Sept 16, 2016 Local news

Sept 16, 2016 Local news

556
0
SHARE

FC Zalen fans ho leh jat dang ho kah’a thilse asolouna ding’a KSO-Imphal leh FCZ in kihoukhomna nei

e254b5da-acd3-4536-a287-4d93f3e6c3f2Imphal, Sept. 15 (ET): Tu le tua chelhajing Manir State League (MSL) 2016 a ama ama club toson ‘fans’ adeh’a FC Zalen ‘fans’ holeh jatdang hokah’a thilse solouna ding gelkhomna in KSO-Imphal leh FC Zalen lamkai hon tuni’n Kuki Inn, Imphal mun’ah kihoukhomna aneiyuvin ahi. Kihoukhomna’a chun FC Zalen thalheng in Athang Chiru, Manager apang in ahi.

  Hetthei khat chu, Sadar Hills a pansa FC Zalen hi tukum MSL a eimi club panla ama sehbou ahin, ningkum MSL a Runners-Up khat jong ahi. Chukitleh Manir a football club a ding’a ‘fans’ tam neipen ahikitne.

  Tuni kihoukhomna a chun nungle fans ho kah a ijemtia boina soh ahiloule fans natohna’a kon club chunga boina lhungthei, boina asokhah tah jongle iti lamdol a seilhah ding ti ahipen e. Hiche thudol’a FC Zalen club leh KSO-Imphal kijamat a panlakhom cheh ding in kiphatsahna aneiyuvin ahi.

  Alangkhat’a, KSO-Imphal in mipi hetding in temna neito gom in hetsahna aneiyin, tuchung MSL chelhah sung’a club toson ‘fans’ hon khat-le-khat kah’a thilse sohthei kampao phalou, eng-hotna natoh, jukham-sava m’a boina sem tiho sosah louva midang jana kichansah johding adeisahna aphong in ahi. Imphal a chelha MSL kichep-golseh jeh’a boina phabep analhung chuleh tu’a jong boina soh chung’a KSO in pan alahdan hojong aseiyin, hitobang ho haisan tahding injong Info.& b. Secy. Paolien Kom in aseiyin ahi.

  FC Zalen hi tule tua Manir gamsung’a eimi football club eneihou lah’a khat ahi in, mipi in jong ngailut naleh lungset na neim’in etosot jing uvin ahi. Ahin, mipi fans hon chingthei tah a etosot lou uleh FC Zalen chung’a jong boina hungsoh thei ahijeh in mipi hon discipline neitah a football match evetji dinguvin avel in KSO in temna ahung kinei kit in ahi.

  Imphal khopi sung hi jat-le-nam chom chom chenkhomna adeh’a Meitei te tamna mun ahi in, boina ahungso teng leh jat-le-nam kikah a boina in ahungsoh doh nomjin in ahi. Janhi FC Zalen match kichai injong boina anasoh in gari car kisuhset nachungchang ajong KSO Imphal in Imphal City Police a jaan geichan in police station ah akiboipi in ahi.

  Hijeh chun, FC Zalen football club ngailut naleh KSO kithopi nading in akit football match teng fans honjong kilungset nanei tah leh discipline neitah’a FC Zalen etosot diuvin avel in KSO Imphal in temna ahung kineijin ahi.


UPF-KNO in ‘Separate State’ athum dinpi jing

Kaybie Chongloi
SADAR HILLS, Sept. 15: United People’s Front (UPF) leh Kuki National Organization (KNO) in ‘Separate State’ thumna anei adin pi jing na thu avel in Thursday nikhon aseikit in ahi.

  ST Thangboi, Chairman, UPF leh PS Haokip, President, KNO in soi akaina UPF leh KNO in thakhat’a thuso aneina’a chun, achesa September nisim 22 nikho’a Grace Bible College, New Lamka’a toukhomna’a ‘Separate State’ thum ding’a kilolna akituh jom jing’e, ati. Chule UPF leh KNO tilouva party adang khatcha in hiche khel ding lampi adang asem theilou ding chule UPF leh KNO in aphat ahiteng gam min asah ding ahi, tinjong aseiyui.

  Kiloikhomna teni in India sorkar toh kihouna (political settlement) kisemna’a stakeholder ho- Inpi, Council, Chief Association, nam lamkai leh adang dang ho dohna aneiding ahi, ati. Hetthei khat chu India sorkar in achesa June nisim 15 nikho’a New Delhi khopi’a um Ashoka Hotel mun’a United People’s Front (UPF) leh Kuki National Organization (KNO) toh ‘Political Dialogue’ masapen anei ahitai. UPF leh KNO toh kisem political dialogue masapen (first round) hi Satyendra Garg, IPS, Joint Secretary (NE), Home Affairs Ministry in alamkai ahi’in, toukhomna’a Brig. Prasad, Director General, Military Intelligence (DGMI), Col. Amit Tewatia, DGMI, Lt. Col. Pankaj Sharma, Director General Military Operations (DGMO) jong pang ahi.

  Dr. J. Suresh Babu, Addl. Chief Secretary (Home), Manipur govt leh P. Doungel, ADGP (Intelligence) Manipur thalheng’a apang in, Aaron Kipgen in UPF delegate 6 alamkaiya chule Seilen Haokip in KNO delegate 6 alamkai ahi. Toukhomna masapen’a UPF leh KNO in Statehood thumna agong dan ape uvin chule India Constitution noi leh Indian Constitution Article 3 dungjuiya Kuki nam miho thumna sempeh ding’a adeisah dan thu aseiyun, kho haosa hon patta achoina thu jong apang’in, chule thuchen hi toukhomna maban achal teng peh ding’in aseibe uve.

  Phengmai thum lhing lekha’a hin Kuki nam miho kibungkhenna, Sadar Hills kipeh louthu, Eight Schedule leh Sixth Scheduled noiya Tribal Protection thumna um kisan peh lou, Inner Line Permit toh kisai Bill thum phatsahna akipeh na’a Hill Area Committee state sorkar in agelkhoh louna, Land Alienation and Annexation thu hojong apang in ahi. Indian Union ‘a state hohi ethno-lingual (pao-leh-ham chule nam) ‘a kisem ahi, tin jong aseiyui. Tekahna’a Tamil ho ding’a Tamil Nadu, Naga ho ding’a Nagaladn, Mizo ho ding’a Mizoram gam kisem ahi, hiche jeh’a Kuki ho ding’ a gam tum kisem ding hi kilomtah ahi.

  Manipur gam’a Kuki gam thu umdan aseiyun, British ho ahunglut masang’a Kuki haosa hon Manipur thinglhang apumpi hi alamkai ahi, ati. Tu dinmun’a Kuki gam leiset haosa hon patta achoi hin ADC Churachandpur, Sadar Hills, Chandel leh Ukhrul, Senapati leh Tamenglong district ‘a Kuki kho phabep pang ahi. Indian Union ‘a Manipur gam kilahlut kum 67 jouva Manipur sorkar noiya kinepna thon jing ahi’in, KNO leh UPF in British ho hung chenlut masang dinmun chan ding adeisah ahi, ati. ‘Self determination’ hi  Indian Union context dungjuiya ‘Statehood’ tina ahi’in, KNO leh UPF hi gamsung citizen kitah tah ahi’in, Indian Constitution Article 3 dungjuiya statehood thumna anei ahi. Hiche hi Kuki ho boina suhlhap nading’a lampi pha pen ahi’in, achesa 1987 kum’a Kuki thal-choi kiloikhomna ana kisem lo ahi, tin thuso anei uvin ahi.

  Manipur gam’a Kuki, Naga leh Meitei hi nam thum chengkhom ho ahi’in, a-itih’a chengkhom jing ahi. Ahin, National Socialist Council of Nagaland- Isak Muivah lamkaina’a Naga nationalism hungdoh’a chule United National Liberation Front leh phaicham’a um meilhei thingnoi dang dang in gamsung’a meilhei thuneina ahin pohdoh jouva kon dinmun kikhel ahi. Prof Saroj Nalini Arambam Paratt in ‘Manipur’ thucheng hi British khang masang’a kimang khalou ahi, tia kicheh tah’a asei ahi. British khang kipat masang’a Meitei Ningthou (meilhei haosa) hon Kangleipak avaihom-u ahi’in, hiche hi phaicham sung ahi’in, thinglhang gam, Kuki ho haosatna mun ahop tha lou ahi. Meilhei leh Kuki haosa ho kikah’a kihetthem to naleh kija tona umjing ahi’in, Melhei leh Kuki hon agam agam venna ding’a British gal anasat cheh ahi’in, gam venna ding’a Khongjom War, 1892 leh Kuki Rising, 1917-19 ahilouleh Kuki Rebellion, 1917-1919 gal um ahi, ati. Achesa 1949 kum’a Meitei Ningthou hon Manipur gamsung Indian Union ‘a lahlut nading (Merger) ding’a nopna anei uva, hiche hi amaho thuneina noiya umlou Kuki haosa hon adoudal ahi. Ahivang’a, gam leiset hi Manipur kivaipohna noiya aum jeh’a athu noiya um ahitai, tin KNO leh UPF in toukhomna masapen’a aseiyin ahi.


Moreh CSO hon khosung’a thingnoi ho’a kuon gihna leh sum-le-pai kidonna thulamleng ahi ti’a sei’u

HOPE_REHABILITATION_CENTRE_DA_LEIRIBA_DRUGS_CHARAMBASINGMoreh, Sept. 15 (ET): Achesa September nisim 1, 2016 nikho’a kipat chun Moreh khopi’a mi-lham kiloikhom, hetthei ding’a Hill Tribal Council, Moreh; Kuki Women Union & Human Righsts, Kuki Students Organisation, Moreh Youth Club chuleh Kuki Chiefs’ Association, Moreh in khosung’ah anti-drug drive ana bol pan uvin ahi.

  Kiloikhom hon amudoh dungjui’un khopi sung’ah drug addict leh julop agom’a mi 88 aum uvin ahi. Amaho hi community chom chom’a kuon ahiuve. Chuleh amaho hi Hope Centre a vetkol ahiuvin, gena touna, neh-le-chah, damdawi ho manbeija peh ahikeo hilouvin Hope Rehabilitaiton Centre leh Moreh Pastors’ Fellowship hon counselling jong abolji uvin ahi. Hiche’a kimanchahna ding’a sum-le-pai tohdoh ho chu houbung ho, organisation leh mimal ho ahiuve.

  Hiti’a thilphalam manona tohguon aumlaijin vangset umtah in social media a September 14-15, 2016 nikho’n akaleh beh in thuphon aum in ahi ati. Mikhat hinkho kigihna, sum don, sum chom ho hi achesa phat lang chun ana umta jong leh gamsung thuso ho’a tribe lamkai ho hinkho gihna, sum-le-pai demand le adang dang thilsoh hung kiso hi thulamleng mai mai ahibouvin akhomi ten akihepha pon ahi ati. I-ham ti’a hitobang kigihna le sum donna ho ana um hileh CSO ho hetlouva umlou hel ding ahi tin kiloikhom hon asei uve.

  Chuleh thuso hon jong hitobang thuso ho kholchen louva amoh so tahlou diuving jong CSO  Moreh hon tiemna le ngehna anei uvin ahi, tin Mangminlien Singson, Gen. Secy., Hill Tribal Council, Moreh; Jamkholen Mate, President, Kuki Chiefs’ Association, Moreh; Hauzalala, President, Moreh Youth Club; Tongkholal Lhungdim, Vice-President, Kuki Students’ Organisation (M); chuleh Hoineng Baite, Gen. Secretary, Kuki Women Union &  Human Rights soi kaina lekha chun aseiye.


Thadou Inpi in achepi le agel thupi pen hi Kuki suhlet le suhhat ding hi ahi: TI-GHQ

UntitledKaybie Chongloi
SADAR HILLS, Sept. 15 (ET): Tunaicha’a ana kisemdoh Thadou Inpi Sadar Hills le lamkai ho tunichun Ngahmun Community Hall mun’a Pathen henga Vang thumpehna Maicham akisempeh’un ahi.

  Hiche Maicham chu ADC Sadar Hills kivaihomna’a Executive Member, Lamkholen Kipgen le Member Lamminthang Kipgen in asemlhon ahin, Rev. Th. Kipgen, former Executive Member, TBA-I chu Kin Thempun anapangin ahi.

  Kin-gol’a chun Thadou Inpi-GHQ, Thadou Women Association-GHQ, Thadou Students’ Association-GHQ chule ama ama noija um bahkai hon jong pan alauvin chule Haosa tampin jong hiche kingol opna aneijun ahi.

  Thadou Inpi-GHQ a General Secretary, Kamboi Kipgen in Thadou Inpi Sadar Hills lamkai cheng phondohna aneijin, Thadou Inpi in adoi le atup, achepi hojong aphongdoh in ahi.

  Aman ahoulimna’a, Thadou Inpi in achepi le agel thupipen chu Kuki ‘suhlet le suhhat’ ding hi ahi tia asei tolhonin Thadou Inpi hi Thadou Conclave, Delhi Declaration dungjuija kisuhat ahi ati.

  Aman aseibena’a, Kuki hin tribe 22 in ahop ahin, Thadou pao tho hon bou Kuki itiu hi machal mona le lhahsamna lentah khat ahitan, tua hi Kuki in ahop Unao dang hotoh kingailutna Kuki hi suhlet ding le suh hatding ngaito akultai ati.

  Maicham kin kibol thudol’a ADC Sadar Hills Member, Lamminthang Kipgen in houlimna aneijin, ahoulimna’a, Thadou tribe identity hi dopsanga ngailut ding ahi tia aseitolhonin Kingol’a panla Thadou Inpi, TWA, TYA, TSA le haosa upa adeh’a khotol’a Haosapu chunga kipathu aphongin ahi.

  ADC Sadar Hills Executive Member, Lamkholen Kipgen in ahoulimna’a, Thadou Inpi Sadar Hills lamkai hon thahat tah le kilungkhattah’a na ahin tohkhom theina diuva hiche kin hi kingonga ahi ati tia asei banjom’in Thadou Inpi Sadar Hills hi phatmasa chun ahina ding bang’in ana umpon, tua lamkai lhingsetna ahung kilhendoh theija natong panthei dia aum hi kipa umtah ahi ati.

  Thadou Inpi Sadar Hills lamkai cheng tilkhouna aneilhon tolhon’in MDC te nin Thadou Inpi Sadar Hills lamkai ho Thadou Muffler khatcheh a o-peh lhonin, chule Sahoi jong Maicham a asemlhonin ahi.

  Rev. Th. Kipgen in Thadou Inpi Sadar Hills lamkai ho tahsa le Lhagaova tilkhouna nasatah aneijouvin, Pathen henga vang le phatthei thumpehna mipi akikhom chengtoh aneikhomin ahi.

  Thadou Women Association Sadar Hills in Thadou Inpi Sadar Hills lamkai ho tilkhouna le achung uva akinepnau, alungmongnau aphongdoh’u tolhonin kipa thilpeh aneijun ahi.

  Thadou Inpi Sadar Hills General Secretary, Nehkam in kingol hingonga le kiloikhomna ho jouse chunga kipathu Thadou Inpi Sadar Hills thalhengin aphongin ahi.Ngailut ankong sokhom na kikhumkha anahi.


Quota thu’a government in thinglhangmite lhemlha jing; KSO GHQ in suhchet ahi ding’a ngeh

Imphal, Sept. 15 (ET): Manipur Gazette, dated 17th May, 2011 nikho’a ana kisuo dungjui in Government of Manipur in Manipur Reservation of Vacancies in Posts and Services (for SC and ST Rules, 2011) mangcha in Scheduled Tribe a dingin public leh government employment a 31% seat reservation ana pieh ahi.

  Hiche chungthu’a KSO General Headquarters in thuphon aneina’ha, hiche thuso hin percentage thu’a nelkal kibol ahipon Government in daan kisun donlou dailou’a akoi hi mipi hon amuchen’uva ahetthem thei na ding’a kisuo ahi. Hiche hin government department jouse’a tribal representation dihloutah a kibol hi lhingset in amu chensah in ahi. Hiche hin avetsah chu ahileh lungthenlou na leh tribal ho rights le privileges suhnem ding hi ahi.

  Tule tu’a Assistant/Associate Professors, Government Colleges leh Higher Secondary School ho’a lecturer umjat hi ivet jong le Manipur Government hin ichan’a eilhep lhah’u ham tihi akimutheiyin ahi.

  Directorate of University and Higher Education Government of Manipur in RTI Act mangcha’a thusuo apieh na’a MGEL record a March 2016 chan’a chun Government Colleges a 955 Assistant/Associate Professors lah ah S.T employee (teaching) 139 bou aumin S.T seat 157 amangthaiyin ahi.

  Hiche ban’a chun tuthah a 415 part time college teacher ho regularise hisahna’a chun ST 31 (7.4%) bou ana hikit in 97 seat ana kivat kit in ahi. Hiche’a avat seat 97 ho suhtoh na dingin tule tu’a MPSC nuoi’a direct recruitment 280 Assistant Proffesors kilah na’a hin ST seat 184 ahin on sah uvin ahi.

  Chuleh Higher Secondary section a jong hin 220 lecturers (through direct recruitment) kilah na’a ST seat 68 (31%) ding chu 29 (31%) bou ahikit in seat 39 avat kit tan ahi. Chuban’ah 707 Higher Secondary School lecturer regularise kibol na’a hi Government in daan dungjui’a ST ding’a 31% reservation kiti chu ajui’a ahileh ST seat hi 219 hiding ahin hilah tuhin ST lecturer hi 114 (16%) bou ahi 105 seat akivat kit tan ahi. Ahin hiche ho suhtoh na dingin Government in nisim 9th November, 2014 nikho’n MPSC nuoi’ah Higher Secondary School lecturer (direct recruitment) ahin la’n hiche’a chun ST seat 172 a su-ong’uvin ahi.

  Department of Personnel and Training, Govt. of India notification dungjui’a chun reservation kipe sang’a lhomjo ahilou leh tamjo akilah khah’a ahileh abnjom’a akilah kit teng kisutoh dingin akiseiyin ahi.

  Tule tu’a Assistant Professors leh Lecturers tohmun kilah na hi ahung lolhin lou’a ahileh tribal hohi kitumbol, nodoh leh sotlhah ihi’u ahi. Hitobang’a tribal ho kibolna hi thilthah ahitapo’n hijeh hin government adeh’a judiciary le executive in hiche thu’a hi thudih ahungpot theina ding’a pan phate’a alah ngai ahi.

  Assistant Professors interview result agangthei pen’a akiphon doh’a ST seat avat ho suhtoh ahitheina dingin KSO in ngehna aneiyun ahi. Iham ti’a government in seat ho suhtoh na ahin neilou leh KSO leh akilungtuopi tribal students’ organisation hon nasatah’a kiphinna kinei ding ahi ti’n KSO General Headquarters, General Secretary, Seiboi Haokip in aseiyin ahi.


Govt. scheme ho mipi’n ahina ding bangtah’a amanchah diuva Haokholal Hangshing  in tiemna nei

Winners of various competition during Adult Learners Week awardedKaybie Chongloi
SADAR HILLS, Sept. 15 (ET): Model Centre Kangpokpi Block in SRC NEHU Shillong vetkolna noiya abol  Literacy competition  a pachan na neiho tuni chun  kipaman hoppehna kingon abolun’in ahi.  Literacy competition chu Swachh Bharat le Literacy for Women Empowerment thupi noiya, Adult learners week toh kisaiya kibol ahi.  Kingon chu SRC NEHU, SLMA Imphal chuleh DLS Senapati in Model Centre Kangpokpi Block toh kitho’a  District Council Hall, Kangpokpi a abol’u ahi.

  Kingon na a chun ADC Sadar Hills Chairman, Haokholal Hangshing Jin-gun in apang in, SRC NEHU Shillong, Director B.Laltanpuia le  SRC NEHU Kangpokpi Block, Director, Lalgougin Misao, Presidium member in apangin ahi.

  ADC Sadar Hills Chairman Haokholal Hangshing in kingon na a ahoulimna a chun, gamkai sunga  khantou machalna alhun theina dingin Sorkar in scheme tampi abol’in ahinlah mipi ten scheme ho ahetthemlou jeh’un aphatchomna a’umji tapoi ati. Aman aseidan in Model Centre kangpokpi Block hi chapang ho leh mipilhing ho ding a literary le social activity kijilna mun phatah ahi ati. Government in abol development scheme ho hi gamkai sunga cheng mipi hon ahina ding bangtah a abollou leu phatchomna umdeh lou ding ahi tin jong aseiye.

  Director SRC NEHU Shillong, B.Laltanpuia in a houlim na chun Adult Learners Week  kibol lona jeh pipen hi  mipi in themjilna amunading keu hilouva Adult Education program ho lolhingtah a achelhah theina ding  jong ahi ati.


Doctor ho mitmo jeh a kachanu abnormal a peng ahi: Birjit

Imphal, Sept 15: JNIMS a kijen damlou hon Doctor ho mitmona aphondoh jing’u hin Government Medical college khatseh JNIMS khantouna ding leh  vannoiya hettheiya aumna dinga Director, Dr. L.Deben in na atoh ho amolphou sah in ahi.

  Tuni Manipur Press Club  a kihoulimna khat a chun naosen pengtil nei Nandeibam Birjit le N.Sangita  in naosen aneina lhon a Doctor ho le Nurse ho donmona phabep aphongdoh lhon’in ahi.  N.Sangita hin achesa August nisim 3 nia chu Cesarean Surgery akiboljouva naosen numei khat ananei ahi.  Chuleh  anao chu khohelou (semi conscious state) a  peng ahi.  Birjit in aseidan in naosen chu normal a pengdinga um ahi’n, ahinlah nurse hon Doctor ho prescribe bollou, lou khat anakaplut jeh a naosen chu khohelouva hungpeng ahi tin aseiye. Birjit in aseidan’in Dr.Devendra le Dr. Thaja thupeh dungjuiya  July nisim 31 nia chu JNIMS Gynaecology ward a admit kakibol’u ahi ati.

  Birjit in aseina a chun,  kaloinu photlot chang a Cesarean surgery kibol hi hospital authority ho henga jong thudoh kananei in ahinlah authority hon donbutna kichehtah eipe thei pouvin, hiche jeh a hi media ho mangcha a mipi hetding a kathilto ho kahin phondoh ahi ati.

  ”Kaloinu chu anaonei kon geiya damsel ahi. Chuleh anao neiding nikho a chu Doctor hon hospital sunga kimulou injection ni (2) eichohsah’un, keijong hiche lou holnan  Imphal khopi sunga um lou-kijohna jouse kana chon in ahi. Ahinlah injection teni kachoh masang chun Nurse khat in kaloinu chu injection chom khat ana kap’in hiche jouva pat chun kaloinu  chu hatah in ahung loh pan tan ahi”  tin Birjit in aseiye. Nurse nu in kaloinu akap injection chu Doctor pa prescribe bolpenpa ahilou kichehtah in akihe doh’e tin Birjit in aseiye. Chuleh Nurse nu’n lou ahinkap chai’a kipat chun kaloinu chu ahungloh pan tan , adinmun ahahsat val jeh chun Doctor pan operation theatre sunga a pohlut sah’in apet pet chun operation abolpai’un ahi.  Chuleh normal a pengding kachanu chu operation in ana at’doh thouvin, hiche jeh chun tuhin ahaidan kisuhlou vin aum’e tin Birjit in asei in ahi. Chukitleh gamsung a cheng mipi jouse’n hiche thu suhchetna dinga atosot ding’un Birjit in ngehna aneiyin ahi.


Kuki Inpi Tuibul Lhang (Kangchup) makaina a SAHNIT NI  Lolhing taha kimang

1 - webSadar Hills, sept.15 (ET): Kuki Inpi Twibul Lhang (Kangchup) tohgon na noija  Sahnit Ni lolhing tah in Kangchup Area Chiefs’ Association (KACA) Office mun’a man ahi. Kuki Inpi Manir thalheng in  Pahend Hangshing President Kuki Independence War Memorial Committee,  Robert Sheilam Haokip Executive Member le Apao Haokip in pan alan ahi. Adang hetthei pan hung laho chu ahile .S.Dama Vaiphei Hon’ble MDC Kangchup,  Kangchup Area Women Human Right (KAWHR), Kangchup Area Tribal Youth Organisation (KATYO) chule kho haosa 20 val in pan ahung la in ahi.

  Sahnit Ni message pedia KIM in ahin sol  Pahend Hangshing in asei na mun danga communal clash aumle ajing athai le Central a kona palai ahin sol ji uvin suhchen ahipai jitan iti dana 1993-97 peha Kuki te mi 900 kitha na le mi lakh 1 val agam dalha a cheh chao ho tuchan athu kisei hou ham? tia mithat ho NSCN (IM) ho gotna pe uvin tia thudih (justice) umna dinga kimang ahin koima toh kimel mat nadinga kibol ahi poi atin ahi. Chuleh hiche thu hi seichama aumkaha Sahnit hi kimang jing ding ahi atin ahi. KIM thalheng . Robert Sheilam Haokip in ahung kikhom haosa upa lhang lamkai ho dinmun m in kitepna 7 ho simdoh nale kitepna jong anei sah in ahi.

  Melchih thei dang khat chu ahile Kuki Inpi Tuibul Lhang (Kangchup) hop sunga Haosa ho jouse soikai na in Kuki Inpi Tuibul Lhang min  in Prime Minister koma lekha thot (Memorandum) pehna jong anei jin ahi. Chubana Kangchup lhang kho jouse a hou lamkai ho makai na in anngol taona khotin houbung tina anei jin chule insona lunghem vetsah na in pondum  jong aki khai doh in ahi tin Khailum Vaiphei, V/President, KITL; Letngam Haokip, President KITL; chuleh Thongpao Kipgen, Gen. Secy, KITL a kuon lekhathot kimu’n aseije.


MLA 5 resign kibol san peh hita

Imphal, Sept. 15 (ET): Manipur Legislative Assembly Secretariat in achesa September 14, 2016 nikho’a order asodoh toh kilhon’in MLA 5 resign akibol’un ahi. Amaho chu ahileh Dr. V. Alexander Pao, 47-Karong (ST) Assembly Constituency; Dikho, 48-Mao (ST) Assembly Constituency; Yumkham Erabot Singh, 15-Wangkhei Assembly Constituency; ST Nunglung Victor, 41-Chandel (ST) Assembly Constituency; chuleh Samuel Risom, 44-Ukhrul (ST) Assembly Constituency ahiuve. Amaho hi Speaker in ahaina’u asan peh ahitai.


DSWO, in Old Age Pension sum homdoh

Lien Gangte
Ccpur, Sept. 15 (ET): District Social Welfare Office, Chiengkawnpang, Tipaimukh Road mun’ah MOAP (Manipur Old-Aged Pensioner) noi’a beneficiaries (Green, Black & White card holder) ho’a dinga pension sum lah thei ding ahi ti’a A. Umarani Devi, District Social Welfare Officer, CCpur in September 9, 2016 a notification a suona bang in, September 15 (10:30-3:30 pm) sung chun Saikot A/C nuoi a MOAP beneficiaries Card No. (i) 1/05/SKOT-180/06/SKOT leh (ii) 1/12//SKT-120/12/SKT hon Old Age Pension sum akilah uvin ahi. Old-aged Pension sum ho hi Assembly Constituency leh Card No. dungjui in hopdoh in aum in ahi.

  Chuleh September 16, 2016 (10:30-3:30 pm) nikho leh Card No. (i) 181/05/SKOT-375/10/SKOT leh (ii) 121/12//SKT-214/12/SKT ho’a hopdoh hiding; September 17, 2016 (10:30-3:30 pm) nikho teng Henglep A/C nuoi a MOAP beneficiaries Card No. (i) 2/08/HLP-338/10/HLP leh (ii) 1/12/HLP-196/12/HLP ho’a hopdoh hiding; September 19, 2016 (10:30-3:30 pm) nikho leh Singngat A/C nuoi a MOAP beneficiaries Card No. (i) 2/96/SGT-172/05/SGT leh (ii) 1/12/SGT-100/12/SGT ho’a hopdoh hiding; September 20, 2016 (10:30-3:30 pm) nikho leh Card No. (i) 173/10/SGT-329/10/SGT leh (ii) 101/12/SGT-189/12/SGT ho’a hopdoh hiding, September 21, 2016 (10:30-3:30 pm) nikho leh CCpur A/C nuoi a MOAP beneficiaries Card No. (i) 7/96/CCP-250/05/CCP leh (ii) 1/12/CCP-150/12/CCP ho’a hopdoh hiding; September 22, 2016 (10:30-3:30 pm) nikho leh Card No. (i) 251/05/CCP-530/10/CCP leh (ii) 151/12/CCP-322/12/CCP ho’a hopdoh hiding; September 23, 2016 (10:30-3:30 pm) nikho leh Thanlon A/C nuoi a MOAP beneficiaries Card No. (i) 1/10/TLN-407/10/TLN leh (ii) 1/12/TLN-200/12/TLN ho’a hopdoh hiding; September 24, 2016 (10:30-3:30 pm) nikho leh Tipaimukh A/C nuoi a MOAP beneficiaries Card No. (i) 1/06/TPM-385/10/TPM leh (ii) 1/12/TPM-200/12/TPM ho’a hopdoh hiding ahi.

  Old Age Pension sum sang ding ho’n Old Age Card receipt leh AADHAR Card xerox/photo copy kichoi cheh ding ahi. Chuleh, Old Age Pension sum ama tahsa’a hung theilou, damlou (bedridden) ho’n 26th Sept., 2016 masang’a District Social Welfare Officer, CCpur application District Social Welfare Office, Chiengkawnpang, Tipaimukh Road mun’a a pehlut’u ngai ding ahi.


Centre in achesa lha nga sunga chun  Manipur sunga manchah ding Dk.100 cr vel ahin pedoh’e: Jitendra

NEW DELHI: Centre in Manipur gamsunga chelha  development project ho’a manchah din achesa lha nga sung a chun Dk.100 crore vel ahin pedoh’e tin DoNER Minister Jitendra Singh in Wednesday ni chun aseiye. Hiche thu hi Jitendra Singh in DoNER kihoulimna  khat a chairman a apan nah’a a asei ahi. Aman aseidan in Manipur hi Sah-solam gamkai sunga um state ho lah a centre in fund aha pehpen state khat ahi ati.

  Jitendra’n aseibena a chun Centre in NLCPR (Non Lapsable Central Pool of Resources)  noiya hin tunigei in Dk.28.47 crore ahin pedoh’in chuleh (North Eastern Council) projects  noiya tunigei hin Dk.75 crore vel ahinpedoh e tin jong aseiye.

(Source: Agencies)


Editorial

Khovei MLA Election Campaign khupan

  2017 MLA election hi February lha leh umding bep ahivang’a Centre akon BJP lamkai ho Manipur hung kitoljing dan’u hi Vote lhahna ding lha khat bou vat hitaleh kilom jeng ahi. Manipur’a BJP Union Minister hung ana kilhah matchetnau hi ningkum lang’a anakipan ahitan, ahin tua Party President Amit Shah ahung’a Imphal khopi’a BJP toson ho asang-asang’a akikhoppan hi BJP ten “boltah tahdi” atiu vetsahnadan ahi. BJP ho ahiti chuopan jeh uva BJP a lutlut chuleh party ticket mumu chu election kai jeng dia kisei huinun (wave) khat aboldoh u tobang ahitai. BJP National President Amit Shah in aseilah a athupipen chu ahileh Manipur gamgi inchi khat jong kisukehponte ti leh Imphal-Moreh Road (lamlen) “four lane” (gari 4 thakhat chetna kipeltheinadi) a semdohdi ti ahi. “Manipur ah khantou machalna natoh ahididol’in akibolpon nehguh chahguh adim’in, police recruitment a candidate ho koima sumpelou aumpoi” ti’n BJP lamkaipu’n aseiye. Congress hon jong BJP ho thusei thipbeh in angaideh kit pouve. BJP hi Manipur gam sukeh dia kiguong ahi ti’n Congress lamkai Gailkhangam in asamle kit’e. “Naga Framework agreement” ah akiselguh aum’in hichu Manipur gamgi khelna (suhkeh) di thu ahi ti’n Gaikhangam in BJP ho lethuhna’a asei thupipen khat ahi. Manipur gamgi ke le kelou thu hi Centre govt leh NSCN-IM kihouna toh kimehchepgo tina ahin meilhei te lungthim tongkha theipen dia BJP leh Congress hon agel’u hidi ahi. Ahin BJP ahia, Congress ahia, a party u hatnadi leh govt/ministry siemna dibou khohsajo chieh ahijeh un ipipi seijongleu angaina’a mi’n alahdi bep ahi. Chuleh huoilai hileh mipi hojong hin thu le la’a Vote pelou, party dei le deimo thua koiman vote pelou, sum thu’a kikai bou ahijeh in tohding leh tohdohsa ho simlhah a vote mudi kiti jong phachomlou maithei ahitai. Moreh lampi khohsahna kipe hi BJP govt in ‘Act East policy’ nuoiya Myanmar,Thailand, Singapore, Malaysia leh South East Asia gamdang dang hotoh kijopmatna neinadi ti jeh ahibouvin Manipur khohsahna tum jong hilou ahi. 2014 MP Election dikon’a tua Prime Minister N. Modi in Imphal a campaign ahungbol’a chu BJP ahung hatleh ni jakhat tohgon lah-a Imphal-Jiribam lamlen semphatdia anaphondoh ahi. Tua kum ni jouva jong chuhlai leh gari lhaitheilouna mun tam ahi. Hiche helouva Amit Shah in Moreh lamlen ‘four lane” semdia aphon ahi.

  BJP leh Congress lamkai hon ageldoh diu khat chu daangnal kamthiem’a kichai taloudi, mipi hojong hin tahsan thei leh tahsanlou thei thu ahetsoh kei u ahitai. Kon napha atoh a, kon imacha abollou ham, kon ichan nehguh chahguh ahabol’am tiho lekha helou injong ahet khang ahitai. Party khat le khat kikah, Candidate khat le khat kikah a kidemtona leh ama amachieh thilphabol ho saple-le hi koiman amoh ngainomloudi ahi tijong koi hileh ahetdia pha ahi.