Sept 13, 2016 Local news

Sept 13, 2016 Local news

1252
0
SHARE

Cauvery vadung jeh’a boina um; khopi sung’a gari leh thil-le-lo kisuse; Section 144 kikoi ta

528245-bus2700 Bengaluru: Cauvery vadung chungchang thu’a kiboina aum toh kilhon’in Karnataka khopi mun chom chom’ah kiphinna asang’in ahi. Hiche boina asan toh kilhon’in Siddaramaiah government in Tamil Nadu govt. heng’a Kannada pao tho ho venbit a aum diuvin ngehna lekha athot in, chuleh Karnataka khopi sung’a jong Tamil pao tho ho venbit ahi diu dan jong aseiye.
  Bengaluru, Mysuru, Chitradurga leh Dharwad khopi’a chun Tamil Nadu registration number pu gari ho suhset in aum’e. Chuleh KPN bus depot a chun bus agom’a 20 val ana hallha uvin ahi.
Karnataka Director General of Police Om Prakash in aseina’ah, khopi sung’ah boina asang lheh jeng’in hinlah ventup in aum’e ati.
  Cauvery Supervisory Committee in Tamil Nadu leh state dang ho’a vadung twi lhalut ding thu’a ana kihoumo kheh’un hijeh chun September nisim 19 nikho leh toukhom kit ding atiuve. Meeting’a lamkai Union Water Resources Secretary Shashi Shekhar in aseidan’in, hiche vadung chungchang thu’a kihoulhahna aumtheihih laije tin PTI jah’ah anaseiye.
  Tuhin Bengaluru khopi sung hatah in aboi in, gari mei’a kihal lha, thil-le-lo suhsetna leh thagum pan’a natoh jatchom chom aum’in ahi. Hitoh lhon’in Monday nikho’n Bengaluru khopi sung jouse’ah police chahthet in akikoi in ahi.\Adeh’a Tamil ho chenna lah dung’ah police ho aha kikoi in ahi. Hiche boina ventup ahina din khopi sung’ah police alhom pen’a 15,000 akikoijin ahi.
  Hiche khopi sung’a boina mun ho leh mipi’n apeldoh ding’a pha phabep ho nuoi’a bang hi ahi:- KNP Bus Depot; hiche mun’a hi bus phabep kihal lha ahitai; ORR Service Road, opposite Park Plaza, near Kadabesanhalli; Chamaraj pet 5th Main; Kamakshi Palya; Sunkadakatte Jn; Gopalan Mall; Bellanduru Ecospace; Richmond road Traffic, Garudamall, Hosmat hospital Jn; Diary circle, Dr.Marigowda road, BTM 29th Mn Jn a kipat HSR; Siddalingaiah Jn a kipat Shanthi Nagar bus stop; Nayandanahalli Jn, BHEL 2nd Gate, RR Nagar MYsuru Rd, Hoysala Jn- Kengeri, Suddugunte Palya; Nayandahalli area; Mysuru Road, Bengaluru; chuleh Pandavapura area tiho ahi.
  Chuleh hiche thilsoh’ahetbe thei ho chu, Nayandahalli, Bengaluru khopi’a chun kiphinna nei hon private transport bus alhom pen’a 30 ana hal lha uvin ahi. Tamil Nadu gam’ah mel hetlou hon New Woodlands Hote, Chennai chu petrol bomb mangcha’n anabulu uvin ahi. Chuleh Rameswaram a chun Tamil outfit member thum hon Karnataka registered gari wingscreen leh glass ho anasuse uvin ahi.
  Tamizhaga Vazhvurimai Katchi worker mi 25 ho chun Mission Street a um Karnataka Bank branch khat ana bulu uvin staff jouse ana nodoh uvin ahi. Alangkhat’ah KSRTC in jong Mysore jotp’a Kerala lhai ding night bus cancel abol in ahi. Tamil Nadu jon ding bus jouse jong suhtang ahitai. Chuleh Tamil Nadu jotpa’a Kerala jon ding bus jouse jong akikham soh in ahi. Karnataka leh Tamil Nadu border’a um Chamarajanagar district chu akikhah tan tai. Bengaluru’s Namma Metro jong 12:30 pm chan geijin ana kikham in ahi. Alangkhat’ah Bengaluru khopi’a school tamtah leh college tamtah jong ‘half day leave’ akilha uvin ahi.
  Hetthei chu Cauvery vadung hi akipatna Talakaveri, Kodagu district Karnataka ahin, Karnataka leh Tamil Nadu’a 800 km sau a longlut a akhonna leh Bay of Bengal a longlut ahi. Hiche vadung jeh’a kiboina hi 1891 kum’a kipat kipan ahitan agom’a kum 125 alhing tai.
  2007 kum chun Cauvery water dispute tribulan in Tami Nadu a ding 419 TMCFT leh Karnataka a ding 270 TMCFT ana lonlut sah in ahi. Tunaicha’a chu Karnataka in vadung akha’a Tamil Nadu a long lut lou ahi. Chuleh tuchung boina hung kipatna pipen chu ahileh Supreme Court in Karnataka heng’a Tamil Nadu gam’a vadung twi 15,000 cusecs alhalut ding’a ahin sei’a kipat hung soh ahi. NDTV/PTI/TH/ZMB

Ministry of Home Affairs GoI. in SoO group ho Stipend lha 18 pedoh lou’u; Designated Camp & Arms Lock ho Protection bou’a thingnoimi lhomcha-cha bou umta

Untitled B.Lalboi Gangte
CCpur. Sept. 12 (ET): Vannoi leiset’a Kuki ten 1917-1919 lai akon’a apu apa teuvin Zale’n-gam movement, chamlhat na adel uva, tukhang’a Kuki National Oragnisation in 1987 kum akipat apu apa tehou tohbang khaijom in Kuki te chenna munjouse venbit naleh Zale’n-gam apu apa khanga atoupha nao gamtum neipiu vin tia ngehna Indian sorkar kom’a demand aneijing naban uva, British ho vaihop lai in Zo chate Kuki, Kachin, Chin, Mizo ho van noi’a gam thum India, Bangladesh, Burma ah anase khen uchu Zo chate ho jouse kipumkhat nading natoh KNO in aneijing naban uva, Mimasa ho natoh bangkhai hojouse kum 28 sung tunichen’a achepiu vin ahi.
  Chule KNO in Kuki chate gamchom chom’a achenao va chenkhom pihon suhgenthei leh minoi nung pen te’a akoi nachung uleh anampi dam nading le Kuki chate atum’a kivaihop nadia kum 29 sunga hem le thal ahindop’uva, Kuki te ding gamtum ahin del jingnao chung’a Centre Govt. le State Govt. toh 2008 a Political Dialogue kipat thei nadingin Suspension Of Operation (SoO) aneipiu vin, hiche ahin Kuki Thingnoi KNO akon’a Arm wing 17 le UPF ho (SoO) anei utoh kilhon’a abusah nadiu Designated Camp abusah nao gambih jouse’a asah peh vin, Centre Govt. in Kuki Thingnoi KNO le UPF teni kum 8 jouvin, 15 June 2016 nikhon New Delhi mun’a Political Dialogue apatpiu vin ahi.
  Chuleh KNO in Kum 8 Suspension of Operation (SoO) noija aum sungin Ministry of Home Affairs Govt. India in KNO adingin Designated Camp 8 apeuvin ahi, KNO Camp ho ahileh 1st Bn Kuki Army Hermon Camp, 2nd Bn Kuki Army Salem Camp, 3rd Bn Kuki Army Horeb Camp, 4th Bn Kuki Army Senai Camp, 5th Bn Kuki Army Thangting Camp, 6 Bn Kuki Army Gilgal Peace Camp, 7 Bn Kuki Army Gamnom Camp, 8 Bn Kuki Army Semol Camp ho ahin, hiche Designated Camp ahi Kuki Army mi-1250 aum vin ahi, Chuleh kimphat Camp aum Kuki Army ho ading’a Ministry of Home Affairs Govt. of India in Lhaseh’a Kuki Army hon Stipend mikhat in dk, 3000/- amudiu chu apejou pouvin ahi, Ministry of Home Affairs in tuni chan’a KukiArmy mi- 1250 ading 18 Months ti chu kum 1 leh kha 6 a Stipend apedoh lou in akoi vin ahi.
  Chuleh Designated Camp kisah naho jouse hi Ministry Of Home Affairs Dept. akon’a kisadoh ngen ahin KNO Arm wing hon 2010 akon’a Camp ho alolut u busa ahiuvin, ahin tuni chan’a Camp khat’a Army Barrack 8 toh 10 kikah ngen um ahi, Home Affairs akon’a Designated Camp ho Repairing nading Fund Section abol loujeh uvin tuhin Camp’a Barrack atamjo akisi gam in gin nathei di dinmun lou ngen asohdoh in ahi.
  Chuleh Stipend ho kitup tah’a Centre Ministry Home Affairs in apehlou nachung’a JMG members ho toukhom phat leh State Govt. le Centre palai hoheng’a kitup tah’a ahiding bangtah’a Stipend hinsol ding in ngeh naho aneijing vin ahin tunichan’a anahsah lou jeh un Designated Camp mun’a Kuki Army ho kium joulou ding ahi, ahin Camp Protection le Arms Lock kibol ho Protection nading bou’a kiumding ahi tin jong JMG Members honjong State le Centre Palai ho hetsah na anei vin ahi.
  Centre Govt. in Suspension of operation (SoO) aum Phaitol gamvah hihen Thinglhang gamvah ho SoO Guideline dungjui’a akitep na gamvah ho chung’a asubukim pouvin, hiche hojeh injong Phaitol gamvah thingnoi kiloi khom chom chom honjong Stipend ho aphatcha kitup tah’a apeh lou jeh’in, tohthei leh boltheisun tin Sept lhasung in Manipur pumpi nikho khat Bandh anakou taovin ahi.

Kuki Black Day man vang’a nam ngailu hija manlou vang’a ngailu lou ahideh poi: UKLF Chairman

Chandel, Sept. 12 (ET): UKLF Chairman SS Haokip in thuphon aneina’ah, Kuki Black Day hi man lou ding kiti ahipon, tua akiman dan akidei lou joh ahibouve ati.
  Tuni nilhah a Molnoi Area Public Meeting ana kibol toh kilhon in Pu SS Haokip Chairman UKLF in aseina’ah Black Day kiman chungchanga UKLF Organisation lunggel hi mipi tamtah in ahethem thei pouvin, akiman vanga nampi ngailu kitia, akimanlou vang’a ngailu lou ahipoi ati.
  UKLF in Black Day thupi tah’a man ding ana kideisahlou na ajeh chu Chandel District hi eimi chenna District dang – Churachandpur, Sadar Hill ho umchan kitho theina gam ahipon ahi. Kuki Black Day mandan ihet khel jeh un Gal ahung thah umdoh kigo jin ahi. Black Day hi thupi tah in kimang hih jong leh kho/houbung level’a ahilouleh eima insung cheh a maicham sem’a athi ho geldohna leh adalhah a-insung mite lunghempi na’n kimang jong leh boilou hel ahi.
  1990’s phatlaija Naga te toh ina kidou’u chun athi amang eiho bou ihipouvin, eihon jong itha phah chan ina thau ahin hinlah eiho itam thinau jeh chu kho neocha cha, in lhomcha bou ina khosah jeh’u leh chenmun det neilouva kichou lele ina hijeh uva athi amang ana kitamjo anahi. Ahin Naga ten hitin eiho man bang in Black Day tin amang pouvin, ama ma insung’ah athi ho leh a-insungmite din taona aman peh uvin ahi.
  Ahinlah eihon eiho bou athi dan in athi ho geldohna nikho tin lungchom keng in, mi douna’n loupi tah a man ding igong uvin, imang jiuvin ahileh mi’n Kuki ten ichung uvah gal khat apan kigouve tia kigonna anei kit’u ahitai. Chutichun ichung uvah gal hinthah bol kit’uleh eiho la koima pan kilah tup’a galbol ding kigo ki umlou ahin hijeh chun phat masa sang’a anunung joh manthahna le vangsetna ichung uva hung lhung ding ahi.
  Adeh deh’a Chandel District sung’a hi eimi kho ho hi Naga te kho kijotpa louna umlou ahitoh lhon in hetman louvin gal hungthah umkit taleh kho helou numei chapang tampi’n thina ato kit ding ahi. Athi ding, amang ding chu Chandel gam miho ihiuve, koiman Churachandpur ah eihung that pouvinte. Hiche hi lungneona dinga kisei ahipon, Chandel District hi Churachandpur leh Sadar Hill toh akibah lou dan kisei ahi. Hijeh a chu Organisation in akigel’in ahileh tulai tah’a midang te phindoh’a gal bol lou ding, ahithei chan’a gamsung’a numei chapang ho cham leh lungmonga achen theina diu leh venbit a umna diu kigel khoh ahi tin SS Haokip in aseiye.
  Ahin mitam tah in UKLF in Black Day man ding akhah un ahi tin agelkhel uvin ahi. Black Day man mai maija chu nampi ngailu iti diu ahileh UKLF in jong kimang ding ahi.
  Ahin 1995-98 laija Sajik Tampak area, Dingpi area leh Samtal area KNA hon Meilhei Thingnoi ho kom’a Dangka Lakh 6 a ana kijohdoh uva ana umsah uva mipi genthei ana thoh chu Nam ngailu/gam ngailu ho natoh thilbol ham? Meilhei thingnoi ho ana kap’a, ana nodoh’a gamsung huhdoh UKLF ho chu Black Day man ding chungthua lunggel kibah lou jeh’a chu nam ngailu lou kahi diu ham tihi mipin igel diu angaiyin ahi.
Ipidia chu UKLF in tunia mipi ding gelna’a Black Day hi thupi tah a manlou ding akitina a Nampi ngailu lou ahi tia kiseise thei ham? Ole jat dang thingnoi kom’a sum kilah a gamsung johdoh hon Black Day kiman na dinga sum le pai apoh doh jeh uva chu nam ngailu/gam ngailu hisah diu ham? tin thudoh aneijin ahi.
  UKLF chairman in aseibena’ah, tunin Kuki ten gam idel uva ahileh ipi ding’a Chandel District hi jat dang nam dang ho ipeh doh’u ham? Achesa Manipur State Assembly Election a 42 Tengnoupal Assembly Constituency an amin mai maiyin Benjamin Mate chu KNA hon ana tung un Naga chapa khat chu Old Kuki ahi tin MLA ana kikaidoh sah un ahi.
  Ahin 41 Chandel AC ah chun Naga khat akai sang in akiti’n bol thei chan in ana kibol in Kuki Chapa khat ana kikai doh sah in ahi. Hinlah UKLF leh mipin asotdoh MLA khat akai kit sang in tin aban election ah Naga chapa khat akaidoh sah kit un ahileh tunin Chandel District a Kuki chapa MLA inei tapouvin ahi. Hiche jeh hin tu’n midang hon Chandel District hi Naga te gam dan in agel tauvin ahi.
  Tunin namsung’ah UKLF in neokhat akibol khel leh ahahem ding itam uvin hinlah KNA ho natoh thilbol koima adem ngam i-um pouve. Iham tin gamsung ah gal hung um kit leh mipi huhna panla’a thi ding chu UKLF ho kihi ding tua gam leh nam kangailui tiho koima amel kimupha lou ding ahi. Hijeh chun koi tobang Black Day mang nom aumleh hou-in ham ahilouleh insung ham ah anathi ho geldoh na leh a-insung mite ding in taona mang un, Organisation in chutobanga man ding chu akikhah pon ahi.
  Black Day man na ding’a nampi kilungkhat tah’a panlah khom sang’a Government kom’a ka i-thingnoi ho (KNO leh UPF) gamtum del na a Political Dialogue patna dingleh Interlocutor appoint bol na dia kilung khat tah a pressure bol joh phalou ham? Kapu Kapa teho India jalen galsat a kana pan’u ahin ipidia tuni geiya hitia hi suhnem’a neikhoi’u ham tia mipi kilungtoh tah’a ipen phat’u ahitalou ham? Ipi dia i-pen nadiuva kipen louva, ipen nalou diu pouva ipen pen’u ham? Hiche hi lainat um tah nam mite ihiuvin ahi.
  UKLF in Kuki nampi ngailut na jal’in Kuki Re-unification akichepi’n hitoh kilhon chun gamsung mipi thoh gentheina pohnat KNA hon ana johdoh sau i-gamsung’u meilhei thingnoi ho khut’a kon in ana kinung lahdoh in ahi. Tunung jongleh Organisation in nampi dia panlahna thei channa hoilai mun hi jongleh jochan na pan kila jing ding ahi, ti’n SS Haokip in aseibei.
  Tuni kihoukhomna’a chun Molnoi Area sung’a um kho haosa ho, houbung lamkai ho leh Civil Society Organisation lamkai ho pan na’n mipi tamtah ana kikhom un ahi.

School/College ho’a kon Student Organisation chom chom ho’n toukhom na nei

Lien Gangte
CCpur, Sept. 12 (ET): Ccpur Dist. sung’a School le College ho’a pat Organisation chom chom ho’n 12th Sept., 2016 nilhah nidan 1:00 apat chun Multi-Purpose Hall, Ccpur Govt. College mun’ah 2nd Joint Meeting Students Organisation ana nei uvin ahi.
  Hiche kingon toh kilhon in Ngamgousiem Gangte, President GSO, Ccpur College in wellcome address le phatpat taona aneijou in ahung khom lamkai hon maban’a panlah ding dan seikhom na leh “JOINT STUDENT’S ORGANIZATION CHURACHANDPUR” a lamkai thah ding lhendoh na anei uvin ahi.
  Joint Student’s Organisation Ccpur ( JSOC) in toukhom na anei’u toh kilhon in thulhuh na chom chom anei uvin ahi. Thulhuh na anei hou, Ccpur Dist. sung’a Student organisation chom chom um ho kiloikhom na ding “Joint Student’s Organisation Ccpur (JSOC)” ti’n kilolna anei uvin ahi. Chuleh, ATSUM kithopi na toh JSOC apat Convenor cheng in Minstry of Tribal Affair a Director, Tribal scholarship toh kisai’a kimu pi ding, Simlai/Student hon scholarship 25th September 2016 masang amu lou ule kiphin na jat chom chom pan ding in kilolna anei uvin ahi.
  Chuleh, ahung kikhom lamkai chom chom hon JSOC lamkai ding lhen doh na anei uvin ahi. JSOC lamkai ding ho, Chief Convenor ding Paotinchon Singson, President TKSU-Ccpur; Convenor Secretary ding Paumuanlian, President SSPP-Rayburn; Convenor Finance ding Remnalal, President HSA-Ccpur chuleh, Convenor Information ding in Ngamgousiem Gangte,President GSO-Ccpur lhen doh in aum in ahi. Chuleh, Students organisation chom chom ho’a President ho JSOC a convenor ding ahiuve.

Wangkhei AC MLA Y. Erabot in MLA leh Congress party’a kon haina lekha pelut, BJP jop ta

erabot photo Imphal, Sept. 12 (ET): Achesa 2011 kum’a thinglhang’a um society hon ‘economic blockade’ abol chung’a Imphal-Jiribam lamlen’a tangden truck 100 val hin puilhung’a Wangkhei Assembly constituency ‘a veteran Congress MLA Yumkham Erabot in Manipur Legislative Assembly’a kon haina ding’a haina lekha apelut tan, Chief Minister Okram Ibobi Singh in nehguh pum’a avaihom demna thu aseiyin ahi.
  Ibobi sorkar toh party khat’a aumkhom vang’a Ibobi sorkar demna neiya Y Erabot in Manipur Pradesh Congress Committee (MPCC) ‘a kon’a haina ding’in jong haina lekha apelut in chule Monday nikhon BJP ajop tan ahi. 2017 kum’a umding election tet ding kigo’a candidate phabep in BJP ‘a Y Erabot lahlutna aumhi alunglhai pouvin, ahin, state BJP lamkai hon liemna aneiyun chule Keishampat Nityapat Chuthek ‘a um party office ‘a Erabot liemna kin-gon loupitah in abol uvin ahi.
  K. Bhabananda, President BJP Manipur Pradesh, Th Chaoba, convener, state election Management committee, Legislature’s Wing lamkai MLA Kh Joykishan Singh, State General Secretary (adm) MLA Th. Bishwajit Singh leh State vice president M. Asnikumar Singh, State Vice President MD. A.R Khan, State General Secy. Media N. Nimbus Singh, State Spokesperson N. Mangi Singh leh Rk. Shivachandra Singh in BJP a athah ‘a kilalut Congress MLA anahi Y Erabot liemna anei uve.
  K Bhabananda, BJP president in ahoulimna’a Erabot hi mi kitah leh mi hangsan ahi, tin pachatna thu aseiyin ahi. “Mi kitah, mi pontho leh mi hangsan’a nahet politician khat min seiyin, tin neidong leuchun Yumkham Erabot bou ahi, kati ding ahi”, ati. Chief Minister Okram Ibobi Singh in tantih neilouva asopi pa chapa O Henry atosot jing thu Bhabananda in demna aneiyin, achesa kum 15 sung’a aphat jouse politics’a mangcha’a mipa hi Congress party in alhendoh ahivang’a achung’a vangsetna alhun sah-u ahi, ati.
  “Erabot in Congress adalhah’a BJP ajop hin avetsah chu Congress ‘a mi kitah hoding’a mun a-ongpoi, tihi ahi”, tin aseibe’e. Erabot injong ahoulimna’a BJP adeilhen jeh thu aseiyin, ama toson hon adeilhen jeh ahi’in, nehguh umna system khelna ding’a japi in adeilhen ahi, ati. MLA ‘a kon haina anei thu’a Y Erabot in party ticket’a kon kaidoh kahijeh’a MLA kahina’a kon kahai ahi, ati. Congress lamkaina sorkar in nehguh abol leh minsetna anei hojeh’a post ‘a kon haina kanei ahi’in, kilolna hi eitoson hotoh kakihoutoh’a kalah ahi, tin aseibe’e.
  Yumkham Erabot Singh hi Wangkhei Assembly Constituency ‘a kon MLA 6 vei kai ahitan, 1980, 1984, 1995, 2002, 2007 chule 2012 kum’a Wangkhei A/C MLA ahi. Achesa 1980-81 kum’a FCS Minister of State in charge leh local self Government panmun atuh’a, 1981-83 kum’a FCS Cabinet Minister in-charge hi’a, 1995-97 kum’a Public Health Engineering Department Minister in-charge atuh’a, 1997-98 kum’a Education, Social Welfare, Art and Culture Minister in-charge, 2007-2012 kum’a Co-operation, Commerce and Industries Minister in charge hi’a chule 2007-09 kum’a Consumer Affairs Food and Public Distribution panmun atuh ahi.

INC a kon Erabot kinodoh

Imphal, Sept. 12 (ET): Y. Erabot in Manipur Pradesh Congress Committee dalhahna dinga haina lekha kase lut ahi ti’a aseijou vin MPCC official thulhut khat in Y. Erabot hi party a kon akinodoh tai tin thuphon anei yun ahi. Thuphon’in aseidan in Y.Erabot hi Indian National Congress a kon kinodoh keu hilouvin Wangkhei Assembly Consitutency PCC a member ahina konjong kum gup kiladoh ahi ati.

Lamlen 37 lah’a 2 bou ‘black-topping’ kibol ahi’n, MLA in japi ajoulhep ahi: DYDF
Thoubal Sept. 12 (ET): Wangjing Tentha Kendra MLA in public meeting’a Wangjing area’a lamlen atamjo feet 20 ‘a akikeh len in, black-topping akibol tai, tia asei hi Dynamic Youth Development Front (DYDF) kiti Wangjing leh Kairembikhoh khangthah ho kiloikhomna in demna leh donbutna ape uvin, MLA pa in jou thu’a gamsung mi alhep lou ding’in gihna aneiyun chule lamlen hi 37 lah’a 2 bou black-topped kibol ahi, tin aseiyui.
  Sunday nikho’a Dynamic Youth Development Front (DYDF) Wangjing in thuso miho akimupi uvin, hiche’a chun kiloikhomna secretary Chongtham Suranjoy in Wangjing Tentha Kendra MLA Paonam Brojen in tu naicha chun Wangjing lamle feet 20 ‘a akikehlen in chule akisem chai tai ati’e, tin aseiyin ahi. MLA pa chenna Wanjing Laikol leirak leh lamlen dang khat tilou adang akisem aumpoi, tin aseibe in ahi. MLA pa thuphon hi gamsung mi kingol bol na leh kijoulhep ahi’in, hiche hi vangset umtah ahi, tin aseiye. Chule MLA pa in asei bang’a atohdoh ding’in jong kouna aneiyin ahi.
  PDA in dangka 16.66 crore sanction abol’a Wangjing Lamding Municipal Council Area lamlen kisem phatna natoh jong vetsui ding ahi, ajeh chu tohgon (plan) ‘a kisem lamlen jat hileh list ‘a lampi kikoibe hohi kitoh lou ahi, tin Suranjoy in aseiyinchule lamlen kikoibe ho semna ding’a kipe sun hi japi phatchomna’a kimang hen, tin aseibe’e. NFSA noiya ration kihop na’a jong MLA pa in sihnei-langneina aneiye, tinjong ngohna aneiyin ahi.   Insung’a kum 5 chunglang ho ami cheh’a anchang kg 5 peh ding’a kisei hi anahsah pouvin, Voter list dungjuiya ahom uve, ati. Sorkar in alhendoh agent ho ahop sah pouvin, hiche hi MLA pa toh kinaina neiya akhohsah hon bou ahom uve, ati. NFSA dan toh kitoh’a anchang akihop louva ahileh DYDF in kiphinna chom chom japi tosotna’a abol ding ahi, tin aseibe’e.

Gorkha Welfare Union Manipur kiphutdoh

Kaybee Chongloi
SADAR HILLS, Sept. 12 (ET): Gorkha Status Demand Committee le United Gorkha Committee Manipur in lungtup ho molso tei nading tohgon aneina khat a chun Gorkha Welfare Union Manipur tia kiminvo kiloikhom thahbeh khat asemdoh lhon in ahi. Gorkha Welfare Union Manipur hi September nisim 11 nia chu Kanglatongbi Community Hall mun’a Gorkha Status Demand Committee le United Gorkha Committee kipunkhom a asemdoh’u ahi. Madan Kumar Limbu in aseidan in Gorkha kiloikhom teni kengkhat a adinkhom nadinga Gorkha Welfare Union Manipur kisemdoh hi gamsung a cheng Gorkha ho khonung ding gelkhohna jal’a kisemdoh ahi ati. Aman aseibe na a chun, tuni a kipat Gorkha Welfare Union Manipur hi Gorkha ho apex body khat hiding chuleh Gorkhaho gentheina le boina ho suhlhapna ding a kiloikhom lenpen hiding ahitai ati.
  Kiloikhom thah a panmun poimo tuh ho leh apanmun ho’u chu- R.B.Chhetry (President); Mani Kumar Limbu (VP), Milan Pradhan (VP), Shiva Kumar Basnet (General Secretary),Ram Bahadur Karki (Jt.Secretary),Ganashyam Kaudainya leh Manoj Rajya (Spokesperson) ahi’uve. Chuleh amaho cheng kithopi ding in executive member get jong alhengdoh uvin ahi.

Ka film hi Sharmila hinkho thusim chungchang a kibol ahipoi: Vikas Dwivedi

Imphal, Sept. 12: Film Director Vikas Dwivedi in tutu’a film khat abol hi Irom Sharmila hinkho thusim ahipoi, tin photchetna anei in ahi. Aman aseidan’in film hi Irom Sharmila hinkho chungthu a kisem ahilou jeh a Sharmila henga phalna kilalou ahi ati. Aman aseibena a chun hiche film hi Manipur thusim a thilsoh gimnei ni chungchang akisem ahi ati. Chuleh film thupi chu Unity, nationality chuleh humanity ahi tin aseiyin ahi.

SLNTSE, STSE le NMMSE Scholarship a ding application form lah thei

CCpur, Sept. 12 (ET): State Level Talent Search Examination (SLNTSE), State Talent Search Examination (STSE) leh National Means-cum-Merit Scholarship Examination (NMMSE) 2016-17 ahung lhung ding 6th Nov., 2016 ni’a um ding ahi. Hiche toh kilhon’a lunglut na nei ho’n application form 22nd Sept., 2016 chan ZEO Office, CCpur mun a lathei hiding, 30th Sept., 2016 masang’a ZEO Office, CCpur a pehlut kit ding ahi.
Hiche scholarship toh kisai a lunglutna nei Class IX & X (Govt. Aided & Private School) students ho’n State Talent Search Examination (STSE) leh State Level Talent Search Examination (SLNTSE) a ding application form alah thei diu, chuleh Govt. School noiya Class VIII students hon National Means-cum-Merit Scholarship Examination (NMMSE) 2016-17 a ding application form a lah thei diu ahi.

Kangvai Authority in nielkal
CCpur, Sept. 12 (ET): September nisim 12, 2016 a Sangai Express a Sapam Rajen Singh, Convenor, TASDO in thuphon aneina chung’ah tuni’n Kangvai Authority, Vaiphei Peoples’ Council Kangvai Block, Zillai Kangvai Block chuleh YVA Kangvai Block in hilchetna aneijin ahi.
  Akhatna’a, 1920 kum’a kipat Kangvai Village in Churachandpur District a Hill House Tax kipe ahitan tunigeija kichepi ahikeo hilouva hiche khanglai’a British Government in jong ahetpeh (recognized) ahi ati. Anina’a, Kangvai Village hi Pollicng Station 57-Henglep (ST) under Churachandpur District nuoi’a um ahin, agom’a voter 879 anei ahi, tin Khailianthang Vaiphei, Chief, Kangvai Village; Lamneimang Vaiphei, Chairman, VPC Kangvai Block; Ph. Khupthianmuan Vaiphei, President, Zillai Kangvai Block; chuleh K Chung Vaiphei, President, YVA Kangvai Block soi kaina lekhathot kimu’n aseiye.

HTC, KWUHR le KSO Moreh in ngehna nei

Moreh, Sept. 12 (ET): September nisim 13 Sahnit ahitoh kilhon’a Moreh khopi sung’a jinglam 7:30 am kipat 12 chan kin-guol chelha ding ahi. Khopi sung jouse 12:00 noon chan gei kikhahsuoh din Joint Committee Hill Tribal Council, Kuki Women Union for Humar Rights leh Kuki Students’ Organisation in ngehna aneijin ahi.