Sadar Hills’a themjilna khohshna umpan! (Aug 29, 2016)

Sadar Hills’a themjilna khohshna umpan! (Aug 29, 2016)

212
0
SHARE

Sadar Hills Private Schools Association (SHIPS) hon bandh hoa school huopsahlou dia adeidan asei u chu private school ho bou hilouva govt school jouse jong hileh phachehdi ahi. Themjilna akitileh school keu hilouva college hojong hinalaidi ahi. Phaigam’a bandh le bandh kimat chet jeh-a school le college kai hon class duhdah-a alahlounao hi tamjo ahi. Ahin phaigam’a school kai tamjo hi private school phatah tah-a kaiho jengin jong private tuition ahalah cheh u ahijeh in bandh tam jongleh lekha lang’a lunglutna hanei jep ho chu themjilna lam’a lhasam dehlou u ahi. A inn’a anu thu apa thu nunglou hojong school a-oja ho thununna khat aneitei ahijeh in school thupi/poimodan seilouva hetsa ahijeh in school ho ahitheichan’a suhboiloudi tivang hi society khonung semphatnadi bulpi khat ahi. Thinglhang’a private school hoa kai chapang tamjo hi private tuition malah school fee jengjong phatah-a pejoulou tam ahijeh in school a class beh hi phatah-a akai uva suhboi ahiloudi hi aphapen hidivang ahi. Ahin bandh akititeng leh gari lhailou ahijeh in school ho kihong jongleh kho khat a kon munchuom’a school kai, ahilouleh a-inn’a kon school gamla jep ho chu keng’a che diu tina ahijeh in ahahsatna um thou thou di ahi. Residence school (chapang jouse Hostel a um) umlou ahijeh in mi themkhat boarding ah umjongleh a-inn’a kon school kai (day scholar) tamjo ahi. Bandh jeh-a Line Bus alhaidaleh school kihong jongleh mi phabep chun Auto rickshaw ham akilahdi tina ahikit jeh in school chapang loikhat dia sum leu bena hidi ahi. Ipi hileh vangphat umtah in thinglhang’a school hohi phaigam’a school bangkhat hoa chapang ho kiphinna hoa kijaosah bangin akijaosah poi. SHIPSA hi private school ho kiloikhomna ahijeh in govt school hodi aseithalou tobang hijongleh bandh hoa school bandh loudi akitileh govt school hojong bandh daleh phachehdi ahi.

Hiche kahlah hin Presidency College Motbung Students’ Union (PCMSU) hon student class phate jaolou ho exam kibolsahloudi ahi tia thuphon ahinbol’e. Student hon themjilna akhohsahleh koima seilouva class adeltho diu ahi. Ahin ‘Attendance’ lampang hi College Authority mopohna joh hidi ahi. Class a Roll call register a “present” himanna koiman lekha hetbena aneidehlou, oja/teacher hon jong thou suhlhahna’a class lah bouva student hon ima ahetbe dehlou ahi. School, hihen college hileh exam ho dihtah-a akiboldileh class phatah-a akilah masat ngai ahi. Sadar Hills a themjilna dinmun kisuhlouna hi sotna pat ahitah jeh in ni khat ni ni’a khelvut thei hipontin ahia ol ol’a hin suhdih theimo vang ahipoi. Chuleh bandh nin class asuhboina sang’a themjilna leh themvetna (exam) lang adihtheilouna hi ipijeh ham abul kisuhtup tokah a themjilna lang’a kikhelna leh machalna umloludi ahi.