Sept 11, 2016 Local news

Sept 11, 2016 Local news

596
0
SHARE

TKSU in damtheina sukha thei ding thil kijoh ho hal lha
7e4cb8e3-3e0c-4e46-9507-b6e0664f4447
Lien Gangte
Ccpur, Sept. 10 (ET): Thadou Kuki Student Union, GHQ le abahkai ho kitho in 10th Sept., 2016 nikho chun Tuibong bazar le akimvel a um dawr le dukan ho vilna anei uvin, mihing damthei na sukha thei ding ahun beisa (expired) Nehthei jat chom chom, Diaper, Cosmetic products le adang dang aman uvin ahi. Ahunbei sa thil chom chom mat’a um ho asum’a dangka 40,000/- val man ding ahi dan TKSU akon thulhut akimu’n, chuleh ahun beisa (expired) Nehthei jat chom chom, Diaper, Cosmetic products le adang kiman ho TKSU GHQ Office, KIC Complex, Tuibong ah PRESS ho mai’ah hallhah in aum in ahi.
  TKSU GHQ akon thuphon chun asei na’ah, Tuibong bazar le akimvel’a dawr/dukan le Hotel bol hon mihing damthei na sukha thei ding thil le nehthei joh lou ding le, ajoh tei tei aum’a akimat doh le dawr/dukan le hotel kikha peh’a, trade lisence ki kah (cancel) peh ding ahi ati. Chuleh, koi hijong le thil ahunbeisa joh ahe aumle TKSU GHQ a report bol thei jing ahi. TKSU GHQ kithujah pi nom ho’n # 9612082563, 8974614721 a kithujah pi jing thei ahi.

KSO-GHQ Gen.Secy. in Sahnit kiman dan hilchetna nei; September nisim 13 le kijotna um ding ahi tia sei

Imphal, Sept. 10(ET): Ahunglhung ding September nisim 13 ni leh muntin’a cheng Kukit chate jousen Kuki Inpi Manipur le KSO General Headquarter vetkolna noiya SAHNIT NI (Black Day) nit cheh ding ahi tin KSO-GHQ, General Secretary, Seiboi a kon kimu thulhut khat in aseiye. Kin-gon kiman na ding gamkai ho leh akiman na ding munho chu -(i) Imphal district -Khongsai veng (ii) Churachandpur – (a) Peace Ground, Tuibuong (b) Sangaikot (c) Singhat (iii) Sadar Hills- (a) Kangpokpi (b) Saikul (c) Kangchup (d) Sinam Khaithong (iv) Chandel- (a) Tengnoupal (b) Moreh (v) Tamenglong district – (a) Phaitol/Jiribam (vi) Ukhrul – Tuisomjang ahiu’ve.
  Hiche nikho le hin NSCN-IM in kuki milham 905 ana thana thilsoh le kho 360 ana hal lhahna chungthu Central government in seilhah louva akoi, lungkimlou vetsahna a Kukite chate jouse’n kijotna kinei ding ahi.
  Leiset chung’a Democracy lenpen leh Justice system khouna pen gamkhat in Kukite genocide chungthu tunigeiya asuhlhap joulou hi lungdon umtah thilkhat ahi. Kukite hin aphat dungjuiya Prime Minister hintuh ho heng’a NSCN-IM chonvalna chungthu analhut jing ahi. Ahinlah tunigei’in Prime Minister khat’in jong kukite kana awgin hi ajah loudan in akilang’in ahi. Chuleh Kukite taona awchang ngailhah’a NSCN-IM gotna pehtah sang a,Centre in NSCN-IM toh framework agreement ahinsem doh hi Kukite dinga lungsoudohna theitah thilkhat ahikit’e.
  SAHNIT NI kimanlona jeh pipen: SAHNIT NI kiti hi Kukite chon nadol a athise ho lunghempina dinga ana kibolji ahi. SAHNIT NI hi muntina cheng Kukite’n chamna le lungmonga aumthei nadiu leh justice amu thei nadiuva, taona nikho a ahin man jingu ahi. Khanglui ho tahsan dungjuiya thina hi jatni um ahi. Akhatna chu- Thipha (natna jeh ahilou le kumtam jeh a thi) ahi’n anina chu Thise (tosetna jeh a thi ahilou le mi le sahang in atha) ahi. Kukite chonna dol’a thipha a thiho hi Leitol a kivui jiuva, athipa/athinu kivui nikhat jouleh mipin athipa/athinu opna a abolji’u ahi. Hiche hi kukite pao in “Selnit” akiti in ahi. Thise a thiho hi khopam lang a kivuiji’u ahi. Chuleh a thise ho kivuidoh jou nikho khat jouleh mipin a op jiu ahi. Hiche hi ‘Sahnit’ akiti in ahi. Sahnit leh Selnit hi athinu/athipa jana vetsahna leh a’insungmite lhamon nadia kibolji ahi. Sahnit hi athipa/athinu chungthu seichet ahikahsea chelha jinga, kho haosa in achungthu aseichet jouteng Sahnit kichai ji ahi. 1992 October nisim 22 nichun United Naga Council (UNC) in Kuki kho phabep Quit Notice anapeuvin , hitolhon chun NSCN-IM in Kukite thagamna ding (Kuki Genocide) tohguon anapan’un ahi. Hiche jouva pat NSCN-IM khut a muolliem Kuki chate 905 ana lhing’in, Kho 360 ana sugam uvin chuleh mihem 100,000 vel ana galjam uvin ahi. NSCN-IM khut a kuki chate atam thinapen nikho chu September nisim 13, 1993 chu ahi. Hiche nikho a hi agom’a 104 ( Aimol, Tamei a pasal 87, Gelnal a pasal 17) anathi ahi. Chuleh kumseh, September nisim 13 SAHNIT NI tia kimang hi hiche nikho geldoh jing nading leh athiho chungthu thudih a akitan nadinga hung kimang jing ahi tin KSO-GHQ, General Secretary Seiboi Haokip in aseiyin ahi.

Gilgal Peace Camp’a nute’n an-ngol taona anei’u nikho 100 lhing ta
KNFs
B.Lalboi Gangte
CCpur. Sept. 10 (ET): Kuki National Organisation (KNO) Arms wing, Kuki National Front (S) Organisation sung’a Nuten 17 May 2008 nikho a kipat tuni chan’a “Chenlang susa khopi sung’a cheng Judate chu atam lhom in gakou khom soh keiyin, chuteng leh keima thalheng in Ann nelou, tui donlouvin um jing uvin” Esther 4:16, kiti thupi’a nei’a Nampi ding leh Namsung’a Namsepai ho lungtup guilhun thei nadia lhaseh’a 2nd Saturday nikho Ann ngol taona nikho’a aman u nikho 100 alhinna tuni jinglam nidan 10:00 in Kuki Army 6th Battalion Gilgal Peace Camp mun’a Songphu hondoh naleh kikhop khom na anei’unahi.
  Hiche kin’a Rev Retd. Hemngam, Founder Jacob Taona Mol in Nute Anngol taokhom na nikho 100 lhinna Anniversary song kido hondoh na aneijin, Pathen heng’a lhandoh najong aneithan ahi, song hondoh ahitokilhon’a Dahpi 100 vei achum’un ahi, hiche ahin KNF (S) Organisation sung’a luboh jouse, Pastor hole Hou lamkai, lhang sung’a Haosa hole Nute lamkai hon pan agalauve. Chuleh Hall sunga kiman chah nakin’a Mr. Vikram @ VK in liemna thusei na aneijin, chujouvin ahung kikhom mipi jousen Pathen ang’a kilhan theng na taokhom na aum in ahi. Chuleh Nute hon Kum 8 leh Lha 4 sung’a Anngol taona aneilo nau ajeh ahungkhom mipi hetdingin phondohna Ms. Hoinu in aneiyin ahi. Samuel Haokip inn-neipi Ms. Baby Haokip in Organisation nute hon jong pasal ho ading’a ipi itoh thei u ibol thei u ham bol ute atito kilhon’a 17 May 2008 nikhon Numei hon itoh thei uleh ibol thei sun’u Nampi kito nading leh damthei nading, Nampi in tup le doi anei uva, Kuki State Demand aneiyu chunga Centre Govt. toh kihou lhah na anei nadiuvin lhakhat sung’a 2nd Saturday nikho hi Nute hon Anngol taonan nei ute tia kilungtoh tah’a Nute in 2008 akon’a tunichan’a go le dai noi hijong leh thase louva kahin chepiu khat ahi ati, chuleh Nute ho Anngol taona kinei nikho leh Pate hon jong atamjo in Taona kiman namun Jacob Taona Muol’a eihung thah jing uvin, chuleh Gilgal Peace Camp kisah jou pat’in Gilgal Camp mun’a Kuki Army ho jaonan Nute hon kin kana mangkhom jiuvin ahi ati, chuleh Baby Haokip in ahoulim na, hiche taona kichepi na a hin, Tuila Area sung’a Nute hotoh jong akimang khom jingin ama chung’a Org a nuten kipa thu kaphon doh nao ban’a kipa thilpeh in Belpi 1 Nute in amaho manchah dingin apen ahi, chuleh Gilgal Peace Camp mun’a Nute kin neiseh’a kithopina pejing Camp CO Mr. Romeo heng’a Camp’a amanchah diuvin jong Belpi khat apen, chuleh Tuila Area Taokhom ho leh Camp kisahna gamneipa Lhanjang Haosa pa jong kipa thilpeh in Belpi khatcheh apen chuban’a Lhanjang Church Choir hojong Belpi khat apen ahi, chuleh tunikho’a kiman chahna a Kinthem pu leh Speaker le kin kiman chah nading’a Nute kithopina peh ho, Saipikhup khat cheh kipa thilpeh’in asilpeh uvin ahi.
  Chuleh Mr. T. Samuel Haokip C-in-C & Home Secretary KNO in ahoulim na, Nute mitlhi long’a anngol ah taona aman uhin Namsung’a kikhel na tamtah ahin polut in ahi, hiche taona ahin patlai uhin Kuki Thingnoi group 20 val achang cheh’a ding’a kalsong ngen ana kihin, Nute hon Nampi kilungkhat nadi, Govt. in Kuki Thingnoi ho Demand u Kuki State adia kihoupi uhen ti’a milhi long’a anngol ah akanao aw chu pathen in aja in thingnoi kiloikhom thei ho KNO & UPF ah ieki gom khom thei uhi Nute taona jeh ahi, chuleh hitobang milhi pum’a taona hohi Nampin aga lentah tuni nikhon akimun, Thingnoi Party tamtah hojong group 2 bou in akikhai khom tan, Centre Govt. toh jong KNO & UPF in Kuki State ading in Political Dialogue ei neipiu tao vin, maban’a Political Dialogue 2vei chan nadi jong kinthei lam’a kineiding ahi ati, Chuleh Centre NSCN-IM in Farm work abol vin mipi jouse in Naga ten alungtup u amudiu eitai akitin Naga ten dandih lou dankal’a natoh anei hou jeh’a Centre Govt. toh Farme work abol ujong asung homkiu iemacha umlou ahi, Naga te Demand Govt. in alolhinsah leh Kuki te Demand Kuki State jong achamlou’a lolhing di ahi ati. Chuleh aseibe na, KNO in Haosa Chief Right ienei hou kipan sa ah Nampi Politics kungkitol ah gamtum Kuki State kidel ahin lhangsung lamkai, Haosa upa hon kei hi hiche kin’a jao katin pao leng akilom dem ti iekigel doh diu, Gam leh Nam natong hon camp asahdoh uva, ajite hou vin milhi long leh anngol ah taona Nampi ding gelna anei uva nikho 100 lhinna aman thei uhi Hou lamkai, gamsung lamkai haosa upa ho kipah ding hilou ham tuni nikhon kinep pe umtah tah melmulou’a umhi vangset umtah leh nampi ading’a kipana hilou ahi, chuleh Nampi in kima nojing chu Kuki State ahin Nam ading a pasal hangsan poimo ahin politics ajong pasal ngai ahi nah Nampi ading ahileh lhasung lamkai leh haosa upa hotoh Nam sepai lamkai hotoh kihou mat jing’a natoh neiding ahin, mimal phatchom nading’a Politics bol hochu alosam ahiu vin Nam ading’a politics kibol ahin MLA Election ah kihoutoh na umlou’a suhchop touchup ho koiman bol daovin ati.
  Chuleh hiche kin kiman na, Pathen thu’a tilkhouna Rev. Sehkhohen Area Pastor Tuila in aneijin ahi, chuleh Kuki Students Org, Kuki Khanglai Lawmpi, Haokip Students Org, Kuki Women Human Right Org, Zomi Students Federation, honjong ahung oup vin ahi. Chuleh Gilgal Peace Camp 6th Battalion Kuki Army ah Nute hon ahungkhom mipi hotoh kipana akon kin kichaijin asohkhom vin ahi.

State sorkar in Dangka 630 lakh lhing UCs apehlou leh BADP fund kituhtang maithei

Imphal, Sept. 9: Union Home Affairs Ministry in Border Area Development Programme (BADP) fund second instalment hi atuhden ding ginmo ahi, ajeh chu India sorkar heng’a utilization certificates (UCs) kipelut loulai ahi.
  Manipur sorkar in 2014-15 kum’a dangka 412.81 lakh chule 2015-16 kum sung’a dangka 2200 lakh lhing utilization Certificate apehlut loulai ahi, tin Home Affairs Ministry in aseiye. Union Home Ministry thulhut dungjuiya Border Area Development Programme (BADP) noiya fund hi UCs toh kisai ahi’in, state heng’a kipe fund jouse UCs pehlut ding ahi’in, chule Physical leh Financial thu’a Quarterly Progress Reports jong pehlut ding ahi, ati.
  MHA in 2014-15 kum’a hi first instalment ‘a dangka 18.37 crore apeh ahitan, hiche’a hi akum masa’a UCs shortfall kikah ahi. BADP guideline dungjuiya second instalment hi October lha jouleh state sorar heng’a kipe ding ahi’in, ahivang’a sorkar in 50% (sum kipe masa ho) chunglang UCs apeh masat ngai ahi. State sorkar in 2015-16 kum’a UCs apehlut ding’a MHA in thuhilna anei aneiya chule 2015-16 kum’a sum kipedoh 50% leh September 2016 kum chan quarterly report apeh masat ding’a thuhilna anei ahitai.

2013 Constable candidate hon an-ngol kiphinna pan ta

Imphal, Sept. 10 (ET): All Manipur Police Constable (Male) recruitment chaiya candidate, 2013 batch member 5 in Saturday nikhon Keishampat Leimajam Leikai Community Hall’a thi chan geiya an-ngol kiphinna apan tauvin ahi. Result kiphon ding leh recruitment test kivoh hai na thuso alahdoh nading uva candidate hon kiphinna aneiyu ahi.
  Candidate 5 hohi- Leimakhong Mapal, Imphal East ‘a cheng M Ajoy (28), Thinungei, Bishnupur district ‘a cheng S Renenankanta Singh (26), Sekta, Imphal East district ‘a cheng Y Pratap (26), Leimakhong Mapal, Imphal East ‘a cheng Ng Anand Singh (21) chule Yorbung, Imphal East ‘a cheng S Sunil Meitei (26) ahiuve.

ILPS kiphinna’a police ho toh kinotona’a simlai phabep kitongkha
d
Imphal, Sept. 10 (ET): Kwakeithel junction’a simlai ‘rally’ bol ho leh police ho kinotona’a police hon tear gas phabep amang uvin, kinotona’a simlai 4 athimil in chule phabep jong akitongkha uvin ahi.
  Comet Higher Secondary School, MEM Higher Secondary School leh Imphal College ‘a kon simlai tamtah Saturday sun nidan khat don’a JCILPS Students Wing lamkaina noiya Imphal College ‘a kikhom ahi, tin thulhut in aseiye. Simlai hohi CM Bungalow jon’a ache nauva Manipur Police team hon alamtin-u ahi. Simlai holeh police ho sangtah in akinoto uvin, kiphinna hi mijouse ding ahijeh’a police honjong tosot uhen, tin kiphinna bol hon awging in asam uvin ahi.
  Inner Line Permit system chepi nading’in thumna awging in anei uvin, police hon kiphinna bol ho suhthip nading’a mol chule tear gas amang-u ahi. Tear gas shell khat Oinam Anand Singh dukan (hard ware store)’a achu in ahi. Police ho achonval’e, tijeh in Kwakeithel ‘a thil joh numei hon dukan mun adalha uva simlai ho atosot-u ahi. Numei 4 panna’a simlai 6 tear gas shell in akhah jeh in akitongkha’e, tin thulhut in aseiyin, abon uva RIMS hospital’a apolut tauve.

Erabot in BJP ajop ding thu seithei hiloulai

Imphal, Sept. 10 (ET): Congress Party’a kon haina nei ding’a thuphon neiya Y Erabot atoson hon BJP ajop ding adeisah vang’a veteran Congress lamkai pa hin BJP ‘a chan anei leh aneilou ding hetchen ahihih laiye. BJP toson holeh Wangkhei AC ‘a candidate masa hon lamkai pa’n party ajop ding adoudal diu ginmo ahi.
Thulhut dungjuiya BJP worker holeh Wangkhei Assembly constituency ‘a candidate hinom hon Y Erabot in party ajop ding sangtah ‘a adoudal-u ahi. State BJP president Ksh Bhavananda in Congress lamkai pa akimupi ding hi aphal louvu ahi, tin thulhut injong aseiye. Y Erabot hi kum 77 lhing ahitan, BJP convention dungjuiya kum 75 chunglang hohi ministerial post kipelou ahi.

Y Erabot in INC dalhah ding’a phondohna neita

Imphal, Sept. 10 (ET): Wangkhei constituency ‘a Manipur Legislative Assembly election’a 6 vei kaidoh’a Yumkhaibam Erabot in ahunglhung ding nikho ni-leh-thum sung’a MPCC heng’a haina lekha kapeh lut ding ahitai, tin thuphon aneiyin ahi.
  Erabot inmun’a Friday nikho’a atoson hotoh toukhomna anei nauva kilungtoh tah’a kilol lhahna aneiyu ahi, tin thulhut in aseiye. Y Erabot toson’a mi tamtah in Saturday nikhon Wangkhei Assembly constituency ‘a ‘mass rally’ abol uvin, MLA pa inmun Ayang Palli lamlen’a kon jingkah nidan 10 ‘a kijotna apat-u ahi. Erabot in Congress adalhah jouteng BJP ajop ding hi atoson hon adeisah ahi.
  Yumkhaibam Erabot in a-inmun’a thuso miho akimupi’a chun atoson ho kilolna kajui ding ahi, tin aseiyin, ahin, BJP ajop ding thu aseipoi. Kum 77 ‘a upa Wangkhei AC MLA Y Erabot in thuso miho heng’a nikho ni-leh-thum sung’a Congress ‘a kon kahai ding ahitai, tin aseiyin chule japi in adeilhen party kajop ding ahi, ati.
“Tuchung’a hi japi in eilamkai ding, ken anung kajui ding ahi”, tin jong aseibe in ahi. Chule Wangkhei AC miho hi politics’a pa-cha ni in asuhboi ahi, ati. Erabot in Chief Minister Okram Ibobi Singh leh asopi cha Henry aseina ahi’in, Henry hin election masa jong atet ahi. Election masa’a Erabot in Henry election’a ajo jou nung’a jong CM Ibobi in Congress MLA akilhengdoh aum vang’a Henry hi thaneina phabep apeh ahi.
  Wangkhei constituency ‘a khantou machalna natoh atamjo hi local MLA pa dohna umlouva natoh hohi Okram Henry leh a-insung miho kipe’a ahi. Atoson mikhat in PWD, PHED, IFCD, PDA leh MAHUD ‘a RTI apeh ahitan, Wangkhei, Sagolband, Khangabok leh Thoubal ‘a developmental works ho sanction kibol thu kholtoh nading ahi. Ahivang’a mopohna nei department hon lhakhat aval nung’a jong donbutna apeh loulai ahi.

CM in ‘Half run marathon’ hondohna nei
IMG_20160910_105827

Imphal, Sept. 10 (ET):Chief Minister Shri Okram Ibobi Singh in Kangla Fort mun’a ‘Run Raise Respond North East’ kiti charity half marathon hondohna aneiyin, kin-gon hi gamkaiya ‘entrepreneur’ ho machalna ding ahi.
Sorkar seh seh inbou tohmun apeh thei ahipoi, tin Chief Minister in houlimna aneiyin ahi. Hitobang tohpha um hi ibon uvin toson uhitin kipunkhom uhite, tin CM in ngehna aneiye. Chule gamsung’a bandh leh blockade aumjing alungkhampi na thu jong aseiyin, hiche hin khantou machalna tohgon sangtah’a atohkhah ahi, ati. Hiche jeh’a gamdang’a um entrepreneur ho gamsung’a hung nomlouvu ahi, ati. Eiho gamsung seh hilouleh vannoi pumpi’a entrepreneurship hin tohmun mi tamtah apeh ahi, tinjong aseiye.
  Nigel Eastwood, technology investor leh international entrepreneur, UK in jong kin-gon ‘a houlimna aneiyin ahi. Hitobang kin-gon hin gong doh’a Nigel in North East India hi India machalna ding’a akhan tou ding ngaicha ahi, tin aseiye. Chule tohgon hi local entrepreneur ho tosot nading ahi, tinjong aseiye.
  Commerce and Industries Minister Govindas Konthoujam leh MP Rajya Sabha leh Olympic bronze medallist MC Mary Kom jong kin-gon’a apanglhon’e.
  Hetthei khat chu, Saturday nikho’a kibol kin-gon’a keng—lam jot ding, alhai ding chule cyclist leh biker 400 vel in pan ala uvin, Half marathon kiti 21.1 km lhing Run hi 2nd World War Memorial, Maibam Lotpa Ching ‘a kon kipan’a Nambol Bora chan ahi. Kin-gon hi MNet kiti North East India’a telecom company lamkai khat toh kigong khom ahi’in, Guwahati, Shillong leh Kohima khopi’a jong chelha ahitai.

Haolai Insung/Unau Ngailut Ankong – 2016 kin gon um

Lien Gangte
CCpur, Sept. 10: Unau Ngailut Ankong – 2016 (Haolai, Lengen, Thahgen) kin gon 10th Sept., 2016 jinglam nidan 10:30 apat chun Haolai Khopi’ah aum in ahi.
  Hiche kingon toh kilhon in, phatpat taona Rev. K Siama Haolai, Saikot in aneiyin, kin chungchang’a houlimna Alun Haolai, President, Haolai Phungpi in aneiyin; Phung upa’ho houlimna, HK Lama Haolai insung, Pumzachin Haulai, New Lamka, Lamkhogin, Chief of Dumlian, Lengen Insung leh P Manga, Thahgen Insung ho’a kon houlim na aum in ahi. Tilkhou thusei na Kama, R.O. Henglep in aneiyin, Insung maicham semna Rev. Lalkhosiak, Neihsial Veng in abeiyin, Kipathu seina Lamkhawdal Haulai, Gangpimuol in aneiyin chuleh, phatchaina leh ankong taona Rev. Seilen Haolai in aneiyin ahi. Alun Haolai, President, Haolai Phungpi in aseina’ah, tuni kikhopna leh ngailutna ankong kigong hi thildang ahipo’n, “Unao Haolai, Lengen, Thahgen” hi Insung khat Sopi thisan khat akihi ti phondohna a kibol ahi. Tuni a hiche kingon hi khang thusim’a melchih jing ding, Insung kisemtupna’a neiding a tohgon ahi tin aseiyin ahi. “Unao Haolai, Lengen, Thahgen” hi Insung khat Sopi thisan khat akihi’n Pu le Pa khang in Ham le Pao kibah loujeh le mun chom chom a aki-um jeh in insung khat akihi ti ana kisei doh thei hih jong le tuni nikho a kipat in ‘Pien-gui dol’a sopi thisan khat akihi ti akipom in phondohna akineitai” ti’n thuphon 10th Sept., 2016 nikho chun Phung upa ho’n kikhut henna soi akai uvin, insung’a mibul ho cheng in anopnau aphondoh’u toh kilhon in Saba hopna jong aum in ahi. Kikhut henna soi koi ho, HK Lama Haolai insung, Pumzachin Haulai, New Lamka, Lamkhogin, Chief of Dumlian, Lengen Insung, P. Manga, Thahgen Insung le Alun Haolai, President, Haolai Inpi ho ahiuve.