Sahnit ni to kilhon’a mabandi joh geldi

Sahnit ni to kilhon’a mabandi joh geldi

328
0
SHARE

  13 September Sahnit nikho ana kimanpat akon kinielna hi ana umpeh in hinlah vangphat umtah in kum masalang’a banglom’in jasan javom hetdia kiniel baotamna ho aumpoi. Society khat sung’a chu mijouse lunggel kibangloudi mong ahijeh in lunggel kijatopeh chu aphapen hijeng ahi. Kumseh leh Sahnit nikkho kiman thua kinielna hi akimanlaisea umjingdidan ahitai. Manjing’a pha ahi tihojong adihna um, mantahlouva pha ahi tiho jong adihna um kitma ahi. Thingnoi kiloikhomna UKLF in sot’a pat hiche nikho man-man tahloudi tia anaseijing chu Naga hotoh akivop tahlou phaat a mandin hinsei taleh athusei khel lele tia demloi umkitdi ahi. UKLF in munjousea koimachan Black Day manda hen atijong ahidehlou jeh in chutitah-a boi jong ahidehpoi. Kumseh Christmas laileh Jesu pendan thusim kiseijing bang’a kumseh 13 September sehleh 1990s gal laiya kithana, Joupi a kitha thusim ho, India sorkar in mona neilou Kuki milham hijat jat kithat, inn le lou kihalpieh, akho agam’a kon kinomang ti thu avelvel’a seijing sang’a hiche thilsoh akon’a nampidi maban ipi gel’a tohdi ham tijoh phaat hitadi ahi. Gal le kitha thusim ho avel vel’a seisei sang’a ipi jeh-a hitobang gal inato uham, itileh hitobang gal hintokit louna dia khochen vengchen kigotna neiya pha ham ti joh haseiya pha ham ti hi Eimi Times geldan ahi. Hichena dia midang toh kigamgitna’a cheng ho kholen’a chenkhomdi ti athupipen khat ahi. Ahin thu ahungnop’a Job card sum ahung umdohleh gal masang’a sang’a kho neoneova cheng ngen hung hikit ahi. Kuki Inpi Manipur (KIM) dinmun ahileh India sorkar in NSCN-IM thingnoi hon Kuki milham anathanau thu aseichai tokah-a hiche Sahnit ni (Black day) mandi chuleh United Naga Council (UNC) in Kuki Custom dungjuiya hiche gal’a kithana thua chabel adop tokah uva kimang jingdi ahi tijong ahi. India sorkar in hiche thu aseidi ahileh sot’a anaseidi ahitai. UNC injong hiche thua kabolkhiel tai ati kal chu NSCN-IM to thakhat kahie ti Official tah-a phondohna hidi ahi. Kuki ho keu kithat ahipon Kuki honjong Naga ho tamtah anathat uve ti hi Naga langho panna khat ahi.

  Kuki Black Day kiman jeh in India govt leh NSCN-IM in Kukite chung’a kiphatlamna aneidoh lhondi hinam ti seithei ahilouvang’in kho kibulua khohelou ho khentum beiya kikap, kitha thu kiseilaisea India govt leh NSCN-IM dia ning kitel um khat vang hidi ahi. Tulang hin hiche nikho kimandan jong ahung kikhel jep-jep tan, nampi kiledoh leh kisemtup kitna dia Pathen kom’a taona nikhoa mangloi um ahi. Phulahna lungthim keng’a hiche nikho mandi tina aumpoi akiti vang’a khangthah chapang lungthim’a muchi pha lungthim umdohdi hinam tivang sei hahsa ahi. Ipi hileh khohelou sopi tamtah galmi ho hem le thal’a anathi ho geldohna nikho khat nei hi akilommo poi. Custom to kitoh-a Sahnit ni kiman jong dihmo ponte. Hiche gal laiya kithana ho politics bol pansatna’a akineileh adih in adihpoi tivang thuchuom ahitai. Ahin midang het dia choh jejua man sang’in ikho iveng ho ah thip chet’in kimangji leh govt leh midang te geldia husejo di ahi.