. Hiti ahitoh kilhon’a northeastern state Arunachal Pradesh hi BJP ally in vai apoh ding ahitai.
Khandu in agom’a Congress MLA 42 akilah in regional People’s Party of Arunachal ajop uvin ahi.Hiche party hi BJP toh kikhutjop ahi. Hiche Congress MLA khatseh kidalha pa chu koidang hilouvin Nabam Tuki ahi.

  MLA 60 hina’a chun Congress in 44 leh BJP a kuon member 11 ahiuve. Congress ana tosot Independent MLA ni in jong hiche regional party chu ajop tan ahi.
“Keima’n assembly speaker kakimupi’a Congress’a kuon’a People’s Party of Arunchal ahilou leh PPA kajop tauve” tin Khandu in aseiye.

  Hetthei chu Tukum January lha’a Arunachal’a govt ana kitahlhah jouva Supreme Court in thupeh aneijou July lha chun Khandu in govt. ana lamkai in ahi.Phat masa’a Nabam Tuki lamkaina’a Congress government chu akithanglha del tan ahi. –TNT


Whatsapp group’a KSO leh TSA Chandel min’a thuso um chu thulamleng ahi: KSO Chandel

Sadar Hills, Sept. 16: September nisim 15 ni’a social networking sites, Facebook leh Whatsapp group a KSO leh TSA Chandel min a kiso “SoO group hon Moreh gamsung a cheng milham ho asugenthei jing’uvin , kai jong adongjing’uve” kitichu thulamleng ahi’n, kiloikhom teni toh akisaina aumpoi tin KSO,Chandel president Mangboi Haokip a kon kimu thuphon khat in aseiye.

  Thuphon in aseidan in , hitobang thusoh hinsemdoh ho hin jouthu a pansat a kiloikhom teni chung a vaihom ding tohguon anei’u ahi ati. Chuleh hiche thuso hin thethang ho hi amincheh’u kihejong leh lhangphong a mipi hetthei ding a vang amin’u kiseidohlou ding ahi. Chuleh thilsuo nia chu KSO le TSA executive ho ka Kho cheh’uva kaum’u ahin, thilso lamjong hephalou kahi’uve tin Thuphon chun aseiye. Thuphon in aseibena a chun, simlai kiloikhom teni hi ama le ama kipedoh a mipi khantouna ding natong kahi’uvin, ahithei leh hitobang kijumsonathei thu ho hi avel a aumkitlou na ding in temna le ngehna akineiye ati.


Assembly Election ahung nai to lhon’in Tribal martyr ho luongdamsa sasah ding leh jana peding politician akibejing’e: JAC-AATB

Manipur Tribal Martyrs (6)CCpur, Sept. 16 (ET): Thinglhang mite gam ,rights leh identity venbitna ding a kiloikhom in anti-tribal bill thumho [the Protection of Manipur People Bill, 2015, the Manipur Land Revenue & Land Reforms (Seventh Amendment) Bill, 2015′ the Manipur shops & Establishment (Second Amendment) Bill, 2015] ahung kidoudalna kum khat hungval tajong leh Tribal Martyr mi ko ho’n ahinkho aphaldoh’u chu tunigei in thinglhang mite lungsung a ahingjing nalaiye tin Joint Action Committee Against Anti-Tribal Bills a kon kimu thuphon khat in aseiye. Mi hangsan ko ho kiphaldohna hin aniseh in thinglhang mite lungsunga thu aseijing in, nikho achal dungjui in thinglhang mite lungsung a kipunkhom na le lungkhat thakhat a kalse khom ding lunggel apunbe jing e tin thuphon chun aseiye.

  Tribal Martyr ko ho kipehdohna hi political party phabep in ama chang phatchomna ding a manchah ding tohguon aneijing’uvin, hiche hi thinglhang mite lungsung teng a kisun tobang ahi tin thuphon chun aseiye. Chuleh Assembly Election ahung naitolhon in Tribal martyr ho luongdamsa sasah ding leh jana peding politician jong akibejinge tin thuphon chun aseiye.

  Kiloikhom in aseidan in, mimal phabep leh political party phabep in Martyr ko ho kipehdohna amachang phatchomna ding a manchah ding tohguon anei’u hi itihchan hijongleh kidoudal jing ding ahi ati.


AMWJU in 43 channa Foundation Day nit; CM in thuso miho pachatna pe

AMWJUImphal, Sept. 16 (ET): All Manipur Working Journalists’ Union (AMWJU) in Friday nikhon Manipur Press Club’a 43 channa Foundation Day anit uvin ahi.

  Kin-gon’a Chief Guest ‘a pang Chief Minister Okram Ibobi Singh in gamsung’a thuso miho panlah na pachatna thu aseiyin ahi. “Gamsung’a um society hi het hahtah ahi’in, Manipur sang’a lenjo gam ho sang’a igam uva jat-leh-nam tam ahi’in, anam anam in ama ama nam phatchomna ding’a na atoh ahi’in, hiche jeh’a gamsung’a journalist ho panlah na hi pachat umtah ahi”, tin Okram Ibobi in aseiye. Chule kiloikhomna chom chom jeh’a thuso mihon hahsatna ato ahetpeh na thu jong aseiyin ahi.

  “Nikhat teng leh koima kikum louna chamlhatna thuso mihon aneiding ahi”, ati. Thingnoimi hon thuso’a so ding leh so louding thu’a akikum jing thu aseina ahi. “Press hi Democracy khom li channa ahi’in, amaho jeh’a kong kitol ahi”, tin Ibobi in aseibe’e. Chief Minister in DIPR panlahna jong pachatna thu aseiyin ahi. Kin-gon’a IPR Director Meghachandra Kongbam Guest of Honour ‘a pang ahi.

  AMWJU in corpus fund sem leh itih phat hijong leh sorkar kithopina beiya thuso miho kithopina apeh jing thei ding ahi, tin CM in ngaidan aseiye. Chule AMWJU fund drive bolna’a jo channa kithopina peh ding’in jong aseiye. AMWJU President Wangkhemcha Shamjai injong ahoulimna’a thuso mihon hahsatna ato thu aseiyin ahi. “Journalist 9 val thingnoimi hon akaplih ahitan, tuchan geiya themmona neiho akiman ahilouleh gotna kipe’a jong umloulai ahi”, ati. Sorkar in thuso miho kithopina ape jing’e, tin aseiyin chule Press Academy leh Press Housing colony hondoh ahina ding’a kithopina apeh diuvin jong ngehna aneibe’e.

  Kin-gon’a journalist retire hi ho jouse kipa thilpeh ape uvin chule aumtalou journalist ho insung mite jong jana in thilpeh ape uve. Kin-gon’a Chief Minister O Ibobi, AMWJU President Wangkhemcha Shamkai, veteran journalist A Madhumangol leh Director Information and Public Relations Meghachandra Kongbam chief guest, president leh guest of honour ‘a apang uvin ahi.


Langol-Lamphel lamlen kisemphat lou jeh’a kiphinna um

Imphal, Sept.16 (ET): Chingmi-Tammi Apunba Lup hon Friday jingkah in Lamphel’a kon Shija Hospital jotna lamlen ating uvin, lamlen phatlou jeh in Home Guard Commandant Office maiya kiphinna anei uvin ahi.
Chingmi-Tammi Apunba Lup JAC hon kiphinna hi Uripok MLA L Nandakumr in Lamphel leh Shija lamlen kisem ding ahi, tia aseiya ahivang’a lamlen semphat nading fund apehlou jeh’a kibol ahi, tin asei uvin ahi. Uripok Assembly Constituency noiya um lamlen hi achesa kum 15 sung’a semphat louva um ahitan, JAC in tuni jingkah nidan 8 ‘a kon lamlen’a thing bah ajam uva kiphinna abol-u ahi.

  Additional SP Imphal West Dr S Ibomcha lamkaina Manipur Police team hon kiphinna bol JAC hon kiphinna angah diuvin ajol uvin ahi. Kiphinna bol hon lamlen atin sung uva hou toh kisai chule thu-khoh’a vah le ho alha uvin, sun nidan 12.15 don’a MLA Nandakumar in nilhah teng JAC hotoh toukhom ding’a asei jouvin bandh abol-u aladoh tauve.


Asst. Commandant, CRPF, Lamdan Outpost in School chapang ho panpi na pe

Lien Gangte
CCpur, Sept. 16 (ET): Henglep constituency sung’a um Lamdan Kuki Govt. JB school, Leimatak chapang ho’a ding Pencil, Eraser le Notebook pehna Asst. Commandant, Ram Krishna Tiwary, 32battalion, CRPF, Lamdan Outpost in 12th Sept., 2016 nikho chun ana pe in ahi.

  Hiche kingon toh kilhon a, Asst. Commandant, Ram Krishna Tiwary, 32battalion, CRPF, Lamdan Outpost in asei na’ah, Govt. School building hoi tah tah nei’a school kai umlou na tampi kamu in phamo kasa lheh in, hijeng jong leh Lamdan Kuki JB School in Simlai chapang tamtah nanei’u kahin kipa-pi uvin, School Management and Development Committe, teacher ho chuleh khosung Haosapu in Thiemjil na (Education) nangai khoh nau kamu in kahin ngaisang lheh uve tin aseiyin ahi. Aman aseibe na’ah, hapa’n in pang jing’u tin thinglhang gam jouse adeh’a Ccpur dist. sung a ding a hiche School hi ahin vetton (Model) thei ding uva isem doh diu ahi ati. Keijong katohna (profession) a kalut masang in private school ah teacher kana hi in, student ho leh teaching ka ngailut na amang thei naipoi ati. Maban’a kitho khom a hiche school semhoi cheh ding hi keima tah in jong tohding (Responsibility) kanei’e ti’n kala in, hiche jeh chun hiche school Management and Development Committee leh adeh’a Haosapu toh kihet matto jing ding kanom in, student ho jong technology lang toh kisai hetgilna anei thei na diuvin keima tah in jong chapang ho Computer kahil thei ahi tinjong aseiyin ahi. Chuleh, Society a ding’a boina sem ho hi boina hom chom jeh’a School kailou leh School apat’a kinodoh (Dropout student) ho ahinom ji uvin, hiche jeh’a chu khosah kholhang a um nu le pa ho’n jong hiche school mun a ichateu admit ibol uva school ikaisah tei diu hi alhang sung mi ho katep nom napen chu ahi tin aseiyin ahi.


NIELIT study centre kithenso ta

Sadar Hills, Sept. 16 (ET): Damdei Christian College, Taloulong in nissim 16 Sept,2016 ni’n National Institute of Electronics & Information Technology Study Centre leh Course Inaugural Program khat ana neijun ahi.

  Hiche kin’a chun Th. Prameshwor Singh, Executive Director, NIELIT Imphal chu Chief Guest ahin, L. Shyamjit Singh, Technical Director, NIC Manipur le Y. Subhaschandra Singh, Addl. Director, NIELIT Senapati chu Guest of Honours in apang lhon in, chuleh Rev. V. Sitlhou, President, Governing Body, DCC chu Functional President in apang in ahi.

  Chief Guest pun ahoulimna’a chun tulai hi lekha ichan’a them hihen lang Officer sang tah tah hijong leh computer le IT themna neilou ho hi mitcho le elbai tobang ahitai hijeh chun mijousen hitobang themna hi neicheh angaitai tin hiche kina hung pang course trainees first batch 160 le student 500 val ho chu tilkhouna aneijin ahi.


JAC CCpur in gihna nei

Imphal, Sept. 16 (ET): ILPS toh kisai bill thum kiphat sah doudalna’a kisemdoh JAC hon kiphinna’a martyr chang’a mi 9 ho ama phatchomna ding’a jana pe kigo’a politician ho gihna anei uvin ahi. JAC in thuso aneina’a chun, khovei’a um ding assembly election’a tet nom’a mi phabep in tribal martyr chang hohi politics ‘a aphatchompi nading’a amangcha kigo uvin, hiche hi JAC in apom louding, asan louding ahi, ati.


EDITORIAL

Football kichep veho umchan ilodi hitam?

  FC Zalen ho Imphal khopi sung’a Football akichep pou-pou uleh avedi atamji tolhon’a boina neokhat beh aumteijie. Hiche hi Player ho jeh hilouva apam’a aveho jeh ahiji jeh in ipi kiloleh boina ho aumda dem ti hi AMFA leh FC Zalen Club lamkai ho lungkhamna khat ahitai. 14 September ni’a Imphal Polo ground’a Manipur State League (MSL) a FC NEROCA leh FC Zalen kichepna a chun FC Zalen panpi ave hon lungnopmo vetsahna’n lentol sung’ah ana chomlut un Referee pa houset keu hilouvin voh din anadelman uve. Ijem tin Referee pa chung’a khut lhahna ana umkha leh mohseh-a FC Zalen chung’a ‘action’ kila’a akhoh leh Tournament’a kon kum khat kum ni beh nodoh himaithei di ahi. Referee pan langnei sihneina aneiye ti jeh-a hitobang umchan dihlou ana soh ahi. Lunghan vetsahna’a Twi ‘bottle’ leh ‘Plastic Chair’ ho lentol sung’a kiseplut jong akiboljing’in bollou di ahi ti kon ijavei aseivang’in kithungaina aumdeh poi. Chutia Referee hon langnei sihneina abol uve itileh Club lamkai hon Tournament bol AMFA ho kom’a ‘complaint’ lekha aselut uva Referee pa chung’a ‘action’ lah dia aseidiudol joh ahi. Umchan hoilou podoh ave mipi ho chung’a ‘action’ lahjela umkitlou ahijeh-a a Club chung joh-a ‘action’ hung kilahna di hi nailam ahitai. Ningkum’a pat FC Zalen ho MSL leh CC Meet a akichep niseh le’u aveho’a kon’in umchan hoilou ana umji’n hinlah AMFA in Club chung’a ‘action’ lah di ti anaseikhapoi. Ahin tuchung’in “ban” bol di (tornament a jaosah tahloudi) gei ahung gingdoh tai. Player ho suhkhel leh umchan dihlou jeh hilouva aveho (Fans) jeh-a Club “ban” akibolkhah leh Player ho ‘Career’ atohkhah di tina ahiban’a Club dia jong minsetna nasatah hidi, kimoh duodoh kit talou thei ahi. CC Meet thusim’a KSC Supporter hon Referee pa anavoh khah jeh uva KSC jong “ban” anakibolkha’a sottah kithoudoh louva ana umkhasa ahi.

  Football Club hoi khat boldoh jong hi thilbai hilou, sum-le-pai tamtah lutna ahijeh in amin hinnei pan-pan Club khat moh vuidoh ahikhah leh manna tah hidi ahi. Football kichep veho ngol len jengna hi vannoiya tournament thupi Euro ho geiya muthei anahi-e. Jukham sava pum’a kichep vet hi umda phot leh ijem tia ipanpi Team/Club in gollelna aneikhah jongleh alahdan thepje umtei di ahi. Kichepna’a chu khatveile kijou di, khatveile kilel di, Referee hon jong mihem hina’a abolkhiel’u umthei mong ahi. Zalen Club lamkai hon jong AMFA kom’a langnei sihneina aumlouna dia phatah-a sei di, aumjing leh MSL ‘boycott’ bol dia seijoh nahlai thei ahi. Kichep kit teng umchan hoilou solouna dia KSO -Imphal hon pan alahgot’u hi alunggel thei jousen tosotna pieh’a pha ahi.


*For more news, articles, etc. Please click “ET IN PDF”.