Sahnit ni nitdan hung kikhel jep (Bolthei kisei hobeh boldi)

Sahnit ni nitdan hung kikhel jep (Bolthei kisei hobeh boldi)

180
0
SHARE

Sahnit ni nitdan hung kikhel jep
(Bolthei kisei hobeh boldi)

Kum danga bang’in Kuki ten tukum Sahnit ni (Kuki black day) jong muntin’ah ana nit un ahin anikho kinitdan, kimandan vang ahung jatchom jepjep tai. Kum phabep masang’a chu hiche nikho kimandan hi athi ho lunghempina leh achesa thilsoh thusim hoa houlimna, lhiso pina leh govt chunga themmo channa thusei ho atamjo anahijing’e. Koima vetdana leh phulah di lungput neija hiche nikho kinit ahipon chamna dile thudih umtheina dia kibol ahi akitiji vanga mijouse thangtomna leh phulahdi lungputna khat jong umjeng ahidan jong koiman akam’a aseilou vanga alungthim’a agelsohkeiji ahi. Pule pi ten doi le thilha anahou lai uva mi khat dammona jeh ham, ajeh kihelouva thi ho chu “kon natha a ipi nalo ham?” tia ana kitom jiuva chempong’a kotpi ho anasat jiu ahi. Sahnit ni ana kiman jina hoa jong hiche pupa chondan thoa “kitomna” bol’a meipum kaploi jong ana umjie. 1992-97 gal jeh a sopi sangam ana thi ho chu melma kicheh tah a kihe hon anathau ahijeh in hiche kitomna custom ho akipohdoh teng thangtom le lunghang vetsahna bou ahi. Athi ho jana le geldohna a meithal kap (gun salute) jong akibol’e. Akithat ho thu seichaina aum kah a sahnit ni kimang jingdi ahi ti hi Kuki Inpi dinmun le chepi ahijeh in hitia hi chejing di tina ahitai. Hiche nikho kiman jing jeh in aphachom muthei umhih jongleh tolthat NSCN-IM holeh atoson ho dia kengkoh sung’a thihkil hem (sharp) khat nin abutpa nomtah a lam ajotsah theilou tobang hijing thou ahi. Mihem’in atohga alotei ahijeh a Naga nampi din Movement kabol’e tia khohelou milham tamtah anathat Naga thingnoi hojong tua Naga Peace Talk thua Nagaland Naga ho phatchomna di bouva soi kikai tona hung umdi ahi kitipan hi adihlou behseh a tolthat hon aga akilona diu pathen’in aguon hung himaithei ahi.

Ahin ima jousea pathen chunga kipum ngai jong hithelou, eima kihabol jeh a sochatna leh lolhinna hojong um ahi. Naga Peace Talk hung kisuhmo di jeh tahtah a itobang boina le gal hung umdoh thei kit ham ti hi gellou thei ahipoi. Tuchung Sahnit ni jatchom jepma kinitna holah a gahsei thei khat chu Delhi a KSO le Kuki Inpi hon anikho moh nit hilouva maban’a di lampi vetna “ looking for a way forward” ti thupi jong ajaosah uva lekhathem hon thuseina anei uva muntin’a midang hon jong avet theina diuva program pumpi jong Webcasting abol u chu ahi. Maban ding seina hoa hi ahilou ding behseh (unrealistic, utopian) thu ho sei sanga nam miten maban’a kivenjouna dileh gam huhna dia atah a boldoh thei thu kisei hohi thupijo ahi. Delhi Sahnit program a thupi seiho hiche atah a bolthei (practical) lang ahasei jeh un kipapi aum lheh uve. Asei u athupidom ho chu – tua itouphau gam le kho hobeh huhtupna dia gamgi langa ho dettah a chendi, kho mipi jouse dettah a chenna dia ‘democracy’ to kitoh a haosa kivaipohna semphat di, aneijou hon Town/city hoa chendi bou gel sanga thinglhang kho a jong chendi, nam thua kihou lhihna le kihoutohna um ngai ti ho ahi. Ipi thu hileh asei hi bai, atohdoh hah ahinai, ahin akisei holah a maban’a dia ipiham khat beh tohdohna a sahnit ni akimanlouleh  chomkhat jouleh kumseh a angaija kibol (ritual) khat bep hung hidi ahi.