Sahnit ni hikit ta (Black day thua kinelna jong kichim thim...

Sahnit ni hikit ta (Black day thua kinelna jong kichim thim hitaleh kilom)

272
0
SHARE

Sahnit ni hikit ta

(Black day thua kinelna jong kichim thim hitaleh kilom)

                                  Kigingman louva Manipur, Nagaland leh Assam a cheng Kuki ten gal boina khohtah anatuo uva hinkho tamtah leh gam le go lentah jong anachanlonau kum le lha ho 1992 a pat ihinsimleh khatveini dung velcha toh abah vang’a kum 26 lang ana hitai. Ahin Kukiten Naga thingnoi ho khutna thina leh suhgimna Late 1950s langpeh a Naga thingnoi Movement anakipat til laija pat anato ahitai. Mizo Movement hung hatlaija chomkhat anathip chu 1986 kum’a Mizo Movement hung kichaija ‘nam sepai’ kiti ina umlou phat uva pat athah beh a gentheina khat hung kipankit anahi. 1987 kum’a pat haosa bolthei dom ho tha hung kipan kitjeng anahi. 1992 kum’a pat chu akho alhang’a kibuluna leh alomchang thim’a kithana ihintopan u ahi. 1992 leh 1997 kikah a mi 900 val lin hinkho inachan uva gam jong lenpitah ina chan u ahi. Kho 350 lang kisumang kiti vang hi kho neocha cha’a chengte ihi jeh un kho hijaja akisumang’e tia hasei jingdi jong jachat um khat ahi. Ahin Sahnit kiti hi gam le kho kisuhmang thu hiloulai, mona neilou milham akithat ho lunghem pina leh puldouna bou hinalai ahi. Government khat kiti kivaipohna noija kho helou mihem hija kithana kiti hi chi le nam’a gal kibol tona ahi kiti jongleh tulai tobang government kivaipohna khat noija soh dia datmo umtah hijing ahi. Kuki Inpi Manipur in hitobang thil dihlou chung’a thudih um tokah a Sahnit ni hi manjingdi ati ahi. Thivuina kin chaina khat leh kithana thu seichai ahitokah a hiche nikho nit jingdi ti thua achesa kum phabep sung’a nam sung’a kinelna ana umjing chu tulang’a hi kinel jong ichim thim u hitam, oleh nitjing di mong ahi tia nopna khat umjeh ham, ahilouleh koiman athu agelkhoh behseh tahlou jeh ham ho hidi ahi.

            1992 a kon gal khoh tah inatuo jeh uva kin le bong’a kivenna dia nam sepai group jatjat jong ana chopdohbe’a kithuhna ana um’a pat ol ol’a gal hung thipdoh ti thei ahi. Galmi te khutna thina inato jeh uva ‘nam sepai’ kiti tamtah hung doh u chu gal hung thipto lhon’a inam sung mama’a kitha thona hung kipan kit ahi. Khatveini bepma jong thingnoi ho kikah a kitha tona chejom nalai ahi. Sahnit ni init uhi midang thingnoi hon itha jeh uva hitobang sahnit ni init u ahin eihole eiho kikah a tantih neilouva kitha tona umjing hi ipi jeh hitam ti ngaito khamset ahi. Hinkho ikihuhdoh masat louleh chenna gam kihuhdoh theilou ahi. Hinkho le kho le veng, gam le go kihuhna dia ipi ngaija itobang bol’a iti inchen khochen semdi ham ti jong Sahnit ni sehleh hilai mun’a kiseijingsa khat ahin jui hinam hilouham ti chu mipin ahet ahi. Kholhing, kholen a chen hi gal le tol umteng ihinkho keu hilouva igam ikho kihuh jouna ahi ti hi lekha helou honjong ahet ahi. Kholen ho kikhen tel cheh cheh a kho neoneo umbebe nalai hi ipi jeh ham ti jong koima ahelou aumtapoi. Gal manchah nei jeh bouva koima galmi a kon kiveng joulou, kholen a  mi tamtah achenkhom teng kivenna acham’a um thei ahi.  Leiset kichai kah a gal kitohkit taponte tina di umlouhel ahi. Ponvom tahdoh a lunghem thu seina bouva tuni nikho hi iman uleh ha phatchom loudi, ahia maban’a kivenna iti aumtheidem ti gelna le natoh thona’a initleh ha phatchom di ahi. Tunin itihlai hileh gam le nam huhna’a hinkho anachan jouse igeldoh un jana ipekit uve.