Sept 12, 2016 Local news

Sept 12, 2016 Local news

1460
0
SHARE

KNO in gam min ding UPF te offer ana kibol ahi : PS Haokip

KNO FlagB.Lalboi Gangte
CCpur. Sept. 11 (ET): Kuki National Organisation (KNO) Lamkai Luboh President Mr. PS Haokip akon thusoh kimun aseina’a, Kuki chate pu le pa Zale’n-gam chulsa tundoh kitding hi KNO lungtup ahi, Hiche hilchetna lekhabu jong tampi akisodoh jing’in ahi, hinlah India Daanpi jui tokilhon’a, tuni’a hi Manipur sung’a Kuki ten khantou, pilhin, kivenbit na, machal jing na inei thei nadiuva State atum kidel ahi, Hiche State hi India daanpi Article 3 dungjui ya muthei ahi tin ahilchen in ahi.
Alangkhatna, UPF in Article 244(A) dungjuiya State within a State or Tribal State tia thumding tin dinmun aneiyun ahi. Namkhat in demand ni (2) neihi hatna ahilou jeh a sopi jousen kitohtah le lungkhattah a chekhom ding hi KNO te lungtup ahi, chuleh 6 Nov 2012 a, KNO le UPF in kihou khom na Dorcas Hall, New Lamka’a ana kineijin hiche nikho hin written in speech kapen, “Political Road Map For the Kuki People” tin kana homdoh in ahi ati, Hiche nikho hin UPF ten State apom thei diuleh Kuki state mindia KNO ten Zalen-gam katiu hi sopi cheng kipa nading in Zogam hisah ding jong pha kasauve tin kana phongdoh in ahi. India Constitution Article 3 dung jui in full-fledged state del khom taute. State pilhing tilouvin, inam mite diuvin khantou pilhinna, kivenbit na umjou ponte tin kana seiyin ahi ati.
Chuleh 31st August 2015 nikho in Manipur Assembly in bill 3 ahin passed tauvin hijeh hin mipi ten MLA le Minister ho inn chule MP pa inn jong ahin hal lhauvin mi jong ahung thi tan, ajing 1st Sept 2015 nikho hin Simte Youth Office (SYO) hall’a mipi in KNO le UPF lamkai na in Churachandpur a um Tribe leaders ho, social organization a leaders ho, philanthropic organization jousen meeting inei kit tauvin, hiche nikho hin speech kapen, written injong ka speech ka hom’in ahi ati, chuleh hiche nikho’a Kathu sei chu State pilhing del taute, amin ding chu Zale’n-gam or Zogam hoiche hijongleh akhoh poi. State idel khom thei diuleh Mass movement pan taute tin kana seiyin ahi. 2nd Sept 2015, nin Songgel Community Hall’a UPF le KNO chuleh civil organization jouse iki khom kit uvin, hikom mun’a hin keiman Article 3 aphai kati. 1 Sept nikho’a SYO Hall a kasei bangchun kasei kit’in hinlah New Lamka lam’a konna hung hon mi 10 lam in Article 244(A) joh aphai tin Article 3 adeilou nau asei yun ahi. Chuleh 7th Sept 2015 nikho in Chassad Avenue, Imphal a KIM lamkai na in KNO, KNF Semtinthang chule UKLF hicheng hin kihou khomna anakinei’in, hiche nikho hin Kuki Inpi in Haipi Declaration bang’a Kuki State bou kilolna ijui cheh diu ahi ati tauvin Hinlah Pu Semtinthang Kipgen, KNF President le Pu Soson Haokip UKLF Chairman pan Haipi declaration chunga anoplou nalhon aphongdoh lhon’in ahi, Chuleh 13th Sept 2015, nikho hin nam mite khankho ding akigel in kito nading poupou dileh tin Demand kibahsah dingin KNO ten pan akila tai. Hijeh chun UPF te sei bangin KNO in demand kibang hisah din nopna akipe tai. Hiche Demand akibang tai tin Mipi lah’a aki phong doh tan ahi ati. Hiche a demand akibang’e ti chu Article 244 (A) kichepi khom tahen kiti ahi tai.
15th September 2015, nikho in UPF delegate le KNO delegate ho Delhi a tribal state chu Naga hotoh delkhom thei himong ding hinam? ti kicheh tah’a Th. Muivah komma doh chetding in aki sol’in, Manipur Tribal Forum Delhi (MTFD), in Delhi a KNO le UPF ho lhun masang’un Th. Muivah akimupi masat uvin, ana dong tauvin, hiche’a Th. Muivah in adonbut nau chu, “nangho hi Mizo BUS in na dalhah’u ahitan, tuni’a hi Naga BUS hiding, tribal BUS hithei ponte, nahung nom’ule most welcome hinlah tribal BUS ahipoi” ti’a ana hilchet’u ahi ati. Chuleh KNO le UPF delegate hon hiche Muivah kamcheng tahhi MTFD ho apat ajahson phat’un, avel’a Muivah kimu pi angaipoi tin ahin dalha tauve. Hiche nikho a Muivah donbutna tokilhon na Tribal State or Tribal Unity abeitai, ti hiche nikho apat kicheh ahitai ati. Chuleh Delhi mun’a GoI thalheng ho ahin kimu piuvin KNO ho sei bang’a separate state kathum thei diu ham? Ti’a ana doh’u chun na thum thei diu ahi tin ahin hil chen tauvin, hiti chun kipah tahin separate state thum thei ahin hedoh u’vin chuleh tribal unity aumlouva kimoh sei kop dan, ahin hechen uvin kipah tahin inn lam ahung kile tauvin ahi ati.
Chuleh 22nd Sept 2015, hiche nikho hin Grace Bible College Hall’a KNO le UPF in meeting akineijin ahi. Delhi a che ho report akingai masan KNO le UPF delegate hon Th. Muivah a kon na Tribal State or Tribal Unity aumlou photchet ahin hilchen un; aban state demand bolthei ahi tin thulhut ahin nei tauvin ahi. Hijeh hin, UPF leh KNO in kipah tah’in separate state demand bolpan taute tin resolution akinei tan ahi ati. Hinlah State min ding dei dei dan akisei khom’in ahileh min nga(5) jen akisei doh tan,hiche jeh chun keiman jong 2012 kum’a pat state min ding kasei leh koiman ima nasei pouvin tuni’a min 5 jen nasei uchu iti iki nopto theidiu hitam?. Hiche jeh hin keiman tuni’a hi amin ding kasei louding ahin hinlah KNO le UPF in state delkhom ding itiu hi kaki pah’in chomkhat separate state ding iki nopto nau hi celebrate utin chomkhat ni 5 jou langleh sei khom kit taute katin ahi ati. Hinlah kikhen jou chun mithi 9 vil na akineijin akihung doh phat chun mithi ho chung’a kalai nat na, leh KNO leh UPF in separate state thum pan din kaki nopto tauve tin houlim na jong inko athi ho insung mite jaona’a thi op ho kom’a lhamon na thu kana seiyin, vangset umtah in inn kalhun jou in ZRO President Pu Thanglenpao inn ahung kihal tan ahi. Hiti’a pu Thanglenpao inn ahung kihal jeng jeh hin kimu to vah thei louvin KNO le UPF lha ni(2) jouvin akikimuto theibep’in lhani jou chun Imphal mun’a UPF le KNO in state min ding sei na akineijin, hinlah State min hi kikhen na neithei ahi jeh in state thum masau hitin state imu teng’uleh amin ding sah khom taute ti’a KNO le UPF in kilol na aki nei tan ahi ati.
Chuleh aman aseibe kitna, 15th June 2016, hiche nikho hin New Delhi a 1st political dialogue between Kuki Ug’s and Government of India leh Manipur Government in aki nei tan ahi. KNO Negotiator and Spokesperson Dr. Seilen Haokip chuleh UPF spokesperson Mr. Aron Kipgen in signed abolna State Demand ding KNO leh UPF chun ape lut lhon tan ahi. Hiche KNO leh UPF in political dialogue apat hi press a ahung doh tan mitin mu dingin Manipur a Kuki ten separate state ding in dialogue apan tauvin ahi; ti chu magazine leh newspapers ho ah aso tauvin ahi. Hiche phat hin sopi phabep hin ipi ding’a Kuki state kiti jeng ham? Ti’a lunglhai lou na het thei’a aphon doh uh hi aki ja tan ahi. chujou in 17th August 2016, hiche nikho hin Kuki Inpi Mnipur(KIM) te lamkai na in Manipur State sung’a eimi jouse ahin kou khom tauvin, Hiche nikho hin keiman jong ka speech 1000 copies ka print in ‘Kuki Political Stand and Way Forward’ ti ka present in ahi. Hiche nikho hin houlim na kanei jou hin, hitin kaphong doh e, State imu teng uleh UPF leh KNO in amin semkhom ding ti’a KNO leh UPF in kilol na kana nei uh chu KNO lamkai hi na in State min semkhom ding kiti chu UPF ten achang un ie State min diu chu sah tau hen tin UPF te offer kabol tai, Hijeh hin sopi te KNO te in ima tih in sopi chengse toh kitoh lou a lam jot ding hi kanom pouvin hijeh’a chu avel vel’a kajol uva UPF te toh India Constitution Article 3 demand khom ding’a kaki noptou u ahi ati, Hiche bang’a jong chu state imu teng u jong leh amin ding hi UPF ten amin abol ding’a offer kabol kit ahi tai ati.
Chuleh aseibe kitna, mitin in ahet cheh ding’a pha chu tribal unity chu kicheh tah’a Th. Muivah in Naga te chun separate agenda kanei u ahi; chuleh hiche framework agreement hi Nagaland Naga ho chuleh state chom chom’a Naga ho kivai poh khom ding’a Naga bus katol u ahi bouve, tribal bus ahipoi ati’a kicheh tah[a ana hilchet sa chu geldoh leuhen Tribal aum tapoi. Kuki and its cognate groups ho hi separate bus a kingailut tah’a kipumkhat’a hat tah’a che khom ding’a katep joh nahiu ve ati. Chuleh KNO in Kipumkhat ding dei na jal in Gam min ding UPF te offer kabol taovin ahi.

 

Kuki Nampi min’a kiloikhomna isem vang’un Peter in Pakai aseilep to ikibang chet taove: KNF-N

SADAR HILLS, Sept.11(ET): Nampi natoh kiti hi “Heo-jang-te” (Needle size) a pat kipan’a leiset pumpi thulhahna theichan chepi angaijin, Kuki nampi min’a kiloikhomna isemvang uvin Peter in Pakai aseilep to ikibang chet tauve tin Kuki National Front (N) hon tunia thuphon anei nauva aseijui.
Gogou Vaiphei, Information & Publicity Secretary min’a KNF-N thuphon chun, kumdang sanga hoijo le kilomcheh a ‘SAHNIT’ nikho loupitah a man ahi na dingin KIM, KSO le alhang lhanga CSO hon pan hatah’a ahin lahnau chunga pachatna le kipathu akiphonge ati.
Thuphon in aseibena’a, Kuki min kitina taphot chu eiho’a ahin, ihahsat-nao, ikipa-nao, ilhahsam-nao, ilolhin-nao, iminsiet-nao, iminphat-nao, iloupi-nao jouse hi akiseidoh lou Nampi (Nation) lhing khat anahisa thah tundoh kitna dinga eima hon ikisuh loupidiu ngai ahi chule ajeh um chihcheh a ikikoiju angaijin ahi. Koihile Nam thusim neilou chu Nam neilou ahi tijong sumil poute ati.
Eima inchen bou kisemna ding le mite masanga maipha vea um ihidiu le Nampi min patda jongleu hen Gangster hina’a jong bolmo aumpoije tia Gogou Vaiphei in thuphon abolna’a aseitolhonin 13th September kimanlona thisan hin Kuki Nampi dia thu asei seijeng ahin, adung avaijin-keibol, keipohdoh bon hilou tin akaleh akalou vin Nam natong hon bolda le deisah aumin bol jong abol tahlou diuvin hetsahna jong ahung kineije, ati.
Aman aseibena’a, jachat umtah tah le deilou umtah tah isunguva ichepiuvin “ama le ama ki-ot” te ikisoh gotei tei uvin, Nam natong dihtah dana kiphonga pan nasatah’a anala’a kigel kineppi umtah tah le kisonpi umtah tah kiloikhomna themkhat in Kuki kiti min hi suhmang ding le suhmolphou natei tei dia pan nasatah’a la Organization 20% tobang inei taove ati.
Thuphon in aseibena’a, KNF-N in koima got tum akineipon pohnat na jeh’a i-society sunguva thil umdan hung kisei ahin, koitobang hiche thudih hin agot khah aumle lunghang louva kisemthah nading lampi joh’a akigel’ule nampi dia khantou machalna ahin pohlut johdiu ahi ati. Nampi dia Apex Body a inei’u KIM leh atohkhompi kiloikhomna dang dang ho thilgon hi ijapeh lou ule eiho jengjong ivaihom nauva ichapang houvin ithu’u ahin lahlou tengleu ipi hungsoh ding ham tijong ikivenjep’u angaije tia KNF-N thuphon in asei banjomin lamkai luboh hoding bouva sepai um ahipon kivaipoh kitupna dingjoh’a aluboh um ahin decision ilahteng leu mature tah le achesot dingin thulhuhna leh lunggel chaina neiji din ikitem uve ati. KNF-N thuphon in aseibena’a, Nampi semtup na ding tia hung kiphutdoh Thadou Inpi, TSA le TWA hi lungdihtah a na ahintoh diu hi anakingah lel ahin, akivet vet le tunichan’a atoh diuva lom tong talouvin ahung kiphulo nau alungtup’u chu alepeijun Nampi dia galmi kiloikhomna lentah sohdoh bangin akilang tai ati.
Hijeh chun hiche kiloikhomna thum hi achanchin’u lhakhat sunga kikholchil ding hiche kholchilna dungjuija thuphon hung kinei khumding ahitah jeh’in amahon jong nampi suhtup nadin pan hichan kaladoh taovin Nampin khonunga hichan ahin phatchompi ding ahi tihi kichehtah’a jihtho’a KNF-N GHQ a ahinthah lut diuvin thugahna sangtah pumin hetsahna akineije tinjong KNF-N thuphon chun aseije.

Black day kiman ding toh kisai a Security khoutah kikoi

Imphal, Sept. 11: National Socialist Council of Nagalim (Isak-Muivah) in 1993 kum a kuki milham 900 vel anatha na nikho September nisim 13 le Kukite jouse in kijotna aneiding’u tolho’ in Paramilitary Forces hon boina sonathei mun ho vetkolna aneipan tauvin ahi. Jat le Nam kikim a chenna munho a um Police Station ho le Paramilitary Forces ho red alert a umding’uvin mopohna neihon thupeh anei’un, chuleh Central Forces hon atouna’u gamkai sung ho a patrolling jong abolpan tauvin ahi.
September nisim 13 le chelha ding kingon hi Kuki Inpi Manipur (KIM) le Kuki Students’ Organisation (KSO) in agon lhon ahi. KSO GHQ General Secretary Seiboi Haokip in asei na a, hiche nikho lehin muntin’a um Kukite jousen NSCN-IM khut a ana mollem ho le gentheina anatoh hoding’a Pathen heng’a taona aneipeh dingu ahi ati. Chuleh lunghempi vetsahna a mipi kijotna umding ahi tin jong aseiye.
KIM hin muona neilouva kithat, Kukite ho chungthu seilhah ahina dinga Centre heng’a ngehna ahin nei nauhi phatsot thimpi hungche ahitan, ahinlah tunigei hin Centre hihen, state hileh hiche chungthu seilhahna ding’a pheiphung hinsuong a’um hihlaiye. Chuleh Indian government in NSCN (IM) toh kinoptona anei masang’a, Kukite chungthu aseichet masat din hi KIM in ngehna aneiho lah a apipen khat ahi.
NSCN (IM) in 1992 kum’a Kukite chung’a ethnic cleansing ana bolpat ahi. Chuleh September nisim 15 ni kah’a Nagate gam’a cheng Kuki ho akichoudoh diuva NSCN (IM) in thupeh ahin nei ahi. Ahinlah phat tep nikho lhinna ding ni ni (2) kivat nalai’in , NSCN (IM) militant hon Joupi le Jangnomphai anahal lhauvin milham tampi lungsetna beihel in ana that’u , chuleh khosung’a kona jamdohman hojong ana lamtin kit’un mi 87 ana thabe ‘u vin ahi. (Agencies)

Thadou Kuki Holy Bible lolhingtah’a lhandoh hita; ‘Audio Bible Project’ um

Thadou Kuki Holy Bible released Kaybie Chongloi
SADAR HILLS, Sept.11(ET): Thadou Baptist Association le Thadou Kuki Holy Bible Project Committee ho makaina noija Bible Society of India in published abol, “Thadou Kuki Holy Bible” chu tunin lolhingtah’in Motbung Baptist Church mun’a lhandoh in aumtai.
Gah velgeldoh kitthei chu, hiche Thadou Kuki Holy Bible hi achesa 2008 kum’a Motbung vangkho mama a Thadou Christian Centenary ana kiman’a chu thenso le lhandoh anahi ahitan, hijongle asung thu umho, suhkhel, takhel le adang dang semhoiding phabep ana umkhahjeh’a Thadou Kuki Holy Bible Project Committee hon nasatah’a ahin velvet kit nung uva, sukhel, takhel, ahoilou phabep ahinsemtoh jouva athahbeh’a japi simthei dia ahin thah tadoh kit’u ahi.
Tunia lhandohna kingol’a chun Rev. Th. Kipgen, former Executive Secretary, TBA-I chu Dedicating Minister in apangin chule Kangpokpi AC MLA, Nemcha Kipgen le Motbung Haosapu ahina chungchon’a ADC Sadar Hills kivaihomna’a Executive Member jong hi, Kaikhosei Lhouvum in jong pan analan ahi.
Thadou Baptist Association a Hou lamkai phabep in pengkul mut in jana neitah’a “Thadou Kuki Holy Bible” chu Talai a ahin jonglut un chujouvin Minister pu Rev. Th. Kipgen in Pulpit a anasangin Pathen henga lhandohna loupitah in aneijin, thangvahna le kipathu seina chungchon’a phatthei thumna jong aneijin ahi. Aman ahoulimna’a, Pathen thupha hi Pentecost nia pat’a chu min ama ama paocheh’a hettheina ana nei ahitai ati tolhonin Thadou pao tho ho dia Thadou Kuki Holy Bible hung kisemdoh hi ichan ham’a Pathen lenggam kehlet bena le namsunga kilungkhat le kingailutna ahin pun besah theiding akinepna aphongin ahi.
Alangkhat’a, Thadou Kuki Holy Bible Project Committee a Chairman chule TBA-I a Executive Secretary, Rev. V. Sitlhou in Bible hi Houbung chehchaona khat in phatkhat chun anapange ati tolhonin aman athusei ahilchenna achun, a Bible athu/Pathen thu chu hilouvin a Bible min kisahpa jeh a chu Houbung chehchaona anaum ahi ati.
Aman ahilchenbe na’a, Bible anakisem dinga hi a project chu “Thadou Kuki Holy Bible Project” anakiti ahin, hinlah vangset umtah in ahung kilechai phat in “Kuki Holy Bible” ahung kitile Houbung ana chehchao pan ahi ati.
Rev. V. Sitlhou in aseibena’a, tua kisemdoh “Thadou Kuki Holy Bible” hi North East sunga tribal [thinglhangmi] holah’a dia ahoipen hidingin kaginchai atin chule hiche hi hung kisemhoi be nalaiding, soft leather cover chule pocket size a jong khonungle hung kisemdoh kit nalaidi ahi ati.
“Audio Bible Project” jong Dangka Lakh 30 langjen lut in akiboipin sotlouva hung kithenso vahkit ding ahitai tia Rev. V. Sitlhou in aasei banjomin Text, Audio chule Reference jao pum’a kisem “App Bible” kitijong nasatah in akiboipin, hiche hi North East seh hilouva India pumpia adia hitobanga holah’a amasapen hinalai maithei ahin, hiche jong hi gangtah’a hung kithenso ding ahitai ati.
Kangpokpi AC MLA, Nemcha Kipgen in ahoulimna’a, TBA le Thadou Kuki Holy Bible Project Committee ho tomngaina le gutchuna jalla “Thadou Kuki Holy Bible” tadoh theija aumhi chimtih neilouvin Pathen kathangvah in chule ahung kisalel ho le ahin boipi ho jouse chunga kakipana kaphonge ati.
Bible hi “Lhagao Chemjam” ahin tunin “I-Thaomei khom’u itungdoh tauve” tia MLA Nemcha Kipgen in aseiye.
Thadou Kuki Holy Bible Project Committee a chairman chu Rev. V. Sitlhou, Exe.Secy. TBA-I; Secretary-Rev. L.Kipgen, Finance Secy. TBA-I chule Chief Translator chu Kaithang Singsit, M.Th. ahiuvin chule adang typing, design le adang danga panla ho jouse Ngailut thilpeh jong TBA Women Society hon aneijun, kingol gontoh hon jong MLA nu le EM ADC Sadar Hills jaona’a in media coverage bol ho jong kipa thilpeh aneijun ahi.
Motbung BYF, Damdei Women Society, Motbung Women Society ho le Golden Choir Keithelmanbi hon Pathen vahchoila ngeitah asah hou chun mipi lungsung ana suthou lheh jengin ahi.
Committee ho akon’a thulhut kimun aseina’a, Thadou Kuki Holy Bible hi copy 3000 akitat in akhoh dungjuija kita beding ahi atiuve.

Sadar Hills’a Old Age pension kihom ding

Kaybie Chongloi
SADAR HILLS, Sept. 11: Director, Social Welfare, Manipur akon’a concerned Social Welfare Officer ho thupeh dungjuija Social Welfare Office, Saitu-Gamphazol, Sadar Hills Senapati district in ahunglhung ding September nisim 15 apat nisim 23 chan Kangpokpi, Saikul le Saitu AC sunga Tehse sum san tia ihet’u MOAP noija Old Age Pension ahopding ahitai.
N. Usharani Devi, Social Welfare Officer, Saitu Gamphazol, Kangpokpi in aseina’a, Manipur Old Age Pension [MOAP] noija Card Avom (Black) le Akang (White) neiho Tehse sum san (Old Age pension) hi aphat le amun kipe dungjuija kihom panding ahitai ati.
Kangpokpi Sub Division sunga MOAP noija Card Avom le Akang nei jouse September nisim 15 le 16 nikho teng ADC office [Complex], Kanggui mun’a kihomding chule Keithelmanbi Sub Division ho September nisim 17 le 19 nikho le Keithelmanbi Community Hall a kihom ding ahi.
Saikul langa ho September nisim 20 le 21 nikho teng Saikul Police Station mun’a kihom ding chule Saitu lhanga ho September nisim 22 le 23 nikho teng Gamnom Sapormeina Police Station mun’a kihom ding ahi.
Pension sum kihop phat hi jingkah lam nidan 10 apat nilhah lam nidan 3 chan hisoh keiding ahi.
Old Age Pension sang ding hon akichoidiu angaicha hochu: (1) Aadhaar Card (Xerox khat le original jong) (2) Bank Passbook (Xerox khat le original), (3). Ningkum’a sum anasan uva receipt khat ana kilah uchu akichoi chehdiu, chule (4). Passport Size photo thahleh 2 toh akichoi diu ahi.
Koiman akhel’a mi asolthei louding chule angaicha cheng kichoilhing lou ho koima sum kipelou ding ahi tinjong Social Welfare Officer nun hetsahna aneije.
Aman aseibena’a, tuchunga hi Director, Social Welfare Manipur thulhah dungjuija sum hi phatah a asangadi ho kholchilna akinei jouteng amasatah khut’a asum’a kipeh thoding, bank account a kiheng talouding ahi ati.
Chule sum kihop ni le Card ana kidalhah hou chu ama ama cheh khutna kipedoh ding ahitahjeh in thonlouva ama sacheh ahungtei angaije ati tolhonin Card San (Red) le Adup (Blue) nei ho’a tuchunga hi jaolou lai ahin, ahungphat le ol’a hung kihetsah ding ahi.

Believers Church Manipur, District Women Fellowship Convention – 2016 lolhing tah’a ana kimang

9894dd2a-ba0c-457d-8bd1-90d30dd0c9fc Lien Gangte
Ccpur, Sept. 11 (ET): Believers Church, Manipur, in “O Pathen, lungtheng neipen lang, kasunga lhagao thah, adih chu neikhumpeh in.” Psalm 51:10 thupi a mang in Manipur District Women Fellowship Convention-2016 kingon 9th Sept. apat 12 Sept., 2016 sung Believers Church, K. Khomunnom ah ana um in ahi. Believers Church, Manipur in District Women Fellowship Convention – 2016 kingon anei toh kilhon in, khop-pi hondoh na kingon 9th Sept., 2016 nilhah jan pung 6:00 chun Believers Church K. Khomunnom ah ana um in, Believers Church ponlap khaipal na Soipi Singson in aneiyin, Khopi Pathien a lhandoh na le hondoh a Rev. Fr. Gena Vaiphei, DIOCESE Secy. Believers Church, Imphal DIOCESE in ana neiyin ahi.
Believers Church, Manipur in District Women Fellowship Convention – 2016 kingon anei toh kilhon in, Pathien thuseiyin Rev. Fr. Gena Vaiphei, Diocesan Secy. Believers Church, Imphal Diocese le Rev. Fr. Thangboi, Diocesan Secy. Believers Church, Ccpur Diocese apang lhon in ahi. Khop-pi sung ahin, Praise & Worship, Scripture Reading, Cultural Program, Talent Show le adang dang kingon ana um in ahi. Chuleh, 11th Sept., 2016 jan kikhop hunsung’ah Believers Church, Ccpur District Women Fellowship Convention – 2016 khop-pi khana Rev. Fr. Thangboi, Diocesan Secy. Believers Church, Ccpur Diocese in aneiyin, khop-pi kha ahi toh kilhon in khop-pi ponlap khailhah na Thangboi Baite, K. Khomunnom haosapu in aneiyin ahi.

Certificate lhem mangcha ho chung’a ‘criminal case’ kijihlut ding

Imphal, Sept. 11 (ET): Govt. of Manipur, Directorate of Education (S) (Administrative Section) a kuon thuso kimu’n aseina’ah, Primary Teacher (SSA), Upper Primary Teacher (SSA) chuleh Graduate Teacher (RMSA) direct recruitment a ding’a certificate hetthei ding’a TET, D.El.Ed., B.Ed. chuleh document dang dang ho khuolchilna phatah um ding ahi ati.
Institute jouse’a kholchilna nei din Manipur gamsung leh apolang’ah teams akisol in ahi. I-ham ti’a certificate ho alhem (fake) ahikhah leh akhatna’a police heng’a FIR kibol’a criminal case kijikhum ding ahi; anina’a candidate nu/pa minchuon na jouse’a a natoh kiholna bang aumkhah’a ahijong leh hiche form ho chu kikhah ding, khonung geija govt. natoh ahol thei tahlou ding ahi.
Chuleh hiche fake certificate apply bol ho din ‘window period’, tichu September nisim 9, 2016 a kipat September nisim 15, 2016 sung akitep peh uvin hiche kah’a fake certificate a apply ana bol hon withdraw abol diu ahi, tin N. Praveen Singh, Director of Education (S) Maniopur’a kuon thuso chun aseiye.

Saikul United Veteran FC in trophy lopna kin ana kibol

FC REPEAT Saikul Manager Thangkam Lupheng presents memento to Manglenthang Zou SADAR HILLS, Sept. 11 (ET): Janni’n Saikul Hill Town ah FC REPEAT, Saikul in 1st (L) Shivasagar Memorial Veterans Tournament, 2014 a champion trophy analah lop pehna leh Saikul United Veteran Football Club (SUV FC) thiensuo na kinguon anaumin ahi.
Hiche kin’a chun Tonglet Chongloi Chief Guest hina leh ADC Sadar Hills member Paotinlun Chongloi, thangkam Lupheng chuleh masang’a International footballer Manglenthang Zou hon Presidium member hina’n pan anala’uvin ahi. FC REPEAT, Saikul hin achesa 2014 kum’a Kalimpong, Darjeeling mun’a ana um 1st (L) Shivsagar Memorial Veterans Tournament a champion anahi’u ahi. Ahin FC REPEAT chu “Saikul United Veteran” Football Club ti’n minkhel na aneita’uvin ahi. Hiche minkhel na hi club Manager in Chief Guest leh Presidium member ho umpet in phondoh na ana neiyin chuleh houlim nale Club Executive le Official ho phondoh na jong ana neiyin ahi. Chuleh Club in kipa nale tiilkhou na’n player ho kipa thilpeh naleh Manglenthang Zou in Club Coach hina’a pan alahna jaana vetsah na’n Memento leh naam puon silpeh na jong anei’uvin ahi.
Hiche jou chun FC REPEAT (tu’a SUV FC) leh Eimi Veteran FC in Rs. 2000 cheh apodoh in Saikul playground ah friendly match aneilhon in ahi. Hiche match achun Eimi Veterans in SUV FC chu goal 2 in anajouvin match a goljo na’a sum chu Zion Orphanage Home, Saikul kithopina’n anape’uvin ahi.
Kin kichaiyin Club Manager Thangkam Lupheng inn neiya pan na’n ankuong anasoh khom uvin ahin.

Zai-them 2016 round 2 boina umlouva che lha

Dignitaries of noon session and organising comtt - resized Chandel, Sept. 11(ET): Kuki Baptist Convention (KBC) India, Youth Departmen tohgon noiya chelha Zai-them 2016 Second Round tuni chun KBC Centre Church, Molnoi Area, Chandel District’a ana chelha in ahi. Zai-them hi gamsung’a khangdong Pathen lasah kitetna ahi.
Kingon’a chun Chandel ADC Member (Nominee) Chinneivah Haokip, Saivom Primary School Head master Christina Ating Haokip le KBC Men Deparment Vice-President Jamkholal Zou hon Jin-gun, Jin-ja um le Kinneipa in apang’un ahi.
KBS Youth President James Doungel in akikhom mipi ho leh Jin-gun liemna thu aseijou chun constestant 32 in athepnau cheh anapodoh’un, kitetna chun Hou-In sung chu ana hotling jeng’in ahi. Nilhah session a chun Molnom Vangkho Haosapi Vahneilhing Haokip,Assistant Professor Paosei Haokip le KBC Mission & Evangelism Board Member Lhunthang Mate Jin-gun, Jin-ja um chuleh kin neipa in apang kit’un ahi.
Kitetna a panla khangdong lasathem 32 ho lah a kon chun Jury member hon next round a lutdingin mi 20 alhengdoh un ahi. Amaho cheng hin October nisim 16 nileh KBC, Centre Church, B.Vengnom, CCPur District a kitetna abanjop diu ahi. Tuni kingon a chun Thangkholun Singsit le HM.Lhingboi, kin heitoh in ana panglhon’in ahi. Chuleh Jury member ho chu Thangboi Singson, Jimmy haokip chuleh Paocha ahiuve. Hiche kitetna grand final hi November nisim 18 nileh umding ahi.

ICP Moreh kisa chai vah tading

Imphal, Sept. 11(ET): Gamgi, Moreh’a kisa Integrated Check Post (ICP) hi tukum December sung’a akisah chai ding tahsan ahi’n, Border Management department, Home Affairs Ministry, India sorkar in December lha sung’a Moreh’a ICP kisa sahchai tei ding’a Chief Secretary lhamonna thu aseipeh’e, tin thulhut in aseiyin ahi.
ICP ‘a hi immigration, custom leh adang dang umding ahi’in, facility hi India leh ASEAN gam ho kivil to na machal sah nading ahi. Nikho phabep masang chun ICP kisah thu’a cabinet secretary in Chief Secretary toh ‘Video Conference’ abol’e, tin thulhut in aseiyin ahi. December lha’a natoh chai ding thu akisei toh kilhon’a state sorkar in centre jotna lamlen jouse hi ICP kisah chai masang’a sah chai ding’a thupeh anei ahitai.

An-ngol kiphinna chejom jing

Imphal, Sept. 11(ET): Keishampat Leimajam Leikai Community Hall mun’a Manipur Police Constable (male) recruitment test 2013 batch member 5 in an-ngol kiphinna abol achejom pi jing’in, amaho hin recruitment test kibol sa voh hai ding’a sorkar thuphon doudalna’a kiphinna abol-u ahi.
Kiphinna bol’a mi nga ho tahsa dinmun alel cheh cheh in, Sunday jingkah nidan 9 don in mikhat athimil in ahi. Leimakhong Mapal’a cheng Iboton chapa Jonny Mangshatabam hin kiphinna abolna mun’a kho helouva thi mil den ahi’in, Remedy hospital, Pureiromba Khongnangkhong, Konung Mamang’a apolut uvin, atahsa dinmun a-ol tai.